कोल्हापूर : प्रतिनिधी : कोल्हापूर जिल्ह्यातून जाणाऱ्या राष्ट्रीय महामार्ग ४८ वर सहा पदरी एलिव्हेटेड कॉरिडॉरला मंजुरी मिळाली. केंद्रीय भूपृष्ठ वाहतूक, महामार्ग मंत्री नितीन गडकरी यांनी एलिव्हेटेड कॉरिडॉरची घोषणा केली. या प्रकल्पासाठी ३५७.९९ कोटींची निधी खर्च होणार आहे. महाराष्ट्राच्या प्रगतीला वेग देणाऱ्या या निर्णयाबद्दल पंतप्रधान नरेंद्र मोदी, केंद्रीय भूपृष्ठ वाहतूक तथा महामार्ग मंत्री नितीन गडकरी यांचे मुख्यमंत्री देवेंद्र फडणवीस यांनी आभार मानले आहेत. (Elevated Corridor Approved in Kagal)
कागल शहरात राष्ट्रीय महामार्ग-४८ वर दोन्ही बाजूस ३-लेन कॉंक्रीट सर्व्हिस रस्त्यासह ६-लेन एलिव्हेटेड कॉरिडॉरच्या बांधकामासाठी ३५७.९९ कोटी रुपयांच्या तरतुदीसह मंजुरी देण्यात आली आहे. राष्ट्रीय महामार्ग-४८ हा भारताच्या गोल्डन क्वाड्रिलॅटरल (जीक्यू) महामार्ग नेटवर्कमधील अत्यंत महत्त्वाचा मार्ग असून तो दिल्ली, मुंबई, पुणे, बेंगळुरू, चेन्नई या प्रमुख शहरांना जोडतो. कागल येथे फाईव्ह स्टार एमआयडीसी औद्योगिक क्षेत्र असल्यामुळे या भागात व्यापार व उद्योग झपाट्याने वाढत आहेत. त्यामुळे या महामार्गावर मोठ्या प्रमाणात मालवाहतूक होत असून प्रचंड वाहतूक कोंडी व प्रदूषणातही वाढ होत आहे. याचा परिणाम आपातकालीन सेवांवर देखील होत आहे. पण मंजूर करण्यात आलेल्या एलिव्हेटेड कॉरिडॉरमुळे लांब अंतराची जलद वाहतूक वेगळी होणार असून स्थानिक वाहतूक सुरळीत होण्यास मदत होईल. यामुळे प्रवासी व मालवाहतुकीसाठी गतीमान व सुरक्षित प्रवास शक्य होणार आहे. तसेच इंधन बचत होऊन प्रवासाचा वेळही कमी होईल. परिसरातील वाहतूक कोंडी कमी होण्यास मदत होणार आहे. (Elevated Corridor Approved in Kagal)
या महामार्गामुळे या भागातील उत्पादकता वाढेल, आर्थिक सुबत्ता वाढेल व आपतकालीन सेवा कार्यक्षमतेने पुरवता येतील. यामुळे देशांतर्गत वाहतूक सुरळीत होण्यास मदत होईल आणि मालवाहतुकीची कार्यक्षमता वाढेल. (Elevated Corridor Approved in Kagal)