Tag:

Maharashtra

काँग्रेसच्या वरिष्ठ निरीक्षकांची नियुक्ती

by प्रतिनिधी October 15, 2024

written by प्रतिनिधी

मुंबई; विशेष प्रतिनिधी : काँग्रेसचे राष्ट्रीय अध्यक्ष मल्लिकार्जुन खरगे यांनी महाराष्ट्र विधानसभा निवडणुकीसाठी विभागनिहाय वरिष्ठ निरीक्षकांची नियुक्ती केली आहे. मुंबई व कोकण विभागासाठी राजस्थानचे माजी मुख्यमंत्री अशोक गेहलोत व डॉ. जी. परमेश्वर यांची नियुक्ती केली आहे. विदर्भासाठी छत्तीसगडचे माजी मुख्यमंत्री भुपेश बघेल, पंजाबचे माजी मुख्यमंत्री चरणजीतसिंह चन्नी, उमंग सिंघर यांची नियुक्ती केली आहे. मराठवाड्यासाठी राजस्थानचे माजी उपमुख्यमंत्री सचिन पायलट आणि तेलंगाणाचे मंत्री उत्तमकुमार रेड्डी यांची नियुक्ती करण्यात आली आहे. पश्चिम महाराष्ट्रासाठी टी. एस. सिंगदेव आणि एम. बी. पाटील तर उत्तर महाराष्ट्रासाठी डॉ. सय्यद नासीर हुसेन व डी. अनसुया सिथक्का यांची नियुक्ती करण्यात आलेली आहे. (Congress)

अखिल भारतीय काँग्रेस कमिटीचे सरचिटणीस मुकुल वासनिक आणि अविनाश पांडे हे या निवडणुकीसाठी वरिष्ठ समन्वयक असतील, असे अखिल भारतीय काँग्रेस कमिटीने जाहीर केले आहे.

हेही वाचा :

October 15, 2024 0 comments

दक्षिण महाराष्ट्र

‘कागल’च्या जनतेची माफी मागा

by प्रतिनिधी October 14, 2024

written by प्रतिनिधी

कोल्हापूर; प्रतिनिधी : वैद्यकीय सहाय्य मंत्री तथा जिल्ह्याचे पालकमंत्री हसन मुश्रीफ वारंवार खालच्या दर्जाची, अशोभनीय व्यक्तव्ये करीत आहेत. ‘कागल’ राजर्षी शाहू महाराजांची जन्म व कर्मभूमी आहे. शाहू महाराजांनी भारतरत्न डॉ. बाबासाहेब आंबेडकर यांच्या नेतृत्वास पुढे आणून पुरोगामी विचारांचा पुरस्कार केला. अशा थोर पुरुषांच्या विचारांचा अपमान हसन मुश्रीफ करीत असून त्यांनी कागलच्या जनतेची माफी मागायला हवी. यांचा काय आदर्श घेणार असा हल्लाबोल ‘शाहू’ ग्रुपचे अध्यक्ष समरजीत घाटगे यांनी केला. (Samarjeet Ghatge)

हसन मुश्रीफ यांनी गडहिंग्लज येथील एका कार्यक्रमात ‘समरजीत घाटगे यांच्याबद्दल खालच्या शब्दात टीका केली होती. याविषयी बोलताना घाटगे म्हणाले, हसन मुश्रीफ यांच्यासारख्या जबाबदार लोकप्रतिनिधीकडून पुरोगामी कोल्हापुरातील जनतेने काय आदर्श घ्यायचा? शाहूंच्या कागलची ही बदनामी नव्हे का? यापूर्वी दिवंगत विक्रमसिंह घाटगे, सदाशिवराव मंडलिक, श्रीपतराव शिंदे, बाबासाहेब कुपेकर, आप्पासाहेब नलवडे यांच्यामध्ये टोकाचे मतभेद झाले. पण त्यांनी कधी अशी पातळी सोडली नाही. वारंवार शाहू महाराजांच्या कागलचा अपमान ते करत असून याच राजघराण्याने त्यांना राजकारणात आणले हे ते विसरले का?

निवडणूक अजून जाहीर झालेली नसतानाही मुश्रीफ यांची ही अवस्था झाली आहे. ही निवडणूक मुश्रीफ विरुद्ध ‘कागल’ची स्वाभिमानी जनता, अशी लढत होणार असल्याने याचा त्यांना अंदाज आला आहे. (Samarjeet Ghatge)

‘ईडी’च्या धाडीवेळी पळून का गेला..

हसन मुश्रीफ यांच्या घोरपडे साखर कारखान्याच्या शेअर्सपोटी शेतकऱ्यांकडून गोळा केलेले ४० कोटी त्यांनी खाल्ल्याचा आरोप आपण केला होता. त्याची न्यायालयीन प्रक्रिया सुरू आहे, तुरुंगवास इतर गोष्टी पुढच्या होत्या, मात्र त्या आधीच ते ज्येष्ठ नेते शरद पवार यांना सोडून गेले. दोषी नव्हता, तर ‘ईडी’चे पथक दारात आल्यानंतर आपण मागच्या दाराने पळून का गेला? असा सवाल समरजीत घाटगे यांनी केला.

