Tag:

संजय राऊत

Raut criticizes Mahayuti: बहिणींच्या मतांची किंमत पाचशेवर

by प्रतिनिधी April 15, 2025

written by प्रतिनिधी

मुंबई : केंद्रीय गृहमंत्री अमित शहा यांची उपमुख्यमंत्री आणि शिवसेना नेते एकनाथ शिंदे यांनी नुकतीच भेट घेतली. या भेटीत काय घडले आणि शहा यांनी एकनाथ शिंदे यांना काय उत्तर दिले ते मला माहीत आहे, असा दावा ठाकरे गटाचे नेते, खासदार संजय राऊत यांनी केला. तसेच त्यांनी लाडकी बहीण योजनेवरही भाष्य केले. (Raut criticizes Mahayuti)

राऊत यांनी महायुती सरकारच्या कारभारावर मंगळवारी जोरदार टीका केली. शिंदेंना शहा यांनी काय उत्तर दिले ते लोकांसमोर आले तर मला वाटते की या राज्याचे चित्र स्पष्ट होईल, असे ते म्हणाले.

राज्यातील ज्या लाडक्या बहिणींकडून १५०० रुपयांच्या बदल्यात मते विकत घेतली, त्या मतांची किंमत आता पाचशे रुपयांवर आली आहे. उद्या ती शून्यावर येईल, असे भाकीतही राऊत यांनी केले. (Raut criticizes Mahayuti)

राज्य आर्थिक अराजकतेच्या खाईत

राज्याची आर्थिक परिस्थिती अत्यंत गंभीर असल्याची टीका करून संजय राऊत म्हणाले, कर्मचाऱ्यांचे पगार द्यायलाही पैसे नाहीत. देवेंद्र फडणवीस यांनी कितीही मोठ्या वल्गना कराव्यात, पण हे राज्य चालवणे आर्थिकदृष्ट्या सोपे राहिलेले नाही. गेल्या साडेतीन वर्षांत राज्याची आर्थिक शिस्त पूर्णपणे बिघडलेली आहे. आर्थिक अराजकाच्या खाईत राज्य सापडलेलं आहे. अजित पवार हे बोलत नसले तरी त्यांनाही त्या चिंतेनं ग्रासलेले आहे. (Raut criticizes Mahayuti)

अमित शहा यांच्याकडे शिंदे यांनी अजित पवार आमच्या फाईल मंजूर करत नाहीत आम्हाला निधी देत नाहीत. आम्हाला निधी देत नाहीत म्हणजे कोणाला? हा प्रश्नच आहे. तुमचे जे ५-२५ गद्दार आमदार आहेत. ते फक्त निधी आणि पैशाच्या ताकदीवर तुमच्यासोबत बरोबर राहिले. त्यांना या राज्याची तिजोरी लुटण्याची परवानगी तुम्हाला हवी आहे का? शहांनी यावर शिंदे यांना काय उत्तर दिले, ते मला माहिती आहे. ते लोकांसमोर आले तर या राज्याचे चित्र स्पष्ट होईल, असे खासदार राऊत म्हणाले.

कुडाळची घटना बीडपेक्षाही भयंकर
कुडाळमध्ये घडलेली घटना बीडच्या संतोष देशमुख यांच्या हत्येपेक्षाही भयंकर आहे. आम्ही त्यावर उद्धव ठाकरे यांच्याशी चर्चा करणार आहोत. कदाचित आम्हाला सगळ्यांना कोकणात त्यासाठी दौरा करावा लागेल. आतापर्यंत सिंधुदुर्ग जिल्ह्यात २७ खून झाले आहेत. त्यात नऊ खून आमच्या शिवसैनिकांचे आहेत. यांचा आका कोण आहे? या विषयी वैभव नाईक यांनी काही प्रश्न विचारलेले आहेत. त्याचे उत्तर गृहमंत्र्यांनी देणे गरजेचे आहे, अशी मागणीही राऊत यांनी केली.

हेही वाचा :
भिडे गुरुजींवर कुत्र्याचा हल्ला
पाच लुटेरे…
मान्सूनची गुड न्यूज!

April 15, 2025 0 comments

महाराष्ट्र राजकारण

Raut’s attack on BJP: राणाला बिहार निवडणुकीपूर्वी फाशी देतील

by प्रतिनिधी April 11, 2025

written by प्रतिनिधी

मुंबई : विशेष प्रतिनिधी : २६/११ दहशतवादी हल्ल्यातील मास्टरमाईंड तहव्वूर राणाला भारतात आणण्यासाठी २००९ पासून कायदेशीर प्रक्रिया सुरु होती. आता त्याचे श्रेय घेतले जाईल. मग त्याला बिहार निवडणुकी दरम्यान फाशीची शिक्षा दिली जाईल. निवडणुकांसाठी भाजप काहीही करु शकते, असा हल्लाबोल शिवसेना उद्धव ठाकरे गटाचे नेते खा. संजय राऊत यांनी शुक्रवारी (११ एप्रिल) केला. (Raut’s attack on BJP)

भाजपामध्ये धमक असेल तर कुलभूषण जाधव आणि देशाची लूट करून परदेशात पळून गेलेल्या विजय मल्ल्या, मेहुल चोक्सीला घेऊन यावे, असे आव्हानही राऊत यांनी दिले. (Raut’s attack on BJP)

राणाला भारतात आणणे हा पंतप्रधान नरेंद्र मोदी यांच्या कुटनीतीचे यश आहे, असे मत केंद्रीय मंत्री अमित शाह यांनी व्यक्त केले होते. त्याला राऊत यांनी प्रत्युत्तर दिले. ते म्हणाले, राणाला भारतात आणण्यासाठी २००९ पासून कायदेशीर प्रक्रिया सुरु आहे. आता त्याचे श्रेय घेतले जाईल. मग त्याला बिहार, प.बंगालच्या निवडणुकीच्या दरम्यान फाशीची शिक्षा दिली जाईल. निवडणुकांसाठी भाजप काही करु शकतो.

राणाचे प्रत्यार्पण झाल्यानंतर देशातील आर्थिक घोटाळ्यांमध्ये आरोपी असलेले नीरव मोदी आणि मेहुल चोक्सी यापैकी एकाला भारतात आणून मोठा विजय साजरा करावा, राणाला भारतात आणण्याचे श्रेय तत्कालीन सरकारचे आहे. त्याकाळात ही प्रक्रिया सुरु झाली होती, असा दावा त्यांनी सांगितले. (Raut’s attack on BJP)

अमित शहा तटकरेंचे नेते

छत्रपती शिवाजी महाराज यांच्या ३४५ व्या पुण्यतिथी निमित्त शहा शनिवारी, १२ एप्रिल रोजी किल्ले रायगडवर येत आहेत. त्यानिमित्त ते खासदार सुनील तटकरे यांच्या गीताबाग येथील निवासस्थानी स्नेहभोजन करणार आहेत. त्यावरुन राऊत यांनी तटकरे यांच्यावरही निशाणा साधला. ते म्हणाले, ‘तटकरे यांचे नेते अजित पवार नाहीत. त्यांचे नेते अमित शाह आहेत. एकनाथ शिंदे यांचे नेते अमित शहा आहेत. शहा नसते तर हा पक्षच फुटला नसता. राज्यात कायदा आणि सुव्यवस्था राहिली नाही. देवेंद्र फडणवीस यांना आपण गृहमंत्री असल्याचे माहीत नाही. रोज नागपूर, मुंबई आणि राज्यात महिलांवर अत्याचार होत आहे. त्यानंतर गृहमंत्री कुठे दिसत नाही.’

