नवी दिल्ली : उपराष्ट्रपतीपदाच्या निवडणुकीसाठी एनडीएचा उमेदवार निवडण्याचे सर्वाधिकार पंतप्रधान नरेंद्र मोदी आणि भाजपचे अध्यक्ष आणि केंद्रीय मंत्री जे.पी. नड्डा यांना देण्यात आले. (VP election)
एनडीतील घटक पक्षांच्या नेत्यांची बैठक बुधवारी (६ ऑगस्ट) झाली. या बैठकीत एकमताने हा ठराव मंजूर करण्यात आला.
बैठकीला उपस्थित असलेले संसदीय कामकाज मंत्री किरेन रिजिजू यांनी माध्यमांना याबाबतची माहिती दिली. मोदी आणि नड्डा यांनी उमेदवार निवडीचा दिलेला निर्णय सर्वांना मान्य असेल. (VP election)
‘‘पंतप्रधानांनी घेतलेला निर्णय आघाडीतील सर्व पक्षांना मान्य असेल,’’ असे रिजिजू म्हणाले. जनता दल (युनायटेड) नेते राजीव रंजन सिंह यांनी हा ठराव मांडला. तेलगू देसम पार्टी (टीडीपी) चे राम मोहन नायडू यांनी त्याला पाठिंबा दिला. एनडीएच्या सर्व पक्षांच्या नेत्यांनी त्याला पाठिंबा दिला.
बैठकीत उपस्थित असलेल्या सूत्रांनी सांगितले की उमेदवाराचे नाव १२ ऑगस्टच्या आसपास जाहीर केले जाईल. २१ ऑगस्ट ही उमेदवारी अर्ज दाखल करण्याची शेवटची तारीख असेल. (VP election)
बैठकीला उपस्थित असलेल्यांमध्ये गृहमंत्री अमित शहा, शिवसेनेचे श्रीकांत शिंदे, लोक जनशक्ती पार्टीचे चिराग पासवान, टीडीपीचे लवू कृष्ण देवरायलू आणि रिपब्लिकन पार्टी ऑफ इंडियाचे रामदास आठवले यांचा समावेश होता. शिवसेनेचे नेते आणि महाराष्ट्राचे उपमुख्यमंत्री एकनाथ शिंदे यांनी बुधवारी भाजपच्या उमेदवाराच्या निवडीला बिनशर्त पाठिंबा जाहीर केला होता.
जगदीप धनखड यांच्या कार्यकाळ पूर्ण होण्याआधीच पदाचा राजीनामा दिला आहे. त्यामुळे उपराष्ट्रपती पदाची निवडणूक होत आहे. धनखड यांनी त्यांच्या निर्णयामागे वैद्यकीय समस्यांचा उल्लेख केला असला तरी, त्यांच्या आणि सरकारमधील मतभेदांमुळे त्यांनी राजीनामा दिल्याच्या चर्चा हो आहेत. हे लक्षात घेऊन, सरकारमधील काही सूत्रांनी असे सूचित केले आहे की एनडीएचा नवीन उमेदवार भाजपमधीलच आणि मोदींच्या विश्वासातील असेल.
उपराष्ट्रपतीपदाच्या निवडणुकीसाठी निवडणूक मंडळात संसदेच्या दोन्ही सभागृहांचे सदस्य असतात. एनडीएकडे त्यांच्या उमेदवाराला निवडून आणण्यासाठी आवश्यक असलेल्या खासदारांच्या संख्येच्या बाबतीत आवश्यक संख्याबळ आहे.