Tag:

Test cricket

Australia Win : ऑस्ट्रेलियाचा डावाने विजय

by प्रतिनिधी February 1, 2025

written by प्रतिनिधी

गॉल : फलंदाजांपाठोपाठ गोलंदाजांनीही प्रभावी कामगिरी केल्यामुळे ऑस्ट्रेलियाने यजमान श्रीलंकेविरुद्धची पहिली कसोटी शनिवारी चौथ्या दिवशीच एक डाव २४२ धावांनी जिंकली. या विजयासह ऑस्ट्रेलियाने दोन सामन्यांच्या कसोटी क्रिकेट मालिकेत १-० ने आघाडी घेतली आहे. (Australia Win)

ऑस्ट्रेलियाने पहिल्या डावामध्ये ६५४ धावांचा डोंगर रचल्यानंतर श्रीलंकेची अवस्था तिसऱ्या दिवसअखेर पहिल्या डावामध्ये ५ बाद १३६ अशी झाली होती. शनिवारी, श्रीलंकेचा पहिला डाव १६५ धावांत आटोपला. पहिल्या डावात श्रीलंकेच्या फक्त दिनेश चंदिमलला अर्धशतक झळकावता आले. त्याने १३९ चेंडूंमध्ये ९ चौकारांसह ७२ धावा केल्या. ऑस्ट्रेलियातर्फे फिरकीपटू मॅथ्यू कुन्हेमनने ६३ धावांत ५, तर नॅथन लायनने ५७ धावांत ३ विकेट घेतल्या. (Australia Win)

पहिल्या डावात ४८९ धावांची मोठी आघाडी मिळाल्यामुळे ऑस्ट्रेलियाने श्रीलंकेवर फॉलोऑन लादला. श्रीलंकेचा दुसरा डावही अवघ्या ५४.३ षटकांत २४७ धावांत संपुष्टात आला. श्रीलंकेच्या आघाडीच्या फलंदाजांपैकी कोणालाच मोठी खेळी करता आली नाही. श्रीलंकेकडून दुसऱ्या डावातील सर्वोच्च धावा नवव्या क्रमांकावरील जेफ्री व्हंदारसेच्या होत्या. त्याने ४७ चेंडूंमध्ये ७ चौकार व २ षटकारांसह ५३ धावा फटकावल्या. कुन्हेमन आणि लायन यांनी दुसऱ्या डावामध्ये प्रत्येकी ४ विकेट घेतल्या. कुन्हेमनने सामन्यात एकूण ९ विकेट घेऊन कारकिर्दीतील सर्वोत्तम कामगिरी नोंदवली. ऑस्ट्रेलियातर्फे २३२ धावांची खेळी करणारा उस्मान ख्वाजा सामनावीर ठरला. या मालिकेतील दुसऱ्या कसोटीस ६ फेब्रुवारीपासून सुरुवात होणार आहे. (Australia Win)

संक्षिप्त धावफलक : ऑस्ट्रेलिया – पहिला डाव ६ बाद ६५४ (घोषित) विजयी विरुद्ध श्रीलंका – पहिला डाव ५७.२ षटकांत सर्वबाद १६५ आणि दुसरा डाव ५४.३ षटकांत सर्वबाद २४७ (जेफ्री व्हंदारसे ५३, अँजलो मॅथ्यूज् ४१, धनंजया डिसिल्वा ३९, मॅथ्यू कुन्हेमन ४-८६, नॅथन लायन ४-७८).

हेही वाचा :

क्रीडा तरतुदींमध्ये ३५० कोटींची वाढ

भारत विश्वचषकाच्या अंतिम फेरीत

रणजी स्पर्धेत विराट कोहली फ्लॉप

February 1, 2025 0 comments

क्रीडा

Australia PM : दोन्ही संघांनी घेतली ऑस्ट्रेलियाच्या पंतप्रधानांची भेट

by प्रतिनिधी January 1, 2025

written by प्रतिनिधी

सिडनी : बॉर्डर-गावसकर ट्रॉफी मालिकेतील सिडनी येथील अखेरच्या कसोटीपूर्वी भारत व ऑस्ट्रेलियाच्या संघांनी ऑस्ट्रेलियाचे पंतप्रधान अँथनी अल्बानीज यांची भेट घेतली. नववर्षाच्या स्वागतासाठी अल्बानीज यांनी किरीबिल्ली हाउस या आपल्या निवासस्थानी कार्यक्रम आयोजित केला होता. याप्रसंगी अल्बानीज यांनी भारताचा वेगवान गोलंदाज जसप्रीत बुमराहचे कौतुक केले. (Australia PM)

