Category:

ताज्या बातम्या

India’s victory over Australia : भारताचा ऑस्ट्रेलियावर ४८ धावांनी विजय

by प्रतिनिधी November 6, 2025

written by प्रतिनिधी

नवी दिल्ली : पश्चिम ऑस्ट्रेलियातील क्विन्सलँड करारा येथील हेरीटेज बँक स्टेडियममध्ये झालेल्या टी- २० क्रिकेट सामन्यात भारताने यजमान ऑस्ट्रेलियाचा ४८ धावांनी पराभव करत मालिकेत २-१ अशी आघाडी घेतली. मालिकेतील अंतिम सामना ब्रिस्बेन येथे खेळवण्यात येणार आहे.

नाणेफेक जिंकून ऑस्ट्रेलियाने गोलंदाजीचा निर्णय घेतला. भारताने प्रथम फलंदाजी करत २० षटकात आठ गडी गमावून १६९ धावा करत माफक आव्हान ठेवले. सलामीवीर अभिषेक शर्माने २८, उप कर्णधार शुभमन गिलने ४६, शिवम दुबेने २२ तर सूर्यकुमार यादवने २० धावा केल्या. अक्षर पटेलची नाबाद २१ धावांची खेळीही निर्णायक ठरली. (India’s victory over Australia)

भारतानेचे १६८ धावांचे माफक आव्हान पेलताना ऑस्ट्रेलिया फलंदाजांची फिरकी गोलंदाजीपुढे डाळ शिजली नाही. कर्णधार मिचेल मार्शने सर्वाधीक ३० धावा केल्या. त्या खालोखाल मॅट शॉर्टने २५ धावा केल्या. भारतीय संघाची फिरकी कमालिची प्रभावी ठरली. वॉशिंग्टन सुंदरने तीन गडी बाद केले. अक्षर पटेल आणि शिवम दुबेने प्रत्येकी दोन गडी बाद केले. तर जसप्रीत बुमराह आणि अर्शदीपने प्रत्येकी एक गडी बाद केला. ऑस्ट्रेलियासचा डाव ११९ धावावर आटोपला. भारताने हा सामना ४८ धावांनी जिंकला. (India’s victory over Australia)

पाच सामन्यांच्या मालिकेत पहिला सामना पावसाने रद्द केला. दुसरा सामन्या ऑस्ट्रेलियाने जिंकला. तिसरा आणि चौथा सामना जिंकून भारताने २-१ अशी आघाडी घेतली आहे. (India’s victory over Australia)

November 6, 2025 0 comments

Mladen Zizovic : फुटबॉल सामन्यातच प्रशिक्षकाचा मृत्यू

by प्रतिनिधी November 4, 2025

written by प्रतिनिधी

नवी दिल्ली : सर्बियन सुपरलिग फुटबॉल सामना सुरू असताना रॅडनिकी १९२३ संघाचे मुख्य प्रशिक्षक म्लाडेन झिझोविक यांचे निधन झाले. ते ४४ वर्षाचे होते. त्यांच्या निधनानंतर मैदानावर शोककळा पसरली आणि सामना रद्द करण्यात आला. (Mladen Zizovic)

सोमवारी सर्बियन सुपरलिगमध्ये म्लाडोस्ट लुकानी आणि रॅडनिकी १९२३ यांच्यात सामना सुरु होता. सामन्याच्या पहिल्या हाफमध्ये रॅननिकी संघाचे मुख्य प्रशिक्षक म्लाडेन झिझोविक मैदानावर कोसळले. त्यांना ताबडतोब मैदानाजवळील हॉस्पिटलमध्ये हलवून त्यांच्यावर उपचार सुरू करण्यात आले. त्यानंतर पुन्हा सामना सुरू झाला. पण २० मिनिटांनी झिझोविक यांच्या मृत्यूही बातमी खेळाडूंना कळताच सामना रद्द करण्यात आला. झिझोविकच्या यांच्या मृत्यूचे वृत्त कळताच मैदानावरच खेळाडू दु:खाने कोसळून गेले. अनेक खेळाडूंनी मैदानावर झोपून आपल्या आश्रूंना वाट मोकळी करुन दिली. अनेक खेळाडू गुडघे टेकून विमनस्क अवस्थेत बसल्याचे चित्र पहायला मिळाले. त्यानंतर मुख्य पंच आणि संयोजकांनी सामना रद्द केला. (Mladen Zizovic)

रॅडनिकी १९२३ ने नंतर एका अधिकृत निवेदन प्रसिद्ध केले. त्यामध्ये असे म्हटले आहे की , “आम्हाला सर्वांना अतिशय दु:ख झाले असून आम्ही जनतेला, चाहत्यांना आणि क्रीडा मित्रांना कळवत आहोत की आमचे मुख्य प्रशिक्षक, म्लाडेन झिझोविक यांचे काल रात्री लुकानी येथे झालेल्या म्लाडोस्ट आणि रॅडनिकी १९२३ यांच्यातील सामन्यादरम्यान निधन झाले. आमच्या क्लबने केवळ एक महान तज्ञच नाही तर सर्वात महत्त्वाचे म्हणजे एक चांगला व्यक्ती, एक मित्र आणि एक क्रीडा कार्यकर्ता गमावला आहे, ज्याने त्याच्या ज्ञानाने, उर्जेने आणि कुलीनतेने त्याला ओळखणाऱ्या सर्वांच्या हृदयात खोलवर छाप सोडली. (Mladen Zizovic)

November 4, 2025 0 comments

ताज्या बातम्या महत्त्वाच्या नोंदी

Sandesh Kurale : राष्ट्रीय टेनिस स्पर्धेत कोल्हापूरच्या संदेश कुरळेने उपविजेतेपद पटकावले

by प्रतिनिधी November 4, 2025

written by प्रतिनिधी

कोल्हापूर : प्रतिनिधी : मुंबई येथे झालेल्या एआयटीए राष्ट्रीय टेनिस चॅम्पियनशिप स्पर्धेत कोल्हापूरच्या संदेश दत्तात्रय कुरळे याने उपविजेतेपद पटकावले.

