Tag:

महाराष्ट्र दिनमान

कर्नाटकच्या मंत्री लक्ष्मी हेब्बाळकर यांच्या पुत्राच्या कार चालकावर चाकू हल्ला

by प्रतिनिधी January 6, 2026

written by प्रतिनिधी

बेळगाव : प्रतिनिधी : कर्नाटकच्या मंत्री लक्ष्मी हेब्बाळकर यांच्या पुत्राच्या कार चालकावर अज्ञातानी चाकू हल्ला केल्याची घटना बेळगावातील क्लब रोडवर घडली. कार चालक बसवंत कडोलकर (३२) याच्यावर अज्ञातानी चाकू हल्ला केला आणि ते घटना स्थळावरून लगेच पसार झाले. (Knife attack on car drivers)

चाकू हल्ला झालेल्या बसवंत याला उपचारासाठी खासगी हॉस्पिटलमध्ये हलविण्यात आले आहे. सध्या बसवंत याची स्थिती धोक्याबाहेर असल्याचे डॉक्टरांनी सांगितले आहे.पैशाच्या व्यवहारातून चाकू हल्ला झाला असावा असा प्राथमिक अंदाज पोलिसांनी व्यक्त केला आहे. ओळखीच्या व्यक्तींनीच चाकू हल्ला केला असण्याची शक्यता वर्तवली जात आहे. (Knife attack on car drivers)

मंत्री लक्ष्मी हेब्बाळकर यांचा पुत्र अन युवा काँग्रेस नेता मृणाल हेब्बाळकर यांचा बसवंत हा कारचालक आहे. चाकू हल्ल्याचे वृत्त कळताच मृणाल हेब्बाळकर यांनी हॉस्पिटलमध्ये जावून कार चालकाच्या प्रकृतीची चौकशी केली. घटनेचे वृत्त कळताच पोलीस घटनास्थळी दाखल झाले आणि त्यांनी हल्लेखोरांचा शोध घेण्यास प्रारंभ केला. हल्ला झालेल्या परिसरातील सी सी टी व्ही फुटेज पोलीस तपासत असून हल्लेखोरांचा शोध घेण्यासाठी पोलिसांनी स्वतंत्र पथक स्थापन केले आहे. कॅम्प पोलीस स्थानकात सदर घटनेची नोंद झाली आहे. (Knife attack on car drivers)

January 6, 2026 0 comments

BJP is trying to hijack the great historical figures

महत्त्वाच्या नोंदी राजकारण

भाजपाकडून युगपुरुषांना पळविण्याचा प्रयत्न; खासदार राऊत यांचा हल्लाबोल

by प्रतिनिधी January 6, 2026

written by प्रतिनिधी

जमीर काझी : मुंबई : छत्रपती शिवाजी महाराज हे महाराष्ट्राचे, मराठी माणसाचे आणि हिंदवी स्वराज्याचे आराध्य दैवत आहेत. भाजपाने आजवर अनेक युगपुरुषांना पळविण्याचा अयशस्वी प्रयत्न केला आहे, तसे महाराजांना गुजरातला पळविण्याचा प्रयत्न करू नका, शिवाजी महाराजांनी सुरत लुटून दणादाण उडवली होती, हा इतिहास कोणी विसरू शकत नाही, असा हल्लाबोल ठाकरे गटाचे नेते खासदार संजय राऊत यांनी मंगळवारी भाजपावर केला.

केंद्रीय जलशक्ती मंत्री के. सी. पाटील यांनी सुरतमधील एका कार्यक्रमात छत्रपती शिवाजी महाराज हे पाटीदार समाजाचे होते, असे वादग्रस्त वक्तव्य केले आहे. राज्यात महापालिका निवडणुकीचा प्रचार रंगात येत असताना त्यांच्या या वक्तव्यावरून राज्यभरातून तीव्र संताप व्यक्त होत आहे. विरोधकांनी त्यांच्यावर कडाडून हल्ला चढविला आहे. याबाबत संजय राऊत म्हणाले,’ भाजपाने आजवर सरदार वल्लभभाई पटेल, नेताजी सुभाषचंद्र बोस आणि रवींद्रनाथ टागोर अशा अनेक युगपुरुषांना पळविण्याचा प्रयत्न करूनदेखील फायदा झाला नाही. आता गुजरातला छत्रपती शिवाजी महाराजांना पळवायचा प्रयत्न सुरू आहे. त्यांनी आधी अरबी समुद्रातील शिवस्मारक पूर्ण करा. मग शिवाजी महाराजांची जात काढा. महाराजांना जात लावू नका. हे असे विषय काढून मराठी माणसासह महाराष्ट्राला डिवचण्याचा प्रकार सुरू आहे. शिवसेना, राष्ट्रवादी पळविली. आता बाळासाहेब ठाकरे आणि छत्रपती शिवाजी महाराजांना पळवायला लागले आहेत. महाराष्ट्राचं आराध्य दैवत तुम्ही पळवत आहात. तुमच्याकडे काही दैवत नाही का, गुजरातमध्ये कोणी महान नेते जन्मालाच आलेले नाहीत का, म्हणून तुम्हाला आमची दैवतं पळवण्याचा बकासुरू आनंद घ्यायचा का”, असा टोला त्यांनी भाजपा नेत्याला लगावला. (BJP is trying to hijack the great historical figures)

