रावळपिंडी : चॅम्पियन्स ट्रॉफी वन-डे क्रिकेट स्पर्धेतील ‘ग्रुप ए’मधील पाकिस्तान-बांगलादेश सामना गुरुवारी पावसामुळे रद्द करण्यात आला. पाकिस्तान व बांगलादेश या दोन्ही संघांचा हा अखेरचा साखळी सामना होता. सामना रद्द झाल्याने दोन्ही संघांना प्रत्येकी १ गुण मिळाला असला, तरी त्यांना एकाही विजयाशिवाय स्पर्धेबाहेर जावे लागले. (Rain)
दोन दिवसांपूर्वी रावळपिंडी स्टेडियमवरच ‘ग्रुप बी’मधील ऑस्ट्रेलिया व दक्षिण आफ्रिका यांच्यातील सामना रद्द करण्यात आला होता. त्यानंतर, आज या स्टेडियमवरील सलग दुसरा सामना रद्द झाला. या चॅम्पियन्स ट्रॉफीमधील रावळपिंडी स्टेडियमवरचा हा अखेरचा सामना होता. यानंतर पाकिस्तानातील उर्वरित सामने लाहोर व कराची येथे रंगणार आहेत. गुरुवारी पावसाने जराही उसंत न घेतल्यामुळे मैदानावरील अच्छादन सकाळपासूनच कायम ठेवण्यात आले. अखेर दुपारी ४ वाजता ॲड्रियन होल्डस्टिक आणि मायकेल गॉफ या पंचांनी मैदानाची पाहणी करून सामना रद्द करण्याचा निर्णय घेतला.(Rain)
पाकिस्तान व बांगलादेश या दोन्ही संघांना साखळी फेरीत प्रत्येकी दोन पराभव पत्करावे लागल्याने त्यांचे स्पर्धेतील आव्हान याअगोदरच संपुष्टात आले होते. त्यामुळे, गुरुवारचा सामना केवळ औपचारिकतेपुरताच होता. याबरोबरच पाकिस्तानवर सलग तिसऱ्या आयसीसी स्पर्धेमध्ये साखळी फेरीतच गाशा गुंडाळण्याची नामुष्की ओढावली. याआधी २०२३ चा वन-डे वर्ल्ड कप आणि २०२४ च्या टी-२० वर्ल्ड कपमध्ये पाकचे आव्हान साखळीतच संपुष्टात आले होते. (Rain)
हेही वाचा :
केविन पीटरसन ‘दिल्ली कॅपिटल्स’चे ‘मेंटॉर’