या स्पर्धेत दुसऱ्या फेरीत संदेश कुरळेने विश्वजीत सणसचा ६-२ ६-४ पराभव करत उपांत्यपूर्व फेरीत प्रवेश केला. उपांत्यपूर्व फेरीत कनिष्क जेटलीचा ६-२ ६-१ असा सहज पराभव करत उपांत्य फेरीत धडक मारली. तीन सेटस् मध्ये झालेल्या उपात्य सामन्यात त्याने दीप मुनीमवर ४-६ ७-६(१) ६-२ असा विजय मिळवला आणि अंतिम फेरीत प्रवेश केला. अंतिम सामन्यात संदेश कुरळे आणि निरोव शेट्टी भिडले. पहिला सेट निरोवने ६-४ असा जिंकला. दुसऱ्या सेटमध्ये संदेश चांगली लढत दिली. त्याने टायब्रेकरमध्ये ७-६ असा सेट जिंकत सामना १-१ असा बरोबरीत आणला. शेवटच्या सेटमध्ये निरोवने ६-० अशी एकतर्फीत मात करत विजेतेपद पटकावले. संदेशला उप विजतेपदावर समाधान मानावे लागले. (Sandesh Kurale)

संदेश दत्तात्रय कुरळे कोल्हापूरचा असून अर्शद देसाई टेनिस अकॅडमी येथे प्रशिक्षण घेत आहे. त्याला प्रशिक्षक मनाल देसाई व अर्शद देसाई यांचे मार्गदर्शन लाभत आहे. (Sandesh Kurale)

November 4, 2025 0 comments

ताज्या बातम्या देश-विदेश महत्त्वाच्या नोंदी महिला

90 crore prize money : भारतीय महिला क्रिकेट संघावर ९० कोटींचा वर्षाव

by प्रतिनिधी November 3, 2025

written by प्रतिनिधी

नवी दिल्ली : विश्वचषक पटकावणाऱ्या भारतीय महिला संघांवर देशभरातून शुभेच्छांचा वर्षाव होत असताना संघावर करोडो रुपये बक्षिसांचा वर्षाव झाला आहे. भारत महिला संघाला ९० कोटी रुपयेहून अधिक रक्कम बक्षिस म्हणून मिळणार आहेत. आयसीसीकडून ४.४८ दशलक्ष अमेरिकन डॉलर्सच्या बक्षिस मिळणार असून त्याचा फायदा भारतीय खेळाडूंना मिळणार आहे. बीसीसीआयने तर भारतीय महिला संघावर बक्षिसाची खैरात करताना ५१ कोटी रुपयांचे बक्षिस जाहीर कले आहे.

बीसीसीआयकडून बक्षिस जाहीर

नवी मुंबईच्या डी. वाय. पाटील स्टेडियमवर झालेल्या अंतिम सामन्यात हरमनप्रीत कौर हिच्या नेतृत्वाखाली भारतीय संघाने दक्षिण आफ्रिकेवर ५२ धावांनी विजय मिळवल्यानंतर देशभर शुभेच्छाचा वर्षावर होता. तसेच खेळाडूंवर बक्षिसांचा पाऊस पडला आहे. विजयी संघाला मिळालेली बक्षिसाची रक्कम आणि बीसीसीआयने जाहीर केलेले ५१ कोटी असे ९० कोटी रुपये संघाला मिळणार आहेत. (90 crore prize money)

ट्रॉफीसह भारतियांची मने जिंकली

बीसीसीआयचे सचिव देवजित सैकिया यांनी त्यांच्या पहिल्या विश्वविजेत्याच्या सन्मानार्थ खेळाडू, प्रशिक्षक आणि सहाय्यक कर्मचाऱ्यांसह संपूर्ण पथकासाठी ५१ कोटी रुपयांचे रोख बक्षीस जाहीर केले. “१९८३ मध्ये कपिल देव यांनी विश्वचषक जिंकून भारतीय क्रिकेटमध्ये एक नवीन युग सुरू केले. तोच उत्साह आणि प्रोत्साहन आता महिलांनीही दिले आहे. हरमनप्रीत कौर आणि तिच्या संघाने केवळ ट्रॉफी जिंकली नाही तर त्यांनी सर्व भारतीयांची मने जिंकली आहेत,” असे सैकिया यांनी एएनआयला सांगितले. (90 crore prize money)