याबाबत काँग्रेसचे विधान परिषदेतील गटनेते म्हणाले,’ “महापुरुषांचा इतिहास वेगळ्या पद्धतीने लोकांच्या समोर सांगायचा, हे भारतीय जनता पक्षाचं कारस्थान आहे. मागच्या काळामध्ये छत्रपती शिवरायांच्या जन्मस्थळाबाबत भाजपाकडून वक्तव्य झाले त्यातून महापुरुषांच्या इतिहासाबद्दल संभ्रम निर्माण करण्याचा प्रयत्न ही मंडळी करत आहेत. तुम्ही-आम्ही पाठ्यपुस्तकातून इतिहास वाचला आहे. या पुढच्या पन्नास वर्षात डिजिटल पद्धतीनं इतिहास वाचला जाईल. महापुरुषांबद्दल जाणून-बुजून अशी वक्तव्य करायची. तेच डिजिटल फुटप्रिंटच्या माध्यमातून लोकांसमोर आणायचं. जेणेकरून लोकांना तेच खरे वाटलं पाहिजे, हे कारस्थान आहे. हा पुढील शंभर वर्षांचा प्लॅन आहे. भारतीय राज्यघटनेचे शिल्पकार डॉ. बाबासाहेब आंबेडकर, महात्मा ज्योतिबा फुले, सावित्रीबाई फुले, छत्रपती शिवाजी महाराज राजर्षी छत्रपती शाहू महाराज यांच्या प्रतिमा मलीन करण्याचं हे कारस्थान आहे”, असा आरोप त्यांनी केला. (BJP is trying to hijack the great historical figures)

January 6, 2026 0 comments

महत्त्वाच्या नोंदी राजकारण

मनसेच्या संतोष धुरींचा भाजपमध्ये प्रवेश

by प्रतिनिधी January 6, 2026

written by प्रतिनिधी

मुंबई : प्रतिनिधी : मुंबई महापालिकेची निवडणूकीचा प्रचार रंगात आला असताना भाजपाकडून शिवसेना ठाकरे गट व मनसेला धक्के देण्याची तंत्र कायम ठेवले आहे. मनसेप्रमुख राज ठाकरे यांचे निकटवर्तीय समजले जाणारे संतोष धुरी यांनी मंगळवारी भाजपात प्रवेश केला. मुंबई अध्यक्ष आमदार अमित साटम व अन्य नेत्यांच्या उपस्थित हा कार्यक्रम झाला. धुरी यांचा भाजपा प्रवेश हा ठाकरे बंधूना मोठा धक्का समजला जात आहे. (Santosh Dhuri joins BJP)

धुरी हे वरळीतील १९४ वार्डमधून निवडणूक लढविण्यासाठी इच्छुक होते. मात्र ही जागा उद्धव ठाकरे यांच्या सेनेला सोडण्यात आली. निशिकांत शिंदे यांना उमेदवारी देण्यात आली आहे. त्यामुळे संतोष धुरी हे नाराज होते. ते निवडणुकीच्या रिंगणात उतरले नसले तरी आपल्याला डावलले गेल्यामुळे नाराज होते.त्यांनी राज यांच्यासह कोणाही नेत्याशी संपर्क ठेवला नव्हता. धुरी यांनी सोमवारी मुख्यमंत्री देवेंद्र फडणवीस यांची भेट घेतली त्याचवेळी ते भाजपात जाणार हे निश्चित झाले होते. धुरी यांनी गेल्या दोन दिवसांत भाजपामध्ये प्रवेश करण्याचा निर्णय घेतला असल्याचे सांगितले. (Santosh Dhuri joins BJP)

January 6, 2026 0 comments

Prakash Akolkar received the Lifetime Achievement Award

महत्त्वाच्या नोंदी

ज्येष्ठ पत्रकार प्रकाश अकोलकर यांना ‘कृ. पां. सामक’ जीवनगौरव पुरस्कार

by प्रतिनिधी January 6, 2026

written by प्रतिनिधी

मुंबई : प्रतिनिधी : मंत्रालय आणि विधिमंडळ वार्ताहर संघाच्या सन २०२५ या वर्षीच्या उत्कृष्ट पत्रकार पुरस्कारांची घोषणा मंगळवारी करण्यात आली आहे. ‘कृ. पां. सामक’ हा प्रतिष्ठेचा जीवनगौरव पुरस्कार ज्येष्ठ पत्रकार श्री. प्रकाश अकोलकर यांना जाहीर करण्यात आला आहे.

राज्यस्तरीय उत्कृष्ट पत्रकार पुरस्कारासाठी (वृत्तपत्र ) ‘लोकसत्ता’ चे प्रतिनिधी अशोक अडसूळ यांची तर वृत्तवाहिनीसाठी राज्यस्तरीय उत्कृष्ट पत्रकार पुरस्कारासाठी ‘इंडिया टुडे-आज तक’ ग्रुपचे पुणे ब्युरो चीफ ओमकार वाबळे यांची निवड करण्यात आली आहे. वार्ताहर संघाच्या सदस्यांसाठी असलेल्या उत्कृष्ट पुरस्कार ‘अॅग्रोवन’चे श्री. बाळासाहेब पाटील यांना जाहीर झाला आहे. (Prakash Akolkar received the Lifetime Achievement Award)