हेही वाचा :

October 14, 2024 0 comments

महाराष्ट्र मुंबई

मी बाळासाहेबांचा शिवसैनिक, मला हलक्यात घेऊ नका

by प्रतिनिधी October 12, 2024

written by प्रतिनिधी

मुंबई; प्रतिनिधी : ‘आपले सरकार आले तेव्हा हे सरकार काही दिवसांत पडेल. पंधरा दिवसांत पडेल, महिन्यात पडेल, सहा महिन्यांत पडेल, असे दावे केले जात होते. पण टीका करणाऱ्याला हा एकनाथ शिंदे पुरून उरला. जनतेच्या आणि तुमच्या आशीर्वादाने आणि साथीने या सरकारने घासून, पुसून नाही तर ठासून दोन वर्षे पूर्ण केली. मी बाळासाहेबांचा शिवसैनिक आहे, मला हलक्यात घेऊ नका, असा इशारा देत मुख्यमंत्री एकनाथ शिंदे यांनी शिवसेना पक्षप्रमुख उद्धव ठाकरे यांना पुन्हा डिवचले. (Eknath Shinde)

आझाद मैदानावर शनिवारी शिवसेना शिंदे गटाच्या दसरा मेळावा झाला. त्यावेळी ते बोलत होते. काहींना हिंदू म्हणून घ्यायची लाज वाटत आहे. हिऱ्यापोटी जन्माला आलेल्या गारगोट्यांना आता हिंदू शब्दाची लाज वाटू लागली आहे, असा टोलाही त्यांनी ठाकरे यांना लगावला.

ते म्हणाले, शेतकऱ्यांसाठी पाच लाखांचा विमा देणारे महाराष्ट्र हे पहिले राज्य आहे. आमच्या सरकारकडून अनेक प्रकल्प पूर्णत्वास नेले जात आहेत. विकासाचे वारे जोरात वाहू लागले आहे. त्यामुळे असत्याचा आणि अहंकाराचा रावण जाळून टाकून प्रगतीचा व विजयाचा निर्धार करू. दोन वर्षांच्या अगदी कमी काळात आपले सरकार लाडके सरकार झाले असून अनेक कामे पूर्णत्वास नेली आहेत. लाडक्या बहिणी आणि लाडके भाऊ हे सरकारचे ब्रँड अँबेसिडर आहेत. येत्या विधानसभा निवडणुकीत ते हिसका दाखवतील, असा दावाही एकनाथ शिंदे यांनी केला. (Eknath Shinde)

धारावीकरांच्या पाठीशी…

धारावीतल्या सर्वांना म्हणजे दोन लाख १० हजार जणांना हक्काचे घर देणार आहोत. निवारा देणार आहोत. त्यामुळे विरोधकांच्या कोणत्याही अफवेवर विश्वास ठेवू नका. प्रत्येक धारावीकरांच्या पाठीशी आमचे सरकार खंबीरपणे उभे आहे. प्रत्येकाला हक्काचे घर देऊ, हा आमच्या डबल इंजीन सरकारचा शब्द आहे, अशा शब्दांत शिंदे यांनी आश्वस्त केले.

झोपटपट्टीसाठी योजना

रमाबाई आंबेडकर झोपडपट्टी योजना आम्ही एसआर आणि एमएमआरडीएला दिली आहे. तिथे १७ हजार घरे देणार आहोत. मुंबईत जे रखडलेले प्रकल्प आहेत, ज्यांना भाडे मिळत नाही, काही लोकांना मुंबईबाहेर जावे लागले हे सर्व प्रकल्प सरकार घेणार आणि पूर्ण करणार आहे, असे त्यांनी सांगितले. यावेळी शिवसेना शिंदे गटाचे प्रवक्ते नरेश म्हस्के, ज्योती वाघमारे यांनी मनोगत व्यक्त केले.

ते घरात, आम्ही दारात

कोरोनाकाळात खिचडी आणि कफन यांच्यात पैसे कोणी खाल्ले, मढ्याच्या टाळूवरचे लोणी खाणारे तुम्ही आहात, अशी टीका करून मुख्यमंत्री शिंदे म्हणले, सकाळ झाली मोरू उठला. आंघोळ केली आणि मोरू पुन्हा झोपला, अशी काही लोकांची अवस्था होती. बाळासाहेबांच्या मागे अख्खी दिल्ली झुकायची. आताचे त्यांचे नाव घेणारे दिल्लीच्या मागे मला मुख्यमंत्री करा, माझा चेहरा पुढे करा, म्हणून फिरत आहेत. अशावेळी तुमच्या सहकाऱ्यांना तुम्ही चालत नाही तर महाराष्ट्राला कसे चालाल, असा टोला एकनाथ शिंदे यांनी केला. आम्ही पीपीई किट घालून लोकांना मदत करत होतो हॉस्पिटलमध्ये जात होतो. तुम्ही घरात बसून होता, याचा पुनरुच्चार करत शिंदे यांनी उद्धव ठाकरे यांच्यावर टीका केली.

