Chief Minister Devendra Fadnavis

नागपूर; विशेष प्रतिनिधी : ‘वन नेशन वन इलेक्शन’ होता कामा नये. त्याआधी निवडणूक प्रक्रिया पारदर्शक झाली पाहिजे. निवडणूक आयुक्तांची नेमणूकही निवडणुकीतून केली पाहिजे, अशी मागणी माजी मुख्यमंत्री, शिवसेना पक्षप्रमुख उद्धव ठाकरे यांनी पत्रकारांशी बोलताना केली. (Uddhav Thackeray)

हिवाळी अधिवेशनासाठी सहभागी होण्यासाठी ठाकरे मंगळवारी नागपूरला आले होते. विधान परिषदेत काही काळ उपस्थित राहिल्यानंतर त्यांनी पत्रकार परिषद घेऊन भूमिका मांडली. पंतप्रधान नरेंद्र मोदी भाजपा व महायुती सरकारवर जोरदार टीका केली. मंत्रिमंडळ विस्तारात स्थान न मिळाल्याने छगन भुजबळ यांच्यासह शिवसेनेतील अनेक आमदार नाराज आहेत. त्यांना पुन्हा पक्षात घेणार का? अशी विचारणा केली असता त्यांना पहिल्यांदा आपली भूमिका स्पष्ट करू द्या मग पाहू, असे उत्तर दिले. हिवाळी अधिवेशन सुरू झाले. पण हे बिन खात्याचे मंत्रिमंडळ असून अद्याप खातेवाटप झालेले नाही. त्यामुळे नेमकी जबाबदारी कोणावर, हे कधी निश्चित होणार, असा सवाल केला. (Uddhav Thackeray)

लवकरात लवकर खातेवाटप व्हायला पाहिजे होते. पण, राक्षसी बहुमत मिळाल्यानंतरही शपथविधीपासून मंत्रिमंडळ विस्तारात वेळ गेला. खातेवाटपही अजून झाले नाही. कोणताही मंत्री कोणत्याही प्रश्नाला उत्तर देतोय. हे काय चालले आहे, अधिवेशन घेतले कशाला? असा सवाल त्यांनी केला.

‘लोकसभेत वन नेशन वन इलेक्शन’ आणण्यात आले आहे. त्या विधेयकाबाबत ते म्हणाले की, निवडणूक प्रक्रिया पारदर्शी करण्याची आवश्यकता आहे. कारण राज्यातील सध्याचे सरकार हे ईव्हीएम सरकार असल्याचे जनतेचे मत बनले आहे. तीव्र नाराजी असतानाही ते बहुमताने निवडून येतातच कसे, याबाबत जनतेमध्ये शंका व्यक्त होत आहे. निवडणूक आयुक्त हे नेमले जाणार असतील आणि ते जर आम्हाला निवडणुकीचे कायदे शिकवणार असतील तर ती प्रथा योग्य नाही आणि अशा व्यक्तीच्या अधिपत्याखाली ‘वन नेशन वन इलेक्शन’ होता कामा नये. पहिला प्रथम निवडणूक आयुक्तही निवडणूक प्रक्रियेतून निवडला पाहिजे. त्यासाठी मतप्रक्रिया कशी घ्यायची हे ठरवावे लागेल. (Uddhav Thackeray)

राज्यपालांच्या अभिभाषणाबाबत बोलताना ते म्हणाले की, ‘आरेमधील मेट्रोच्या कारशेडसाठी झाडांची कत्तल केली गेली. त्याच्यामध्ये यांना कुठे पर्यावरण दिसले नाही. तसेच आता डोंगरी येथे कारशेडसाठी  चौदाशे झाडांची कत्तल केली जाणार आहे. पर्यावरणाची तज्ञांची समिती हे होऊ देणार आहे का? राज्यातील  कायदा आणि सुव्यवस्थेबद्दल, महिलांच्या सुरक्षेबद्दल राज्यपालमहोदयांच्या अभिभाषणात काही आढळले नाही.