६ जानेवारी या पत्रकार दिनाचे औचित्य साधून आज या पुरस्कारांची घोषणा संघाचे अध्यक्ष दिलीप सपाटे आणि सरचिटणीस दीपक भातुसे यांनी केली. ज्येष्ठ पत्रकार अभय देशपांडे, प्रकाश सावंत, सदस्य सचिव सुजित महामुलकर यांच्या निवड समितीने या पत्रकारांच्या नावांची पुरस्कारासाठी केलेली शिफारस मंत्रालय आणि विधिमंडळ वार्ताहर संघाच्या कार्यकारिणीने मान्य केली. (Prakash Akolkar received the Lifetime Achievement Award)

यापूर्वी कृ. पां. सामक जीवनगौरव पुरस्कार ज्येष्ठ पत्रकार वसंत देशपांडे, विनायक बेटावदकर, विजय वैद्य, दिनू रणदिवे, दिनकर रायकर, प्रकाश जोशी, अजय वैद्य, प्रतिमा जोशी, पंढरीनाथ सावंत यांना सन्मानपूर्वक प्रदान करण्यात आला आहे. यंदाच्या निवड झालेल्या पुरस्कारांचे लवकरच समारंभपूर्वक वितरण करण्यात येईल. (Prakash Akolkar received the Lifetime Achievement Award)

January 6, 2026 0 comments

पोलिस डायरी महत्त्वाच्या नोंदी

शिवराय आणि जिजाऊंची बदनामी करणाऱ्या आरोपींकडून माफीनामा

by प्रतिनिधी January 6, 2026

written by प्रतिनिधी

सातारा : प्रतिनिधी : ऑक्स्फर्ड युनिव्हरसिटी प्रेस इंडिया, प्रकाशित, जेम्स लेन लिखित, “शिवाजी”, हिंदू किंग इन इस्लामिक इंडीया या पुस्तकात काही शेरे आणि परिच्छेदामधुन, युगपुरुष छत्रपती शिवाजी महाराज आणि मॉसाहेब जिजाऊ यांची प्रतिमा मलीन करण्याचा जो मजकूर लिहीला होता. त्याविरोधात खासदार श्रीमंत छत्रपती उदयनराजे भोसले यांनी साताऱ्यातील मुख्य न्यायदंडाधिकारी यांच्या न्यायालयात २००४ मध्ये खाजगी फौजदारी याचिका दाखल केली होती. या गुन्ह्यातील आरोपींनी आपल्यावरील फौजदारी खटला चालवू नये, काढून टाकावा याकरीता मुंबई उच्य न्यायालयात धाव घेतली होती. सुनावणी दरम्यान आरोपींनी माफी मागण्याची तयारी दर्शवली. त्यानुसार कोल्हापूर सर्कीट बेच यांचा आदेश पारित झाला असून, आरोपींनी माफीनामा लिहून दिला आहे अशी माहीती खासदार श्रीमंत छत्रपती उदयनराजे भोसले यांनी एका पत्रकाद्वारे दिली आहे.

जेम्स लेनच्या पुस्तकात बदनामी करणारा मजकूर

लेखक जेम्स लेन यांनी लिहिलेले “शिवाजी” द हिंदू किंग इन इस्लामिक इंडिया, या नावाचे पुस्तक २००३ मध्ये ऑक्स्फर्ड युनिव्हरसिटी प्रेस इंडिया यांनी प्रकाशित केले होते. या पुस्तकातील परिच्छेद आणि समासांमध्ये युगपुरुष छत्रपती शिवाजी महाराज आणि मॉसाहेब जिजाऊ यांचे प्रतिमा मलिन करणारा मजकूर होता. त्याशिवाय पुस्तकाचे नाव हिंदू किंग इन इस्लामिक इंडिया हे सुध्दा बदनामीकारक होते. (Shivaji, the Hindu King in Islamic India)

उदयनराजे भोसलेकडून कोर्टात फौजदारी खटला

शिवाजी द हिंदू किंग इन इस्लामिक इंडीया हे पुस्तक प्रकाशित करुन, आरोपी क्रमांक १ ते १० यांनी छत्रपती शिवाजी महाराज आणि मॉसाहेब जिजाऊ यांचेविषयी बदनामीकारक शेरे आणि टिपण्या प्रकाशित झाल्याने, त्यांच्या विरोधात श्रीमंत छत्रपती उदयनराजे भोसले यांनी सातारा येथील मुख्य न्यायदंडाधिकारी यांचेसमोर यांचेविरुध्द खाजगी फौजदारी खटला दाखल केला होता.