सिडनी मॉर्निंग हेराल्ड या ऑस्ट्रेलियन वृत्तपत्राने यासंबंधीचे वृत्त दिले आहे. सुमारे दीड तास अल्बानीज यांनी दोन्ही संघांसोबत वेळ घालवला. “बुमराह दरवेळी गोलंदाजीस येतो, तेव्हा काहीतरी उत्कंठावर्धक घडते. त्याला डाव्या हाताने किंवा लंगडी घालत गोलंदाजी करावी लागेल, असा कायदा आपण येथे संमत करू शकतो,” अशी मिश्किल प्रतिक्रियाही अल्बानीज यांनी यावेळी दिली. ऑस्ट्रेलियाचा नवोदित फलंदाज सॅम कॉन्स्टसने या कार्यक्रमादरम्यान भारताच्या विराट कोहलीसोबत छायाचित्र घेतले. मेलबर्न कसोटीदरम्यान कॉन्स्टसला धक्का दिल्यामुळे विराटला मानधनाच्या २० टक्के दंड ठोठावण्यात आला होता. कॉन्स्टसचे पालकही या कार्यक्रमास उपस्थित होते. त्यांनी बुमराहसोबत छायाचित्र काढण्याची विनंती केली.

या कार्यक्रमामध्ये भारताचा कर्णधार रोहित शर्मा छोटेखानी भाषण करणार होता. तथापि, ऐनवेळी त्याच्याऐवजी भारताचे प्रशिक्षक गौतम गंभीरने हे भाषण केले. “ऑस्ट्रेलिया हा प्रवासासाठी खूप सुंदर, परंतु क्रिकेटदौरा करण्यासाठी खूप कठीण देश आहे. येथील प्रेक्षक हा उत्साही आहे. या दौऱ्यातील आमची आणखी एक कसोटी शिल्लक आहे. त्या कसोटीत आम्ही प्रेक्षकांचे मनोरंजन करू शकू, अशी मला आशा आहे,” असे गंभीर म्हणाला. (Australia PM)

ऑस्ट्रेलियाचा कर्णधार पॅट कमिन्सनेही या वेळी मनोगत व्यक्त केले. “मागील आठवड्यामध्ये मेलबर्नमधील कसोटी ही आम्ही खेळलेल्या सर्वोत्तम कसोटींपैकी एक आहे. त्या पाच दिवसांमध्ये आम्ही स्टेडियममध्ये जे वातावरण अनुभवले, तसे मी यापूर्वी कधीही अनुभवले नव्हते. या आठवड्यात होणाऱ्या मालिकेतील अखेरच्या कसोटीकरिताही मी तितकाच उत्सुक आहे. मालिकेचा निकाल या कसोटीवर अवलंबून असल्याने आम्हाला मालिका जिंकण्याची संधी आहे,” असे कमिन्सने सांगितले. अल्बानीज यांनी भारतीय संघाची या दौऱ्यामध्ये घेतलेली ही दुसरी भेट आहे. यापूर्वी भारत आणि प्राइम मिनिस्टिर इलेव्हन यांच्यामध्ये कॅनबेरा येथे रंगलेल्या सराव सामन्यापूर्वी अल्बानीज भारतीय संघास भेटले होते.

The Australian and Indian teams have already given us an incredible summer of cricket. pic.twitter.com/oqVDOOr5Bm

— Anthony Albanese (@AlboMP) January 1, 2025

p>
हेही वाचा :

January 1, 2025 0 comments

Rohit Sharma : रोहित शर्माची निवृत्ती आठवड्यावर?

by प्रतिनिधी December 31, 2024

written by प्रतिनिधी

सिडनी : मागील काही कसोटींमध्ये सातत्याने अपयशी ठरत असलेला भारताचा कर्णधार रोहित शर्माच्या कसोटी क्रिकेटमधून निवृत्तीच्या चर्चांनी जोर धरला आहे. बॉर्डर-गावसकर ट्रॉफी मालिकेतील सिडनी येथे अखेरची कसोटी पार पडल्यानंतर रोहित निवृत्तीची घोषणा करू शकतो, असे वृत्त आहे. (Rohit Sharma)