October 12, 2024 0 comments

महाराष्ट्र मुंबई

‘मविआ’ला घरचे झाले थोडे…

by प्रतिनिधी October 12, 2024

written by प्रतिनिधी

मुंबई; प्रतिनिधी : हरियाणा विधानसभा निवडणुकीचा निकाल जाहीर झाल्यानंतर महाराष्ट्राच्या निवडणुकीकडे सगळ्यांचे लक्ष लागले असतानाच समाजवादी पक्षाचे अध्यक्ष अखिलेश यादव यांनीही महाराष्ट्राकडे मोर्चा वळवला आहे. पक्षाच्या चार नेत्यांना महाराष्ट्राचे प्रभारी नेमून त्यांनी महाराष्ट्रात पक्षविस्ताराकडे लक्ष केंद्रित केले आहे. सूत्रांकडून मिळालेल्या माहितीनुसार, पुढील आठवड्यात अखिलेश यादव महाराष्ट्राच्या दौऱ्यावर येणार असून ते धुळे आणि मालेगाव या दोन मतदारसंघांचा दौरा करणार आहेत. या दोन्ही ठिकाणी एमआयएमचे आमदार असल्यामुळे याठिकाणी समाजवादी पक्षाला यश मिळू शकते, अशी त्यांची धारणा आहे. (Akhilesh Yadav)

लोकसभा निवडणुकीत उत्तर प्रदेशात समाजवादी पक्षाला चांगले यश मिळाल्यामुळे उत्तर प्रदेशच्या बाहेरही पक्षाचा विस्तार करण्याचे त्यांचे प्रयत्न सुरू आहेत, महाराष्ट्र हा त्यातील महत्त्वाचा टप्पा मानला जातो. मुस्लिम मतांवर दावेदारी करणाऱ्या असदुद्दीन ओवेसी यांच्या ‘एमआयएम’सोबत उत्तर प्रदेशातही त्यांचा संघर्ष आहे. त्यामुळे त्यांनी धुळे आणि मालेगावपासून सुरुवात करण्याचे ठरवल्याचे सांगण्यात येते. उत्तर भारतीय आणि मुस्लिम मतदार ही आपली हक्काची मतपेढी असल्याचा अखिलेश यांचा दावा आहे. तोच दावा मजबूत करण्यासाठी त्यांनी महाराष्ट्र दौऱ्याचे नियोजन केल्याचे सांगण्यात येते. महाविकास आघाडीतील पक्षांसोबत केंद्रात ते इंडिया आघाडीच्या माध्यमातून एकत्र असले तरी महाराष्ट्रातही आपल्या पक्षाला सन्मानजनक जागा मिळाव्यात, अशी त्यांची मागणी आहे. महाविकास आघाडीने त्याचा विचार केला नाही, तर सुमारे बारा जागांवर स्वतंत्रणे लढण्याची व्यूहरचना समाजवादी पक्षाने केल्याचे सांगण्यात येते. (Akhilesh Yadav)

लोकसभा निवडणुकीनंतर समाजवादी पक्ष देशातील तिसऱ्या क्रमांकाचा पक्ष बनला आहे. उत्तर प्रदेश, बिहारच्या मतदारांची संख्या लक्षणीय असलेल्या तसेच मुस्लिम बहुल असलेल्या महाराष्ट्रातील मतदारसंघांवर पक्षाने लक्ष केंद्रित केले असून अशा बावीस जागांवर चाचपणी करण्यात येत आहे. विधानसभेच्या २०१९च्या निवडणुकीत महाराष्ट्रात समाजवादी पक्षाला फक्त दोन जागांवर विजय मिळाला होता. भिवंडी पूर्वमधून रईस शेख आणि मानखुर्द शिवाजीनगर येथून अबू असीम आझमी निवडून आले होते. या दोन्ही जागांव्यतिरिक्त इतर दहा जागा लढवण्यासाठी पक्ष इच्छुक आहे. त्यामुळे महाविकास आघाडीपुढील अडचणी वाढणार आहेत. केंद्रातील इंडिया आघाडीत असलेल्या प्रमुख पक्षाला सोबत घेण्यासाठी महाविकास आघाडीवरील दबाव वाढला आहे. हरियाणातील पराभवानंतर काँग्रेस पक्ष बॅकफूटवर गेला असला तरी समाजवादी पक्षाच्या अपेक्षा पूर्ण करण्यात काँग्रेससह आघाडीतील अन्य पक्ष कितपत लवचिक धोरण स्वीकारतात, हा खरा प्रश्न आहे. समाजवादी पक्षाच्या रडारवरील काही जागा मुंबईतील असल्यामुळे शिवसेनेसाठीही त्यांची अडचण होणार आहे, त्यामुळे समाजवादी पक्षाला सोबत घेण्यासाठी मोठी कसरत करावी लागणार आहे. मविआचे नेते समाजवादी पक्षासाठी किती जागा सोडण्यास तयार होतात आणि समाजवादी पक्ष किती जागांवर तडजोड करतो, यावर भविष्यातील राजकारण अवलंबून आहे. आधीच जागावाटपावरून मविआमध्ये रस्सीखेच सुरू असताना, समाजवादी पक्षाच्या नव्या पवित्र्यामुळे आघाडीची अवस्था ‘घरचे झाले थोडे आणि व्याह्यांनी धाडले घोडे….’ अशी झाली आहे. उत्तर प्रदेशातून आलेले घोडे नव्हे, पण समाजवादी पक्षाची सायकल आपल्या ताफ्यात सामावून घेण्याचे आव्हान महाविकास आघाडीपुढे आहे.