सरकारची झाली रे दैना

मंत्रिमंडळात स्थान न मिळाल्याने नाराज असलेल्या छगन भुजबळ यांनी ‘जहाँ नहीं चैना वहा नहीं रहना,’ असे म्हटले होते. त्याबाबत बोलताना ठाकरे सरकारची झाली आहे दैना, अशी टीका केली. छगन भुजबळ माझ्याशी अधूनमधून संपर्कात असतात, असेही ते म्हणाले.

हेही वाचा :

• ईव्हीएम सरकारकडून लोकशाही व्यवस्थेचा खून : नाना पटोले
• ‘वन नेशन वन इलेक्शन’ विधेयक लोकसभेत
• फॉलोऑनचा धोका टळला

मुंबई; विशेष प्रतिनिधी : विधानसभा निवडणूकपुर्व व निवडणूक निकालानंतर एकमेकावर केलेल्या टीकेमुळे चर्चेचा विषय बनलेले हा महाविकास आघाडीचे नेते उद्धव ठाकरे यांनी आज (दि.१७) मुख्यमंत्री देवेंद्र फडणवीस यांची भेट घेऊन त्यांना शुभेच्छा दिल्या. नागपूरात हिवाळी अधिवेशनात ठाकरेंनी आज हजेरी लावली होती. दुपारी त्यांनी मुख्यमंत्र्यांच्या दालनात जाऊन त्यांचे अभिनंदन केले. (Uddhav Thackeray)

२०१९ च्या विधानसभा निवडणूक निकालानंतर भाजपा व शिवसेना युती तुटल्यापासून उद्धव ठाकरे व फडणवीस यांच्यात वितुष्ट निर्माण झाले. तेव्हापासून त्यांनी एकमेकांवर टीका करण्याची एकही संधी सोडली नव्हती. विधानसभा निवडणूक काळात त्यांनी एकमेकांवर कडाडून टीका व आरोप प्रत्यारोप केले होते. ५ डिसेंबरला आझाद मैदानावर झालेल्या शपथविधीसाठी फडणवीस यांनी उद्धव ठाकरे यांना फोन करून निमंत्रण दिले होते. मात्र, ते गैरहजर राहिले. हिवाळी अधिवेशनाच्या दुसऱ्या दिवशी उद्धव ठाकरे नागपूरला आले. त्यांनी सभागृहाच्या कामकाजात भाग घेतला. यानंतर त्यांनी मुख्यमंत्री दालनात जाऊन देवेंद्र फडणवीस यांचे अभिनंदन केले.

यावेळी युवासेनाप्रमुख, शिवसेना नेते आ. आदित्य ठाकरे, विधानपरिषद विरोधी पक्षनेते अंबादास दानवे, शिवसेना नेते, आ. अनिल परब, आ. भास्कर जाधव, आ. सचिन अहिर, आ. संजय पोतनीस, आ. वरुण सरदेसाई उपस्थित होते. (Uddhav Thackeray)

आज पक्षप्रमुख मा.श्री.उद्धवसाहेब ठाकरे ह्यांनी महाराष्ट्र राज्याचे मुख्यमंत्री मा. देवेंद्र फडणवीस ह्यांची भेट घेऊन, त्यांचे अभिनंदन केले.
ह्यावेळी युवासेनाप्रमुख, शिवसेना नेते, आमदार आदित्य ठाकरे, विधानपरिषद विरोधी पक्षनेते अंबादास दानवे, शिवसेना नेते, आमदार अनिल परब, आमदार… pic.twitter.com/rM7EpuTgVu

— ShivSena – शिवसेना Uddhav Balasaheb Thackeray (@ShivSenaUBT_) December 17, 2024

हेही वाचा :

• ईव्हीएम सरकारकडून लोकशाही व्यवस्थेचा खून : नाना पटोले
• ‘वन नेशन वन इलेक्शन’ विधेयक लोकसभेत
• फॉलोऑनचा धोका टळला