कर्णधार आणि फलंदाज म्हणूनही रोहित सध्या टिकाकारांच्या रडारवरती आहे. न्यूझीलंडविरुद्धची मायदेशातील मालिका ०-३ अशी गमावल्यानंतर त्याच्या नेतृत्वावर प्रश्नचिन्ह उपस्थित करण्यात येत होते. सध्या सुरू असणाऱ्या बॉर्डर-गावसकर ट्रॉफी मालिकेत भारताचा एकमेव विजय हा रोहितच्या अनुपस्थितीत जसप्रीत बुमराहच्या नेतृत्वाखाली मिळालेला आहे. ॲडलेड येथे दुसऱ्या कसोटीत परतल्यानंतरची रोहितची कर्णधार म्हणून तीन कसोटींमधील कामगिरी ही दोन पराभव व एक अनिर्णित अशी आहे. एकाच मोसमात पाच कसोटी सामने गमावणारा रोहित हा भारताचा केवळ दुसराच कर्णधार ठरला आहे. यापूर्वी सचिन तेंडुलकरच्या नेतृत्वाखाली १९९९ मध्ये भारताने एकाच मोसमात पाच कसोटींमध्ये पराभव पत्करले होते. (Rohit Sharma)

मेलबर्न कसोटीतील पराभवानंतर जागतिक कसोटी अजिंक्यपद स्पर्धेची (वर्ल्ड टेस्ट चॅम्पियनशीप) अंतिम फेरी गाठण्याच्या भारताच्या आशा धुसर बनल्या आहेत. भारताने सिडनी कसोटी जिंकली, तरीही संघाला ऑस्ट्रेलिया-श्रीलंका कसोटी मालिकेच्या निकालावर अवलंबून राहावे लागणार आहे. अशातच फलंदाज म्हणूनही रोहित शर्मा सातत्याने अपयशी ठरतो आहे. या मोसमात रोहितला आतापर्यंत आठ कसोटींमध्ये केवळ एक अर्धशतक झळकावता आले आहे. मोसमातील त्याची सरासरी १०.९३ इतकी कमी आहे. यंदाच्या बॉर्डर-गावसकर ट्रॉफीमध्ये त्याला तीन कसोटींतील सहा डावांमध्ये मिळून केवळ ३१ धावा करता आल्या आहेत. ॲडलेड व ब्रिस्बेन कसोटीत रोहित सहाव्या स्थानी फलंदाजीस आला होता. मेलबर्नला रोहितने पुन्हा सलामीला येण्याचा निर्णय घेतला. त्यामुळे अगोदरच्या कसोटींमध्ये सलामीला प्रभावी कामगिरी करणाऱ्या लोकेश राहुलला तिसऱ्या स्थानी फलंदाजीस यावे लागले, तर शुभमन गिलला संघाबाहेर राहावे लागले. (Rohit Sharma)

या सर्व पार्श्वभूमीवर क्रिकेटप्रेमींबरोबरच क्रिकेटतज्ज्ञही रोहितच्या निवृत्तीची चर्चा करू लागले आहेत. फलंदाज म्हणून रोहितच्या पायांची हालचाल मंदावली असून त्याच्या फटक्यातील सफाईही दिसून येत नाही. कर्णधार म्हणूनही त्याच्या नेतृत्वात कल्पकतेचा अभाव आहे. त्यामुळे, भारतीय क्रिकेट नियामक मंडळाने (बीसीसीआय) रोहितची कर्णधारपदावरून हकालपट्टी करत त्याला संघातून डच्चू देण्यापूर्वी रोहितसमोर सन्मानाने निवृत्त होण्याचा पर्याय आहे. परिणामी, सिडनी कसोटीनंतर रोहित निवृत्तीची घोषणा करू शकतो. हा सामना जिंकला तरीही रोहित विजयासह सन्मानाने कसोटीला अलविदा करू शकतो. फेब्रुवारीत चॅम्पियन्स ट्रॉफी ही महत्त्वाची स्पर्धा असल्याने त्यापूर्वी कसोटीचे ओझे उतरवल्यास रोहित पुन्हा नव्या जोमाने ‘वन-डे’मध्ये भारताचे नेतृत्व करू शकेल. (Rohit Sharma)

हेही वाचा :

December 31, 2024 0 comments

क्रीडा महत्त्वाच्या बातम्या

AUS vs IND : मेलबर्न कसोटीत ऑस्ट्रेलियाचे वर्चस्व

by प्रतिनिधी December 27, 2024

written by प्रतिनिधी

महाराष्ट्र दिनमान ऑनलाईन डेस्क : चौथ्या कसोटीतील दुसऱ्या दिवसाचा खेळ संपेपर्यंत भारताने पाच गडी गमावून १६४ धावा केल्या आहेत. ऑस्ट्रेलियाने पहिल्या डावात ४७४ धावा केल्या होत्या. या बाबतीत भारत अजूनही ३१० धावांनी मागे आहे. दुसऱ्या दिवसाच्या तिन्ही सत्रात ऑस्ट्रेलियाने सामन्यावर वर्चस्व राखले. शेवटच्या सत्रात भारताची धावसंख्या २ बाद १५३ अशी होती. यानंतर अवघ्या सहा धावात तीन विकेट गमावल्या. (AUS vs IND)