आयसीसीकडून ३९,७८ कोटी रुपये बक्षिस

भारताच्या विजयामुळे आंतरराष्ट्रीय क्रिकेट परिषदेकडून विक्रमी ४.४८ दशलक्ष अमेरिकन डॉलर्स (३९.७८ कोटी रुपये) बक्षीस रक्कम मिळाली – जी कोणत्याही क्रिकेट विश्वचषकासाठी आतापर्यंतची सर्वाधिक आहे. आयसीसीचे अध्यक्ष जय शाह यांच्या नेतृत्वाखाली आयसीसीला ही चालना मिळाली, ज्यांनी यापूर्वी लिंग समानता आणि महिलांच्या खेळात गुंतवणूकीसाठी केलेल्या व्यापक प्रयत्नांचा भाग म्हणून महिलांच्या बक्षीस रकमेत तिप्पट वाढ केली होती. “जय शाह यांनी बीसीसीआयचा कार्यभार स्वीकारल्यापासून, अनेक परिवर्तने घडली आहेत – वेतन समानता, प्रशिक्षकांमध्ये सुधारणा आणि डब्ल्यूपीएलचा उदय यामुळे महिला क्रिकेट कायमचे बदलले आहे,” असे सैकिया पुढे म्हणाल्या. (90 crore prize money)

हरमनप्रीत कौर, स्मृती मानधना , शफाली वर्मा आणि दीप्ती शर्मा यांच्या नेतृत्वाखालील भारताच्या विश्वचषकातील खेळाडूंची इतिहासात केवळ चॅम्पियन म्हणूनच नव्हे तर महिला क्रिकेटला प्रतिष्ठा आणि समृद्धीच्या व्यवसायात रूपांतरित करणाऱ्या अग्रणी खेळाडू म्हणून नोंद होणार आहे. (90 crore prize money)

November 3, 2025 0 comments

ताज्या बातम्या पोलिस डायरी महत्त्वाच्या नोंदी महाराष्ट्र

Sikandar Sheikh arrested : महाराष्ट्र केसरी सिकंदर शेखच्या अटकेनंतर कोल्हापुरात खळबळ

by प्रतिनिधी November 1, 2025

written by प्रतिनिधी

कोल्हापूर : प्रतिनिधी : शस्त्रतस्करी प्रकरणी पंजाब पोलिसांनी महाराष्ट्र केसरी सिकंदर शेखला अटक केल्यानंतर कोल्हापुरात खळबळ उडाली आहे. मुळचा सोलापूर जिल्ह्यातील मोहोळ तालुक्यातील सिकंदर कोल्हापुरातील गंगावेश तालमीचा मल्ल असल्याने कुस्तीशौकिनांकडून आश्चर्य व्यक्त केले जात आहे. सिकंदरच्या कुटुंबियांनी खोट्या गुन्ह्यात त्याला अटक केली आहे, असा आरोप केला आहे. (Sikandar Sheikh arrested)

पंजाब पोलिसांकडुन गुन्हा दाखल

सिंकदर शेख याला शस्त्रतस्करी प्रकरणी पंजाब पोलिसांनी अटक केली आहे. पपला गुर्जर टोळीचा पर्दाफाश करत टोळीला शस्त्र पुरवणाऱ्या चौघांना सीआयए पथकाने ताब्यात घेतले आहे. त्यात सिंकदर शेख आहे. आरोपींकडून पोलिसांनी एक लाख ९९ हजार रुपये रोख, पाच पिस्तुले, काडतुसे, दोन गाड्या जप्त केल्या आहेत. याप्रकरणी खरड (पंजाब) पोलीस ठाण्यात आर्म ऍक्टनुसार गुन्हा दाखल करण्यात आला आहे. पण पंजाबमध्ये सिकंदर शेखरला अटक झाल्यानंतर महाराष्ट्रातील कुस्ती क्षेत्रात मात्र खळबळ उडाली आहे. (Sikandar Sheikh arrested)

संशयित पापला टोळीशी संबधित

अटक करण्यात आलेले आरोपी राजस्थान आणि हरियाणामधील सक्रीय असलेल्या विक्रम उर्फ पपला टोळीशी थेट संबंधित आहेत. आरोपी उत्तर प्रदेशमधून शस्त्रे आणत ती पंजाब परिसरात पुरवत होते. त्यातूनच ही कारवाई करण्यात आली आहे. यातील तिघेजण गुन्हेगारी पार्श्वभूमी असलेले आहेत. तर सिंकदर शेख याची गुन्हेगारी पार्श्वभूमी जाणून घेण्यासाठी महाराष्ट्र पोलिसांशी संपर्क साधला आहे. या प्रकरणातील मुख्य आरोपी दानवीर हा पापला गुर्जर टोळीचा सक्रीय सदस्य आहे. त्याच्यावर उत्तर प्रदेश, राजस्थान आणि हरियाणा येथे खून, दरोडा, एटीएम फोडणे आणि आर्म ऍक्टनुसार गुन्हे दाखल आहेत. दानवीर हा मध्य प्रदेश आणि उत्तर प्रदेश येथून शस्त्रे आणून पंजाब आणि परिसरात पुरवण्याचे काम करत असे.

गेले काही महिने सिकंदरचा पंजाबमध्ये मुक्काम

२४ ऑक्टोबरला दानवीर आणि त्याचा साथीदार बंटी हे एका गाडीत शस्त्रे घेऊन मोहालीत आले होते. ही शस्त्रे सिंकदर यांच्याकडे द्यायची होती. सिंकदर याने पुढे नयागावातील कृष्ण उर्फ हैप्पी याला पुरवायची होती. परंतु, पोलिसांनी सापळा रचत तिघांना एअरपोर्ट चौकातून अटक केली. नंतर २६ ऑक्टोबरला कृष्ण उर्फ हैप्पी याला अटक करत त्याच्याकडून पिस्तुले जप्त करण्यात आली. मूळचा सोलापूर जिल्ह्यातील मोहोळ तालुक्यातील असलेल्या सिंकदर याने महाराष्ट्र केसरी हा किताब जिंकला आहे. तो क्रीडा कोट्यातून भारतीय सैन्यात दाखल झाला होता. पण, ती नोकरी त्याने सोडून दिली होती. गेल्या काही महिन्यांपासून सिंकदर हा पंजाब येथील मुल्लांपूरमधील गरिबदास येथे भाड्याच्या घरात राहत होता. सिंकदर याच्या अटकेनंतर कुस्ती क्षेत्रात खळबळ उडाली आहे. (Sikandar Sheikh arrested)