हेही वाचा :
वाघ्याचं काय घेऊन बसलाय, द्या दणका!
कुरूंदकरला २१ एप्रिलला शिक्षा सुनावणार

April 11, 2025 0 comments

महाराष्ट्र राजकारण

Raut criticize Shinde: एकनाथ शिंदे काँग्रेसमध्ये जाणार होते

by प्रतिनिधी March 15, 2025

written by प्रतिनिधी

मुंबई : विशेष प्रतिनिधी : एकनाथ शिंदे यांचा भगव्याशी काही संबंध नाही. तपास यंत्रणेच्या भीतीपोटी त्यांनी गद्दारांना घेऊन शिवसेना फोडली. यापूर्वी ते काँग्रेसमध्ये जाणार होते. त्यासाठी त्यांनी काँग्रेसचे तत्कालीन नेते अहमद पटेल यांची भेट घेतली होती, असा गौप्यस्फोट ठाकरे गटाचे नेते खा. संजय राऊत यांनी शनिवारी (१५ मार्च) केला. (Raut criticize Shinde)

धुळवडीच्यादिनी काँग्रेसचे ज्येष्ठ नेते नाना पटोले यांनी उपमुख्यमंत्री एकनाथ शिंदे आणि अजित पवार यांना काँग्रेस सोबत येण्याची ऑफर दिली होती. त्याला उत्तर देताना शिंदे यांनी प्रत्युत्तर देताना शिंदे यांनी आमचा रंग भगवा आहे, जे कोणी येतील त्यांचे स्वागत आहे असे म्हटले होते. राऊत यांनी शिंदे यांच्यावर टीका करीत हा गौप्यस्फोट केला. तसेच नानांच्या ऑफरमध्ये सुधीर मुनगंटीवार आहेत का, असा चिमटाही काढला. ते म्हणाले, ‘शिंदे यांचा भगव्याशी काही संबंध नाही. त्यांचा गट भाजपच्या ताटाखालचे मांजर झाली आहे. त्यांच्या आणि अजित पवार यांच्या हातात भाजपचा झेंडा आहे. छत्रपती शिवाजी महाराजांचा भगवा झेंडा आहे. भगव्या झेंड्याशी त्यांचा काही संबंध नाही. तो उध्दव ठाकरे यांच्या शिवसेनेचा आहे.’ (Raut criticize Shinde)

गद्दार शिंदे काँग्रेस आघाडी सरकारच्या काळात काँग्रेसकडे चालले होते. काँग्रेसचे नेते अहमद पटेल आता हयात नाहीत, पण दिल्लीत त्यांच्याशी पहाटे चर्चाही केली होती. त्यावेळी त्यांना ते शक्य झाले नाही. पृथ्वीराज चव्हाण यांना विचारा ते त्याबाबत जास्त माहिती देतील, असा दावाही राऊत यांनी केला. (Raut criticize Shinde)

नाना पटोले यांच्या ऑफरबद्दल ते म्हणाले, ‘नाना हे आमचे सहकारी आहेत. राजकारणात काहीही अशक्य नसते. मविआ सरकार येईल असे कोणाला वाटले होते का? राजकारणात सर्व शक्यता आहेत. त्यांनी कुणाला ऑफर दिली आहे व कुणी मान्य केली आहे का हे त्यांच्याशी चर्चा करून बघू. राजकारणात रुसवे फुगवे, आदळआपट सुरू आहे. नाना यांनी लवकर भांडे वाजवले, थोडे थांबायला हवे होते.’ त्यांच्या ऑफरमध्ये मुनगंटीवार आहेत का? असा टोलाही त्यांनी लगावला. (Raut criticize Shinde)

मग नेतेपद कसे दिले? : खा.मस्के

एकनाथ शिंदे यांच्या मागे राज्यातील जनता आहे. त्यामुळे ठाकरे गटाकडून वारंवार त्यांच्यावर टीका करण्यात येत असल्याचे प्रत्युत्तर शिंदे गटाचे खा. नरेंद्र मस्के यांनी दिले. ते म्हणाले, एकनाथ शिंदे काँग्रेसमध्ये जाणार होते हे माहीत होते तर मग त्यांना सेनेत नेतेपद कसे दिले होते, याचा खुलासा राऊत यांनी करावा, असे आव्हानही त्यांनी दिले.

हेही वाचा :
पुन्हा एकदा ठाकरे बंधूंना एकत्र येण्याची साद!
भारतीय संशोधक विद्यार्थिनीचा व्हिसा रद्द

March 15, 2025 0 comments

महत्त्वाच्या नोंदी महाराष्ट्र राजकारण

Jaikumar Gore: जयकुमार गोरेंकडून संजय राऊतांविरुद्ध हक्कभंग

by प्रतिनिधी March 7, 2025

written by प्रतिनिधी

मुंबई : विशेष प्रतिनिधी : एका महिलेला नग्न फोटो पाठवल्याचे आरोप करून आपल्याला बदनाम केल्याप्रकरणी राज्याचे ग्रामविकास मंत्री व सोलापूरचे पालकमंत्री जयकुमार गोरे यांनी ठाकरे गटाचे नेते खा. संजय राऊत यांच्याविरूद्ध हक्कभंग दाखल केला. शरद पवार गटाचे आ. रोहित पवार व एक यू ट्यूब चालक तुषार खरात यांचाही हक्कभंग दाखल केलेल्यांत समावेश आहे. विधानसभा अध्यक्ष राहुल नार्वेकर यांनी तो दाखल करून घेतला. या अधिवेशनात त्याबाबत कार्यवाही होण्याची शक्यता आहे.(Jaikumar Gore)

मंत्री गोरे यांनी एका महिलेला स्वतःचे नग्न फोटो पाठवल्याचे सांगत हंबीरराव मोहिते यांच्या कुटुंबातील एका स्त्रीचा या मंत्र्याने विनयभंग केला, असे आरोप संजय राऊतांनी केल्यानंतर आता ही कारवाई करण्यात आली आहे .

