मुंबई : प्रतिनिधी : राज्याचे उपमुख्यमंत्री अजित पवार यांच्या विमान अपघातातील मृत्यूचा धक्का पचवत त्यांच्या पत्नी सुनेत्रा पवारांनी आज शनिवारी राज्याच्या उपमुख्यमंत्रीपदाची शपथ घेतली. त्या राज्याच्या पहिल्या महिला उपमुख्यमंत्री ठरल्या आहेत. यापुढे अजित पवारांच्या कार्याचा वारसा आणि राष्ट्रवादी काँग्रेसची धुरा सांभाळण्याचे शिवधनुष्य सुनेत्रा पवारांना पेलवावे लागणार आहे. (Sunetra Pawar took the oath of office as Deputy Chief Minister)
बुधवारी विमान अपघातात बारामतीत अजित पवारांचा विमान अपघातात निधन झाले होते. त्यांच्या निधनाने सर्वांनाच धक्का बसला होता. या धक्क्यातून सावरत राष्ट्रवादी काँग्रेस पक्षाने वेगाने पावले उचलत विधीमंडळ पक्षाचा नेता निवडीसाठी तयारी सुरू केली. पती निधनानंतर अवघ्या चौथ्या दिवशी राष्ट्रवादी काँग्रेस पक्षाच्या बैठकीत सुनेत्रा पवारांची पक्षाच्या गटनेतेपदी निवड झाली. तसेच पक्षाचे सर्वाधिकार त्यांना देण्यात आले. (Sunetra Pawar took the oath of office as Deputy Chief Minister)
त्यानंतर सायंकाळी पाच वाजता शपथविधी सोहळा अत्यंत साधेपणाने झाला. राष्ट्रगीत, महाराष्ट्र गीतानंतर सुनेत्रा पवार यांना राज्यपाल आचार्य देवव्रत यांनी उपमुख्यमंत्रीपदाची गोपनीय शपथ दिली. यावेळी त्यांचे पुत्र जय पवार, राष्ट्रवादीचे प्रदेशाध्यक्ष सुनील तटकरे, प्रफुल पटेल, छगन भुजबळ, हसन मुश्रीफ, धनंजय मुंढे यांच्यासह पक्षाचे आमदार, पदाधिकारी उपस्थित होते. सुनेत्रा पवार यांनी अजित पवार यांच्याप्रमाणेच गांभीर्यपूर्वक शपथ घेतली. यानंतर कार्यकर्त्यांनी लोकभवनातील दरबार हॉलमध्ये अजित पवार आणि सुनेत्रा पवार यांच्या नावाने घोषणाबाजी केली. ‘अमर रहे अमर रहे, अजित पवार अमर रहे’, ‘वहिणीसाहेब आप आगे बढो, हम आपके साथ है’, असे म्हणत कार्यकर्त्यांनी घोषणाबाजी केली. (Sunetra Pawar took the oath of office as Deputy Chief Minister)