November 1, 2025 0 comments

ताज्या बातम्या महत्त्वाच्या नोंदी

India defeated : खराब फलंदाजीने भारत ऑस्ट्रेलियाकडून पराभूत

by प्रतिनिधी October 31, 2025

written by प्रतिनिधी

मेलबर्न : भारत आणि ऑस्ट्रेलिया यांच्यात मेलबर्न येथे झालेल्या टी-२० क्रिकेट सामन्यात यजमान ऑस्ट्रेलियाने चार गड्यांनी सहज विजय मिळवला. भारताच्या स्टार खेळाडूंनी केलेल्या खराब फलंदाजीने भारताचे १२५ धावांचे माफक आव्हान ऑस्ट्रेलियाने चौदाव्या षटकात पार केले. भारताच्या अभिषेक शर्माने धडाकेबाज फलंदाजी करुत ६८ धावा करत भारताचे आव्हान कसेबसे राखण्याचा प्रयत्न केला. ऑस्ट्रेलियाच्या जोश हेझलवूडने तीन गडी बाद करत सामना फिरवला. (India defeated)

प्रथम फलंदाजी करणाऱ्या भारतीय संघाचा सलामीवीर शुभमन गिलला हेझलवूडने पाच धावा असताना तंबूचा रस्ता दाखवला. संजू सॅमसनला नॅथन एलिसने पायचित पकडले. कर्णधार सूर्यकुमार यादवला हेझलवूडने चकवले. यष्टीरक्षक जोश इंगलिसकडे त्याने झेल दिला. सूर्यकुमार फक्तच एकच धाव करु शकला. तिलक वर्मा आणि अक्षर पटेल स्वस्तात बाद केले. भारताची पाच बाद ४९ धावसंख्या असताना अभिषेक शर्मा आणि हर्षित राणाने भारताचा डाव सावरला. अभिषेक शर्माने ३७ चेंडूत ६८ धावा केल्या. त्याला हर्षित राणाने चांगली साथ दिली. राणाने ३३ चेंडूत ३५ धावा केल्या. दोघांनी सहाव्या गड्यासाठी ५६ धावांची भागिदारी केली. अभिषेकने वेगवान आणि फिरकी गोलंदाजांना लक्ष्य करत चौकारांची आतषबाजी केली. १८ व्या षटकात अभिषेकला एलिसने बाद केले. राणा झेवियर बार्टलेटच्या गोलंदाजीवर बाद झाला. दोघे बाद झाल्याने भारताचा डाव १८.४ षटकात १२५ धावांवर आटोपला. (India defeated)

भारताचे माफक आव्हान ऑस्ट्रेलियाने सहज पार केले. कर्णधार मिचेल मार्शने २६ चेंडूत ४६ धावा चोपत संघाच्या विजयाची वाट सुकर केली. दोन चौकार आणि चार षटकार खेचले. ट्रॅव्हिस हेडने २८ धावा केल्या. वरुण चक्रवर्तीने दोन गडी बाद केले. सहा गडी गमावून ऑस्ट्रेलियाने भारताची धावसंख्या पार केली. जसप्रित बुमराहने शेवटच्या टप्प्यात दोन गडी बाद केले. भारतावर विजय मिळवत ऑस्ट्रेलियाने १-० अशी मालिकेत आघाडी घेतली. (India defeated)

October 31, 2025 0 comments

ताज्या बातम्या देश-विदेश महत्त्वाच्या नोंदी राजकारण विधानसभा निवडणूक

Azharuddin : भारतीय क्रिकेट संघाचा माजी कर्णधार अझरुद्दीन होणार मंत्री

by प्रतिनिधी October 30, 2025

written by प्रतिनिधी

नवी दिल्ली : तेलंगणातील काँग्रेस सरकारच्या मंत्री मंडळाचा विस्तार होणार असून भारतीय क्रिकेट संघाचा माजी कर्णधार महम्मंद अझरुद्दीन यांना मंत्रीपद मिळणार आहे. अझरुद्दीन यांची नुकतीच तेलंगणा विधान परिषदेवर राज्यपाल नियुक्त म्हणून आमदार म्हणून निवड झाली आहे. तेलंगणातील ज्युबली हिल्स विधानसभा पोटनिवडणूकीच्या पार्श्वभूमीवर हा निर्णय घेतला असल्याची चर्चा आहे.