ज्यांनी माझ्यावर आरोप केले त्या प्रत्येकावर सभागृहात हक्कभंग प्रस्ताव दाखल करत आहे, असे सांगून त्यांनी त्यासंबंधी थेट न्यायालयाची प्रत देत निर्दोष असल्याचा दावा केला. (Jaikumar Gore)

याबाबत शिवसेना ठाकरे गटाचे मुखपत्र ‘सामना’मध्ये बुधवारी सविस्तर वृत्त छापले होते. या महिलेने राज्यपाल आणि विरोधी पक्षातील प्रमुख नेत्यांना पत्र पाठवून मदतीची याचना केली आहे. जयकुमार गोरे यांनी आपल्याला त्यांचे नग्न अवस्थेतील फोटो पाठवले होते. हे प्रकरण २०१९ निकालात निघाले होते. मात्र, आता गोरे मंत्री झाल्यानंतर पुन्हा या महिलेच्या पाठीमागे लागल्याचा आरोप ठाकरे गटाचे खासदार संजय राऊत यांनी केला होता. त्यांच्यावर अशाप्रकारचे गंभीर आरोप झाल्याने राजकीय वर्तुळात खळबळ उडाली होती. (Jaikumar Gore)

त्याबाबत विधानसभेत आज हक्कभंग मांडताना म्हणाले, ‘माझ्यावर २०१७ मध्ये एक गुन्हा दाखल झाला होता. दोन वर्षे हा खटला सुरु होता, २०१९ मध्ये या प्रकरणाचा निकाल लागला होता. त्या निकालाची प्रत माझ्याकडे आहे. मला या प्रकरणात न्यायालयाने निर्दोष मुक्त केले आहे. त्यावेळी न्यायालयाने मोबाईल आणि इतर मुद्देमाल जप्त करण्याचे आदेश दिले होते. लोकशाहीत न्यायालय सर्वोच्च असते. तुम्हीही (पत्रकार) त्यापेक्षा मोठे नाही. हा निकाल येऊन सहा वर्षे झाली आहेत. किमान कुठल्यावेळी विषय समोर आणावा, याला राजकीय लोकांनी मर्यादा ठेवली पाहिजे, त्यांना जरब बसावी यासाठी संजय राऊत, रोहित पवार, युट्युब चालक तुषार खरात यांच्यावरचा हक्क अभंग मांडत आहे. भाजपाचे आमदार सुधीर मुनगंटीवर यांनी त्यांना समर्थन देताना याबाबत ‘दूध का दूध पानी का पानी’ व्हायला पाहिजे. सध्याच्या अधिवेशनातच याबाबत सोक्षमोक्ष लागायला हवा, अशी भूमिका मांडली.

हेही वाचा :

आता कुठे गेली ५६ इंच छाती?

भारतावर कराबाबत मोठा निर्णय २ एप्रिलला

March 7, 2025 0 comments

महाराष्ट्र राजकारण

Pawar slams Gorhe: नीलम गोऱ्हेंचे वक्तव्य मूर्खपणाचे

by प्रतिनिधी February 24, 2025

written by प्रतिनिधी

मुंबई : साहित्य संमेलनात विधान परिषदेच्या उपसभापती नीलम गोऱ्हे यांनी केलेले वक्तव्य मूर्खपणाचे आहे. त्यांना असे बोलायचे होते तर साहित्य संमेलनात यायची आवश्यकता नव्हती, या शब्दांत ज्येष्ठ नेते व साहित्य संमेलनाचे स्वागताध्यक्ष शरद पवार यांनी गोऱ्हे यांचा समाचार घेतला. (Pawar slams Gorhe)

पत्रकारांशी बोलताना ते म्हणाले की, त्यांच्या वक्तव्याबाबत संजय राऊत यांनी केलेल्या विधानाशी मी शंभर टक्के सहमत आहे. साहित्य संमेलनाच्या पदाधिकाऱ्यांनी माफी मागितली. त्यामुळे मी म्हटले आता पडदा टाका. संजय राऊत यांना माझ्यावरही जबाबदारी टाकायची असेल तर माझी तक्रार नाही कारण मी संमेलनाचा स्वागताध्यक्ष होतो.

गोऱ्हे यांनी शनिवारी साहित्य संमेलनात ‘असे घडलो आम्ही’ या कार्यक्रमात मुलाखत देताना, बाळासाहेब ठाकरे यांच्यानंतर शिवसेनेत दोन मर्सिडीज दिल्या की एक पद मिळायचे, असा आरोप करून खळबळ उडवून दिली होती. त्याला खा. संजय राऊत यांनी सोमवारी जोरदार प्रत्युत्तर दिले. (Pawar slams Gorhe)

त्यांनी साहित्य संमेलनात जी राजकीय चिखलफेक झाली. त्याची जबाबदारी शरद पवार झिडकारु शकत नाहीत, ते स्वागताध्यक्ष होते, पालक आहेत, जी राजकीय चिखलफेक झाली, त्याला तेही तितकेच जबाबदार आहेत. त्याचा त्यांनी निषेध व्यक्त केला पाहिजे, अशी मागणी राऊत यांनी केली. त्यानंतर संध्याकाळी शरद पवार यांनी पत्रकार परिषद घेतली.

ते म्हणाले, ‘नीलम गोऱ्हे यांनी मर्यादित कालावधीत चार पक्षात प्रवेश केला. त्यांना सेनेने ४ वेळा आमदार कसे केले, हे सर्वांना माहीत आहे. साहित्य संमेलनात त्यांनी असे वक्तव्य करण्याची काही आवश्यकता नव्हती. उपमुख्यमंत्री एकनाथ शिंदे यांचा सत्कार केल्याबाबत ठाकरे गटाकडून झालेल्या टीकेला प्रत्युत्तर देताना, असे सत्कार करण्यासाठी परवानगी आवश्यक असल्यास यापुढे परवानगी घेतली जाईल असा टोला त्यांनी मारला. या सोहळ्यात एकूण १५ जणांना पुरस्कार देण्यात आला होता. मात्र केवळ एकनाथ शिंदे यांचे नाव दाखवण्यात आले, बातमी आली हे योग्य नाही. (Pawar slams Gorhe)

गोऱ्हेंचा ठाकरे गटाकडून निषेध

दरम्यान, गोऱ्हे यांच्या वक्तव्याच्या निषेधार्थ ठाणे, पुणेसह राज्यात विविध ठिकाणी ठाकरे गटाकडून जोडे मारो आंदोलन करण्यात आले.

उपनेत्या सुषमा अंधारे म्हणाल्या की, नीलम गोरे यांना राज्यसभा किंवा मंत्रीपद हवे आहे म्हणून त्यांनी हे आरोप केले आहेत. मात्र त्या जबाबदार व्यक्ती असल्याने त्यांच्या विरोधात आम्ही मानहानीचा दावा दाखल करणार आहोत. त्यांनी पुरावे द्यावेत, अन्यथा नाक घासून माफी मागितली पाहिजे.

