नवी दिल्ली : पंतप्रधान नरेंद्र मोदी यांनी मंगळवारी (२ सप्टेंबर) बिहारच्या रॅली वादावर तीव्र टीका करत आपले मौन सोडले. एका व्हायरल व्हिडिओमध्ये त्यांच्या दिवंगत आईबद्दल अपमानास्पद टिप्पणी करण्यात आली होती. त्यांनी या टिप्पणीला केवळ त्यांचाच नाही तर “देशातील प्रत्येक आई, बहीण आणि मुलीचा” अपमान म्हटले आहे, असे सांगून बिहारचे लोक त्यांच्या दुःखात सहभागी झाल्याचे सांगितले. (Modi attacks oppositions)
बिहार राज्य जीविका निधी सहकारी संघ लिमिटेडच्या एका कार्यक्रमात बोलताना पंतप्रधान मोदी म्हणाले, ‘‘आई ही आपली दुनिया आहे. आई ही आपला स्वाभिमान आहे. काही दिवसांपूर्वी परंपरेचा सन्मान करणाऱ्या या समृद्ध बिहारमध्ये काय घडले याची मी कल्पनाही केली नव्हती. बिहारमध्ये राजद-काँग्रेसच्या मंचावरून माझ्या आईला शिवीगाळ करण्यात आली… हा केवळ माझ्या आईचा अपमान नाही. हे देशातील माता, बहिणी आणि मुलींचा अपमान आहे. मला माहिती आहे… हे पाहिल्यानंतर आणि ऐकल्यानंतर तुम्हा सर्वांना, बिहारच्या प्रत्येक आईला किती वाईट वाटले! मला माहिती आहे, माझ्या हृदयात जितकी वेदना आहे तितकीच वेदना बिहारच्या लोकांनाही आहे.” (Modi attacks oppositions)
पंतप्रधान मोदी पुढे म्हणाले की, त्यांच्या दिवंगत आईने त्यांना स्वतःपासून दूर केले होते जेणेकरून ते त्यांचे आयुष्य देशसेवेसाठी समर्पित करू शकतील. (Modi attacks oppositions)
ते म्हणाले, “माझ्या आईने मला त्यांच्यापासून वेगळे केले जेणेकरून मी तुमच्यासारख्या कोट्यावधी मातांची सेवा करू शकेन. तुम्हाला सर्वांना माहिती आहे की आता माझी आई हयात नाही. काही काळापूर्वी, वयाची १०० वर्षे पूर्ण केल्यानंतर, ती आपल्या सर्वांना सोडून गेली. माझी ती आई, जिचा राजकारणाशी काहीही संबंध नव्हता, जी आता नाही, तिला राजद, काँग्रेसच्या मंचावरून शिवीगाळ करण्यात आली. बहिणी आणि मातांनो, मी तुमचे चेहरे पाहू शकतो; तुम्हाला किती वेदना झाल्या असतील याची मी फक्त कल्पना करू शकतो. काही मातांच्या डोळ्यात अश्रू मला दिसत आहेत. हे खूप दुःखद, वेदनादायक आहे.”