पोट निवडणूक जिंकण्यासाठी मंत्रीपद

शुक्रवारी ३१ ऑक्टोबर रोजी अझरुद्दींन यांचा मंत्रीमंडळात समावेश होणार आहे. राज्यपाल त्यांना मंत्रीपदाची शपथ देणार आहेत. तेलंगणा राज्यात ज्युबिली हिल्स विधानसभा पोटनिवडणूकीसाठी मतदान होणार आहे. या मतदार संघात मुस्लीम मतदारांची मोठी संख्या आहे. त्यामुळे मंत्रीमंडळात अल्पसंख्याक समाजाचे प्रतिनिधीत्व म्हणून अझरुद्दीन यांना मंत्रीपद दिले जाणार आहे. ज्युबिली हिल्स निवडणूक जिंकण्यासाठी मुस्लीमांची मते मिळण्याची गरज असल्याने काँग्रेसने हा निर्णय घेतला आहे. ११ नोव्हेंबर रोजी पोट निवडणूक होणार आहे. (Azharuddin)

दोन महिन्यात मंत्रीपदाची लॉटरी

ऑगस्ट महिन्यात काँग्रेस पक्षाकडून अझरुद्दीन यांना आमदार दिली होती. अझरुद्दीन यांचे नाव सूचवण्यापूर्वी काँग्रेसने कोडांदारम आणि अमेर अली खान यांच्या नावाची शिफरास राज्यपालांकडे केली होती. पण राज्यपालांनी ही नावे फेटाळली होती. त्यानंतर काँग्रेसने कोडांदारम आणि अझरुद्दीन यांचे नाव सूचवले होते. राज्यपालांनी अझरुद्दीन यांचे नाव स्वीकारल्यानंतर ऑगस्ट महिन्यात ते आमदार झाले. अवघ्या दोन महिन्यात त्यांना मंत्रीपदाची लॉटरी लागली.

अझरुद्दीन यांचा परिचय

६२ वर्षीय महम्मोद अझरुद्दीन यांचा जन्म हैद्राबाद येथे झाला. हैद्राबादमधील ऑल सेंटस् स्कूल, निजाम कॉलेज, उस्मानिया विश्वविद्यालयात त्यांचे शिक्षण झाले. ते कॉमर्सचे पदवीधर आहेत. १९८४ मध्ये भारतीय क्रिकेट संघात त्यांची निवड झाली. ९९ कसोटी सामन्यात त्यांनी ६२१५ धावा जमवल्या. १९९ ही त्यांची सर्वोच्च धावसंख्या. २२ शतके आणि २१ अर्धशतके झळकावली. एक दिवसीय सामन्यातही त्यांनी ठसा उमटवला होता. ३३४ सामन्यात ३०८ वेळा खेळताना ९३७८ धावा केल्या. १५३ ही त्यांची सर्वोच्च धावसंख्या होती. वन डे मध्ये सात शतके आणि ५८ अर्धशतके झळकावली. अझरुद्दीन उत्कृष्ट आणि चपळ क्षेत्ररक्षक होते. त्यांनी १५६ झेल पकडले. एक दिवसीय सामन्यात वेगवान शतक झळकावण्याचा पहिला मान आझरुद्दीन यांना मिळाला होता. इंग्लंडविरुद्ध त्यांनी ८७ चेंडूत शतक केले होते. (Azharuddin)

ईडन गार्डन मैदानावर पाच शतके

कोलकोत्यातील ईडन गार्डन हे त्यांचे आवडते मैदान होते. सात कसोटी सामन्यात त्यांनी पाच शतके ठोकली होती. यशस्वी भारतीय कर्णधार म्हणून त्यांची गणना होते. १०३ सामन्यात त्यांनी भारतीय संघाला १४ सामने जिंकून दिले. त्यांचा विक्रम सौरभ गांगुलीने मोडला. १९८६ मध्ये अर्जुन पुरस्कार, पदमश्री पुरस्काराने गौरवण्यात आले. १९९१ मध्ये विस्डेन क्रिकेटर ऑफ एअर पुरस्काराने गौरव करण्यात आला.

मॅचफिक्सिंगचा आरोप त्यांच्यावर केल्यानंतर बीसीसीआयने त्यांच्यावर आजन्म बंदी घतली. त्यामुळे त्यांची क्रिकेटमधील कारकीर्द थांबली. २०१२ मध्ये त्यांच्यावरील झालेल्या आरोपातून निर्दोष मुक्तता झाली.

२००९ मध्ये राजकीय प्रवासास सुरुवात

२००९ मध्ये त्यांनी काँग्रेस पक्षात प्रवेश करत राजकीय कारकीर्दीस सुरुवात केली. २००९ मध्ये उत्तर प्रदेशातील मुरादाबाद लोकसभा मतदार संघातून निवडणूक लढवली. ते ५० हजार मताधिक्यांनी विजयी झाली. २०१४ च्या निवडणूकीत ते पराभूत झाले. तरीही ते काँग्रेस पक्षाशी संग्लन राहिले. तेलंगणा विधान परिषदेत ते आमदार झाल्यानंतर आता मंत्रीपदाची माळ त्यांच्या गळ्यात पडणार आहे. (Azharuddin)

October 30, 2025 0 comments

ताज्या बातम्या महत्त्वाच्या नोंदी

India vs Australia: ऑस्ट्रेलियाकडून भारताचा सलग दुसरा पराभव, गिल-विराट अपयशी

by प्रतिनिधी October 23, 2025

written by प्रतिनिधी

एडलेडच्या (Adelaide) वनडे सामन्यातील विजयामुळे भारत-ऑस्ट्रेलिया यांच्यातील तीन एकदिवसीय सामन्यांची मालिका ऑस्ट्रेलियाने जिंकली आहे. ऑस्ट्रेलियाच्या तरुण खेळाडूंनी भारतीय संघाचा नवीन वनडे कर्णधार शुभमन गिलचे कर्णधारपदाचे पदार्पण झाकोळून टाकले आहे. (India vs Australia)

या पराभवातील सर्वात निराशाजनक गोष्ट म्हणजे — शुभमन गिलची फलंदाजी आणि कर्णधारपद. पहिल्या दोन सामन्यांमध्ये गिलच्या बॅटमधून निघालेल्या एकूण धावा फक्त आहेत फक्त १९. त्याने गोलंदाजीमध्ये केलेले बदल आणि क्षेत्ररचना या दोन्हींवर मोठे प्रश्न उपस्थित झाले आहेत. तथापि, टीमच्या पराभवात इतर फलंदाजांचाही मोठा वाटा आहे. (India vs Australia)

दुसरीकडे, ऑस्ट्रेलियन संघात अनेक नवे चेहरे आहेत. तरीही त्यांनी दोन्ही सामने सहज जिंकून मालिकेवर कब्जा केला.