नाशिकचे माजी महापौर विनायक पांडे यांनी २०१४ मध्ये नीलम गोऱ्हे यांनी विधानसभेचे तिकीट देण्यासाठी आपल्याकडून पैसे घेतले होते, मात्र उमेदवारी दुसऱ्याला देण्यात आली, असा आरोप केला. तसेच ठाकरे गटाचे आमदार देशमुख यांनी आपल्याकडे २५ लाखाची मागणी केली असल्याचे सांगितले. पुण्याचे माजी नगरसेवक अशोक हरनाळ यांनी त्यांची सर्व कुंडली बाहेर काढण्याचा इशारा दिला. (Pawar slams Gorhe)

शिंदे गटाकडूनही प्रत्युत्तर

नीलम गोऱ्हे यांच्यावर ठाकरे गटाकडून झालेल्या टीकेला शिंदे गटानेही प्रत्युत्तर दिले. महिलेबाबत अशी भाषा वापरणाऱ्या संजय राऊत यांना लाज वाटते की नाही? त्यांना जोड्याने मारले पाहिजे, मराठवाड्यात ठाकरे गटाने अनेक ठिकाणी पैसे घेऊन तिकीट वाटप केले होते. जनतेने त्यांना त्याची जागा दाखवली आहे, अशी टीका समाजकल्याण मंत्री संजय शिरसाट यांनी केली. तर खा. नरेंद्र मस्के यांनी नीलम गोऱ्हे या कधीच नाशिकच्या संपर्क प्रमुख नव्हत्या. विनायक पांडे यांना शिवसेनेतून काढून टाकण्यात आले होते. त्यामुळे त्यांनी केलेले आरोप बिनबुडाचे आहेत, असा दावा केला.

हेही वाचा :

ज्या सोन्याच्या ताटात खाल्लं, त्यातच घाण करुन गेल्या…

February 24, 2025 0 comments

महाराष्ट्र

Delhi Sahitya Sammelan शिंदे-पवार आणि संमेलनाचे राजकारण

by प्रतिनिधी February 13, 2025

written by प्रतिनिधी

राजधानी दिल्लीत उपमुख्यमंत्री एकनाथ शिंदे यांचा सत्कार समारंभ झाला. राष्ट्रवादी काँग्रेस (शरद्चंद्र पवार) पक्षाचे अध्यक्ष शरद पवार यांच्या हस्ते हा सत्कार समारंभ झाल्यामुळे दिल्लीसह महाराष्ट्रातील राजकारण ढवळून निघाले आहे. तसे ते स्वाभाविकही आहे. कारण या कार्यक्रमानंतर शिवसेनेचे खासदार संजय राऊत यांनी थेट शरद पवार यांच्यावरच टीका केली आहे. या कार्यक्रमाच्या निमित्ताने काही प्रश्न निर्माण होत आहेत. त्यांची चर्चा करण्याचा प्रयत्न इथे आहे.(Delhi Sahitya Sammelan)

एकनाथ शिंदे यांच्या सत्कार समारंभाची जी निमंत्रण पत्रिका होती, त्यावर `सरहद पुणे आयोजित अखिल भारतीय मराठी साहित्य महामंडळ ९८ वे अखिल भारतीय मराठी साहित्य संमेलन, दिल्ली` यांच्यातर्फे महादजी शिंदे राष्ट्रगौरव पुरस्कार असा उल्लेख आहे. या समारंभात एकनाथ शिंदे यांना संमेलनाचे स्वागताध्यक्ष शरद पवार यांच्या हस्ते पुरस्कार देण्यात आला. या निमंत्रण पत्रिकेत पुरस्कर्ते – एकनाथ शिंदे असा उल्लेख होता. खरेतर ते पुरस्कारार्थी किंवा सोप्या भाषेत गौरवमूर्ती असे असावयास हवे होते. पण अनवधानाने का होईना संयोजकांनी खरे छापले. म्हणजे पुरस्कर्ते. याचा अर्थ एकनाथ शिंदे यांनी पुरस्कृत केलेला पुरस्कार एकनाथ शिंदे यांना दिला गेला. ते खरेही आहे.

पुरस्कार कुणी दिला?

कार्यक्रमाच्या पत्रिकेवर अखिल भारतीय मराठी साहित्य महामंडळाचे नाव आहे. दिल्ली साहित्य संमेलनाचा उल्लेख आहे. पत्रिकेवर दिल्ली साहित्य संमेलनाचे आणि सरहद संस्थेचे लोगो आहेत. निमंत्रकांमध्ये साहित्य महामंडळाशी संबंधित कुणाची नावे नाहीत. वैभव डांगे, ज्ञानेश्वर मुळे, सचिन इटकर, निवेदिता वैशंपायन, राजेश खरात, लेशपाल जवळगे आणि अतुल बोकरिया यांची नावे आहेत. ही सगळी मंडळी संमेलनाच्या संयोजन समितीतली आहेत. त्यांचा महामंडळाशी काही संबंध नाही.

शरद पवार आणि एकनाथ शिंदे

सगळ्या चर्चेच्या केंद्रस्थानी असलेला मुद्दा म्हणजे शरद पवार यांच्या हस्ते एकनाथ शिंदे यांचा सत्कार. त्यावर संजय राऊत यांनी कठोर शब्दात टीका यामुळे दिल्लीतील वातावरण तापले आहे.

आपल्याला आठवत असेल, मुंबईत पंचवीस वर्षांपूर्वी झालेल्या अखिल भारतीय मराठी साहित्य संमेलनावेळी संमेलनाध्यक्ष वसंत बापट यांनी केलेल्या टीकेवरून शिवसेनाप्रमुख बाळासाहेब ठाकरे यांनी साहित्य संमेलनाला बैलांचा बाजार म्हटले होते. त्यानंतर पंचवीस वर्षांनी ठाकरे यांच्या तालमीत तयार झालेले खासदार आणि सामनाचे कार्यकारी संपादक संजय राऊत यांनी दिल्लीतील संमेलन हे दलालांचे संमेलन असल्याचे म्हटले आहे. पंचवीस वर्षांत साहित्य संमेलनाने बैलबाजारापासून दलालांच्या संमेलनापर्यंतची प्रगती केली असं म्हणायचं का? संजय राऊत यांनी केलेली टीका अत्यंत कडवट आहे. परंतु ही वेळ संमेलनावर का आली, याचाही विचार करावयास हवा.(Delhi Sahitya Sammelan)

यानिमित्ताने काही प्रश्न उपस्थित होतात…

पहिला प्रश्न म्हणजे महादजी शिंदे राष्ट्रगौरव पुरस्कार नेमका कुणाचा आहे? साहित्य महामंडळाचा तर असा काही पुरस्कार ऐकिवात नाही. निमंत्रण पत्रिकेवर महामंडळाच्या संमेलनाचा लोगो आहे. म्हणजे महामंडळाला हात झटकता येणार नाहीत. महामंडळाला न विचारता संयोजकांनी परस्पर केलेला हा कारभार दिसतो आहे. महामंडळाचे लोक आश्रितासारखे संयोजकांच्या मेहेरबानीवर असल्यासारखे वागायला लागतात तेव्हा संयोजक मुजोर बनतात. आणि संमेलनाच्या मांडवात संयोजकांच्या सोयीचे साहित्यबाह्य, औचित्यभंग करणारे बरेच काही घडत राहते. एकशे चाळीस वर्षांची परंपरा असलेल्या संमेलनाला कुणीही कसेही वाकवायला लागते, तेव्हा महामंडळावरच्या मंडळींची फक्त फक्त लाचारीच दिसून येते. जी यापूर्वी अनेकदा दिसून आली आहे. यावेळी ती पुन्हा दिसली. दुर्दैवाची बाब म्हणजे देशाच्या राजधानीतल्या संमेलनात ती दिसली.(Delhi Sahitya Sammelan)