सामन्यात यशस्वी जैस्वालची विकेट टर्निंग पॉइंट ठरली. यशस्वीने कोहलीसोबत शानदार फलंदाजी करत १०२ धावांची भागीदारी रचली. मात्र, यशस्वी धावबाद होताच भारताचा डाव गडगडला. तो ८२ धावांवर धावबाद झाला. यानंतर विराट कोहली ३६ धावा करून बाद झाला. त्यानंतर नाईट वॉचमन आकाश दीपही खाते न उघडताच पॅव्हेलियनमध्ये परतला. तत्पूर्वी, सलामीला आलेला कर्णधार रोहित शर्मा ३ तर केएल राहुल २४ धावा करून बाद झाला. ऑस्ट्रेलियाकडून पॅट कमिन्स आणि स्कॉट बोलँड यांनी प्रत्येकी दोन बळी घेतले.

ऑस्ट्रेलियाचा पहिला डाव

बॉर्डर-गावस्कर ट्रॉफीतील चौथा सामना बॉक्सिंग-डे कसोटीच्या पहिल्या दिवशी ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला. या सामन्यात भारतीय संघात एक तर ऑस्ट्रेलिया संघात दोन बदल करण्यात आले. ऑस्ट्रेलियाने जोश हेझलवूडच्या जागी स्कॉट बोलंडला आणि नॅथन मॅकस्विनीच्या जागी सॅम कॉन्स्टस , भारताने शुभमन गिलच्या जागी वॉशिंग्टन सुंदरला संघात स्थान दिले. (AUS vs IND)

प्रथम फलंदाजी करताना ऑस्ट्रेलियाकडून कसोटीमध्ये पदार्पण करणाऱ्या सॅम कॉन्स्टसने उस्मान ख्वाजासोबत पहिल्या विकेटसाठी ८९ धावांची भागीदारी केली. पदार्पण करणाऱ्या सॅम कॉन्स्टसने भारताचा वेगवान गोलंदाज जसप्रीत बुमराहला लक्ष्य केले. त्याने आक्रमक फलंदाजी करत ५९ चेंडूंत आपल्या कारकिर्दीतील पहिले अर्धशतक झळकवले. परंतु सामन्याच्या २० व्या ओव्हरमध्ये भारताचा फिरकीपटू रवींद्र जडेजाने त्याला एलबीडब्ल्यू केले. कॉन्स्टसने आपल्या खेळीत ६५ चेंडूंत २ षटकार आणि ६ चौकाराच्या सहाय्याने ६० धावांची खेळी केली.

यानंतर फलंदाजीसाठी मैदानात आलेल्या उस्मान ख्वाजासोबत लाबुशेनने ६५ धावांची भागीदारी रचली. यावेळी ख्वाजाने आपल्या कसोटी कारकिर्दीतील २७ वे अर्धशतक झळकवले. सामन्याच्या ४५ व्या षटकात बुमराहने ख्वाजाच्या रूपात ऑस्ट्रेलियाला दुसरा झटका दिला. ख्वाजाने आपल्या खेळीत १२१ चेंडूंत ६ चौकारांच्या मदतीने ५७ धावा केल्या. यानंतर स्टीव स्मिथने लाबुशेनसोबत तिसऱ्या विकेटसाठी ७३ धावांची भागिदारी केली. सामन्याच्या ६६ व्या षटकात वॉशिंग्टन सुंदरने विराट कोहलीकरवी लाबुशेनला झेलबाद केले. लाबुशेनने १४५ चेंडूंत ७ चौकाराच्या मदतीने ८३ धावांची खेळी केली. यानंतर फलंदाजीला आलेल्या हेडला बुमराहने आल्यापावली तंबूत पाठवले. त्याला धावांचा भोपळा ही फोडता आला नाही. त्यानंतर बुमराहने मिचेल मार्शला चार धावांवर बाद केले. (AUS vs IND)

एका बाजूने विकेट पडत असताना स्मिथने शानदार फलंदाजी केली. त्याने १११ चेंडूंत ६८ धावांच्या नाबाद खेळीत पाच चौकार आणि एक षटकार लगावला आहे. तर, कर्णधार पॅट कमिन्स ११ धावांवर खेळत आहे. भारताकडून गोलंदाजीत बुमराहने सर्वाधिक तीन विकेट घेतल्या. तर, आकाश दीप, जडेजा आणि वॉशिंग्टन सुंदर यांना प्रत्येकी एक विकेट मिळाली.