आरोपीकडून उच्च न्यायालयात याचिका

मुख्य न्यायदंडाधिकाऱ्यांनी उदयनराजे भोसले यांची तक्रार आणि पुस्तकातील घटकांचा विचार करुन, आरोपींविरुध्द आयपीसी कलम ५०० नुसार कार्यवाही सुरु करण्याचे आदेश २ एप्रिल २००४ दिले. या आदेशाच्याविरोधात आरोपींनी मुंबई उच्य न्यायालयात फौजदारी याचिका आणि अर्ज दाखल केला. सदरचे फौजदारी रिट पिटीशन हे सईद मंदार खान, संपादक, ऑक्स्फर्ड युनिव्हरसिटी प्रेस इंडिया तसेच, टिळक महाराष्ट्र विदयापिठामध्ये संस्कृतचे प्राध्यापक म्हणून कार्यरत असणाऱ्या डॉ.श्रीकांत बहुलेकर, तसेच टिळक महाराष्ट्र विदयापिठाच्या लेक्चरर सुचेता परांजपे, बीओआरआय चे ग्रंथपाल व्ही.एल.मंजूळ यांनी दाखल केली होती. (Shivaji, the Hindu King in Islamic India)

आरोपींनी दाखवली माफी मागण्याची तयारी

सदर याचिका संदर्भात मुंबई उच्य न्यायालयाच्या कोल्हापूर सर्किट बेंचमधील न्यायाधीश शिवकुमार दिगे यांचेसमोर १७ डिसेंबर २०२५ ला सुनावणी झाली. या सुनावणी दरम्यान मुळ आरोपीं आणि याचिकाकर्त्यांच्या वकीलांनी तक्रारदार श्रीमंत छत्रपती उदयनराजे भोसले यांची माफी मागायची तयारी दर्शवली. तसेच लेखी माफीपत्राची मराठी आणि इंग्रजी वृत्तपत्रात राष्ट्रीय पातळीवर व्यापक प्रसिघ्दी दिली जाईल असे सांगितले. तक्रारदार श्रीमंत छत्रपती उदयनराजे भोसले यांचेवतीने ॲङ शैलेश धनंजय चव्हाण, ॲङ रणजीत पाटील, ॲङ धवलसिंह पाटील यांनी कोर्टाने आदेश दयावेत असे सांगितले. यावर न्यायमुर्ती श्री दिगे यांनी राष्ट्रीय पातळीवरील सर्वांत जास्त खपाच्या वृत्तपत्रात माफीनामा पत्र प्रसिध्द करण्याचे आदेश दिले. (Shivaji, the Hindu King in Islamic India)

माफीनामा पत्रामधील मजकूर असा

जेम्स विल्यम लेन्स यांनी लिहिलेले पुस्तक सन २००३ मध्ये ऑक्स्फर्ड युनिव्हर्सिटी यांनी प्रकाशित केले. लक्षावधी लोकांच्या मनामध्ये आणि हृदयावर राज्य करणा-या श्रीमंत छत्रपती उदयनराजे भोसले यांची लोकप्रियता मी ओळखतो. त्यांच्या विषयीच्या मनोभावना, त्यांचा वारसा याबाबत मी आदर व्यक्त करतो. त्यांना तसेच सर्वसामान्य जनतेच्या भावना दुखावल्या असतील तर आम्ही त्याबद्दल दिलगीरी व्यक्त केरतो. त्यांना झालेल्या मनस्तापाबद्दल मी हा बिनशर्त माफीनामा श्रीमंत छत्रपती उदयनराजे भोसले यांचेकडे सादर करतो. (Shivaji, the Hindu King in Islamic India)

January 6, 2026 0 comments

Ravindra Chavan's statement about Vilasrao Deshmukh

महत्त्वाच्या नोंदी राजकारण

विलासराव देशमुखांबद्दल वक्तव्य; रवींद्र चव्हाणांचा पत्रकार परिषदेतून काढता पाय

by प्रतिनिधी January 6, 2026

written by प्रतिनिधी

छत्रपती संभाजीनगर : दिवंगत माजी मुख्यमंत्री विलासराव देशमुखांबद्दल भाजप प्रदेशाध्यक्ष रवींद्र चव्हाण यांनी केलेल्या वक्तव्याने त्यांच्यावर काँग्रेससह विरोधी पक्षांनी टीकेचा भडीमार केला. प्रदेशाध्यक्ष चव्हाण यांनी देशमुख यांच्यासंबधी केलेल्या वक्तव्याबद्दल दिलगिरी व्यक्त केली पण लातूरच्या जनतेची माफी मागणार का या प्रश्नांवर उत्तर न देता पत्रकार परिषद अर्धवट सोडून गेले. चव्हाण यांच्या वक्तव्याचा फटका मराठवाड्यात बसण्याची शक्यता वर्तवली जात आहे.

लातूर महानगरपालिकेच्या निवडणुकीसाठी भाजप प्रदेशाध्यक्ष रवींद्र चव्हाण प्रचाराला आले होते. यावेळी त्यांनी भाषणात लातूर शहरामधून विलासराव देशमुख यांच्या आठवणी पुसल्या जातील यात शंका नाही असे वक्तव्य केले. या वक्तव्याबद्दल चव्हाण यांनी माफी मागावी अशी मागणी होत आहे. आमदार अमित देशमुख यांनी तीव्र नाराजी व्यक्त केली आहे. अभिनेते रितेश देशमुख यांनी एक्सवर पोस्ट करत लोकांसाठी जगलेल्या माणसांची नावे मनात कोरलेली असतात. लिहिलेले पुसता येते, कोरलेले नाही अशा शब्दात नाराजी व्यक्त केली आहे. काँग्रेस प्रदेशाध्यक्ष हर्षवर्धन सपकाळ यांनीही टीका केली आहे.