सरहद संस्थेचा हा पुरस्कार असेल तर त्यांनी साहित्य संमेलनाचा लोगो का वापरला? कारण संयोजकांना माहीत आहे, की आपण कसेही वागलो तरी महामंडळ आपले काही बिघडवू शकणार नाही. एखादा बाईट प्रसारमाध्यमांना देऊन हात चोळीत बसतील.
दुसरा मुद्दा असा की, महादजी शिंदे राष्ट्रगौरव पुरस्कार एकनाथ शिंदे यांना कोणत्या निकषावर दिला? महादजी शिंदे साता-याचे आणि एकनाथ शिंदेही साता-याचे म्हणून! व्वा ! अर्थात पुरस्कार कुणाला द्यायचा हा तो देणा-या संस्थेचा अधिकार असतो. त्यानुसार सरहद संस्थेने तो दिला. त्यात काहीच आक्षेपार्ह नव्हते. परंतु त्यासाठी त्यांनी संमेलनाच्या नावाचा वापर करावयास नको होता.

संमेलनाचे राजकारण

संमेलनाच्या निमित्ताने दिल्लीत मराठीचा डंका वाजवायचा उद्देश त्यामागे असू शकतो. दिल्लीत महाराष्ट्राचा डंका वाजवायचा तर महाराष्ट्रात अनेक चांगल्या गोष्टी आहेत. मोठी माणसं आहेत. एकनाथ शिंदे यांचं अलीकडचं राजकारण, दिल्लीच्या सत्तेपुढं लाचार होऊन केलेला कारभार हे निश्चितच महाराष्ट्राला कमीपणा आणणारं आहे. अलीकडच्या काळात त्यांना महाराष्ट्राच्या राजकारणात दुय्यम, तिय्यम महत्त्व मिळू लागलंय. त्या पार्श्वभूमीवर त्यांचं मार्केटिंग करण्यासाठीचा हा उपद्व्याप होता का?
आपलं महत्त्व वाढवण्यासाठी त्यांच्याकडून पुन्हा पक्ष फोडीचं राजकारण केलं जातंय. ऑपरेशन टायगरसारख्या वावड्या उडवल्या जाताहेत. हे महाराष्ट्रासाठी कोणत्याही पातळीवर भूषणावह नाही. या सगळ्या राजकारणात साहित्य संमेलन सहभागी झालंय का, असा प्रश्न यानिमित्ताने निर्माण होतो. साहित्य संमेलन राजकारण्यांच्या आश्रयानं होणं यात काही गैर नाही. परंतु ते कुणाच्यातरी राजकारणासाठी वापरणं गैरच नव्हे, तर निषेधार्ह आहे.
एकनाथ शिंदे महाराष्ट्राचे कर्तृत्ववान नेते म्हणून दिल्लीत डंका वाजवणे म्हणजे महाराष्ट्राचा लोकप्रिय कार्यक्रम म्हणून इंडिया गॉट लॅटेंटसारख्या भाडिपाच्या कार्यक्रमाचं किंवा लोककला म्हणून म्हणून गौतमी पाटीलच्या भोजपुरी स्टाईल नाचगाण्याच्या कार्यक्रमाचं आयोजन करण्यासारखं आहे.

राहिला मुद्दा शरद पवार यांचा…

शरद पवार, नितीन गडकरी हे महाराष्ट्राच्या राजकारणातले वेगळ्या स्कूलचे नेते आहेत. त्यांच्या विचारधारा वेगळ्या असल्या तरी त्यांचं राजकारण उदारमतवादी आहे. उद्या शरद पवारांना अजित पवारांच्या सत्काराला बोलावलं तरी ते हजर राहतील. आणि अजित पवारांच्या कार्यशैलीचं नेमकेपणाने गुणवर्णन करतील. नितीन गडकरींना नाना पटोलेंच्या सत्काराला बोलावलं तरी ते जातील आणि नाना पटोलेंच्या धडाडीचं कौतुक करतील. महाराष्ट्राच्या राजकारणातले हे दोघे दुर्मीळ नेते आहेत. देवेंद्र फडणवीस यांचं राजकारण सुरू झाल्यानंतर महाराष्ट्राच्या राजकारणातली ही उदारमतवादी परंपरा संपुष्टात आली आहे. त्यामुळं त्यांच्या दृष्टिकोनातून शरद पवार किंवा नितीन गडकरी यांच्यासारख्या नेत्याकडे पाहणे योग्य ठरणार नाही. (Delhi Sahitya Sammelan)

संजय राऊत यांची टीका

तरीसुद्धा संजय राऊत यांनी थेट शरद पवार यांच्यावर केलेली टीका रास्तच म्हणावी लागेल. कारण एकनाथ शिंदे यांनी जे राजकारण केले त्याचे खोलवर घाव उद्धव ठाकरे यांच्यासह त्यांच्या पक्षावर झाले आहेत. ते कधीही न भरून येणारे आहेत. त्यामुळे एकनाथ शिंदे यांच्या सत्काराला गेल्यामुळं राऊत यांनी शरद पवारांच्यावर टीका करणं चुकीचं म्हणता येणार नाही. त्यांची भावना त्यांनी मोकळेपणाने व्यक्त केली. याचा अर्थ लगेच पवार-ठाकरे यांच्यात दरी निर्माण होईल असंही समजण्याचं कारण नाही.

मराठी माणसांचे हसे

साहित्य संमेलन दिल्लीत होतंय. त्याची चर्चा साहित्याच्या अंगाने व्हायला हवी. मराठी भाषा,साहित्याच्या अनुषंगाने चर्चा व्हायला हवी. दुर्दैवाने त्याऐवजी राजकारणाची चर्चा होतेय. संमेलन गाजवण्याच्या नादात संमेलनाचे बारा वाजवण्याचे उद्योग सुरू आहेत. एकशे चाळीस वर्षांची परंपरा असलेल्या ९८ व्या संमेलनाच्या निमित्ताने एवढा उथळपणा बरा नव्हे. एकनाथ शिंदे यांनी दिल्लीच्या राजकारणात महाराष्ट्राच हसे केले तेवढे पुरेसे आहे. संमेलनाच्या निमित्ताने मराठी माणसांचे सामर्थ्य दाखवण्याच्या नादात मराठी समूहाचे हसे होणार नाही, याची काळजी साहित्य महामंडळाने आणि संमेलनाच्या आयोजकांनी घ्यायला हवी.

