बेंगळुरू : गेल्या ३६ तासांपासून बेंगळुरूमध्ये तुफान पावसाने कहर माजवला आहे. दोन दिवस येथील जनजीवन विस्कळीत झाले आहे. पावसामुळे विविध ठिकाणी झालेल्या दुर्घटनांमध्ये पाचजणांचा बळी गेला आहे.(Heavy Rainfall)
अनेक भागात गुडघ्यापर्यंत पाणी साचले आहे. शहरात मोठ्या प्रमाणात वाहतूक कोंडीचे चित्र कायम आहे.
सततच्या मुसळधार पावसामुळे साई लेआउट मोठ्या प्रमाणात पाण्याखाली गेले. त्याला बेटाचे स्वरुप आले. असंख्य घरांचे तळमजले अंशतः पाण्याखाली गेले. त्यामुळे रहिवाश्यांना घराबाहेर पडता आलेले नाही.
सोमवारी सुमारे १५० जणांना वाचवण्यात आले आणि सुरक्षित ठिकाणी हलवण्यात आल्याचे अधिकाऱ्यांनी सांगितले. ब्रुहत बेंगळुरू महानगरपालिकेने (BBMP) साई लेआउटमधील बाधित रहिवाशांना अन्न आणि पिण्याचे पाणी पुरवले. (Heavy Rainfall)
साई लेआउटमधील त्यांच्या अडचणींबद्दल नागरी अधिकाऱ्यांनी दिलेल्या प्रतिसादाबद्दल स्थानिक रहिवाशांनी संताप व्यक्त केला. हेन्नूरमधील एका बाल अनाथाश्रमाला पावसाचा मोठा फटका बसला.
आपत्ती प्रतिसाद दलाच्या मदतीने अग्निशमन आणि बचाव कर्मचाऱ्यांनी पाण्याने भरलेल्या अनाथाश्रमातून रहिवाशांना बाहेर काढले. (Heavy Rainfall)
मान्यता टेक पार्क आणि सिल्क बोर्ड जंक्शनसह विविध ठिकाणी गुडघ्यापर्यंतच्या पाण्यातून प्रवास करणाऱ्या प्रवाशांना मोठ्या अडचणी येत होत्या.
शहरातील रस्त्यांवर मोठमोठे खड्डे पडले आहेत. त्यामुळे वाहनचालकांना धोकादायकरित्या वाहन चालवत जावे लागत आहे. मोठ्या प्रमाणात पाणी साचल्याने ठिकठिकाणी वाहने थांबवावी लागत आहेत. त्यामुळे संपूर्ण शहरात वाहतूक कोंडी झाली आहे.
पोलिसांनी मंगळवारी दिलेल्या वृत्तानुसार, एका अपार्टमेंटमधून पावसाचे पाणी काढण्याचा प्रयत्न करताना विजेचा धक्का लागून एका १२ वर्षीय मुलासह दोघांचा मृत्यू झाला. (Heavy Rainfall)
मायको लेआउट पोलिसांनी सांगितले की, सोमवारी संध्याकाळी बीटीएम दुसऱ्या स्टेजजवळील एनएस पल्या येथील मधुवन अपार्टमेंटमध्ये राहणारे मनमोहन कामथ (६३) यांनी त्यांच्या घरातून पाणी काढण्यासाठी मोटारीकृत पंप वापरण्याचा प्रयत्न केला. त्यावेळी विजेच्या धक्क्याने त्यांचा मृत्यू झाल्याचे एका पोलिस अधिकाऱ्याने सांगितले. सोमवारी महादेवपुरा पोलिस स्टेशन हद्दीतील एका कंपनीत साफसफाई करताना शशिकला (३५) यांच्या अंगावर कंपाउंडची भिंत कोसळल्याने त्यांचा मृत्यू झाला.