हेही वाचा :

October 12, 2024 0 comments

महाराष्ट्र मुंबई

प्रकल्पग्रस्तांच्या पुनर्वसनासाठी नागनाथअण्णांच्या नावे महामंडळ

by प्रतिनिधी October 10, 2024

written by प्रतिनिधी

मुंबई; प्रतिनिधी : राज्यात सार्वजनिक प्रकल्पबाधित प्रकल्पग्रस्तांचे पुनर्वसन आणि विकासासाठी क्रांतिवीर नागनाथअण्णा नायकवडी प्रकल्पग्रस्तांचे पुनर्वसन व विकास महामंडळ स्थापन करण्याची घोषणा करण्यात आली. मुख्यमंत्री एकनाथ शिंदे यांच्या अध्यक्षतेखाली (दि.१०) झालेल्या मंत्रीमंडळ बैठकीत हा निर्णय घेण्यात आला. दरम्यान, या बैठकीत तब्बल ८० निर्णय घेण्यात आले. (Nagnath Naikwadi)

क्रांतिवीर नागनाथ अण्णा नायकवडी यांनी उभी हयात कष्टकरी शेतकरी, शेतमजूर आणि धरणग्रस्त-प्रकल्पग्रस्तांच्या विकासासाठी घालवली. त्यांच्या नावाने महामंडळ स्थापन करण्याच्या निर्णयाचे स्वागत होत आहे.

स्वतंत्र महाराष्ट्राच्या निर्मितीनंतर शेतीला पाणी तसेच वीजनिर्मिती यासाठी राज्यभरात धरणांची उभारणी करण्यात आली. धरणे, कालवे तसेच विविध विकासप्रकल्प उभारले गेले. या प्रकल्पात अनेक शेतकऱ्यांच्या, भूमिपुत्रांच्या जमिनी आणि घरे गेली. त्यांच्या पुनर्वसनाबाबतच्या अनेक मागण्या शासनस्तरावर गेली अनेक वर्षे पडून आहेत. राज्यातील विविध प्रकल्पबाधितांची संख्या मोठी आहे. त्यांच्यासाठी पुनर्वसन महामंडळाची निर्मिती करण्याची बाब शासनाच्या विचाराधीन होती. ती यानिमित्ताने पूर्ण झाली. तसेच या महामंडळाला नागनाथअण्णांचे नाव देऊन राज्य सरकारने त्यांचाही गौरव केला आहे. (Nagnath Naikwadi)

क्रांतिवीर नागनाथ अण्णांनी विद्यार्थीदशेतच चलेजाव चळवळीत सहभाग घेतला. त्यानंतर सातारच्या प्रतिसरकाच्या माध्यमातून इंग्रजांविरोधात सशस्त्र उठाव केला.

स्वातंत्र्यानंतर हुतात्मा किसन अहिर साखर कारखान्याची स्थापना केली. त्या माध्यमातून शिक्षण आणि सहकार चळवळीत उल्लेखनीय कार्य केले. कष्टकरी शेतकरी, शेतमजूर आणि धरण व प्रकल्पग्रस्तांसाठी मोठी चळवळ उभारली. १९९३ साली वारणा आणि कोयना धरणग्रस्तांच्या पुनर्वसनासह अन्य प्रश्नांवर त्यांनी मुंबईत मोर्चा काढून शासनाचे लक्ष वेधले. दुष्काळी भागातील १३ तालुक्यांना पाणी मिळाले पाहिजे, यासाठी सातत्याने सांगली जिल्ह्याच्या आटपाडी येथे दरवर्षी पाणी परिषदाही भरवल्या. सरकारने साखर कारखान्यांवर आयकर लादण्याच्या निर्णयाविरोधातही त्यांनी यशस्वी लढा दिला.

हेही वाचा :

October 10, 2024 0 comments

महाराष्ट्र मुंबई

महायुती सरकारचा निर्णयांचा धडाका

by प्रतिनिधी October 10, 2024

written by प्रतिनिधी

महाराष्ट्र दिनमान ऑनलाईन डेस्क : मुख्यमंत्री एकनाथ शिंदे यांच्या अध्यक्षतेखाली आज (दि.१०) राज्य मंत्रीमंडळाची शेवटची बैठक पार पडली. येत्या काही दिवसात विधानसभा निवडणुकीच्या तारखांची घोषणा होण्याची शक्यता आहे. काही दिवसांत आचारसंहिता लागण्याची शक्यता आहे.तत्पूर्वी आज झालेल्या मंत्रिमंडळाच्या बैठकीत महायुती सरकारने तब्बल ८० निर्णय घेतले आहेत. शेवटची कॅबिनेट बैठक असण्याची शक्यता असल्याने सरकारतर्फे निर्णय घेण्यात आले आहेत. पत्रकारांसाठी आणि वृतपत्र विक्रेते यांच्यासाठी दोन स्वतंत्र महामंडळांना कॅबिनेटची मंजुरी देण्यात आली आहे. (Eknath Shinde)