हेही वाचाः
Chhawa : ‘छावा’ची ओपनिंग १० कोटींकडे
Sanjay D. patil : राज्यपालांच्या हस्ते डॉ. संजय डी. पाटील यांचा गौरव
Prakash pawar : डॉ. प्रकाश पवार चिकित्सक विश्लेषक

February 13, 2025 0 comments

आंदोलन महाराष्ट्र राजकारण समाज

Raut attacks hajare : मोदी काळातील घोटाळ्यांबाबत हजारे गप्प का?

by प्रतिनिधी February 9, 2025

written by प्रतिनिधी

मुंबई : विशेष प्रतिनिधी : पंतप्रधान नरेंद्र मोदींच्या काळात गेल्या ११ वर्षात देशात आणि राज्यात इतके घोटाळे, भ्रष्टाचार झाले. लोकशाहीवर हल्ले करण्यात आले. त्याबाबत अण्णा हजारे एका शब्दानेही का बोलले नाहीत?, हे त्यांनी देशाला स्पष्ट करून सांगावे, असे आव्हान ठाकरे गटाचे नेते खा. संजय राऊत यांनी रविवारी हजारे यांना दिले. (Raut attacks hajare)

दिल्ली विधानसभा निवडणुकीत ‘आप’चा दारुण पराभव झाल्यानंतर अण्णा हजारे यांनी त्याबाबत आनंद व्यक्त करून अरविंद केजरीवाल यांच्या कारकिर्दीबाबत मत मांडले होते.

त्याबाबत पत्रकारांशी बोलताना देताना राऊत म्हणाले की,अण्णा हजारे काय म्हणतात त्याला आता काही महत्त्व राहिलेले नाही. केजरीवाल आणि हजारे यांनी एक मोठे आंदोलन उभे केले होते. या आंदोलनामुळेच अण्णा देशाला माहीत झाले. पण गेल्या १२ वर्षांत या देशावर अशी अनेक संकटे आली. देश लुटला जात आहे. विकला जात आहे. एकाच उद्योगपतीच्या घशात देशाची सार्वजनिक संपत्ती घातली जात आहे. भ्रष्टाचाऱ्यांना भाजपमध्ये पवित्र करून घेण्यात येत आहे. पण अण्णांना त्यावर आपले मत व्यक्त करावेसे वाटत नाही, यामागचं रहस्य काय? असा खोचक सवाल त्यांनी केला. (Raut attacks hajare)

मोदी काळात देशात, महाराष्ट्रात इतके घोटाळे झाले, लोकशाहीवर हल्ले झाले, अत्याचार झाला. तेव्हा अण्णा हजारेंनी त्याविरोधात कधीच हालचाल केली नाही. ‘ब्र’ही काढला नाही. पण केजरीवाल यांच्या दिल्लीतील पराभवाने त्यांना आनंद झाला. त्यांच्या चेहऱ्यावरील आनंद काल पाहिला, त्यांना अत्यानंद झाला. हा आनंद लोकशाहीला मारक आहे, असे सांगून ते म्हणाले, दिल्ली विधानसभा निवडणुकीबाबत ‘एक्झिट पोल’ने वर्तवलेला अंदाज तंतोतंत खरा ठरला. जणू ही निवडणूक भाजपा एकहाती खेचून आणणार हे चित्र अगोदरच स्पष्ट झाले होते. मागील एक वर्षांपासून आपचे जे पानीपत झाले होते. ते सर्वांनी उघड्या डोळ्यांनी पाहिले. (Raut attacks hajare)

महाराष्ट्रानंतर दिल्लीचे निकाल आले, त्यात आप आणि काँग्रेस एकत्र लढले असते तर निकाल वेगळा लागला असता हे आकडे सांगत आहेत. आता एकत्र यायचा याचा विचार नेत्यांनी करायला हवा, याविषयीची भूमिका सगळ्यांनी घेणे आवश्यक आहे. नाहीतर देशात आणि राज्याराज्यात जे काही चालले त्याला आपण सगळ्यांनी मिळून मान्यता द्यावी, असा टोला त्यांनी इंडिया आघाडीला लगावला. जर असे असेल तर हा देश टिकेल का? लोकशाही टिकेल का? विरोधी पक्ष राहिल का? याचा विचार सर्वांनी केला पाहिजे. ‘आप’च्या पराभवाचा आनंद काँग्रेसला झाला असेल तर ते दु:खद आहे, कारण भाजपा सत्तेत आली आहे, हे त्यांनी विसरू नये, याकडे त्यांनी लक्ष वेधले.

हेही वाचा :

‘आप’ने १३ जागा कशा गमावल्या?

भाजप, ‘आप’च्या मतात केवळ अडीच टक्क्याचा फरक

बीरेन सिंह मणिपूरच्या मुख्यमंत्रीपदावरून पायउतार

३१ माओवाद्यांचा खात्मा

February 9, 2025 0 comments

महाराष्ट्र राजकारण

Sanjay Raut : शिंदे गटाच्या आमदारांवर फडणवीसांचे नियंत्रण

by प्रतिनिधी February 2, 2025

written by प्रतिनिधी

मुंबई : प्रतिनिधी : शिवसेना शिंदे गटातील २० ते २५ आमदार मुख्यमंत्री देवेंद्र फडणवीस यांच्या नियंत्रणाखाली आहेत, असा दावा शिवसेना ठाकरे गटाचे खासदार संजय राऊत यांनी केला आहे.(Sanjay Raut)
मुंबईत झालेल्या पत्रकार परिषदेत त्यांनी हा दावा केला. ते म्हणाले, राज्यात सरकार बहुमताने आले तरी या सरकारमध्ये एकसंघपणा किंवा एकवाक्यता नाही. एकमेकांविरोधात कुरघोड्यांचे राजकारण सुरू आहे. एकनाथ शिंदे यांची बार्गेनिंग पॉवर संपली आहे. शिंदे आणि त्यांचा गट सरपटणारा प्राणी झाला आहे, अशी टीकाही राऊत यांनी केले.(Sanjay Raut)
एकनाथ शिंदे खासगीत सांगतात की विधानसभा निवडणुकीनंतर मुख्यमंत्रिपदी मीच राहणार असे वचन मिळाल्यामुळे आम्ही फुटलो, पण निवडणुका झाल्यानंतर शिंदे यांना खड्यासारखे बाजूला केले, याकडे संजय राऊत यांनी लक्ष वेधले. शिंदे यांना उपमुख्यमंपत्रिपद, काहींना मंत्रिपदे दिली. पण सध्या एकनाथ शिंदे यांचा चेहरा पाहिला की असे लक्षात येते की ते अजूनही शून्यात आणि गुंगीत आहेत. या धक्क्यातून ते सावरलेले नाहीत. आपल्याला ५० ते ५५ जागा कशा मिळाल्या हा पहिला धक्का त्यांना बसला. भाजपने दिलेला शब्द पाळला नाही हा दुसरा धक्का मिळाला. त्यातून ते कोलमडलेले आहेत.(Sanjay Raut)
शिंदे गटातील २० ते २५ आमदारांच्या गटावर फडणवीस यांचे पूर्ण नियंत्रण आहे असा दावा संजय राऊत यांनी केला. हे लोक फडणवीस आणि अमित शहा यांच्या सांगण्यावरुन सुरतला गेले. ते एकनाथ शिंदे यांच्यासाठी गेले नाहीत. आजही त्यांच्यावर फडणवीस यांचेच नियंत्रण आहे. जे उरलले आमदार आहेत ते चलबिचल आणि चंचल आहेत. त्यांना आपली कोंडी होत आहे, असे वाटते. भविष्यात आपल्याला जे नेतृत्व संरक्षण देईल त्यासाठी आपण पुन्हा मागे फिरायचे का? अशी त्यांची भावना झाली आहे, अशी माझी माहिती आहे असेही खासदार राऊत म्हणाले.
मुख्यमंत्री वर्षा बंगल्यावर का रहायला गेले नाहीत?
फडणवीस अद्याप मुख्यमंत्र्यांच्या वर्षा या अधिकृत बंगल्यावर का रहायला गेले नाहीत, असा सवाल करून काळी जादू असल्याने मुख्यमंत्री अजूनही अधिकृत निवासस्थानी जात नाहीत याचे उत्तर काळी जादूवाल्यांनी द्यावे, असेही राऊत म्हणाले.

