कोल्हापूर : प्रतिनिधी : विधानसभा निवडणूकीच्या कोल्हापूरातील प्रचारसभेत तत्कालिन मुख्यमंत्री एकनाथ शिंदे यांनी शक्तीपीठ महामार्ग रदद् करणार अशी घोषणा केली होती. तसेच शेतकऱ्यांची कर्जमाफीही करणार असे आश्वासन दिले होते. पण निवडणुकीनंतर दोन्ही आश्वासनावर महायुती सरकारने घुमजाव केले आहे. या पार्श्वभूमीवर राज्याचे उपमुख्यमंत्री एकनाथ शिंदे सहा एप्रिल रोजी कोल्हापूर दौऱ्यावर येत आहेत. शक्तीपीठ महामार्ग आणि शेतकरी कर्जमाफी प्रश्नांवर कुणाल कामरा यांचे गाणे वाजवून एकनाथ शिंदे यांना अडवण्याचा इशारा शक्तीपीठ महामार्ग विरोधी संघर्ष समितीने दिला आहे. (Shaktipith committee)
उपमुख्यमंत्री शिंदे हे पाच एप्रिलला कोल्हापूर दौऱ्यावर येत आहेत. त्यांच्या दौऱ्याच्या पार्श्वभूमीवर आज गुरुवारी सर्किट हाऊस येथे शक्तीपीठ महामार्ग विरोधी संघर्ष समितीच्या वतीने शेतकऱ्यांच्या प्रमुख प्रतिनिधींची बैठक पार पडली. बैठकीमध्ये बोलताना समितीचे समन्वय गिरीश फोंडे म्हणाले,” एकनाथ शिंदे यांनी तत्कालीन सरकार व पक्षाशी गद्दारी केली तेव्हा जनतेने हलकेपणाने घेतले. पण आता शक्तिपीठ महामार्ग रद्द करण्याचे व कर्जमाफीचे आश्वासन देऊन देखील न पाळता शेतकऱ्यांची गद्दारी करत असतील तर कोल्हापुरातील शेतकरी तसेच सामान्य जनता हे सहन करणार नाही. महाराष्ट्रात गेल्यावर्षी २९०० शेतकऱ्यांनी आत्महत्या केली. रोज आठ शेतकरी आत्महत्या करत असताना एकनाथ शिंदे विजय मेळावा घेणार असल्याने हा प्रकार शेतकऱ्यांच्या जखमेवर मीठ चोळण्यासारखे आहे. १२ मार्च च्या मुंबई मोर्चाच्यावेळी एकनाथ शिंदे शेतकऱ्यांना भेटले नाहीत. त्यामुळे त्यांना आता कोल्हापुरात फिरकू देणार नाही. कुणाल कामरा चे गाणे लावून एकनाथ शिंदे यांचा विरोध होईल”. (Shaktipith committee)
उद्धव ठाकरे शिवसेनेचे जिल्हाप्रमुख विजय देवणे म्हणाले,” महाराष्ट्र युती सरकार हे सातत्याने आंदोलन करणाऱ्यांवर दडपशाही करत आहे. या दडपशाहीला कोल्हापुरातील जनता भीक घालणार नाही. शक्तीपीठ महामार्ग रद्द करून व कर्जमाफीचा आदेश घेऊनच एकनाथ शिंदेंनी कोल्हापुरात पाय ठेवावा. अन्यथा कोल्हापुरी हिसक्याला सामोरे जावे लागे.” गोकुळ संचालक प्रकाश पाटील म्हणाले,”निवडणुकीमध्ये शेतकऱ्यांना आश्वासन देत त्यांचे पालन न करणे म्हणजे महाराष्ट्रातील राजकीय संस्कृतीचे पतन आहे. महाराष्ट्राच्या तिजोरी मध्ये खडखडाट असताना ८६ हजार कोटी कर्ज काढून शक्तिपीठ महामार्ग कशाला पाहिजे. या पैशातूनच शेतकऱ्यांना कर्जमाफी द्यावी. अन्यथा उप मुख्यमंत्र्यांनी कोल्हापुरात पाय ठेवू नये.” (Shaktipith committee)
शिवाजी कांबळे म्हणाले,” सरकार सातत्याने शेतकऱ्यांच्या पाठीमध्ये सुरा खुपसण्याचे काम करत आहे. शेतकऱ्यांच्या आंदोलनामध्ये फूट पाडण्यासाठी सरकार एजंटाना पाठीशी धरून महामार्गाला समर्थन असल्याचे भासवत आहे. कृष्णात पाटील म्हणाले,” एकनाथ शिंदे यांचे कोल्हापुरातील आमदार हे शेतकऱ्यांच्या विरोधी भूमिका घेत शेतकऱ्यांना चिथावणी देत आहेत. याला एकनाथ शिंदे व देवेंद्र फडणवीस यांचे समर्थन आहे.” (Shaktipith committee)
या बैठकीला सुरेश बन्ने, किसान सभेचे नामदेव पाटील, दिनकर सूर्यवंशी, प्रकाश पाटील, वृषभ पाटील, तानाजी भोसले, शिवाजी पाटील, सदानंद कदम, युवराज पाटील, जालिंदर कुडाळकर, वाय. एन. पाटील, मारुती नलवडे, सर्जेराव पाटील, सदाशिव पाटील यांच्यासह शेतकरी मोठ्या संख्येने उपस्थित होते. (Shaktipith committee)
हेही वाचा :
मोदी सरकारने ताठ कण्याने अमेरिकेला विरोध करावा
