ढाका : बांगला देशातील सत्तापालट आणि रक्तरंजित हिंसाचारानंतर देश सोडून गेलेल्या शेख हसीना यांच्याविरोधात अटक वॉरंट जारी करण्यात आले आहे. (Sheikh Hasina)
स्थानिक माध्यमांनी दिलेल्या माहितीनुसार, देशातील एका न्यायालयाने मानवतेविरुद्ध गुन्हे केल्याच्या आरोपावरून त्याच्याविरुद्ध अटक वॉरंट जारी केले आहे. शेख हसीना बांगला देशातून हेलिकॉप्टरने देशाबाहेर पडल्या आणि दिल्लीजवळच्या हिंडन एअरबेसवर उतरल्या. तेव्हापासून त्या भारतात राहतात; मात्र त्यांच्या ठावठिकाणाबाबत कोणतीही माहिती नाही. त्यांना सुरक्षित ठिकाणी ठेवण्यात आले आहे.
शेख हसीनाविरोधात न्यायालयात अर्ज दाखल करणारे वकील मोहम्मद ताजुल इस्लाम म्हणाले, की हा एक संस्मरणीय दिवस आहे. त्याचवेळी बांगला देशातील आंदोलनादरम्यान मारल्या गेलेल्या शेकडो लोकांपैकी एकाच्या कुटुंबीयांनी ही चांगली बातमी असल्याचे सांगितले. आम्हाला आशा आहे, की आता शेख हसीना यांच्यावरील खटला पुढे जाईल आणि आम्हाला न्याय मिळेल. बांगला देशात गेल्या १५ वर्षांपासून शेख हसीना सत्तेवर होत्या. पंतप्रधान असताना मोठ्या प्रमाणावर लोकांना अटक केल्याचा आरोप त्यांच्यावर आहे. याशिवाय राजकीय विरोधकांची हत्या करण्यात आली.
बांगला देश आंतरराष्ट्रीय गुन्हे न्यायाधीकरणाचे मुख्य वकील ताजुल इस्लाम यांनी सांगितले, की शेख हसीना यांना १८ नोव्हेंबर रोजी न्यायालयाने हजर करण्याचे आदेश दिले आहेत. इस्लाम म्हणाले, ‘शेख हसीना जुलै ते ऑगस्ट या काळात देशात हिंसाचार पसरवणाऱ्यांचे नेतृत्व करत होत्या, ज्यात शेकडो लोक मारले गेले.’ शेख हसीना व्यतिरिक्त न्यायालयाने त्यांचा पक्ष अवामी लीगचे सरचिटणीस कैदुल कादर यांनाही अटक करण्यास सांगितले आहे. या दोन नेत्यांशिवाय इतर ४४ जणांवर अटक वॉरंट जारी करण्यात आले आहे. या ४४ जणांची नावे जाहीर करण्यात आलेली नाहीत.
हेही वाचा :