दरम्यान आज संभाजीनगर येथे झालेल्या पत्रकार परिषदेत रवींद्र चव्हाण यांनी दिलगिरी व्यक्त केली. विलासरावांवर कोणतीही टीका टिप्पणी केलेली नाही. विलासराव फार मोठे नेते होते. महाराष्ट्राचे मुख्यमंत्री होते. माझ्या त्या वक्तव्याकडे राजकीय दृष्ट्या पाहू नका. त्यांचे चिरंजीव आमदार अमित देशमुख माझे चांगले मित्र आहेत. त्यांच्या चिरंजीवांच्या भावना दुखावल्या असतील तर मी दिलगिरी व्यक्त करतो. लातूरकरांची माफी मागणार का, असे विचारले असता, रवींद्र चव्हाणांनी हा प्रश्न टाळत पुढील प्रश्न.. असे म्हटले. त्यानंतर पत्रकारांनी पुन्हा एकदा विलासराव देशमुखांबद्दल तुम्ही केलेल्या वक्तव्याबद्दल माफी मागणार का, असे विचारले असता रवींद्र चव्हाण यांनी नमस्कार करत पत्रकार परिषदेतून काढता पाय घेतला.

January 6, 2026 0 comments

MP Raut criticizes the Election Commission

महत्त्वाच्या नोंदी राजकारण

निवडणूक आयोगाच्या डोळ्यात गारगोट्या आहेत? : संजय राऊत

by प्रतिनिधी January 6, 2026

written by प्रतिनिधी

मुंबई : प्रतिनिधी : राज्यात मोठ्या प्रमाणावर झालेल्या बिनविरोध निवडणुकांवरुन विरोधी पक्षांनी राज्य निवडणूक आयोगाला धारेवर धरले आहे. शिवसेनेचे खासदार संजय राऊत यांनी निवडणूक आयोगावर हल्लाबोल केला. निवडणूक आयोगाच्या कार्यपद्धतीवर त्यांनी निवडणूक आयोगाच्या डोळ्याच्या खाचा झाल्या आहेत का? त्यांच्या डोळ्यांत गारगोट्या आहेत? असा सवालही केला. (Sanjay Raut, State Election Commission, Rahul Narvekar)

सरळ मार्गाने न झालेल्या बिनविरोध निवडणुकाकडे राज्य निवडणूक आयोग डोळेझाक करत असल्याचा आरोप खासदार राऊत यांनी केला. विधानसभा अध्यक्ष राहुल नार्वेकर यांना निवडणूक आयोगाकडून दिलेली क्लीनचीट ही संशयास्पद आहे, असा आरोपही त्यांनी केला. धमकी, पैशांचा वापर आणि सरकारी यंत्रणांचा गैरवापर करूनच या बिनविरोध निवडणुका घडवून आणण्यात आल्या. पालिकेने ज्या अधिकाऱ्यावर ठपका ठेवला होता, त्यालाही आयोगाने क्लीनचीट दिली, हे संपूर्ण व्यवस्थेच्या अपयशाचे उदाहरण आहे,” अशी टीकाही त्यांनी केली. “अनेक ठिकाणी उमेदवारांना पैसे देऊन नामनिर्देशन मागे घ्यायला भाग पाडण्यात आले. काही ठिकाणी तर इच्छुक उमेदवारांना थेट अर्जच भरू दिले नाहीत. आपचे उमेदवार, जनता दलाचे उमेदवार अशा अनेक पक्षांच्या उमेदवारांना नामनिर्देशन प्रक्रियेतून दूर ठेवण्यात आले,” असा आरोप खासदार संजय राऊत यांनी केला. (Sanjay Raut, State Election Commission, Rahul Narvekar)

“बबन महाडिक हे नामनिर्देशन दाखल करण्यासाठी रांगेत उभे असतानाही त्यांच्या अर्जाचा स्वीकार करण्यात आला नाही. ही सरळसरळ दहशत असून, यामागे विधानसभा अध्यक्षांची भूमिका आहे,” असा पुनरुच्चार खासदार राऊत यांनी पत्रकार परिषदेत केला. निवडणूक आयोगाच्या डोळ्याच्या खाचा झाल्या आहेत का? की त्यांच्या डोळ्यांत गारगोट्या आहेत? असा सवाल त्यांनी यावेळी उपस्थित केला. “या परिस्थितीत निवडणूक आयोगाला काहीच दिसत नसेल, तर आयोग सत्ताधारी पक्षासाठी काम करत असल्याचा निष्कर्ष अपरिहार्य ठरतो. या निवडणूक आयोगाच्या काळात ७० ठिकाणी बिनविरोध निवडणुका झाल्या आहेत. याआधीच्या काळात इतक्या मोठ्या प्रमाणावर बिनविरोध निवडणुका कधीच झाल्या नव्हत्या,” असा दावा त्यांनी यावेळी केला आहे. (Sanjay Raut, State Election Commission, Rahul Narvekar)

January 6, 2026 0 comments

महत्त्वाच्या नोंदी

काँग्रेसचे माजी केंद्रीय मंत्री सुरेश कलमाडी यांचे निधन

by प्रतिनिधी January 6, 2026

written by प्रतिनिधी

पुणे : प्रतिनिधी : काँग्रेसचे ज्येष्ठ नेते, माजी केंद्रीय मंत्री पुण्याचे माजी खासदार सुरेश कलमाडी (वय ८२) यांचे निधन झाले आहे. अनेक दिवसांपासून सुरेश कलमाडी हे आजारी होते . मंगळवारी पहाटे साडे तीन वाजण्याच्या सुमारास त्यांनी प्राणज्योत मालवली. त्यांच्यावर दुपारी अंत्यसंस्कार करण्यात येणार आहे, अशी माहिती मिळत आहे.

