Author

प्रतिनिधी

मराठी भाषेतील स्वतंत्र माध्यम. अन्यायग्रस्तांच्या बाजूने पक्षपाती. ज्या घटकांना आवाज नाही, त्यांचा आवाज. सत्तेला प्रश्न विचारण्याबरोबरच विधायक बाबींचा खंबीर पाठपुरावा. संपादकः विजय चोरमारे

दक्षिण महाराष्ट्र

‘स्वाभिमानी’चा २५ रोजी ऊस परिषदेत एल्गार

by प्रतिनिधी October 6, 2024

written by प्रतिनिधी

कोल्हापूर; प्रतिनिधी : गतवर्षी गेलेल्या उसाला प्रतिटन २०० रुपयांचा दुसरा हप्ता अगोदर द्यावा त्यानंतरच यावर्षीच्या हंगाम सुरू करावा अशी मागणी स्वाभिमानी शेतकरी संघटनेचे नेते, माजी खा. राजू शेट्टी यांनी केली. २५ ऑक्टोबरला जयसिंगपूर येथे स्वाभिमानी शेतकरी संघटनेची ऊस परीषद होणार असल्याचेही जाहीर केले. उदगांव (ता. शिरोळ) येथे संघटनेचा कार्यकर्ता मेळावा पार पडला. यावेळी ते बोलत होते. अध्यक्षस्थानी आण्णाप्पा पांदारे होते. (Raju Shetti)

यावेळी शेट्टी म्हणाले, ‘महायुतीचे सरकार शेतकऱ्यांच्या नाही तर उद्योगपतींच्या बाजूचे आहे. खा. शरद पवार शेतकऱ्यांच्या प्रश्नावर गप्प आहेत. राज्यात सध्या परिवर्तनाची गरज आहे. मजबूत तिसऱ्या आघाडीची आवश्यकता आहे. त्यासाठी परिवर्तन महाशक्ती आघाडीने सर्व लहान पक्षांना एकत्र करून नवा पर्याय दिला आहे. गतवर्षीच्या ऊस दराचे आंदोलन झाल्यामुळे साखर कारखानदारांना दर देणे भाग पडले. यापुढे स्वाभिमानीच्या आंदोलनाची व्याप्ती वाढवणार आहे. शिष्यवृत्तीसाठी डाटा गोळा करणारे, ऊसतोड मजूर, वाहतूकदार, कंत्राटी वीज कर्मचारी यांच्यासाठीही यापुढे आंदोलन करण्यात येईल. यावेळी प्रा. जालिंदर पाटील, जि.प.चे माजी सदस्य अनिल मादनाईक यांची भाषणे झाली. (Raju Shetti)

स्वागत राजाराम देसाई यांनी केले. प्रास्ताविक मिलिंद साखरपे यांनी केले. स्वाभिमानीचे जिल्हाध्यक्ष वैभव कांबळे, जनार्दन पाटील , भागवत जाधव, राजेंद्र गड्डयाण्णवार, राजगोंडा पाटील, सचिन शिंदे, अजित पाटील, जयकुमार कोल्हे आदींनी मनोगत व्यक्त केले.

हेही वाचा :

October 6, 2024 0 comments

दक्षिण महाराष्ट्र

नवरात्रोत्सवाच्या चौथ्या दिवशी अंबाबाईची श्री गायत्री देवी रूपात पूजा

by प्रतिनिधी October 6, 2024

written by प्रतिनिधी

कोल्हापूर; प्रतिनिधी : अश्विन शुद्ध चतुर्थी म्हणजेच शारदीय आजच्या दिवशी श्री अंबाबाईची श्री गायत्री देवी रूपातील अलंकार नवरात्रातील पूजा साकारण्यात आलेली आहे. पौराणिक संदर्भानुसार श्री गायत्री देवीला वेदमाता असे संबोधले जाते. गायत्री देवीच्या उत्पत्तीच्या कथेची सुरुवात विश्वाच्या निर्मितीपासून होते. जेंव्हा ब्रम्हदेवांना विश्वाची निर्मिती करायची होती, तेव्हा त्याचे सुलभीकरण करण्यासाठी त्यांनी दिव्य अशी दैवी स्त्रीशक्ती प्रकट केली. जिचे मूर्त स्वरूप म्हणजेच गायत्री देवी होय, गायत्री देवीची पाच मुखे ही पंचतत्वे पृथ्वी, आप, तेज, वायु आणि आकाश यांचे प्रतिनिधित्व करतात. ती कमलासनावर विराजमान आहे. तिचे कमळ हे आसन पावित्र्य आणि आध्यात्मिक जागृतीचे प्रतिक आहे. गायत्री देवीला १० हात आहेत. (Navratri Ustav 2024)

