बरेली (उ.प्र.) : बॉलीवूड अभिनेत्री दिशा पटनी हिच्या वडिलोपार्जित निवासस्थानाबाहेर दोनदा गोळीबार करण्यात आल्याचे चौकशीत निष्पन्न झाले आहे. रोहित गोदरा-गोल्डी ब्रार टोळीने ११ सप्टेंबर रोजी प्रथम दोन शूटर पाठवले, त्यांनी एकदाच गोळीबार केला. मात्र त्याचे समाधान झाले नाही. टोळीने दुसऱ्या दिवशी आणखी एक शूटर पाठवले. १२ सप्टेंबर रोजी उत्तर प्रदेशातील बरेली येथे ही घटना घडली. (Firing at Disha’s home)
एका सूत्रानुसार, बागपत येथील रहिवासी असलेल्या शूटरच्या पहिल्या जोडीने परत येऊन गोदराला त्यांच्या हँडलरद्वारे दोन गोळ्या झाडल्याचे कळवले तेव्हा तो अस्वस्थ झाला. ‘‘त्याने दोन वेगवेगळे पुरुष पाठवण्यास सांगितले, ज्यांनी नंतर सुमारे १०-१२ राऊंड फायर केले,’’ असे सूत्रांनी पुढे सांगितले. (Firing at Disha’s home)
दिशाची बहीण खुशबू पटनी (३४), भारतीय सैन्यातील निवृत्त मेजर आणि सध्या वेलनेस कोच आहे. तिने अलीकडे केलेल्या वादग्रस्त विधानाशी या हल्ल्याचा संबंध जोडला जात आहे. तिने प्रसिद्ध कथा वाचक अनिरुद्ध आचार्य यांच्यावर टीका केली होती. तसेच त्यांनी महिलांविरुद्ध “स्त्रीद्वेषी टिप्पणी” केली होती, असा आरोप केला होता.
खुशबूने तिच्या इंस्टाग्राम स्टोरीजवर व्हिडिओ पोस्ट केला होता. “जर तो माझ्यासमोर असता तर मी त्याला धडा शिकवला असता,” असा इशारा तिने दिला होता.
गोल्डी ब्रार गटाने सोशल मीडियावर गोळीबाराच्या घटनेची जबाबदारी स्वीकारली आहे.
