नवी दिल्ली : वृत्तसंस्था : हिवाळी अधिवेशनाच्या पहिल्या दिवशी प्रचंड गदारोळ झाला. संसदेचे हिवाळी अधिवेशन सोमवारी सकाळी सुरू झाले; मात्र सुरुवातीच्या गदारोळामुळे लोकसभा आणि राज्यसभेचे कामकाज दिवसभरासाठी तहकूब करावे लागले.
गौतम अदानी समूहावरील लाचखोरीच्या आरोपांवर विरोधी पक्षांचे खासदार चर्चेवर ठाम राहिल्याने राज्यसभेचे कामकाज विस्कळित झाले. संसदेच्या वरिष्ठ सभागृहाचे कामकाज सकाळी ११.४५ वाजेपर्यंत तहकूब करण्यात आले आणि त्यानंतर अदानी मुद्द्यावर चर्चेच्या मागणीवर विरोधी खासदार ठाम राहिल्याने सभागृहाचे कामकाज दिवसभरासाठी तहकूब करण्यात आले. बुधवारी राज्यसभेची बैठक होणार आहे. कामकाज दिवसभरासाठी तहकूब करण्यापूर्वी केंद्रीय मंत्री मनोहर लाल यांनी दिल्ली विकास प्राधिकरणाच्या (डीडीए) सल्लागार परिषदेसाठी एका सदस्याची निवड करण्याचा प्रस्ताव मांडला. हा प्रस्ताव वरिष्ठ सभागृहात आवाजी मतदानाने मंजूर करण्यात आला. केंद्रीय मंत्री जे. पी. नड्डा यांनी ‘नॅशनल इन्स्टिट्यूट ऑफ मेंटल हेल्थ अँड न्यूरोसायन्सेस’च्या सदस्य निवडण्यासाठी आणलेला दुसरा प्रस्तावही आवाजी मतदानाने स्वीकारण्यात आला.
तत्पूर्वी, लोकसभेचे कामकाज सुरू होताच सभापती ओम बिर्ला यांनी दिवंगत सदस्यांना आदरांजली वाहिली. सभागृहाचे कामकाज दुपारी १२ वाजेपर्यंत तहकूब केले. त्यानंतर काही वेळातच सभापतींनी पुन्हा सभागृहाचे कामकाज तहकूब केले.
लोकसभा आणि राज्यसभेच्या स्वतंत्र सत्रापूर्वी संसदेचे संयुक्त अधिवेशनही आयोजित करण्यात आले होते. उद्या, २६ नोव्हेंबर रोजी संसद संविधानाचा ७५ वा वर्धापन दिन साजरा करणार आहे. सभागृहाचे अधिवेशन २० डिसेंबर रोजी संपणार असून, आजपासून एकूण २५ दिवस कामकाज चालेल. वक्फ (दुरुस्ती) विधेयक हेदेखील अधिवेशनादरम्यान मांडण्यात येणाऱ्या विधेयकांपैकी एक आहे. खासदार जगदंबिका पाल यांच्या नेतृत्वाखालील संयुक्त संसदीय समिती साक्षीदारांचे जबाब आणि विविध भागधारकांकडून साक्ष घेतल्यानंतर हे विधेयक सादर केले जाणार आहे.
परिचय, विचार आणि पास करण्यासाठी सूचिबद्ध केलेल्या इतर विधेयकांमध्ये मुस्लिम वक्फ (रद्द) विधेयक, भारतीय विमान विधेयक, आपत्ती व्यवस्थापन (दुरुस्ती) विधेयक, गोवा राज्याच्या विधानसभा मतदारसंघात अनुसूचित जमातींच्या प्रतिनिधित्वाचे पुनर्संयोजन विधेयक, लोडिंग बिलांमध्ये समुद्रमार्गे माल वाहतूक विधेयक, रेल्वे (सुधारणा) विधेयक, बँकिंग कायदे (सुधारणा) विधेयक आणि तेल क्षेत्र (नियमन आणि विकास) दुरुस्ती विधेयक यांचा समावेश आहे. बॉयलर बिल, नॅशनल को-ऑपरेटिव्ह युनिव्हर्सिटी बिल, पंजाब कोर्टस्‌ (सुधारणा) बिल, मर्चंट शिपिंग बिल, कोस्टल शिपिंग बिल आणि इंडियन पोर्टस्‌ बिल यांचादेखील या यादीत समावेश आहे. तत्पूर्वी, आज राज्यसभेतील विरोधी पक्षनेते मल्लिकार्जुन खर्गे यांच्या कार्यालयात दोन्ही सभागृहांतील ‘इंडिया’आघाडीच्या नेत्यांची बैठक झाली. बैठकीत नेत्यांनी अदानी समूहावरील आरोपांवर चर्चेची मागणी करण्यासाठी विरोधी पक्षांची एकसंध रणनीती ठरवली.
मला शिकवू नका; खर्गेंनी बजावले
राज्यसभेत सभापती जगदीश धनखड यांनी विरोधी पक्षनेते मल्लिकार्जुन खर्गे यांना काही गोष्टी सांगण्याचा प्रयत्न केला. त्यावरून दोघांत खडाजंगी झाली. मी ५४ वर्षे लोकशाहीच्या मंदिरात आहे, तुम्ही मला शिकवू नका, असे खर्गे यांनी धनखड यांना बजावले.