सूर्य हा वैश्विक प्रकाशाचा, तेजाचा व जीवनाचा प्रतीक मानला जातो आणि गायत्री देवी ही त्याच्या तेजाची प्रतिनिधी आहे. गायत्री मंत्राच्या माध्यमातून सूर्याची उपासना केली जाते. न गायत्र्याः परो मंत्र : ।’ अर्थात, गायत्री मंत्रापेक्षा श्रेष्ठ असा दुसरा मंत्र नाही, जो ऋग्वेदाच्या तिसऱ्या मंडळातील ६२ व्या सूक्तातील १० वा मंत्र. आहे. ॐ भूर्भुवः स्वः । तत्सवितुर्वरेण्यम् । भर्गो देवस्य धीमहि । धियो यो नः प्रचोदयात् । अर्थ :- भूलोक (पृथ्वी), भुवर्लोक आणि स्वर्गलोक व्यापणाऱ्या प्रकाशमान पूजनीय सवित्र (सूर्य) देवाचे आम्ही ध्यान करतो, जो आमच्या बुद्धीला (सर्वांगीण उन्नती साठी) प्रेरणा देवो. गायत्री मंत्र विश्वामित्र ऋषींनी सिद्ध केला आणि गायत्री मंत्राच्या तपश्चर्येनेच त्यांना प्रतिसृष्टी निर्माण करण्याचे सामर्थ्य प्राप्त झाले. देवी भागवत पुराणामध्ये गायत्री उपसानेचे वर्णन दिले आहे. गायत्री मंत्राला मंत्रराज, अमृतमंत्र व महामंत्र अशी अन्य नावे आहेत. धार्मिक पूजेच्या अगोदर गायत्री मंत्रासहित प्राणायाम केला जातो.

श्री गायत्री देवी ही ज्ञान आणि आध्यात्मिक उन्नतीची अधिष्ठात्री देवता असून तिची उपासना ही आध्यात्मिक आणि भौतिक प्रगतीसाठी केली जाते. श्री गायत्री देवी सर्वांची सर्वांगीण उन्नती करो, हीच तिच्या चरणी प्रार्थना ! ही पूजा श्रीपूजक मयुर मुकुंद मुनिश्वर, अरुण मुनिश्वर,सोहम मुनिश्वर, सुकृत मुनिश्वर यांनी बांधली. (Navratri Ustav 2024)

गोल्डन रंगाचे व मरुन बाळ रंगाचे काठ असणारे महावस्त्र किंमत १,२८ ७००/- तिरुपती देवस्थान कडून अर्पण सदर महावस्त्र अर्पण करणे करीता बी. शशिधर यांनी सपत्नीक येऊन सदरचे महावस्त्र मा. प्रशासक तथा जिल्हाधिकारी कोल्हापूर यांचे कडे सुपूर्द केले. यावेळी देवस्थान समितीचे सचिव श्री. शिवराज नाईकवडे, व्यवस्थापक श्री महादेव दिंडे व अन्य देवस्थान समिती कर्मचारी उपस्थित होते.

हेही वाचा :

October 6, 2024 0 comments

ज्येष्ठ साहित्यिका प्रा. डॉ. तारा भवाळकर यांची साहित्य संमेलनाध्यक्षपदी निवड

by प्रतिनिधी October 6, 2024

written by प्रतिनिधी

महाराष्ट्र दिनमान ऑनलाईन डेस्क : यंदा दिल्लीत होणाऱ्या ९८ व्या अखिल भारतीय मराठी साहित्य संमेलनाच्या अध्यक्षपदी लोकसंस्कृती आणि लोकसाहित्याच्या अभ्यासक, ज्येष्ठ साहित्यिका डॉ. तारा भवाळकर यांची निवड करण्यात आली आहे. साहित्य परिषदेच्यावतीने पुण्यात आयोजित पत्रकार परिषदेत ही घोषणा करण्यात आली. अखिल भारतीय साहित्य महामंडळाच्या अध्यक्ष प्राध्यापक उषा तांबे यांनी ही घोषणा केली आहे.

डॉ. तारा भवाळकर यांचा परिचय

डॉ. तारा भवाळकर यांचा जन्म १ एप्रिल १९३९ मध्ये झाला. वैचारिक लेखन करणाऱ्या एक मराठी लेखिका म्हणून त्यांची ख्याती आहेत. प्राध्यापक म्हणून निवृत्त झाल्यावर पुण्यातील ललित कला अकादमी आणि मुंबई विद्यापीठ लोककला अकादमीमध्ये अतिथी प्राध्यापक म्हणूनही त्यांनी काम केले आहे. त्यांचा लोकसाहित्य, लोकसंस्कृती, लोकपरंपरा आणि लोककला विषयांचे लेखन आणि गाढा अभ्यास आहे. लोकसंस्कृती, नाट्यसंशोधन, संतसाहित्य, एकांकिका, ललित लेखन, लोककला आणि स्त्री जाणिवांवर भाष्य करणारे लेखन त्यांनी केले आहे. मराठी विश्वकोश, मराठी वाड्.मयकोश आणि मराठी ग्रंथकोश या महत्त्वाच्या कार्यातही त्यांचे योगदान आहे.