हेही वाचा:

भारत पुन्हा ‘वर्ल्ड ग्रुप-१’मध्ये
भारत दुसऱ्यांदा जगज्जेता
अर्थव्यवस्थेला गती मिळेल

February 2, 2025 0 comments

महाराष्ट्र राजकारण

Split in MVA : ‘मविआ’तील फूट अटळ !

by प्रतिनिधी January 11, 2025

written by प्रतिनिधी

मुंबई : जमीर काझी : विधानसभा निवडणुकीतील दारुण अपयशानंतर अवसान गळालेल्या महाविकास आघाडीची शकले पडण्यावर अखेर शिक्कामोर्तब झाले आहे. (Split in MVA )

घटक पक्षातील नेत्यांच्या एकमेकांवरील टिकेला २४ तास उलटण्यापूर्वीच ठाकरे गटाचे नेते खा. संजय राऊत यांनी मुंबईसह महाराष्ट्रातील स्थानिक स्वराज्य संस्थांच्या सर्व निवडणुका स्वबळावर लढण्याचे जाहीर केले आहे. त्यामुळे ‘मविआ’ एकसंधपणे पुढील निवडणुकीत लढणार नाही, हे निश्चित झाले आहे. किंबहुना, काँग्रेस आणि शरद पवार राष्ट्रवादी काँग्रेस हे निवडणुकांना एकत्रित सामोरे गेले तरी अपवाद वगळता स्थानिक स्वराज्य संस्थांमध्ये ठाकरे गटाचा सवतासुभा राहणार आहे. (Split in MVA )

खा. संजय राऊत यांनी शनिवारी त्याबाबतची भूमिका पत्रकारांशी बोलताना स्पष्ट केली. ते म्हणाले की, मुंबई पालिकेच्या आगामी निवडणुकांसह राज्यातील सर्व निवडणुका स्वबळावर लढणार आहोत. उद्धव ठाकरे यांनी आम्हाला स्वबळावर लढण्याचे संकेत दिले आहेत. एकदा आम्हाला पाहायच आहेच. जे काही होईल ते होईल. मुंबई, ठाणे नागपूरमध्ये कार्यकर्त्यांना संधी केव्हा देणार? कार्यकर्त्यांना संधी न दिल्यामुळे पक्षवाढीला फटका बसतो.

स्थानिक स्वराज्य संस्थांच्या निवडणुका सर्व पक्षांनी स्वबळावर लढवाव्या आणि आपापल्या कार्यकर्त्यांना संधी द्यावी, असे सांगून ते म्हणाले, ‘लोकसभेत इंडिया आघाडी स्थापन केली होती. महाराष्ट्रात महाविकास आघाडी स्थापन केली होती. आघाडीत अनेक कार्यकर्त्यांची निवडणूक लढवण्याची इच्छा पूर्ण होत नाही. स्थानिक स्वराज्य संस्थांच्या निवडणुकांत कार्यकर्त्यांना निवडणूक लढवण्याची संधी दिली पाहिजे. राऊत यांच्या या अनपेक्षित घोषणेमुळे राजकीय वर्तुळात खळबळ उडाली आहे. काँग्रेस आणि शरद पवारांची राष्ट्रवादी आता कोणती भूमिका घेते, याकडे सर्वांचे लक्ष लागून राहिले आहे. (Split in MVA )

…तोपर्यंत भाजपाशी संघर्ष कायम : राऊत

कोण कुठे जाणार, कोण कुठे येणार? हे देवेंद्र फडणवीस ठरवणार नाहीत. प्रत्येक पक्षाची एक भूमिका, विचारसरणी असते. तुम्ही आमच्या पक्षाला तोडले आहे, ते कुठल्या विचारसरणीत बसते. राजकीय नेत्यांना तुरुंगात टाकण्याची परंपरा तुम्ही सोडणार असाल तर आम्ही तुमचे स्वागत करू. मात्र जोपर्यंत तुम्ही तानाशाही करणार, भ्रष्टाचाऱ्यांना सोबत घेऊन सरकार चालवणार तोपर्यंत आमचा संघर्ष त्यांच्याशी राहणार, असा इशाराही राऊत यांनी यावेळी भाजपाला दिला. (Split in MVA )

पक्षश्रेष्ठींच्या सल्ल्यानुसार निर्णय : खा. गायकवाड

महाविकास आघाडीतील प्रत्येक पक्षाची स्वतंत्र मते आहेत. ते त्यांच्या धोरणाप्रमाणे स्थानिक स्वराज्य संस्थांच्या निवडणुकीत निर्णय घेऊ शकतात, पण मला त्यांची काही अडचण नाही. आम्ही सद्यस्थिती आणि पक्षश्रेष्ठींशीच्या सल्ल्यानुसार मुंबई महापालिकेच्या निवडणुका लढवू, अशी भूमिका मुंबई काँग्रेसच्या अध्यक्ष खासदार वर्षा गायकवाड यांनी मांडली.

स्वतंत्र लढल्यास फटका बसणार : आव्हाड

विधानसभेच्या पराभवानंतर आपण एकत्रित राहायला पाहिजे, असे माझे मत आहे. त्यामुळे हा निर्णय फार घाईने घेतलेला दिसतोय. हा निर्णय योग्य आहे असे वाटत नाही. त्यमुळे मतविभागणीचा फटका बसू शकतो, मात्र त्यांना स्वतंत्र लढायचे असल्यास आम्ही काही करू शकत नाही, असे शरद पवार गटाचे प्रवक्ते आमदार जितेंद्र आव्हाड यांनी सांगितले.

जनतेचा आशीर्वाद आमच्यासोबत राहणार : मुख्यमंत्री

स्थानिक स्वराज्य संस्थांमध्ये महाविकास आघाडी कोणता निर्णय घेते? ते एकत्र लढतात की स्वबळवावर याबाबत आम्हाला काहीही पडलेले नाही. जनतेचा आशीर्वाद विधानसभेप्रमाणेच आगामी स्थानिक निवडणुकातही भाजपासोबत याची खात्री आहे, असा विश्वास मुख्यमंत्री देवेंद्र फडणवीस यांनी व्यक्त केला.(Split in MVA )

ठाकरेंची फडणवीसांशी वाढती सलगी

२०१९ च्या निवडणुकीनंतर एकमेकांचे कट्टर वैरी बनलेले मुख्यमंत्री देवेंद्र फडणवीस आणि माजी मुख्यमंत्री उद्धव ठाकरे यांच्यात आता सलगी वाढली आहे. ठाकरे यांनी फडणवीस मुख्यमंत्री झाल्यानंतर तीनदा भेटून त्यांचे अभिनंदन केले आहे. शिंदे गट आणि राज ठाकरे यांना शह देण्यासाठी उद्धव ठाकरेंकडून ही खेळी केली जात असल्याची चर्चाही राजकीय वर्तुळात रंगली आहे.

