नेपियतव : पश्चिम म्यानमारच्या राखीन राज्यात झालेल्या हवाई हल्ल्यात किमान १९ हायस्कूलचे विद्यार्थी ठार झाले आणि २२ जण जखमी झाले. वृत्तसंस्था एएफपीने हे वृत्त वांशिक सशस्त्र गट अराकान आर्मी (एए) च्या हवाल्याने दिले आहे. (Air strike on schools)
शुक्रवारी मध्यरात्रीच्या सुमारास क्युकटाव टाउनशिपमध्ये ही घटना घडली. तेथे एए आणि म्यानमार सैन्यात तीव्र संघर्षात सुरू आहे.
एएच्या निवेदनानुसार, हवाई हल्ल्यात दोन खासगी हायस्कूलवर हल्ला झाला. यामध्ये १५ ते २१ वयोगटातील विद्यार्थी मृत्युमुखी पडले. या गटाने या हल्ल्यासाठी देशातील सत्ताधारी लष्करी जंटाला जबाबदार धरले. (Air strike on schools)
‘‘निष्पाप विद्यार्थ्यांच्या मृत्यूबद्दल आम्हाला पीडितांच्या कुटुंबांइतकेच दुःख झाले आहे,’’ असे एएने आपल्या निवेदनात म्हटले आहे.
लष्करी जंटाने या घटनेवर कोणतीही प्रतिक्रिया दिली नसली तरी, स्थानिक ‘आउटलेट म्यानमार नाऊ’ने दिलेल्या वृत्तानुसार, एका जंटाच्या युद्धविमानाने विद्यार्थी झोपेत असताना शाळेवर पाचशे पौंड वजनाचे दोन बॉम्ब टाकले.
संयुक्त राष्ट्रांच्या बाल संघटना ‘युनिसेफ’ने या हल्ल्याचा निषेध केला आहे. त्याला ‘क्रूर हल्ला’ आणि या प्रदेशातील हिंसाचाराच्या वाढत्या प्रमाणाचा भाग म्हटले आहे. (Air strike on schools)
‘‘यासारख्या घटनांमुळे राखीन राज्यात वाढत्या विनाशकारी हिंसाचारात भर पडत आहे. त्याची झळ मुले आणि अनेक कुटुंबांना बसत आहे, ’’ असे युनिसेफने एका निवेदनात म्हटले आहे.
गेल्या वर्षभरात एएने राखीनमधील लष्करी कारवायांच्या मालिकेतील हा हवाई हल्ला आहे. एएने गेल्या वर्षभरात हा महत्त्वपूर्ण प्रदेश ताब्यात घेतला आहे. २०२१ मध्ये आंग सान सू की यांच्या निवडून आलेल्या सरकारला उलथवून टाकणाऱ्या लष्करी उठावापासून म्यानमारमध्ये राजकीय आणि सशस्त्र अशांतता आहे. त्यामुळे देशभरात सशस्त्र प्रतिकार सुरू झाला आहे. इंटरनेट आणि फोनच्या तुटपुंज्या उपलब्धतेमुळे प्रभावित क्षेत्राशी संपर्क मर्यादित आहे. देशभरातील संघर्षग्रस्त भागात नागरी लोकसंख्येवर हवाई आणि तोफखान्याच्या हल्ल्यांचा वापर केल्याचा आरोप लष्करावर वारंवार केला जात आहे.