गेल्या काही वर्षांपासून कलमाडी हे सक्रिय राजकारणापासून दूर होते. अलीकडेच त्यांना प्रकृती बिघडल्याने दीनानाथ मंगेशकर रुग्णालयात त्यांच्यावर उपचार सुरू होते. परंतु, मंगळवारी पहाटे साडेतीन वाजण्याच्या सुमारास त्यांचे निधन झाले. त्यांच्यावर पुण्यातील वैकुंठभूमी येथे अंत्यसंस्कार करण्यात येणार आहे. (Suresh Kalmadi has passed away)

सुरेश कलमाडी यांचा जन्म १ मे १९४४ मध्ये झाला. त्यांचे प्राथमिक शिक्षण सेंट व्हिन्सेंट हायस्कूलमध्ये झाले. त्यानंतर त्यांनी पुण्यातील फर्ग्युसन महाविद्यालयातून उच्च शिक्षण पूर्ण केले. त्यांनी १९६० मध्ये नॅशनल डिफेन्स अकॅडमी मध्ये प्रवेश घेतला. १९६४ ते १९७२ या काळात त्यांनी भारतीय हवाई दलात पायलट म्हणून सेवा बजावली. त्यांनी १९६५ आणि १९७१ च्या भारत-पाकिस्तान युद्धांमध्ये सक्रिय सहभाग घेतला होता.

१९७७ मध्ये कलमाडी यांनी पुणे युवक काँग्रेसचे अध्यक्ष म्हणून राजकीय प्रवासाला सुरुवात केली. ते पुण्यातून तीन वेळा लोकसभेवर निवडून आले. तसेच त्यांनी चार वेळा राज्यसभा सदस्य म्हणूनही काम केले. पी. व्ही. नरसिंह राव यांच्या सरकारमध्ये ते रेल्वे राज्यमंत्री होते. रेल्वे अर्थसंकल्प सादर करणारे ते पहिले राज्यमंत्री ठरले होते. (Suresh Kalmadi has passed away)

कलमाडी हे १९९६ ते २०१२ या प्रदीर्घ काळासाठी भारतीय ऑलिंपिक संघटनाचे अध्यक्ष होते. त्यांनी एशियन ॲथलेटिक्स असोसिएशनचे अध्यक्ष आणि भारतीय ॲथलेटिक्स महासंघाचे अध्यक्ष म्हणूनही काम पाहिले. पुण्यात दरवर्षी होणारी ‘पुणे आंतरराष्ट्रीय मॅरेथॉन’ आणि ‘पुणे फेस्टिव्हल’ सुरू करण्याचे श्रेय कलमाडी यांना जाते. पुण्यात बालेवाडी येथे झालेल्या राष्ट्रीय क्रीडा स्पर्धेचे यशस्वी आयोजन केले होते. पुण्याच्या राजकारणावर त्यांचे काही काळ वर्चस्व होते. क्रीडा क्षेत्रातील कुशल संघटक म्हणून त्यांची ओळख होती. (Suresh Kalmadi has passed away)

२०१० मध्ये दिल्लीत झालेल्या राष्ट्रकुल स्पर्धेच्या आयोजनात भ्रष्टाचार झाल्याच्या आरोपावरून कलमाडी यांना २०११मध्ये अटक करण्यात आली होती आणि काही काळ तुरुंगवासही झाला होता. तब्बल १५ वर्षांनंतर, २०२५ मध्ये अंमलबजावणी संचालनालयाने या प्रकरणी त्यांच्याविरोधात कोणतेही ठोस पुरावे नसल्याचे सांगत न्यायालयात क्लोजर रिपोर्ट सादर केला. न्यायालयाने तो मान्य केल्याने कलमाडी यांना या सर्व आरोपांतून क्लीन चीट मिळाली. (Suresh Kalmadi has passed away)

January 6, 2026 0 comments

Provide the NOTA option in uncontested constituencies

महत्त्वाच्या नोंदी राजकारण

बिनविरोधच्या ठिकाणी ‘नोटा’चा पर्याय वापरण्यासाठी संधी द्या : हर्षवर्धन सपकाळ

by प्रतिनिधी January 5, 2026

written by प्रतिनिधी

जमीर काझी : मुंबई : स्थानिक स्वराज्य संस्था निवडणुकीत फ्री अँड फेअर निवडणुकीच्या धोरणाला हरताळ फासला आहे. मुख्यमंत्री व दोन्ही उपमुख्यमंत्री यांनी लोकशाही गुंडाळून टाकली असून पैशाचा खेळ सुरु आहे. लोकशाहीत संविधानाने दिलेला मतदानाचा हक्क बजावण्यासाठी ‘नोटा’चा पर्यायही आहे. त्यामुळे ज्या ज्या ठिकाणी विरोधी उमेदवार नाही, तेथे मतदारांना ‘नोटा’ वापरण्याची संधी द्यावी, अशी मागणी काँग्रेसचे प्रदेशाध्यक्ष हर्षवर्धन सपकाळ यांनी सोमवारी केली.

