कोल्हापूर : प्रतिनिधी
लोकसभेतील विरोधी पक्ष नेते खा. राहुल गांधी हे चार आणि पाच ऑक्टोबर रोजी कोल्हापूर दौऱ्यावर येत आहेत. त्यांच्या उपस्थितीत विविध कार्यक्रम होणार आहेत.
विधान परिषदेतील काँग्रेसचे गटनेते आमदार सतेज पाटील यांनी गांधी यांच्या दौऱ्यासंदर्भातील माहिती पत्रकार परिषदेत दिली. चार ऑक्टोबर रोजी दुपारी राहुल गांधी यांचे कोल्हापुरात आगमन होणार आहे. त्यानंतर सायंकाळी सहा वाजता कसबा बावडा येथील भगवा चौकात उभारण्यात आलेल्या छत्रपती शिवाजी महाराजांच्या भव्य पुतळ्याचे अनावरण त्यांच्या हस्ते होणार आहे. शिल्पकार सतीश घारगे यांनी हा पुतळा तयार केला आहे. पाच ऑक्टोबर रोजी सकाळी दहाच्या सुमारास राहुल गांधी नर्सरी बागेतील राजर्षी शाहू समाधीस्थळ येथे भेट देणार आहेत. त्यानंतर ते संविधान सन्मान संमेलनाकडे रवाना होतील. राहुल गांधी यांच्या प्रमुख उपस्थितीत होणाऱ्या या संमेलनात राज्यभरातील एक हजारहून अधिक निमंत्रित सहभागी होणार आहेत. सर्व धर्मातील प्रतिनिधी आणि स्वयंसेवी संस्थांचे प्रतिनिधी तसेच काँग्रेसचे प्रभारी रमेश चेन्नीथला, प्रदेशाध्यक्ष नाना पटोले, माजी मुख्यमंत्री पृथ्वीराज चव्हाण, सुशीलकुमार शिंदे, विधिमंडळ पक्षनेते बाळासाहेब थोरात, विरोधी पक्षनेते विजय वडेट्टीवार यांच्यासह वरिष्ठ नेते उपस्थित राहणार आहेत.
या पत्रकार परिषदेला खासदार शाहू महाराज, आमदार राजू आवळे, आमदार जयश्री जाधव, आमदार जयंत आसगावकर, जिल्हा परिषदेचे माजी अध्यक्ष राहुल पाटील, ‘गोकुळ’चे संचालक चेतन नरके, करणसिंह गायकवाड आदी उपस्थित होते.
२००० कलाकार सादर करणार छत्रपती शिवाजी महाराजांवरील नाटक
५ ऑक्टोबरला सायंकाळी कसबा बावडा पॅव्हेलियन मैदानावर २००१ कलाकार नाटक सादर करणार आहेत. यामध्ये १ हजार कलाकार छत्रपती शिवाजी महाराजांच्या वेशभूषेत दिसणार आहेत. महाराजांचा इतिहास नव्या पिढीपर्यंत पोहचवण्याचा प्रयत्न या मध्यमातून केला जाणार असल्याचे आ. पाटील यांनी यावेळी सांगितले.
काँग्रेस पक्ष ‘हाऊस फुल्ल!’
राज्यातील मोठे नेते कोल्हापुरात येत असल्याने काँग्रेसमध्ये इनकमिंग होणार का? या पत्रकारांच्या प्रश्नावर काँग्रेस भरगच्च आहे, आधीच हाऊस फुल्ल आहे. मात्र येणाऱ्यांचे स्वागतच असेल, असे आमदार सतेज पाटील यांनी सांगितले. महाविकास आघाडीमध्ये सर्वांना न्याय देऊन पुढे जाण्याचा प्रयत्न केला जात असल्याचे ते म्हणाले.