पहिल्या सामन्यात पावसामुळे त्यांना डीएलएस नियमाचा फायदा झाला. पण दुसऱ्या सामन्यात त्यांनी भक्कम फलंदाजी करून धावांचा यशस्वी पाठलाग केला. शेवटी थोडी गडबड झाली तरी कूपर कॉनोलीने संयमी खेळ करत ऑस्ट्रेलियाला विजय मिळवून दिला. (India vs Australia)

शॉर्ट आणि कॉनोलीचे शानदार प्रदर्शन

ऑस्ट्रेलियन कर्णधार मिचेल मार्शने नाणेफेक जिंकून आधी गोलंदाजी निवडली. भारताला त्यांनी केवळ २६४ धावांवर रोखले. धावांचा पाठलाग करताना सुरुवातीला ऑस्ट्रेलियालाही दोन झटके बसले. मार्श आणि हेड लवकर बाद झाले. मात्र त्यानंतर मॅथ्यू शॉर्ट आणि शेवटी कूपर कॉनोली यांनी अर्धशतकी खेळी केली. त्यामुळे ऑस्ट्रेलियाला सलग दुसरा विजय मिळाला. शॉर्टने ७८ चेंडूत ७४ धावा केल्या (४ चौकार, २ षटकार). कॉनोलीने ५३ चेंडूत नाबाद ६१ धावा ठोकल्या (५ चौकार, १ षटकार). (India vs Australia)

शॉर्टचे सुटलेले कॅच निर्णायक

भारतीय संघाने या सामन्यात दोन मोठे झेल सोडले. तेच शेवटी निर्णायक ठरले. ऑस्ट्रेलियाकडून सर्वाधिक धावा करणाऱ्या मॅथ्यू शॉर्टला दोन वेळा जीवनदान मिळाले. पहिल्यांदा, तो फक्त २० धावांवर असताना अक्षर पटेलने पॉईंटवर सोपा झेल सोडला. तेव्हा तो पूर्ण सेट झाला नव्हता. बॉल जोरात आला असल्याने कॅच कठीण होता, पण तो महत्त्वाचा होता. दुसऱ्यांदा, शॉर्ट ५५ धावांवर असताना त्याला पुन्हा जीवनदान मिळाले. यावेळी तो सेट झाला होता आणि ऑस्ट्रेलियाची स्थिती थोडी नाजूक दिसत होती. पुन्हा पॉईंटच्या दिशेने गेलेल्या चेंडूवर सिराजला सोपा झेल पकडता आला नाही. (India vs Australia)

नंतर सिराजनेच डीप स्क्वेअर लेगवर त्याचा झेल पकडला, पण तोपर्यंत सामना ऑस्ट्रेलियाकडे झुकला होता. सामान्यतः सिराज पॉईंटवर फिल्डिंग करत नाही. पण कर्णधार गिलच्या चुकीच्या फिल्ड प्लेसमेंटमुळे भारताने मोठी संधी गमावली. (India vs Australia)

कर्णधार गिलचे काय चुकले?

शुभमन गिल आपल्या दुसऱ्याच सामन्यात कर्णधार म्हणून उतरला होता. त्याच्या खेळात अनुभवाची कमतरता स्पष्ट जाणवली. भारतीय गोलंदाजांनी शेवटी यश मिळवले, पण गिलने योग्य वेळी गोलंदाजीमध्ये बदल केले असते तर सामना भारत जिंकू शकला असता. एक वेळ अशी होती की ३९व्या षटकानंतर ऑस्ट्रेलिया संघर्ष करत होता. पण त्यानंतर सिराजचा सोपा कॅच सुटला. तरीही सामना वाचवता आला असता. परंतु क्रॅम्प्स असतानाही गिलने एका टोकावर स्पिनऐवजी सतत हर्षित राणालाच गोलंदाजीस ठेवले. राणाने शॉर्टची विकेट घेतली, पण त्या काळात भारताने केवळ १५ चेंडूंमध्ये ३५ धावा दिल्या. तिथेच सामना भारताच्या हातातून निसटला. परिणामी, सामना ऑस्ट्रेलियाने सहज जिंकला. (India vs Australia)

कर्णधारपदाचा गिलच्या फलंदाजीवर परिणाम?

पर्थ आणि अ‍ॅडलेड या दोन्ही सामन्यांत काही गोष्टी सारख्याच घडल्या —

विराट कोहली दोन्ही वेळा शून्यावर बाद झाला. आणि कर्णधार शुभमन गिलही लवकर बाद झाला.

