कोल्हापूर : प्रतिनिधी : मराठा आंदोलक मनोज जरांगे पाटील यांनी सादर केलेली ऑडिओ क्लिप गंभीर असून मराठा समाजात तेढ निर्माण करणाऱ्या या ऑडिओ क्लिपची फॉरेन्सिक आणि सायबर सेलकडून चौकशी व्हावी, अशी मागणी मंत्री उदय सामंत यांनी मुख्यमंत्री देवेंद्र फडणवीस यांच्याकडे केली आहे. या क्लिपमधील चर्चा करणाऱ्या व्यक्ती भाजप पक्षाशी संबधित असून त्यांच्या आवाजाचे नमुने फॉरेन्सिक लॅबकडे पाठवून त्याचे सत्य समोर आले पाहिजे. ही क्लिप म्हणजे एकनाथ शिंदे व खासदार डॉ. श्रीकांत शिंदे यांच्या बदनामीचे षडयंत्र असून त्याची सखोल चौकशी झाली पाहिजे, असे मंत्री सामंत यांनी म्हटले आहे. कोल्हापूर येथे आयोजित पत्रकार परिषदेत ते बोलत होते. (Uday Samant demands an inquiry into the audio clip)
श्वेता शालिनी, आमदार भातखळकर,सुशील कुलकर्णींचा आवाज
मंत्री सामंत म्हणाले की, शिंदे साहेबांनी मराठा समाजाचे आंदोलन चांगल्या पद्धतीने हाताळले होते, त्यांनी मराठा समाजाला न्याय देण्याची भूमिका घेतली होती, मात्र त्यांच्याबद्दल बदनामीकारक वक्तव्य या पूर्ण आडिओ क्लिपमध्ये ऐकायला मिळतात. या ऑडिओमध्ये भाजपच्या सोशल मिडियाशी संबधित श्वेता शालिनी, आमदार अतुल भातखळकर, युट्यूबर सुशील कुलकर्णी यांच्यासारखा आवाज आहे. या ऑडिओ क्लिपमधून समाजा-समाजात तेढ निर्माण करण्याचा प्रयत्न झाला. ही ऑडिओ क्लिप कोणी रेकॉर्ड केली, कशासाठी व्हायरल केली व त्यात मराठा समाजाचे आंदोलन चिरडण्याचा प्रयत्न होता का, याची चौकशी केली गेली पाहिजे, असे मंत्री सामंत म्हणाले. (Uday Samant demands an inquiry into the audio clip)
श्रीकांत शिंदेंचा उल्लेख करणाऱ्या महिलेने पुरावे द्यावेत
ते पुढे म्हणाले की, यात काही संबंध नसताना डॉ. श्रीकांत शिंदे यांचा उल्लेख करण्यात आला. डॉ. श्रीकांत शिंदे यांचा उल्लेख केल्यानंतर एकनाथ शिंदे बदनाम होतील, शिवसेना बदनाम होईल, अशा प्रकारचे षडयंत्र ऐकायला मिळते, हे दुर्देवी आणि गंभीर आहे, असे मंत्री सामंत म्हणाले. या ऑडिओ क्लिपमध्ये डॉ. श्रीकांत शिंदे यांनी ५०० कोटी रुपये जरांगे पाटील यांना दिले, असे वक्तव्य भाजपशी संबधित असलेल्या श्वेता शालिनी या महिलेने केले आहे. मराठा समाजाच्या आरक्षणाला पाठिंबा देण्याचे काम खासदार डॉ. शिंदे यांनी केले, मात्र त्यांचीही बदनामी करण्याचा प्रयत्न या क्लिपमध्ये झालाय. खासदार डॉ. शिंदेंचा उल्लेख करणाऱ्या महिलेने याचे पुरावे सादर केले पाहिजेत, अशी मागणी मंत्री सामंत यांनी केली आहे. क्लिपमध्ये जे कोणी बोललेत त्यांचा आवाज खरा की खोटा यासाठी क्लिप फॉरेन्सिक लॅबमध्ये पाठवून त्याचे सत्य जनतेसमोर आले पाहिजे. त्यांचा आवाज खरा असेल तर त्यांच्यावर काय कारवाई करणार हे भारतीय जनता पक्षाने स्पष्ट केलं पाहिजे, असे मंत्री सामंत म्हणाले.
शिवसेना, मराठा समाजात दुही निर्माण करण्याचा प्रयत्न
एकनाथ शिंदे, देवेंद्र फडणवीस हे मराठा समाजासाठी चांगल काम करत असताना मराठा समाजाविरोधात षडयंत्र तयार करणं हे योग्य आहे का, महायुतीमध्ये शिवसेना आणि मराठा समाजात जाणीवपूर्वक दुही निर्माण करण्याचा कोणी प्रयत्न करतंय का, याचा खुलासा संबधित यंत्रणेकडून होणे आवश्यक आहे, असे ते म्हणाले. हे प्रकरण गंभीर असून पोलीस, सायबर सेल, फॉरेन्सिक विभाग आणि पक्षाच्या स्तरावर या ऑडिओ क्लिपची चौकशी होणे आवश्यक आहे, असे मंत्री सामंत यांनी म्हटले आहे. (Uday Samant demands an inquiry into the audio clip)