Stumps on Day 2 in Melbourne!#TeamIndia move to 164/5, trail by 310 runs

Updates https://t.co/njfhCncRdL #AUSvIND pic.twitter.com/9ZADNv5SZf

— BCCI (@BCCI) December 27, 2024

हेही वाचा :

December 27, 2024 0 comments

क्रीडा महत्त्वाच्या बातम्या

आयसीसीची विराटवर कारवाई

by प्रतिनिधी December 26, 2024

written by प्रतिनिधी

महाराष्ट्र दिनमान ऑनलाईन डेस्क : बॉक्सिंग डे कसोटीचा पहिला दिवस आज चांगलाच चर्चेत आहे. आजचा दिवस गाजला तो विराट आणि ऑस्ट्रेलियाचा युवा खेळाडू सॅम कॉन्स्टस यांच्यामुळे. सॅम कॉन्स्टसने कारर्किदितील पहिल्याच सामन्यात आक्रमक खेळी करत आजचा दिवस गाजवला. दरम्यान, त्याचा विराटसोबत वाद झाल्याचे पाहायला मिळाले. त्याचे व्हिडिओ सध्या सोशल मीडियावर चांगलेच व्हायरल होत आहेत. सामन्यादरम्यान विराट आणि सॅम कॉन्स्टस यांच्यात झालेल्या वादामुळे आयसीसीने विराटवर कारवाई केली आहे. (Virat Kohli)

बॉर्डर-गावस्कर ट्रॉफी कसोटी क्रिकेट मालिकेतील चौथा सामना मेलबर्न क्रिकेट ग्राउंडवर सुरू आहे. सामन्याच्या १० व्या षटकात मोहम्मद सिराज आणि सॅम कॉन्स्टस यांच्यात वादावादी झाली. यानंतर विराट चालत जाताना सॅम कॉन्स्टसला त्याचा धक्का बसला. यावेळी कॉन्स्टस आणि विराट यांच्यात शाब्दिक चकमक झाली. यावेळी विराटने त्याच्या दिशेने जात त्याला काहीतरी बोलला. यामुळे दोघांमधील वाद वाढला. यावेळी ऑस्ट्रेलियाचा फलंदाज उस्मान ख्वाजा आणि पंच मायकेल गॉफ यांनी मध्यस्थी करत दोघांना दूर केले.

परंतु, या वादामुळे आयसीसीचे सामनाधिकारी अँडी पायक्रॉप्ट यांनी विराटवर कारवाई केली आहे. विराटच्या सामना शुल्कात २० टक्के कपात करण्यात येणार आहे. तसेच त्याला एक डिमेरिट पाँइंटही देण्यात आला आहे. विराटने आपली चूक मान्य केल्यामुळे याप्रकरणी कोणतीही कारवाई होणार नाही. दिवसाच्या खेळानंतर एका वृत्तवाहिनीशी बोलताना कॉन्स्टसने ‘आम्ही दोघेही भावनांवर ताबा ठेवू शकलो नाही,’ असे सांगितले. “मला लागलीच ते जाणवले नाही. मी स्वत:चे ग्लोव्ह्ज व्यवस्थित करत होतो आणि त्याने येऊन मला खांद्याने धक्का दिला. परंतु, क्रिकेटमध्ये अशा गोष्टी होत असतात,” असे कॉन्स्टस म्हणाला. (Virat Kohli)

दरम्यान, ऑस्ट्रेलियाचा माजी कर्णधार रिकी पाँटिंग आणि समालोचक रवी शास्त्री यांनीही विराटच्या वर्तनावर नापसंती दर्शवली. विराटचे वर्तन अनावश्यक होते, असे शास्त्री म्हणाले.

The ICC has confirmed the sanction for Virat Kohli.#AUSvIND | #WTC25 https://t.co/tfbmHJRzTi

— ICC (@ICC) December 26, 2024

हेही वाचा :

December 26, 2024 0 comments

क्रीडा

Ben Stokes : बेन स्टोक्स तीन महिने संघाबाहेर

by प्रतिनिधी December 24, 2024

written by प्रतिनिधी

लंडन : इंग्लंडच्या कसोटी क्रिकेट संघाचा कर्णधार बेन स्टोक्सला तीन महिने क्रिकेटपासून दूर राहावे लागणार आहे. त्याच्या डाव्या मांडीचे स्नायू पुन्हा फाटल्यामुळे त्याला उपचार घ्यावे लागणार असल्याची माहिती इंग्लंड क्रिकेट बोर्डाने दिली. (Ben Stokes)

