पुणे : प्रतिनिधी : राष्ट्रवादीच्या विलिनीकरणाबाबत १२ फेब्रुवारीला निर्णय जाहीर होणार होता, असा गौप्यस्फोट खासदार शरद पवारांनी केला. अजित पवारांच्या अपघाती निधनानंतर दोन्ही राष्ट्रवादीच्या विलिनीकरणाची चर्चा सुरू असताना पवारांनी हे स्पष्टीकरण केले आहे. दरम्यान विलिनीकरणासंदर्भात १७ जानेवारीला शरद पवार आणि अजित पवारांच्या उपस्थितीत शरद पवार गटाच्या नेत्यासोबत असलेल्या बैठकीचा व्हिडिओ बाहेर पडला आहे.
राष्ट्रवादी काँग्रेस पक्षाचे राष्ट्रीय अध्यक्ष, विधानसभा गटनेता आणि उप मुख्यमंत्रीपदाचा निर्णय घेण्यासाठी आज शनिवारी मुंबईत बैठक आयोजित केली आहे. सायंकाळी पाच वाजता सुनेत्रा पवार यांचा उप मुख्यमंत्रीपदाचा शपथविधी होणार आहे. त्यासाठी काल शुक्रवारी रात्री सुनेत्रा पवार मुंबईकडे रवाना झाल्या. सध्या त्यांचे वास्तव्य मुंबईतील देवगिरी बंगल्यावर आहे. उपमुख्यमंत्रीपद स्वीकारण्याबाबत सुनेत्रा पवारांशी कोणतीही चर्चा झाली नसल्याचे शरद पवारांनी सांगितले आहे. (Sharad Pawar’s shocking revelation)
दरम्यान आज सकाळी शरद पवारांनी माध्यमांशी संवाद साधनाना राष्ट्रवादी काँग्रेसच्या विलिनीकरणाबाबत भाष्य केले. “दोन्ही राष्ट्रवादी एकत्र करण्याची अजितदादांची इच्छा होती. त्यासाठी गेल्या काही दिवसांपासून जोरदार चर्चा सुरू होती. महापालिका निवडणुकीनंतर हा निर्णय घेण्यात येणार होता. पण जिल्हा परिषद निवडणूक लागल्या. या निवडणुकीत एकाच चिन्हावर, घड्याळावर दोन्ही राष्ट्रवादीने लढावे अशी अजित पवारांची इच्छा होती. गेल्या दोन दिवसांपासून याविषयीच्या बातम्या आल्या. त्याला दोन्ही राष्ट्रवादीतील बड्या नेत्यांनी सुद्धा दुजोरा दिला. अशा चर्चा सुरू होती”, असे वक्तव्य शरद पवार यांनी केले. (Sharad Pawar’s shocking revelation)
याशिवाय, “अजितदादा आणि जयंत पाटील यांच्यात दोन्ही राष्ट्रवादी एकत्र येण्याविषयीची सकारात्मक चर्चा झाली होती. अजितदादादा आणि जयंत पाटील यांच्यात चर्चा सुरू होती. मी या चर्चेत नव्हतो. दोन्ही राष्ट्रवादीच्या विलिनीकरणाचा निर्णय १२ तारखेलाच जाहीर होणार होता” असा गौप्यस्फोट शरद पवार यांनी केला.
