बंगळुरू : जनता दला (धर्मनिरपेक्ष)चा नेता आणि माजी खासदार प्रज्ज्वल रेवण्णाला (वय ३४) शनिवारी (२ ऑगस्ट) बलात्कार प्रकरणात जन्मठेप सुनावण्यात आली आहे. शिवाय त्याला दहा लाखांचा दंडही ठोठावण्यात आला आहे. (Prajwal Revanna Case)
रेवण्णा हा माजी पंतप्रधान एचडी देवेगौडा यांचा नातू आहे. कालच बंगळुरूच्या आमदार / खासदार विशेष न्यायालयाने चार पैकी एका बलात्कार प्रकरणात त्याला दोषी ठरविले होते. आज त्याला जन्मठेपेची शिक्षा सुनावण्यात आली. हसन येथील फार्म हाऊसवरील एका मदतनीस महिलेवर धमकी देऊन सातत्याने बलात्कार केल्याचा त्याच्यावर आरोप आहे. (Prajwal Revanna Case)
निकाल जाहीर करण्यापूर्वी, प्रज्वल रेवण्णाला न्यायालयात बोलण्याची संधी देण्यात आली. यावेळी प्रज्वलने माझ्याविरोधात कट रचल्याचा आरोप केला. ‘‘मी खासदार म्हणून निवडून आलो आहे. या काळात मी चांगले काम केले आहे. मी खासदार असताना कोणीही माझ्यावर बलात्काराचा आरोप केला नाही. परंतु निवडणुकीच्या अगदी आधी हा आरोप करण्यात आला. माझी एकमेव चूक म्हणजे मी राजकारणात वेगाने वाढलो,’’ असे ते म्हणाले.
प्रज्वलला रडू कोसळले
कोर्टाने शिक्षा सुनावताच प्रज्वल रेवण्णाला भर न्यायालयातच रडू कोसळले. विद्यार्थीदशेत मेरिट असलेला विद्यार्थी होतो आणि मेकॅनिकल इंजिनिअरिंगचे पदवीधर आहे. पालकांना भेटून मला सहा महिने झाले आहेत. कोर्टाने दया दाखवावी आणि मला पालकांना भेटू द्यावे, अशी विनंतीही त्याने न्यायालयात केली. (Prajwal Revanna Case)