हेही वाचा :

पराभवाच्या नैराशेतून ‘मविआ’मध्ये वादाच्या ठिणग्या!

January 11, 2025 0 comments

महाराष्ट्र राजकारण

MVA Conflict : पराभवाच्या नैराशेतून ‘मविआ’मध्ये वादाच्या ठिणग्या!

by प्रतिनिधी January 10, 2025

written by प्रतिनिधी

मुंबई : जमीर काझी : विधानसभा निवडणुकीत दारुण पराभवाला सामोरे जावे लागलेल्या महाविकास आघाडीतील सुंदोपसुंदी आता चव्हाट्यावर येऊ लागली आहे. निवडणुकीतील अपयशाचे खापर एकमेकांवर फोडू लागल्याने राष्ट्रीय स्तरावरील इंडिया आघाडीप्रमाणेच राज्यातील ‘मविआ’तही वादाची ठिणगी पडली आहे. आगामी स्थानिक स्वराज्य संस्थांच्या निवडणुकीच्या पार्श्वभूमीवर त्यांच्यातील दुफळी महायुतीसाठी बोनस ठरण्याची शक्यता व्यक्त होत आहे. (MVA Conflict)

राष्ट्रवादी काँग्रेस शरद पवार गटाची मुंबईत दोन दिवस बैठक झाली. या बैठकीत खा. अमोल कोल्हे यांनी पक्षाच्या पदाधिकारी, कार्यकर्त्यांचे मनोबल वाढविताना गुरुवारी, काँग्रेसची मोडलेली पाठ अद्याप सरळ झालेली नाही तर शिवसेना ठाकरे गट अजून झोपेतून जागा झाला नसल्याची टीका केली. त्याला काँग्रेसचे नेते विजय वडेट्टीवार यांनी प्रत्युत्तर देताना कोल्हेंनी स्वत:च्या पक्षाचे पहावे, यांनी जागावाटपाचा घोळ घातला नसता तर अधिक चांगल्या प्रकारे निवडणुकीला सामोरे जाता आले असे म्हटले; तर ठाकरे गटाचे नेते खासदार संजय राऊत यांनी काँग्रेसने विदर्भात जागावाटपासाठी हट्ट केला नसता तर चित्र वेगळे दिसले असते, असा टोला लगावला.(MVA Conflict)

दिल्ली विधानसभा निवडणुकीत काँग्रेस आणि आप स्वतंत्रपणे लढत आहेत. इंडिया आघाडीतील बहुतांश पक्षांनी या निवडणुकीसाठी ‘आप’ला समर्थन दिले आहे. त्यामुळे इंडिया आघाडी मोडीत निघाली असल्याची परिस्थिती आहे. तशीच परिस्थिती आता राज्यात ‘मविआ’ची झाली आहे. विधानसभा निवडणुकीत महायुतीला प्रचंड यश मिळाल्याने ‘मविआ’ या धक्यातून सावरलेली नाही.(MVA Conflict)

त्यामुळे विरोधी पक्षनेतेपदासाठी नाव सुचविण्यावर अद्याप एकमत झालेले नाही. आता तर एकमेकांवर टीका केली जात आहे. त्यामुळे येत्या काही दिवसांत त्याबाबत आरोप प्रत्यारोप रंगण्याची चिन्हे आहेत. स्थानिक स्वराज्य संस्थांच्या निवडणुका स्वबळावर लढवाव्यात, असा ठाकरे गटाच्या पदाधिकारी- कार्यकर्त्यांचा आग्रह आहे. नेत्यांच्या आरोप-प्रत्यारोपांमुळे त्याला आणखी फोडणी मिळणार आहे.

काँग्रेसची पाठ मोडलेली तर शिवसेना झोपलेली : खा. कोल्हे

विधानसभेतील पराभवामुळे काँग्रेसची मोडलेली पाठ अद्याप सरळ व्हायला तयार नाही तर दुसरीकडे शिवसेना अजूनही झोपेतून जागी झालेली नाही. राज्यात मित्रपक्षांच्या अशा वागण्यामुळे राष्ट्रवादी काँग्रेस शरदचंद्र पवार पक्षाला विरोधी पक्ष म्हणून वाढण्यासाठी मोठा स्पेस आहे. पराभव आधी मनात होतो आणि त्यानंतर रणांगणात होतो. त्यामुळे मरगळ झटका आणि कामाला लागा. तुमच्याकडे लढणारे शरद पवार आहेत. लक्षात ठेवा ‘बचेंगे तो और भी लढेंगे,’ असे खा. अमोल कोल्हे यांनी म्हटले आहे.

आम्हाला सल्ला कमी द्यावा : विजय वडेट्टीवार

विधानसभेत ९ कोटींवर मतदान वाढले आहे. झोलझाल करून, ईव्हींएमच्या भरवशावर हे सरकार सत्तेत आले आहे. अमोल कोल्हेंना एवढेच सांगतो त्यांनी स्वत:च्या पक्षाकडे जास्त लक्ष द्यावा, आम्हाला सल्ला कमी द्यावा. जागावाटपामध्ये नेत्यांनी जो घोळ घातला त्यामुळे प्रचारासाठी कमी वेळ मिळाला, असे प्रत्युत्तर काँग्रेसचे नेते व माजी विधानसभा विरोधी नेते विजय वडेट्टीवार यांनी दिले.

काँग्रेसने काही जागा सोडल्या असत्या तर… : राऊत

आमच्यात नक्कीच वाद सुरु होता. जागावाटपाला विलंब झाला हाच मुद्दा आहे. काँग्रेसला सर्वांत जास्त जागा हव्या होत्या. त्यांच्या सर्वांत कमी जागा निवडून आल्या. विदर्भात काही जागा सोडल्या असत्या तर चित्र काहीसे वेगळे दिसले असते, असे खासदार संजय राऊत म्हणाले. चंद्रपूरची जागा किशोर जोरगेवार राष्ट्रवादीतून लढणार होते. यासाठी १७ दिवस राष्ट्रवादीने प्रयत्न केले, पण काँग्रेसने जागा न सोडल्याने जोरगेवार भाजपात जाऊन जिंकले, असे प्रत्युत्तरही त्यांनी वडेट्टीवार यांना दिले. (MVA Conflict)

हेही वाचा :

मोदी म्हणाले, ‘मी देव नाही!’

हिंदी ही राष्ट्रभाषा नाही, तर…

January 10, 2025 0 comments

Newer Posts

Older Posts