ते म्हणाले,’ भाजपा महायुतीची सत्तेची भूक लोकशाही गिळंकृत करण्यापर्यंत पोहचली आहे. महानगरपालिका निवडणुकांमध्ये ‘बाप बड़ा ना भैया, सबसे बड़ा रुपैया’चे वगनाट्य जोरात सुरु आहे,

निवडणुका या काही नवीन नाहीत, निकोप लोकशाहीत विरोधी पक्षांनाही तेवढेच महत्व आहे. देशाचे पहिले पंतप्रधान पंडित जवाहरलाल नेहरु यांच्या मंत्रिमंडळात सहा बिगर काँग्रेसचे मंत्री होते, ही आपली संस्कृती व परंपरा आहे. पण विरोधकच नको अशी प्रवृत्ती भाजपा व महायुतीची बनली असून त्यातून बिनविरोधसाठी सत्ताधारी कोणत्याही स्तराला जात आहेत. विरोधी पक्षांच्या उमेदवाराला अर्ज भरू न देणे, धमक्या देणे, दबाव तंत्राचा वापर करणे त्याचबरोबर पोलीस, प्रशासन यांच्या मदतीने बेशरमपणाचा खेळ सुरु आहे आणि निवडणूक आयोग मात्र याचा मूक साक्षीदार बनला आहे, याचा आम्ही निषेध करतो. असे सपकाळ म्हणाले. (Provide the NOTA option in uncontested constituencies)

नार्वेकरांनी पदाची प्रतिष्ठा घालवली

संवैधानिक पदावरील व्यक्तीने राजकीय अभिनिवेष बाजूला ठेवणे अपेक्षित आहे. लोकसभेचे अध्यक्ष, राज्यसभेचे सभापती, राज्यपाल, विधानसभेचे अध्यक्ष परिषदेचा सभापती ही संवैधानिक पदे आहेत, त्यांचा आदराने उल्लेख केला जातो. पण महाराष्ट्र विधानसभेचे अध्यक्ष राहुल नार्वेकर हे यांनी पदाची प्रतिष्ठा घालवली आहे. अध्यक्षपदाच्या पहिल्या कारकिर्दीत त्यांनी पक्षातंर बंदी कायदा मोडीत काढून लोकशाही व संविधानाच्या छातीत सुरा खुपण्याचे काम केले, म्हणून त्यांना दुसऱ्यांदा संधी देण्यात आलेली आहे. आता हे महाशय महापालिकेच्या निवडणुकीत आपल्या नातेवाईकांसाठी अत्यंत खालच्या पातळीवर उतरले आहेत. विरोधकांना अर्ज भरू देण्यात अडथळा आणणे, विरोधकांना धमक्या देणे, पदाचा गैरवापर करणे अशा प्रकारचे वर्तन त्यांनी केले असून त्यांच्यावर कठोर कारवाई करणे आवश्यक आहे. (Provide the NOTA option in uncontested constituencies)

राष्ट्रपतींनी नार्वेकरांना पदावरुन हटवावे

राष्ट्रपतींनी याची गंभीर दखल घेऊन नार्वेकर यांना पदावरून बडतर्फ केले पाहिजे, अशी मागणी सपकाळ यांनी केली आहे. याप्रकरणी काँग्रेसने नार्वेकर यांच्यावर कारवाईच्या मागणीसाठी पत्र पाठवले होते. पण निवडणुक आयोगाने पुरावे मागितले. घटनेच्या ठिकाणचे सीसीटीव्ही फुटेज आहे, ज्यांना अडवण्यात आले धमक्या दिल्या त्यांच्या तक्रारी घेऊन कारवाई करावी. आता चौकशी अहवाल आला असला तरी त्यात केवळ शब्दच्छल करण्यात आलेला आहे. (Provide the NOTA option in uncontested constituencies)

सत्ताधारी महायुतीमध्ये नुरा कुस्ती

महानगरपालिकेच्या निवडणुकीत सत्तेतील तीन पक्ष एकमेकांच्या समोर उभे ठाकले असून तेच एकमेकांवर टीका करत आहेत, हा प्रकार ‘मी मारल्यासारखे करतो तु रडल्यासारखे कर’, असा असून महायुतीत ‘नुरा कुस्ती’ सुरु आहे. एवढेच गंभीर आहेत तर अजित पवार यांनी सत्तेतून बाहेर पडावे नाहीतर भाजपाने अजित पवार यांनी बाहेरचा रस्ता दाखवावा, असेही सपकाळ यांनी सांगितले.

January 5, 2026 0 comments

महत्त्वाच्या नोंदी राजकारण

कोर्ट कर्मचाऱ्यांना निवडणूक ड्युटी लावणे बीएमसी आयुक्तांना पडले महागात

by प्रतिनिधी January 5, 2026

written by प्रतिनिधी

जमीर काझी : मुंबई : बृहन्मुंबई महापालिका निवडणुकीच्या कामात न्यायालयाच्या कर्मचाऱ्यांना चुकून इलेक्शन ड्युटी लावणे महापालिका आयुक्त आणि मुंबई जिल्हा प्रमुख निवडणूक अधिकारी भूषण गगराणी यांना चांगलेच महागात पडले आहे. याबाबत दाखल याचिकेवर सोमवारी उच्च न्यायालयात त्यांना तीन तास उपस्थित राहून माफीनामा सादर केला. मात्र न्यायमूर्ती चंद्रशेखर आणि न्यायमूर्ती गौतम अंखड यांच्या खंडपीठाने चूक मान्य करण्यास नकार देत सुनावणी तीन आठवड्यांकरिता तहकूब केली आहे.