राज्य सरकारने निर्णयांचा धडाका लावत नव्याने काही महामंडळ स्थापन करण्यास मंजुरी दिली आहे. यात संत गोरोबा कुंभार महामंडळ, कोळी समाज महामंडळासाठी प्रस्ताव मागवण्यात आला आहे. लेवा पाटील समाज महामंडळाला मंजुरी देण्याचा निर्णय घेण्यात आला आहे. नॉन क्रिमीलयेर संदर्भातील प्रस्ताव केंद्राकडे मंजुरीसाठी पाठवण्यात आला आहे. ओबीसी नॉन क्रिमीलेअरच्या उत्पन्नचा टप्पा ८ लाखाहून १५ लाखापर्यंत नेण्याचा या प्रस्तावात नमूद करण्यात आलं आहे. आर्थिक विकास महामंडळाचा निर्णयही घेण्यात आला आहे. (Eknath Shinde)

रतन टाटा नावाने उद्योग रत्न पुरस्कार

रतन टाटा यांना मरणोत्तर भारतरत्न देण्यात यावा, असा प्रस्ताव पाठवला आहे, असे गिरीश महाजन यांनी सांगितले. रतन टाटा याना जो पहिला उद्योग रत्न पुरस्कार देण्यात आला होता. तो यापुढे रतन टाटा यांच्या नावाने देण्यात येईल, असा महत्त्वाचा निर्णय घेण्यात आला आहे. याशिवाय मुंबई इथं उद्योग भवन उभारलं जात असून त्याला रतन टाटा यांचं नाव देण्यात येणार आहे. ठाणे रत्नागिरी आदी कामासाठी सीएसआर मधून ५०० कोटी रुपये रतन टाटा यांनी दिले होते. नवीन उद्योग भवन हे ७०० कोटींचे होत आहे याला नाव देऊन एक प्रकारे शासकीय श्रध्दांजली असेल अशी माहिती मंत्री उदय सामंत यांनी दिली.

मंत्रीमंडळाचे महत्त्वाचे निर्णय

वांद्रे शासकीय कर्मचाऱ्यांना घरांसाठी जागा देणार (सार्वजनिक बांधकाम)
सावनेर,कणकवली,राजापूर, अंबरनाथ, जिहे कठापूर, लातूरच्या जलसंपदा प्रकल्पांना मान्यता (जलसंपदा विभाग)
महाराष्ट्र सार्वजनिक ग्रंथालये अधिनियमात सुधारणा (उच्च व तंत्र शिक्षण)
कायमस्वरुपी विनाअनुदान तत्वावर नवीन समाजकार्य महाविद्यालय (उच्च व तंत्र शिक्षण)
राज्यात तीन नव्या खासगी विद्यापीठांना मान्यता. (उच्च व तंत्र शिक्षण)
राज्यातील अंगणवाडी केंद्रांमध्ये पाळणाघरे सुरू करणार (महिला व बाल)
जिल्हा परिषद अध्यक्ष,उपाध्यक्ष,सभापती, उपसभापतींच्या निवडणूकीस मुदतवाढ (ग्राम विकास)
सिडको महामंडळ व पुणे महानगर प्रदेश विकास प्राधिकरणास दिलेले भूखंड कब्जेहक्काने रुपांतरीत करणार (नगर विकास)
केंद्र शासनाची अॅग्रिस्टॅक योजना राबवणार (कृषि)
मा. बाळासाहेब ठाकरे हळद संशोधन केंद्रास अतिरीक्त निधी (कृषि).
पालघर जिल्ह्यातील विविध गावांतील जागा एमआयडीसीला (महसूल)
बोरीवली तालुक्यातील जागा धारावी पुनर्विकास प्रकल्पासाठी (महसूल)
महाराष्ट्र धारण जमिनींचे तुकडे पाडण्यास प्रतिबंध करण्याच्या अधिनियमात सुधारणा (महसूल)
कुर्ल्यातील शासकीय जमीन डायलेसिस सेंटरसाठी शाहीर अमर शेख प्रबोधनीला (महसूल)
बाळासाहेब ठाकरे गोरेवाडा आंतरराष्ट्रीय प्राणिसंग्रहालयात आफ्रिकन सफारी प्रकल्प (वने)
पशुसंवर्धन व दुग्धव्यवसाय विभागाची पुनर्रचना (पशुसंवर्धन,दुग्धविकास व्यवसाय)
भेंडाळे वस्ती प्रकल्प पाणी पुरवठा विभागास हस्तांतरित (मृद व जलसंधारण)
रमाबाई आंबेडकर मधील झोपडपट्टी पुनर्वसनासाठी खासगी जमिनीचा मोबदला देणार (गृहनिर्माण)
मराठवाड्यातील शाळांकरीता भारतरत्न डॉ. बाबासाहेब आंबेडकर आदर्श शाळा योजनेत निधी (शालेय शिक्षण)
राज्यात आंतररष्ट्रीय रोजगार व कौशल्य विकास कंपनी (शालेय शिक्षण)
शाळांना २० टक्के वाढीव अनुदानाचा टप्पा (शालेय शिक्षण)
न्यायमुर्तींच्या खासगी सचिवांना सचिवालयीन संवर्ग (विधि व न्याय)
नाशिकरोड,तूळजापूर,वणी-यवतमाळ येथे न्यायालय (विधि व न्याय)
नानाजी देशमुख कृषी संजिवनी प्रकल्पाचा दुसरा टप्पा राबवणार (कृषि)
महाराष्ट्र राज्य अनुसूचित जाती आयोगास वैधानिक दर्जा (सामाजिक न्याय व विशेष सहाय्य)
शबरी महामंडळाच्या थकहमीची मर्यादा वाढवून शंभर कोटी. (आदिवासी विकास)
देवळालीतील भूखंड नाशिक रोडच्या महाराष्ट्र साहित्य परिषदेला (नगर विकास)
मौलाना आझाद महामंडळाच्या भागभांडवलात वाढ (अल्पसंख्याक विकास)
मदरश्यांमधील शिक्षकांच्या मानधनात वाढ (अल्पसंख्याक विकास)
पिंपरी चिंचवड पोलीसांच्या परेड ग्राऊंडसाठी पशुसंवर्धन विभागाची जागा (गृह)
समृध्दी महामार्गास जोडणाऱ्या जालना ते नांदेड द्रुतगती महामार्गास मान्यता (सार्वजनिक बांधकाम
कात्रज कोंढवा उड्डाणपुलास बाळासाहेब देवरस यांचे नाव (सार्वजनिक बांधकाम)
आपत्ती सौम्यीकरणाची कामे आता स्थानिक स्वराज्य संस्थांमार्फत (मदत व पुनर्वसन)
राहता तालुक्यातील शेती महामंडळाची जागा क्रीडांगणासाठी (महसूल)
शिंपी,गवळी,लाडशाखीय वाणी-वाणी, लोहार, नाथपंथीय समाजासाठी महामंडळे (इतर मागास बहुजन कल्याण)
पत्रकार तसेच वृत्तपत्र विक्रेत्यांसाठी स्वतंत्र महामंडळे (कामगार)
कराड तालुक्यातील उंडाळे योजनेच्या दुरुस्तीस मान्यता (मृद व जलसंधारण)
सार्वजनिक रुग्णालयांमध्ये सुलभ शौचालयांची सुविधा (सार्वजनिक आरोग्य)