पहिल्या सामन्यात गिलने दोन सुंदर चौकारही मारले. पण लेग साइडकडे दूर जात असलेला बॉल खेळण्याच्या प्रयत्नात विकेटकीपर फिलिपकडे कॅच दिला. दुसऱ्या सामन्यातही तसंच झालं — गिल नियंत्रणात दिसत होता. पण बार्टलेटच्या साध्या बॉलवर पुढे येत मारण्याच्या प्रयत्नात मिड ऑफवर उभ्या मार्शकडे झेल दिला. (India vs Australia)

झंपाची जबरदस्त गोलंदाजी

भारतीय डावात रोहित शर्मा (७३) आणि श्रेयस अय्यर (६१) यांनी छान भागीदारी केली. पण ते बाद झाल्यानंतर एकामागोमाग विकेट पडत गेल्या. अक्षर पटेलने थोडा आक्रमक खेळ केला. पण षटकार मारण्याच्या प्रयत्नात तोही बाद झाला. अर्शदीप सिंग आणि हर्षित राणा यांनी नवव्या विकेटसाठी ३७ धावांची भागीदारी केली. त्यामुळे भारताची धावसंख्या अडीचशे पार गेली. ऑस्ट्रेलियाकडून अ‍ॅडम झंपाने ४, बार्टलेटने ३, तर मिचेल स्टार्कने 2 विकेट घेतल्या. (India vs Australia)

October 23, 2025 0 comments

ताज्या बातम्या महत्त्वाच्या नोंदी

Brand Kolhapur : खेळाडूंच्या भविष्यासाठी ब्रँड कोल्हापूर कडून निधी उभारण्याची घोषणा

by प्रतिनिधी October 18, 2025

written by प्रतिनिधी

कोल्हापूर : प्रतिनिधी : खेळाडूंच्या भविष्यासाठी ब्रँड कोल्हापूर कडून मोठा निधी उभारण्याची घोषणा विधान परिषदेची काँग्रेसचे गटनेते आमदार सतेज पाटील यांनी केली. त्यांनी स्वत: पाच लाखाची घोषणा करुन उपक्रमाचा शुभारंभ केला. या संकल्पनेला प्रतिसाद देताना नाबार्डचे माजी अध्यक्ष यशवंत थोरात यांनीही एक लाख रुपयांची घोषणा करत प्रतिसाद दिला. (Brand Kolhapur)

नाबार्डचे माजी अध्यक्ष यशवंत थोरात यांच्या प्रमुख उपस्थितीत जेष्ठ सामाजिक कार्यकर्ते सुरेश शिपुरकर आणि आंतरराष्ट्रीय स्तरावरील जेष्ठ टेबल टेनिसपटू शैलजा भोसले यांना ‘ब्रँड कोल्हापूर जीवन गौरव पुरस्कारा’ने सन्मानित करण्यात आले. गेल्या वर्षभरात राष्ट्रीय व आंतरराष्ट्रीय पातळीवर कोल्हापूरचे नाव मोठे करणाऱ्या कला, क्रीडा, सांस्कृतिक,शैक्षणिक क्षेत्रातील ५२ गुणवंतांचा सत्कार करण्यात आला. (Brand Kolhapur)

पॅरीस ऑलिंपिकमध्ये रौप्यदक विजेता स्वप्निल कुसाळे, साहित्यिक कृष्णात खोत, यूपीएससी परीक्षेतील गुणवंत बिरदेव डोणे, सौरभ पाटील, हेमराज पणोरेकर, दिलीपकुमार देसाई, अदिती चौगुले, शॉर्ट फिल्म राष्ट्रीय पुरस्कारप्राप्त सचिन सूर्यवंशी, मयूर कुलकर्णी, प्रशांत बिडकर, चित्रपट कला दिग्दर्शक दिलीप रोकडे, ऑपरेशन सिंदूरमधील राफेल विमानाचे पायलट झेवियर रेगे, लेफ्टनंट प्रियंका खोत, मिलिंद देसाई, यश मार्ले, राष्ट्रीय पुरस्कार प्राप्त शिक्षक सागर बगाडे, विवेक चंदालिया, रक्तदाता विश्वजीत काशिद, फोटोग्राफर मंगेश देसाई, वेबसिरीज रायटर दिगंत पाटील, अर्णव कारेकर, क्रिकेटपटू अभिषेक निषाद, आंतरराष्ट्रीय नेमबाज राजकुंवर इंगळे, आयर्न मॅन चेतन चव्हाण, पंकज रावळू, माहेश्वरी सरनोबत, अभिनंदन चिंचवाडे, तनय सोहनी, राजवर्धन घाटगे, अमोल यादव, डॉ. विजय कुलकर्णी, दिलीप जाधव, गौरख माळी, सचिन बुरसे, स्वरुपा पुरजारी, विजय पाटील, आम्रपाली कोहली, सुषमा रेपे, डॉ. केतकी साखरपे, पराग वाटवे, शिवछत्रपती पुरस्कार विजेते प्रतिक पाटील, श्रीधर निगडे, अफ्रिद सत्तार, मानसिंग पाटील, पृथ्वीराज पाटील, कल्याणी पाटील, ऐश्वर्या पुरी, सृष्टी भोसले, अभिषेक निपाणे, अवंती माने यांचा ब्रँड पुरस्काराने गौरवण्यात आले होते.

