पोलिस डायरी

कोल्हापूर : प्रतिनिधी : उद्योजकाच्या चालकानेच जबरी चोरी केल्याचा गुन्हा कोल्हापूर पोलिसांनी अवघ्या १२ तासात उघड केला. पोलिसांनी दोन संशयितांना अटक केली असून त्यातील मुख्य आरोपी हा उद्योजकाच्या कारवरील चालक आहे. काल गुरूवारी (दि.१२) सम्राटनगर येथील राजीव पाटील यांच्या घरी दोघांनी घरातील वृद्धाला चाकूचा धाक दाखवून सोन्याचे दागिने आणि रोख रक्कम लुटली होती. कर्ज फेडण्यासाठी चोरी केल्याची कबुली संशयिताने दिली आहे. पोलिसांनी दोघां संशयितांना ताब्यात घेऊन ४४ तोळे सोन्याचे दागिने आणि रोख ७५ हजार रुपये, गुन्ह्यात वापरलेली वेरणा कार, दुचाकी असा ५० लाख २५ हजाराचा मुद्देमाल जप्त केला. (Car driver theft)

लक्ष्मी लाडा पंप कंपनीचे मालक राजीव जयकुमार पाटील (वय ६० रा. गोविंद सावंत हौसिंग सोसायटी सम्राटनगर) यांच्या घरी चोरी झाली होती. पाटील यांच्या घरातील सर्व सदस्य दिवसभर घर बंद ठेऊन व्यवसायाच्या ठिकाणी जातात. घरी फक्त राजीव पाटील यांचे वयस्कर सासरे असतात. गुरुवारी दुपारी सव्वातीन वाजण्याच्या सुमारास दोन चोरटे घरी घुसले. त्यांनी घराबाहेर ठेवलेल्या चावीने घराचा मुख्य दरवाजा उघडून प्रवेश केला. तसेच घरातील वृद्ध व्यक्तींना चाकूचा धाक दाखवून सोन्याचे दागिने आणि गोदरेज कंपनीचे कॉम्पेक्ट साईजचे दोन लॉकर चोरुन नेले होते. उद्योजक राजीव पाटील यांनी राजारामपुरी पोलिस ठाण्यात फिर्याद दिली. (Car driver theft)

एलसीबीने सुरू केला तपास

वरिष्ठ अधिकाऱ्यांच्या सूचनवरुन स्थानिक गुन्हे अन्वेषण शाखेनेही समांतर तपास सुरू केला. घटनास्थळी भेट दिल्यानंतर ही चोरी माहितगार व्यक्तीनेच केली असावी असा अंदाज बांधण्यात आला. त्यानंतर पोलिस निरीक्षक रवींद्र कळमकर यांनी पोलिस उप निरीक्षक शेष मोरे यांचे पथक तयार केले. गुन्हाचा तपास करताना माहितारानेच जबरी चोरी केली असावी या अँगलने तपास सुरू केला. दरम्यान पोलिस अंमलदार सुरेश पाटील यांना या गुन्ह्यातील संशयिताची नावे मिळाली. पोलिसांनी कोल्हापूर ते बेळगाव राष्ट्रीय महामार्गावर लक्ष्मी टेकडी येथे सापळा लावून प्रकाश दत्तात्रय चौगुले (वय ३८ रा. हंचनाळ, ता. चिकोडी, जि. बेळगाव) आणि अमित विश्वनाथ शिदे (वय २५, रा. यादवनगर) यांची वेरणा कार थांबवली. कारची तपासणी केली असता डिकीमध्ये तीन लहान लॉकर, दोन बॅगा, चाकू, दोन हेल्मेट, दोन रेनकोट मिळून आले. त्यांच्याकडे चौकशी केली असता त्यांनी उडवाउडवीची उत्तरे दिली. त्यानंतर दोघांनी चोरीची कबुली दिली.

कशी केली चोरी

उद्योजक राजीव पाटल यांच्या कारवर प्रकाश चौगुले हा चालक आहे. तो नेहमी घरी येजा करत असल्याने घराची सर्व माहिती होती. गुरुवारी दुपारी प्रकाश चौगुले आणि त्याचा साथीदार अमित शिंदे दुपारी सम्राटनगर येथील राजीव पाटील यांच्या घराजवळ आले. पाटील यांच्या घराच्या मागे खिडकी उघडून पाटील ज्या ठिकाणी कुलुपाची चावी ठेवतात ती घेऊन दोघांनी घरात प्रवेश केला. दोघांनी रेनकोट आणि हेल्मेट घातले होते. राजीव पाटील यांच्या वयस्कर सासऱ्यांना चाकूचा दाखवून गप्प बसवले. त्यानंतर वरच्या मजल्यावरील खोलीत जाऊन लॉकरच्या चाव्या जिथे ठेवतात त्या घेऊन त्यांनी चोरी केली. प्रवासी बॅगेत सोन्याचे दागिने, रोख रक्कम आणि तीन चॉकर चोरले. आणि तिथून पोबारा केला. पोलिसांनी आज दोघां संशयितांना ताब्यात घेऊन ४४ तोळे सोन्याचे दागिने आणि रोख ७५ हजार रुपये, गुन्ह्यात वापरलेली वेरणा कार, दुचाकी असा ५० लाख २५ हजाराचा मुद्देमाल जप्त केला. (Car driver theft)

कर्जाची परतफेड करण्यासाठी चोरी

चालक प्रकाश चौगुले याने अनेकजणांकडून कर्ज घेतले होते. कर्ज फेडण्यासाठी त्याला पैसे देणाऱ्यांनी तगादा लावला होता. राजीव पाटील यांच्या घरी नियमित तो जात असल्याने त्याला घराची खडानखडा माहिती होती. चोरी करण्यासाठी त्याने अमित शिंदेचे मन वळवले होते. चोरीतील काही दागिने देण्याची आमिष अमित शिंदेला प्रकाश चौगुलेने दाखवले होते.

यांनी केला यशस्वी तपास

पोलिस निरीक्षक रवींद्र कळमकर यांच्या नेतृत्वाखाली पोलिस उप निरीक्षक शेष मोरे, पोलिस अंमलदार सुरेश पाटील, वैभव पाटील, प्रदीप पाटील, रमेश माने, विशाल खराडे, विनोद कांबळे, संतोष बरगे, अरविंद पाटील, रामचंद्र कोळी, संजय पडवळ, कृष्णात पिंगळे, अमित सर्जे, सचिन बेडखेळे यांनी यशस्वी तपास केला.