October 10, 2024 0 comments

ताज्या बातम्या दक्षिण महाराष्ट्र

ऑलिंपिक पदक विजेता स्वप्निलचा सन्मान करण्यात राज्यसरकाकडून दुर्लक्ष

by प्रतिनिधी October 7, 2024

written by प्रतिनिधी

कोल्हापूर; प्रतिनिधी : खाशाबा जाधव यांच्यानंतर तब्बल ७२ वर्षांनंतर आलिम्पिकमध्ये स्वप्नील कुसाळेने शूटिंगमध्ये महाराष्ट्राला वैयक्तीक पदक मिळवून दिले. ऑलिंपिकमध्ये पदक पटकावून दोन महिने झाले तरी महाराष्ट्र राज्य शासनाकडून स्वप्नीलचा योग्य सन्मान अद्याप झालेला नाही, असा आरोप स्वप्निल कुसाळे यांच्या कुटुंबियांनी पत्रकार परिषदेत केला. (Swapnil Kusale)

राज्यसरकारने नुकतील ऑलिम्पिक पदक विजेत्या खेळाडूंच्या बक्षीसांची वर्गवारी करण्यात आली. यात सुवर्ण, रौप्य आणि ब्राँझ पदक विजेत्यांसाठी अनुक्रमे पाच कोटी, तीन व दोन कोटी अशा बक्षीसांचा समावेश आहे. ही वर्गवारी कोणासाठी केली ? असा प्रश्न स्वप्निलच्या कुटंबियांनी केली. बक्षीसांची घोषणा ऑलिम्पिकपूर्वी होणे आवश्यक होती. २०२८ च्या ऑलिंपिकमध्ये सुवर्ण पदक पटकावण्यासाठी स्वप्निलने तयारी सुरु केली आहे. त्यासाठी राज्यशासनाचे पाठबळ तोकडे असल्याचे कुसाळे यांनी सांगितले.(Swapnil Kusale)

भारतीय क्रिकेट संघाने नुकताच वर्ल्डकप जिंकला. या संघात महाराष्ट्रातील तीन खेळाडूंचा समावेश होता. वर्ल्डकप जिंकल्यानंतर राज्य शासनाने या खेळाडूंचा विधानभवनात सत्कार केला. तसेच संघाला तब्बल ११ कोटी रुपयांचे बक्षीसही दिले. मात्र असे भाग्य स्वप्निलच्या वाट्याला आले नाही, अशी खंत त्याच्या कुटुंबियांनी केली. राज्यसरकारने स्वप्नीलच्या पदकाबाबत चेष्ठा केल्याची भावना कुसाळे कुटूंबियांनी व्यक्त केली.

