ढाका : बांगलादेशच्या पदच्युत पंतप्रधान शेख हसीना यांना आमच्याकडे सोपवा, अशी विनंती बांगलादेशच्या अंतरिम सरकारने भारत सरकारला केली आहे. तसे राजनयिक पत्र भारताला दिल्याचे सरकारच्यावतीने सोमवारी (दि.२३) सांगण्यात आले. (Sheikh Hasina)
विद्यार्थ्यांच्या नेतृत्वाखालील तीव्र निदर्शनादरम्यान हसीना यांना देश सोडून परागंदा व्हावे लागले. या आंदोलनाने त्यांची १६ वर्षांची राजवट उलथवून टाकण्यात आली. ७७ वर्षीय हसीना ५ ऑगस्टपासून भारतामध्ये निर्वासित जीवन जगत आहेत.
ढाकास्थित आंतरराष्ट्रीय गुन्हे न्यायाधिकरणाने हसीना यांच्याविरोधात ‘मानवता आणि नरसंहाराविरुद्धच्या गुन्ह्यांसाठी’ अटक वॉरंट जारी केले आहे. त्यांच्यासह अनेक माजी कॅबिनेट मंत्री, सल्लागार आणि लष्करी आणि नागरी अधिकाऱ्यांचाही वॉरंट बजावलेल्यांमध्ये समावेश आहे.
परराष्ट्र व्यवहार सल्लागार म्हणजेच परराष्ट्र मंत्री तौहीद हुसेन यांनी यासंदर्भात पत्रकारांना सांगितले की, ‘आम्ही भारत सरकारला एक मौखिक राजनयिक संदेश पाठवला आहे. न्यायिक प्रक्रियेसाठी शेख हसीना यांना बांगलादेशला पाठवण्यात यावे. (Sheikh Hasina)
तत्पूर्वी, गृह सल्लागार जहाँगीर आलम यांनी सांगितले की, पदच्युत पंतप्रधान हसीना यांना भारताने बांगला देशकडे सोपवण्याची मागणी करणारे पत्र त्यांच्या कार्यालयाने परराष्ट्र मंत्रालयाला पाठवले आहे. आम्ही त्यांच्या प्रत्यार्पणाबाबत परराष्ट्र मंत्रालयाला पत्र पाठवले आहे. ही प्रक्रिया सध्या सुरू आहे, असे त्यांनी एका प्रश्नाला उत्तर देताना सांगितले.
आलम म्हणाले की, ढाका आणि नवी दिल्ली यांच्यात प्रत्यार्पण करार आधीच झालेला आहे. या करारानुसार हसीना यांना बांगलादेशात परत आणले जाऊ शकते.
हेही वाचा :