पाटणा; वृत्तसंस्था : देशाच्या स्वातंत्र्यासाठी केवळ एका पक्षाचे किंवा एका कुटुंबाचे योगदान नाही, तर आदिवासी समाजातील अनेक महान वीरांनी बलिदान दिले आहे. आदिवासींच्या योगदानाला इतिहासात योग्य स्थान मिळाले नाही. आदिवासी वर्षानुवर्षे उपेक्षित होते. त्यांचे योगदान आणि त्याग पुसून टाकण्याचा प्रयत्न झाला, अशा शब्दांत पंतप्रधान नरेंद्र मोदी यांनी काँग्रेसवर टीका केली.
बिरसा मुंडा यांच्या दीडशेव्या जयंतीनिमित्त मोदी यांनी बिहारमधील जमुई येथे त्यांना आदरांजली वाहिली आणि त्यांच्या नावाने एक टपाल तिकीट जारी केले. ६००० कोटींहून अधिक किमतीचे प्रकल्पही भेट दिले. यासोबतच मोदी यांनी आदिवासी समाजाकडे दुर्लक्ष केल्याबद्दल आधीच्या सरकारांनाही जबाबदार धरले. ते म्हणाले, की मागील सरकारांच्या चुकीच्या धोरणामुळे आदिवासी समाज वर्षानुवर्षे उपेक्षित राहिला. देशाच्या विकासाच्या शर्यतीत आदिवासी समाज मागे पडला. इतिहासात सर्वात मागासलेल्या आदिवासी जमातींची काळजी घेण्यात आली नाही. बिरसा मुंडा जयंतीनिमित्त आपण आदिवासी गौरव दिन का साजरा करत आहोत, हे समजून घेणे आवश्यक आहे. ही घटना खूप मोठा अन्याय उघड करते. हे इतिहासातील एका मोठ्या चुकीकडे निर्देश करते.
आदिवासींच्या जीवनातील अडचणी कमी करण्यासाठी आमच्या सरकारने २४ हजार कोटी रुपयांची पंतप्रधान जनमान योजना सुरू केली. ही योजना देशातील सर्वात मागास जमातींच्या वस्त्यांचा विकास सुनिश्चित करत आहे. आदिवासी समाजाच्या उन्नतीसाठीही आजचा दिवस ओळखला जाईल, असे सांगून मोदी यांनी ‘ट्रायबल प्राईड पार्क’ तयार करण्याची घोषणा केली. आमच्या सरकारने सर्वात मागासलेल्या जमातींना हजारो कायमस्वरूपी घरे दिली आहेत. गेल्या वर्षी या दिवशी मी बिरसा मुंडा यांच्या उलिहाटू गावात होतो. आज मी त्या भूमीत आलो आहे, ज्याने हुतात्मा तिलका मांझी यांचे शौर्य पाहिले आहे. भगवान बिरसा मुंडा यांच्या १५० व्या जयंती उत्सव पुढील वर्षभर सुरू राहणार आहेत, असे ते म्हणाले.
आदिवासी समाजाने भारताची संस्कृती आणि स्वातंत्र्य जपण्यासाठी शेकडो वर्षे लढा दिला. आदिवासी समाजाने निसर्ग आणि प्राचीन वैद्यकीय व्यवस्था जिवंत ठेवल्या. आदिवासी समाज हा निसर्गाचे रक्षक असल्याचे सांगून त्यांच्या जीवनाचा आणि संघर्षाचा नेहमीच आदर केला पाहिजे असे मोदी म्हणाले. त्यांनी आदिवासी समाजातील एका जीवघेण्या आजाराचाही उल्लेख केला. ते म्हणाले की, सिकलसेल ॲनिमिया हा आजार आदिवासी समाजासमोर मोठे आव्हान आहे. याला तोंड देण्यासाठी आमच्या सरकारने राष्ट्रीय मोहीमही सुरू केली आहे. सुमारे ४.५ कोटी लोकांची तपासणी करण्यात आली आहे.C आदिवासी कुटुंबांना इतर आजारांची तपासणी करण्यासाठी दूर जावे लागू नये, यासाठी मोठ्या प्रमाणात आयुष्मान आरोग्य मंदिरे बांधली जात आहेत, अशी माहिती मोदी यांनी दिली.
आदिवासींसोबत सेल्फी
बिहारमधील जमुई येथील आदिवासी अभिमान दिन कार्यक्रमात मोदी यांनी आदिवासी समुदायाशी संबंधित विविध उत्पादने प्रदर्शित केलेल्या प्रदर्शनातही भाग घेतला. असाच एक स्टॉल होता धर्मदुराई जी आणि एझिलारसी जी यांचा. ते तामिळनाडूच्या अरियालूर जिल्ह्यातील रहिवासी आहेत. त्यांनी पंतप्रधानांना सेल्फी मागितला आणि पंतप्रधानांनी तो आनंदाने काढला.