हरियाणा राज्य सरकारकडून तेथील ऑलिम्पिक पदक विजेत्या खेळाडूंना प्रत्येकी चार ते पाच कोटी रुपयांचे बक्षीस दिले आहे. यात मनु भाकर, विनेश फोगाट, निरज चोप्रा यांचा समावेश आहे. हरियाणा राज्याच्या तिप्पट आर्थिक उत्पन्न महाराष्ट्राचे असून देशाची आर्थिक राजधानी मुंबईही महाराष्ट्रातच आहे. महाराष्ट्र राज्याने इतर राज्यातील खेळाडूंनाही मदत दिली आहे. त्याच प्रमाणे इतर राज्यांकडूनही देशासाठी पदक आणणाऱ्या स्वप्निलला बक्षीस द्यायला पाहिजे होते असे कुसाळे यांनी सांगितले. (Swapnil Kusale)

इतर राज्यांप्रमाणे स्वप्निलला किमान पाच कोटींचे आर्थिक पाठबळ मिळावे. बालेवाडी क्रीडा संकुलजवळ फ्लॅट द्यावा आणि तो सराव करत असलेल्या केंद्राला त्याचे नाव द्यावे अशा मागण्या कुसाळे कुटूंबियांनी पत्रकार परिषदेत केल्या.

२०१३ मध्ये शूटिंग नेमबाजीच्या वर्ल्डकपसाठी त्यावेळच्या राज्य सरकारनं एक कोटी बक्षीस दिले होते. याचा आढावा घेवून मुख्यमंत्र्यांनी पदक विजेत्या स्वप्नीलचा उचित गौरव करावा यासाठी दोन दिवसांत कोल्हापूर दौऱ्यावर येणाऱ्या मुख्यमंत्र्यांची भेट घेणार आहे. यापूर्वी स्थानिक आमदार प्रकाश आबिटकर यांच्या माध्यमातून १२ ऑगस्ट रोजी मुख्यंमत्र्यांना याबाबतचे पत्र दिले आहे. शिवाय स्वत: स्वप्निलनेही मुख्यमंत्र्यांची त्यांच्या वर्षा निवासस्थानी जावून भेट घेतली आहे. मात्र, याबाबत कोणतीही कार्यवाही झाली नसल्याचे स्वप्नीलचे वडील सुरेश कुसाळे यांनी सांगितले. पत्रकार परिषदेस स्वप्नीलच्या आई व कांबळवाडी (ता. राधानगरी)च्या सरपंच अनिता कुसाळे, भाऊ रोहित कुसाळे, गौरव कुसाळे, युवराज हुबळे आदी उपस्थित होते.

हेही वाचा :

October 7, 2024 0 comments

दक्षिण महाराष्ट्र

‘स्वाभिमानी’चा २५ रोजी ऊस परिषदेत एल्गार

by प्रतिनिधी October 6, 2024

written by प्रतिनिधी

कोल्हापूर; प्रतिनिधी : गतवर्षी गेलेल्या उसाला प्रतिटन २०० रुपयांचा दुसरा हप्ता अगोदर द्यावा त्यानंतरच यावर्षीच्या हंगाम सुरू करावा अशी मागणी स्वाभिमानी शेतकरी संघटनेचे नेते, माजी खा. राजू शेट्टी यांनी केली. २५ ऑक्टोबरला जयसिंगपूर येथे स्वाभिमानी शेतकरी संघटनेची ऊस परीषद होणार असल्याचेही जाहीर केले. उदगांव (ता. शिरोळ) येथे संघटनेचा कार्यकर्ता मेळावा पार पडला. यावेळी ते बोलत होते. अध्यक्षस्थानी आण्णाप्पा पांदारे होते. (Raju Shetti)

यावेळी शेट्टी म्हणाले, ‘महायुतीचे सरकार शेतकऱ्यांच्या नाही तर उद्योगपतींच्या बाजूचे आहे. खा. शरद पवार शेतकऱ्यांच्या प्रश्नावर गप्प आहेत. राज्यात सध्या परिवर्तनाची गरज आहे. मजबूत तिसऱ्या आघाडीची आवश्यकता आहे. त्यासाठी परिवर्तन महाशक्ती आघाडीने सर्व लहान पक्षांना एकत्र करून नवा पर्याय दिला आहे. गतवर्षीच्या ऊस दराचे आंदोलन झाल्यामुळे साखर कारखानदारांना दर देणे भाग पडले. यापुढे स्वाभिमानीच्या आंदोलनाची व्याप्ती वाढवणार आहे. शिष्यवृत्तीसाठी डाटा गोळा करणारे, ऊसतोड मजूर, वाहतूकदार, कंत्राटी वीज कर्मचारी यांच्यासाठीही यापुढे आंदोलन करण्यात येईल. यावेळी प्रा. जालिंदर पाटील, जि.प.चे माजी सदस्य अनिल मादनाईक यांची भाषणे झाली. (Raju Shetti)

स्वागत राजाराम देसाई यांनी केले. प्रास्ताविक मिलिंद साखरपे यांनी केले. स्वाभिमानीचे जिल्हाध्यक्ष वैभव कांबळे, जनार्दन पाटील , भागवत जाधव, राजेंद्र गड्डयाण्णवार, राजगोंडा पाटील, सचिन शिंदे, अजित पाटील, जयकुमार कोल्हे आदींनी मनोगत व्यक्त केले.