नुकत्याच झालेल्या न्यूझीलंडविरुद्धच्या कसोटी मालिकेतील अखेरच्या सामन्यात ३३ वर्षीय स्टोक्सला दुखापतीमुळे तिसऱ्या दिवशी मैदान सोडावे लागले होते. त्यानंतर तो फलंदाजीसही आला नव्हता. या वर्षी ऑगस्ट महिन्यात हंड्रेड स्पर्धेमध्ये नॉर्दर्न सुपरचार्जर्स संघातर्फे खेळताना त्याच्या मांडीचा स्नायू फाटला होता. या दुखापतीमुळे त्याला दोन महिने क्रिकेटपासून दूर राहावे लागले होते. त्यानंतर, पुन्हा ही दुखापत उद्भवल्याने स्टोक्सवर जानेवारी महिन्यात शस्त्रक्रिया करण्यात येईल, असे ईसीबीने सांगितले आहे.

पुढील वर्षी फेब्रुवारीमध्ये होणाऱ्या चॅम्पियन्स ट्रॉफीसाठी सोमवारी जाहीर करण्यात आलेल्या इंग्लंड संघातही स्टोक्सचा समावेश करण्यात आला नव्हता. त्याला वैद्यकीय कारणास्तव संघाबाहेर ठेवण्यात आल्याचे ईसीबीने सांगितले होते. आता तो तीन महिने क्रिकेटला मुकणार असल्याने मार्चपासून सुरू होणाऱ्या इंडियन प्रीमियर लीग (आयपीएल) स्पर्धेतील त्याच्या सहभागावरही प्रश्नचिन्ह आहे. (Ben Stokes)

Injury news

We have an update on England Men’s Test captain, Ben Stokes

— England Cricket (@englandcricket) December 23, 2024

हेही वाचा :

December 24, 2024 0 comments

क्रीडा

‌Team India Practice : रोहित, आकाशदीपला किरकोळ दुखापत

by प्रतिनिधी December 22, 2024

written by प्रतिनिधी

मेलबर्न : बॉर्डर-गावसकर ट्रॉफी कसोटी क्रिकेट मालिकेमध्ये चौथ्या सामन्यासाठी भारतीय संघाने रविवारी मेलबर्न क्रिकेट ग्राउंडवर (एमसीजी) सराव केला. या सरावादरम्यान भारताचा कर्णधार रोहित शर्मा आणि वेगवान गोलंदाज आकाशदीप यांना दुखापत झाली. परंतु, ही दुखापत किरकोळ स्वरूपाची असून काळजीचे कारण नसल्याचे स्पष्ट करण्यात आले. (‌‌Team India Practice)

भारतीय संघातील लोकेश राहुल, यशस्वी जैस्वाल, विराट कोहली आणि शुभमन गिल यांनी नेट्समध्ये नव्या चेंडूवर फलंदाजीचा सराव केला. दुसऱ्या नेट्समध्ये रोहित फिरकी गोलंदाजीवर फलंदाजीचा सराव करत होता. त्याचवेळी, पुलचा फटका खेळण्याच्या प्रयत्नात त्याच्या गुडघ्यावर चेंडू आदळला. यानंतर, मैदानावरच त्याच्यावर उपचार करण्यात आले. सरावसत्राच्या अखेरपर्यंत तो पुन्हा चालताना व संघसहकाऱ्यांशी चर्चा करताना दिसल्याने त्याची दुखापत गंभीर नसल्याचे स्पष्ट झाले.

आकाशदीपलाही नेट्समध्ये फलंदाजी करताना हाताला चेंडू लागला होता. तथापि, ही दुखापत गंभीर नसल्याचे त्यानेच सरावसत्रानंतर झालेल्या पत्रकार परिषदेमध्ये सांगितले. “क्रिकेट खेळताना अशा दुखापती होणे सामान्य असते. नेट्समधील खेळपट्टी ही पांढऱ्या चेंडूसाठी तयार करण्यात आल्यामुळे तांबडा चेंडू येथे काहीवेळा खाली राहात होता. त्यामुळे तो बॅटवर न येता शरीरावर आदळला,” असे आकाशदीप म्हणाला. (‌Team India Practice)

भारताचा यष्टिरक्षक-फलंदाज रिषभ पंत सरावसत्रादरम्यान प्रशिक्षक गौतम गंभीर यांच्याशी दीर्घकाळ चर्चा करताना दिसला. आतापर्यंत या मालिकेत संधी न मिळालेला वेगवान गोलंदाज प्रसिध कृष्णानेही नेट्समध्ये गोलंदाजी केली. भारताचे सरावसत्र पाहण्यासाठी एमसीजीवर क्रिकेटप्रेमींची गर्दी जमली होती. बॉक्सिंग डे टेस्ट म्हणून ओळखल्या जाणाऱ्या मेलबर्न कसोटीस २६ डिसेंबरपासून सुरुवात होणार आहे. पाच कसोटींच्या या मालिकेत तिसऱ्या कसोटीअखेर १-१ अशी बरोबरी झाली आहे. ‌(‌Team India Practice)

