बीड : वृक्षप्रेमी, वृक्षसंवर्धक अभिनेते सयाजी शिंदे यांनी बीड जिल्ह्यातील पालवन डोंगरावर साकारलेल्या देवराईला अचानक लागलेल्या आगीत अनेक झाडे जळून खाक झाली. या घटनेबद्दल सयाजी शिंदे यांनी दु:ख व्यक्त केले. (A forest in Beed district caught fire)
सयाजी शिंदे आणि त्यांच्या टीमने पालवन डोंगर रांगेत औषधी आणि दुर्मिळ वृक्षाची लागवड आणि जोपासना केली आहे. बुधवारी सायंकाळी पालवन डोंगररांगेत अचानक धुराचे लोट दिसू लागले. वाऱ्याचा वेग जासत असल्याने सह्याद्री देवराई प्रकल्पाला आगीने वेढले. देवराईत आग भडकल्याने जाळ आणि धूर दिसत होता. आग विझवण्यासाठी वन विभागाचे अधिकारी, कर्मचारी आणि ग्रामस्थांनी शर्थीचे प्रयत्न केले. काही तासानंतर आग विझवण्यात यश मिळाले. यामध्ये झाडांचे आणि वनस्पतींचे मोठे नुकसान झाले. (A forest in Beed district caught fire)
यापूर्वी २०२२ मध्ये याच देवराईला आग लागली होती. त्यावेळी चार ते सहा एकर परिसरातल हजारो झाडे जळून खाक झाली होती. याच वर्षी मार्च महिन्यातही डोंगराला आग लागली होती. बीड जिल्ह्यातील पालवन देवराई प्रसिद्ध असल्याने अनेक पर्यावरणप्रेमी, वृक्षप्रेमी भेट देत असतात. एक विकसित पर्यटनस्थळ म्हणून ही देवराई विकसित होत आहे. सयाजी शिंदे यांनी ही देवराई विकसित करण्यासाठी प्रयत्न करत आहेत. राज्यात सयाजी शिंदे यांनी दहा लाखांहून अधिक झाडे लावली आहेत. (A forest in Beed district caught fire)