यावेळी बाळ पाटणकर, जेष्ठ पत्रकार श्रीराम पवार, रविंद्र ओबेरॉय, डॉ.बी. एम. हिर्डेकर, अमरजा निंबाळकर, वृषाली पृथ्वीराज पाटील, देवश्री सतेज पाटील, डॉ आर. एम. कुलकर्णी , रोटरीचे शीतल दुग्गे, निसर्गमित्रचे अनिल चौगले, पद्मा तिवले, अविनाश शिरगावकर, ब्रँड कोल्हापूर समितीचे सदस्य यांच्यासह विविध क्षेत्रातील मान्यवर उपस्थित होते. (Brand Kolhapur)

October 18, 2025 0 comments

ताज्या बातम्या महत्त्वाच्या नोंदी राजकारण

Priyanka Chaturvedi : देशप्रेमाचे धडे मोदी सरकारने अफगाणिस्तानकडून घ्यावेत : प्रियांका चतुर्वेदी

by प्रतिनिधी October 18, 2025

written by प्रतिनिधी

नवी दिल्ली : पाकिस्तानने अफगाणिस्तानवर केलेल्या एअर स्ट्राईकमध्ये अफगाणिस्तानचे तीन युवा क्रिकेटपटू ठार झाले. त्यानंतर अफगाणिस्ताने नोव्हेंबरमध्ये होणाऱ्या टी- २० तिरंगी क्रिकेट मालिका रद्द करण्याचा निर्णय घेतला. यावरुन शिवसेना उद्धव ठाकरे गटाच्या खासदार प्रियांका चतुर्वेदींनी देशप्रेमाचे धडे अफगाणिस्तानकडून घ्यावेत असा टोला केंद्रातील मोदी सरकार आणि बीसीसीआयला लगावला आहे. (Priyanka Chaturvedi)

पहलगाम हल्ल्यात २६ पर्यटकांची हत्या केली होती. त्यानंतर भारताने ऑपरेशन सिंदूर राबवून पाकिस्तानवर हल्ले घेऊन चांगलाच धडा शिकवला होता. त्यानंतर झालेल्या अशिया चषक स्पर्धेत भारताने पाकिस्तानविरुद्ध सामने खेळू नयेत अशी मागणी शिवसेनेने केली होती. अनेक भारतीयांनी पाकिस्तानबरोबर सामने खेळू नये असे मत व्यक्त केले होते. पण केंद्र सरकारच्या परवानगीने भारतीय संघ पाकिस्तानबरोबर तीन सामने खेळला आणि भारताने पाकिस्तानला हरवत अशिया चषक पटकावला. (Priyanka Chaturvedi)

बीसीसीआय, केंद्र सरकारने देशाला पहिले प्राधान्य द्यावे

पाकिस्तानच्या हवाई हल्ल्यात अफगाणिस्तानमधील तीन क्रिकेटपटू ठार झाले. त्यामुळे पाकिस्तान आणि अफगाणिस्तानमध्ये तणाव आणखी वाढला आहे. या हल्ल्यानंतर अफगाणिस्तानने पाकिस्तानविरुद्ध होणारी टी-२० मालिका रद्द करण्याचा निर्णय घेतला. यावरुन खासदार प्रियंका चतुर्वेदी यांनी देशाला कसे प्राधान्य द्यायचे हे अफगाणिस्तानकडून शिका असा टोला लगावला आहे. खासदार प्रियांका चतुर्वेदीनी एक्सवर पोस्ट केली आहे, त्यात असे म्हटले आहे की, पाकिस्तानची व्यवस्था काही भ्याड लोकांनी बनलेली आहे. अफगाणिस्तान क्रिकेट बोर्डाने पाकिस्तानसोबतचे त्यांचे मालिका सामने रद्द केल्याचे पाहून आनंद झाला. कदाचित बीसीसीआय आणि भारत सरकार खेळांपेक्षा देशाला प्राधान्य कसे द्यायचे याबद्दल टिप्स घेऊ शकतील, या शब्दांत प्रियंका चतुर्वेदी यांनी ट्वीट केले आहे. भारताचे २६ पर्यटक मारल्यानंतरही भारतीय क्रिकेट संघ पाकिस्तानशी खेळला होता. म्हणूनच बीसीसीआय आणि केंद्र सरकारने पहिले प्राधान्य देशाला द्यायला हवे. खेळापेक्षा देशाला प्राधान्य कसे द्यावे हा धडा अफगाणिस्तान क्रिकेट बोर्डाकडून घ्यायला हवा, असा सल्ला प्रियंका चतुर्वेदी यांनी दिला आहे. त्याचवेळी श्रीलंका संघानेही या मालिकेतून माघार घ्यावी, असे आवाहन त्यांनी केले आहे. (Priyanka Chaturvedi)

पाक हवाई हल्ल्यात तीन क्रिकेटपटू ठार

पाकिस्तान आणि अफगाणिस्तान या दोन्ही देशांमध्ये बुधवारी शस्त्रसंधीचा करार करण्यात आला होता. पण शुक्रवारी, पाकिस्तानने शस्त्रसंधीच्या कराराचे उल्लंघन करत अफगाणिस्तानवर हवाई हल्ला केला. पक्तिका प्रांतावर करण्यात आलेल्या या हवाई हल्ल्यामध्ये अफगाणिस्तानच्या स्थानिक क्लबचे तीन क्रिकेटपटू कबीर, सिबगतुल्लाह आणि हारून यांचा मृत्यू झाला, तर चार जण गंभीर जखमी झाले आहेत. याशिवाय आणखी पाच नागरिकांचा मृत्यू झाला आहे. ही घटना तेव्हा घडली, जेव्हा हे खेळाडू प्रांतीय राजधानी शराना येथे स्थानिक स्पर्धा खेळून घरी जात होते. खेळाडूंचा मृत्यू झाल्यानंतर अफगाणिस्तान क्रिकेट बोर्डाने पाकिस्तान आणि श्रीलंका यांच्यासोबत होणाऱ्या टी-२० तिरंगी मालिकेतून माघार घेण्याचा निर्णय घेतला आहे.

October 18, 2025 1 comment

Newer Posts

Older Posts