हेही वाचा :

December 22, 2024 0 comments

क्रीडा

IND vs AUS : चौथ्या कसोटीत ऑस्ट्रेलियाकडून टीम इंडियाला सरप्राईज

by प्रतिनिधी December 21, 2024

written by प्रतिनिधी

महाराष्ट्र दिनमान ऑनलाईन डेस्क : बॉर्डर-गावस्कर ट्रॉफीतील उर्वरित तीन सामन्यांसाठी ऑस्ट्रेलियाने संघाची घोषणा केली. यामध्ये ऑस्ट्रेलियने संघात महत्वाचे बदल केले आहेत. ऑस्ट्रेलियाने सलामीजोडीत आणि गोलंदाजीत बदल केला आहे. मालिकेतील चौथा सामना मेलबर्न स्टेडियमवर खेळवण्यात येणार आहे. (IND vs AUS)

ऑस्ट्रेलियाने संघात सलमीवीर नॅथन मॅकस्विनीच्या जागी युवा फलंदाज सॅम कॉन्स्टास याची निवड करण्यात आली आहे. तर जखमी वेगवान गोलंदाज जोश हेझलवूडच्या जागी रिचर्डसनला संघात स्थान देण्यात आले आहे. यासोबत शॉन ॲबॉट आणि ब्यू वेबस्टर यांची संघात वर्णी लागली आहे. नॅथन मॅकस्किनीच्या जागी संघात वर्णी लागलेल्या सॅम कॉन्स्टास मेलबर्न कसोटीतून पदार्पण करणार आहे. त्याने कॅनबेरा येथे भारताविरुद्धच्या पिंक बॉल कसोटीच्या सराव सामन्यात शतक झळकावले होते. तर रिचर्डसनने तीन वर्षांहून अधिक काळानंतर कसोटी संघात पुनरागमन केले आहे.

मालिका बरोबरीत

भारत आणि ऑस्ट्रेलिया यांच्यात सुरू असलेली बॉर्डर-गावस्कर ट्रॉफी सध्या १-१ अशी बरोबरीत आहेत. मालिकेतील पहिला सामना जिंकून भारताने आघाडी घेतली होती. परंतु, शानदार कामगिरी करत ऑस्ट्रेलियाने दुसऱ्या सामन्यात विजय मिळवून मालिकेत १-१ अशी बरोबरी साधली. तर मालिकेतील पावसामुळे अनिर्णित राहिला. मालिकेत आता दोन सामने बाकी आहेत. (IND vs AUS)

ऑस्ट्रेलियन संघ

पॅट कमिन्स (कर्णधार), शॉन ॲबॉट, स्कॉट बोलँड, ॲलेक्स कॅरी, ट्रॅव्हिस हेड, जोश इंग्लिस, उस्मान ख्वाजा, सॅम कॉन्स्टास, मार्नस लॅबुशेन, नॅथन लियॉन, मिचेल मार्श, जे रिचर्डसन, स्टीव्ह स्मिथ, मिचेल स्टार्क, ब्यू वेबस्टर.

JUST IN: Australia have added young gun Sam Konstas to a 15-player squad for the final two #AUSvIND Tests | @ARamseyCricket https://t.co/9P0hGCCqXw

— cricket.com.au (@cricketcomau) December 20, 2024

हेही वाचा :

December 21, 2024 0 comments

क्रीडा

Virat Kohli : “न विचारता व्हिडिओ घेऊ नका”

by प्रतिनिधी December 19, 2024

written by प्रतिनिधी

मेलबर्न : भारतीय क्रिकेट संघाचा अनुभवी फलंदाज विराट कोहली हा गुरुवारी मेलबर्न विमानतळावर एका प्रसारमाध्यम प्रतिनिधीशी हुज्जत घालताना दिसला. मला न विचारता तुम्ही व्हिडिओ चित्रित करू शकत नाही, असे विराटने संबंधित प्रतिनिधीला सांगितले. (Virat Kohli)