हेही वाचा :

October 6, 2024 0 comments

महाराष्ट्र विधानसभा निवडणूक

महायुतीला पश्चिम महाराष्ट्रात आणखी एक धक्का

by प्रतिनिधी October 5, 2024

written by प्रतिनिधी

महाराष्ट्र दिनमान ऑनलाईन डेस्क : विधानपरिषदेचे माजी सभापती रामराजे नाईक-निंबाळकर शरद पवार गटात प्रवेश करण्याची दाट शक्यता आहे. महायुतीमधील आणखी एक मोठा नेता धक्का देण्याच्या तयारीत असून आजच रामराजे नाईक निंबाळकर महत्त्वाचा निर्णय घेण्याची शक्यता आहे. (Maharashtra Politics)

रामराजे नाईक निंबाळकर यांनी आज (ता. ५) रात्री फलटण येथे कार्यकर्त्यांचा मेळावा बोलावला आहे. या कार्यकर्त्यांशी विश्वासात घेऊन निर्णय घेणार आहेत परंतु, रामराजे नाईक निंबाळकर यांनी अजित पवार यांच्या गटाची साथ सोडून राष्ट्रवादी शरद पवार गटात जाण्याचा निर्णय पक्का असल्याची माहिती आहे.. रामराजे यांच्यासोबत विद्यमान आमदार दीपक चव्हाण ही अजित पवार यांची साथ सोडतील. दीपक चव्हाण यांनी अजित पवार यांची साथ सोडल्यास हा अजित पवार यांच्यासाठी दुहेरी धक्का ठरेल.कारण काही दिवसांपूर्वी अजित पवार यांनी दीपक चव्हाण यांना विधानसभेचे उमेदवारी जाहीर केली होती. (Maharashtra Politics)

रामराजे निंबाळकर कुठेही जाणार नाहीत : अमोल मिटकरी

अजितदादा गटाचे प्रवक्ते अमोल मिटकरी यांनी रामराजे नाईक निंबाळकर गटातून बाहेर जाण्याचे वृत्त फेटाळून लावले. रामराजे नाईक निंबाळकर यांचा आजचा मेळावा कार्यकर्त्यांशी हितगुज करण्यासाठी घेतलेला आहे. याचा अर्थ रामराजे निंबाळकर आणि दीपक चव्हाण शरद पवार गटात जाणार, असा होत नाही. रामराजे नाईक निंबाळकर यांनी यापूर्वीही काहीही चर्चा होऊ दे, मी दुसरीकडे जाणार नाही, असे स्पष्ट केले आहे. ते घाईगडबडीत कुठलाही निर्णय घेणार नाहीत.वेळ पडल्यास राष्ट्रवादी काँग्रेसचे ज्येष्ठ नेते सुनील तटकरे आणि प्रफुल पटेल हे त्यांच्याशी चर्चा करतील.

हेही वाचा :

October 5, 2024 0 comments

दक्षिण महाराष्ट्र

Sangli News | सांगली : रेवनाळमध्ये लांडग्याच्या हल्ल्यात वीस मेंढ्या ठार

by प्रतिनिधी October 1, 2024

written by प्रतिनिधी

जत : तालुक्यातील रेवनाळ येथे लांडग्याच्या हल्ल्यात वीस मेंढ्या, तर चार कोकरे मृत्युमुखी पडली आहेत. या घटनेत सोपान लोखंडे (रा.रेवनाळ ता.जत) यांच्या परिवाराचे मोठे आर्थिक नुकसान झाले आहे. सोमवारी (दि.३०) पहाटे ही घटना घडली. मेंढ्या ओरडण्याचा आवाज येताना लोखंडेंसह कुटुंबीय जागे झाले. त्यानंतर लांडग्याच्या कळपाने तेथून धूम ठोकली. दरम्यान, या घटनेची माहिती मिळताच वन पशुवैद्यकीय अधिकाऱ्यांनी घटनास्थळी येऊन पाहणी करून पंचनामा केला. या परिवाराला तत्काळ मदत मिळावी, अशी मागणी ग्रामस्थांतून होत आहे. (Sangli News)

अधिक माहिती अशी की, सोपान लोखंडे हे शेतीसह जोडधंदा म्हणून मेंढपाळ व्यवसाय करतात. लोखंडे हे घरामध्ये झोपलेले असताना सोमवारी (दि. ३०) पहाटे चारच्या सुमारास लांडग्याच्या कळपाने घराच्या शेजारी उभारण्यात आलेल्या मेंढ्याच्या वाखरीत हल्ला चढविला. या हल्ल्यात २० मोठ्या मेंढ्या व चार लहान कोकरे यांचा जागीच मृत्यू झाला. मेंढ्यांच्या ओरडण्याचा आवाज येत असल्याने लोखंडे परिवार जागा झाला. त्यानंतर लांडग्याच्या कळपाने तेथून धूम ठोकली.

यावेळी जिल्हा बँकेचे संचालक प्रकाश जमदाडे यांनी रेवनाळ येथे जाऊन लोखंडे परिवाराची भेट घेतली. त्यांना प्रकाशराव जमदाडे यूथ फाउंडेशनकडून ११ हजार रुपयांची मदत केली. शासन व प्रशासनाकडे पाठपुरावा करून लोखंडे परिवाराला तत्काळ नुकसानभरपाई मिळवण्यासाठी प्रयत्न करू, अशी ग्वाही जिल्हा बँक संचालक प्रकाश जमदाडे यांनी दिली. (Sangli News )

हेही वाचा :

October 1, 2024 0 comments

Newer Posts

Older Posts