ऐरवी ज्यांच्या दालनाबाहेर लोक भेटीची वाट पाहत असतात, त्या महापालिका आयक्तांना सोमवारी या सुनावणीकरिता कोर्टात वाट पाहावी लागली. त्यासाठी आयुक्त भूषण गगराणी हे स्वतः सकाळी अकराच्या सुमारास हजर राहिले. मात्र इतर प्रकरणांच्या सुनावणीत बराच वेळ गेल्याने या याचिकेची सुनावणी सुरू होण्यास बराच अवधी गेला. त्यानंतर कोर्टाने दिलेल्या सुचनेनुसार भूषण गगराणी यांनी निवडणूक ड्युटीच्या यापूर्वीची आदेशाबाबत कल्पना नसल्याने नजरचुकीने हा आदेश जारी केल्याची चूक कबूल करीत वैयक्तिक प्रतिज्ञापत्र वकिलामार्फत सादर केले. मात्र कोर्टाने आयुक्तंना कोणताही दिलासा न देता या प्रकरणाची सुनावणी न्यायमूर्ती चंद्रशेखर आणि न्यायमूर्ती गौतम अंखड यांच्या खंडपीठाने तीन आठवड्यांकरिता तहकूब केली. (High Court, Bhushan Gagrani. BMC election)

काय आहे हे प्रकरण?

जिल्हा निवडणूक अधिकारी म्हणून काम करणाऱ्या महापालिका आयुक्त भूषण गगराणी यांनी मुंबईतील सर्व कनिष्ठ न्यायालयातील कर्मचाऱ्यांना निवडणूक ड्युटीवर रुजू होण्याचे आदेश २२ डिसेंबरला सर्व कनिष्ठ न्यायालयात पाठवले होते. त्यापत्रावर मुख्य महानगर दंडाधिकाऱ्यांनी आक्षेप घेत महापालिका आयुक्त आणि मुंबई शहर जिल्हाधिकाऱ्यांना हायकोर्टानं कनिष्ठ न्यायालयातील कर्मचाऱ्यांच्या संदर्भात यापूर्वीच प्रशासकीय निर्णय घेत न्यायालयाच्या कर्मचाऱ्यांना निवडणूक कर्तव्यातून सूट देण्याची विनंती केली होती. मात्र पालिका आयुक्तांनी २९ डिसेंबर रोजी मुख्य न्यायदंडाधिकाऱ्यांना पत्र पाठवून कनिष्ठ न्यायालयातील कर्मचाऱ्यांना सूट देण्याची विनंती फेटाळून लावली होती. मात्र त्याची उच्च न्यायालयाने गंभीर दखल घेत ‘सुमोटो ‘याचिका दाखल करून घेत त्याच दिवशी रात्री आठ वाजता मुख्य न्यायमूर्तींच्या मलबार हिल येथील शासकीय निवासस्थानी दुसऱ्या न्यायमूर्तींना पाचरण करून एक विशेष खंडपीठ स्थापन केले होते. (High Court, Bhushan Gagrani. BMC election)

या सुनावणीत पालिका आयुक्तांच्या अधिकार क्षेत्रावर न्यायालयानं थेट बोट ठेवत याबाबत स्पष्टीकरण मागितले. त्यावर पालिका आयुक्तांनी काढलेले हे पत्र मागे घेऊ देण्याची विनंती महापालिकेच्या वकिलांनी केली होती. परंतु न्यायालयाने ती फेटाळून लावत जिल्हा निवडणूक अधिकारी म्हणून काम पाहणाऱ्या पालिका आयुक्तांना न्यायालयीन कर्मचाऱ्यांना निवडणूक कर्तव्यावर रुजू होण्याचे आदेश कोणत्या अधिकार क्षेत्रात घेतले?, याबाबत वैयक्तिक प्रतिज्ञापत्र दाखल करण्याचे आदेश दिले होते.

हायकोर्टाचे निर्देश काय आहेत ?

सप्टेंबर २००८ मध्ये घेतलेल्या निर्णयाचा दाखला देत पालिका आयुक्तांना त्यांनी २२ डिसेंबरला न्यायालयीन कर्मचाऱ्यांना निवडणुकीच्या कामावर बोलावणं पाठवत जारी केलेल्या पत्रावर तूर्तास कोणतीही कारवाई न करण्याचे हायकोर्टाचे निर्देश कायम आहेत. पालिका आयुक्तांना हायकोर्टानं धारेवर धरत कोणत्या अधिकारात ही नोटीस काढलीत?, असा थेट सवाल केलाय. त्या रात्रीच्या सुनावणीत राज्य निवडणूक आयोगाच्या उपसचिवांनी या सुनावणीत व्हिडीओ कॉन्फरन्सिंगमार्फत उपस्थित राहत खंडपीठाला माहिती दिली होती की, निवडणूक आयोग कधीही न्यायालयीन कर्मचाऱ्यांना निवडणूक कर्तव्यासाठी पाचारण करत नाही. (High Court, Bhushan Gagrani. BMC election)

January 5, 2026 0 comments

Newer Posts

Older Posts