बॉर्डर-गावसकर ट्रॉफी मालिकेतील चौथी कसोटी खेळण्यासाठी भारतीय संघाचे गुरुवारी मेलबर्नमध्ये आगमन झाले. भारतीय संघ विमानतळाबाहेर येत असताना, ‘चॅनेल सेव्हन’ या माध्यमसमुहाची एक महिला प्रतिनिधी विराटचा व्हिडिओ चित्रित करत होती. हे विराटच्या लक्षात येताच त्याने संबंधित प्रतिनिधीजवळ जाऊन तिला खडे बोल सुनावले. त्यानंतर विराट बाहेर जाऊ लागला. परंतु, क्षणार्धात वळून त्याने अन्य प्रसारमाध्यम प्रतिनिधींना उद्देशून, ‘मला विचारल्याशिवाय तुम्ही माझ्या कुटुंबियांचे व्हिडिओ घेऊ शकत नाही,’ असे सांगितले. आपल्या मुलांचे चित्रिकरण केले जाणार नसल्याची खात्री मिळाल्यानंतर कोहली तिथून बाहेर पडला.

दरम्यान, चॅनेल सेव्हन समुहानेही याविषयी स्पष्टीकरण दिले असून विराटची प्रतिक्रिया गैरसमजातून आल्याचे म्हटले आहे. ‘कॅमेरा हातात धरून’ प्रतिनिधी भारतीय संघाची वाट पाहत होते. त्यावेळी ते विराटच्या मुलांचे चित्रिकरण करत असल्याचा विराटचा गैरसमज झाला,’ असे चॅनेल सेव्हनने म्हटले. ‘बॉक्सिंग डे टेस्ट’ म्हणून प्रसिद्ध असणाऱ्या मेलबर्न कसोटीस २६ डिसेंबरपासून सुरुवात होणार आहे. (Virat Kohli)

Virat Kohli! pic.twitter.com/jM2zyJCXP8

— RVCJ Media (@RVCJ_FB) December 19, 2024

हेही वाचा :

December 19, 2024 0 comments

क्रीडा

Mohammad Shami : असेल ‘त्यांची’ हमी… तर खेळेल शमी!

by प्रतिनिधी December 18, 2024

written by प्रतिनिधी

ब्रिस्बेन : वेगवान गोलंदाज महंमद शमीसाठी भारतीय कसोटी संघाची दारे खुली आहेत. तथापि, त्याच्या फिटनेसविषयी राष्ट्रीय क्रिकेट अकादमीने (एनसीए) हमी देणे आवश्यक आहे. शमीच्या फिटनेसविषयी २०० टक्के खात्री झाल्यानंतरच त्याचा समावेश संघात करण्यात येईल, असे भारताचा कर्णधार रोहित शर्माने सांगितले. (Mohammad Shami)

बॉर्डर-गावसकर ट्रॉफी मालिकेतील ब्रिस्बेन कसोटीनंतरच्या पत्रकार परिषदेदरम्यान रोहितने प्रसारमाध्यमांशी संवाद साधला. पाच सामन्यांच्या या मालिकेत तीन सामन्यांअखेर भारत व ऑस्ट्रेलियामध्ये १-१ अशी बरोबरी आहे. जागतिक कसोटी अजिंक्यपद स्पर्धेची अंतिम फेरी गाठण्याच्या दृष्टीने भारताला उर्वरित दोन्ही कसोटी जिंकणे आवश्यक आहे. त्यादृष्टीने शमीचा समावेश संघात केल्यास भारतीय गोलंदाजीला धार येऊ शकते. रोहितने मात्र याविषयी बोलताना एनसीएकडे बोट दाखवले.

“शमीच्या फिटनेसविषयी एनसीएमधील कोणीतरी स्पष्टीकरण देण्याची वेळ आता आली आहे. शमी देशांतर्गत क्रिकेट स्पर्धांमध्ये खेळत आहे. तथापि, त्याच्या गुडघ्याच्या दुखापतीविषयी अद्यापही तक्रारी आहेत. ऑस्ट्रेलियामध्ये आल्यानंतर खेळाडू दुखापतग्रस्त होणे हे कोणालाच नको आहे. त्यामुळे, आम्ही कोणताही धोका पत्करणार नाही. त्याच्या फिटनेसविषयी २०० टक्के खात्री झाल्यानंतरच त्याचा समावेश संघात केला जाईल. अर्थात, तो संघात परतल्यास मला आनंदच होईल,” असे रोहित म्हणाला. या मालिकेतील चोथ्या कसोटीस २६ डिसेंबरपासून मेलबर्न येथे सुरुवात होणार आहे. तत्पूर्वी, संघात काही फेरबदल होतात का, याकडे क्रिकेटप्रेमींचे लक्ष लागले आहे. (Mohammad Shami)

हेही वाचा :

December 18, 2024 0 comments

Newer Posts

Older Posts

Test cricket

ऑस्ट्रेलियाचा पहिला डाव

मालिका बरोबरीत

ऑस्ट्रेलियन संघ

Queue