डॉ. तारा भवाळकर यांनी लिहिलेली पुस्तके

प्रियतमा
मरणात खरोखर जग जगते
मराठी नाटक : नव्या दिशा, नवी वळणे
मराठी नाट्यपरंपरा : शोध आणि आस्वाद
यक्षगान आणि मराठी नाट्य परंपरा
तिसऱ्या बिंदूच्या शोधात
लोकनागर रंगभूमी (माहितीपर)
लोकपरंपरा आणि स्त्रीप्रतिभा

डॉ.तारा भवाळकरांना मिळालेले पुरस्कार

पुणे विद्यापीठाचा सर्वोत्कृष्ट प्रबंधासाठी पुरस्कार, १९८२
बँक ऑफ बडोदा, सांगलीः कृतज्ञता पुरस्कार, १९९०
महाराष्ट्र राज्य उत्कृष्ट ग्रंथनिर्मिती पुरस्कार लोकसंचित ग्रंथासाठी, १९९२
अखिल भारतीय दलित साहित्य अकादमी दिल्लीः डॉ. बाबासाहेब आंबेडकर गौरववृत्ती, १९९४
मंगल पुरस्कार, कोल्हापूर विशेष कर्तृत्ववान स्त्रीसाठी साहित्यिक क्षेत्रातील कार्यासाठी, १९९५
श्री. ना. बनहट्टी पुरस्कार, पुणे नगर वाचन मंदिर, पुणे मराठी नाट्यपरंपरा शोध आणि अरस्वाद या ग्रंथासाठी, १९९६
वि.म. गोखले पुरस्कार महाराष्ट्र साहितत्य परिषद, पुणे मराठी नाट्यपरंपरा शोध आणि आस्वाद या ग्रंथासाठी, १९९६
विशेष वाङमय पुरस्कार वाडमय चर्चा मंडळ, बेळगाव माझिया जातीच्या या ग्रंथासाठी, १९९७
वाङ्मय समीक्षा प्रथम पुरस्कार वाडमय चर्चा मंडळ, बेळगाव. मराठी नाटक नव्या दिशा नवी वळणे या ग्रंथासाठी, १९९८
कै. मालतीबाई दांडेकर जीवनगौरव पुरस्कार साहित्यप्रेमी मंडळ, पुणे, २००४
के. प्र. महिला गौरव पुरस्कार, २००५
शिवलीला सांस्कृतिक कलामंच, सांगली महिला गौरव पुरस्कार, २००६
विशाखा वतने पुरस्कार, नाट्यपंढरी लातूर. आकलन आणि आस्वाद या ग्रंथासाठी, २००६
महाराष्ट्र साहित्य परिषद, पुणे जीवनगौरव पुरस्कार, २००६
शरदचंद्र चट्टोपाध्याय पुरस्कारः म. सा. परिषद, पुणे, २००७
लोकसंस्कृती, नाट्यसेवा पुरस्कार नाट्य चित्रपट कलाकार तंत्रज्ञ कल्याण ट्रस्ट, सांगली, २०१०
विशेष सन्मानवृत्ती महाराष्ट्र राज्य साहित्य संस्कृती मंडळ, मुंबई, २०११
डॉ. निर्मलकुमार फडकुले प्रतिष्ठान साहित्य सेवा पुरस्कार, सोलापूर, २०११
सूर्योदय सेवारत्न पुरस्कार, जळगांव, २०१२
ज्ञानेश प्रकाशन, पुणे पुरस्कृत शैलजा काळे स्मृती पुरस्कार, २०१३
कै. डॉ. अ. का. प्रियोळकर स्मृती पुरस्कार मुंबई विद्यापीठ, २०१३
रत्नशारदा पुरस्कार सह्याद्री वाहिनी दूरदर्शन, २०१५
यशस्विनी पुरस्कार संवाद, वाई, २०१५
साहित्य रत्न पुरस्कार रत्नाप्पाअण्णा कुंभार स्मृतीमंच, जयसिंगपूर, २०१६
लोकमत सखीमंच जीवन गौरव पुरस्कार, सांगली, २०१६
गार्गी पुरस्कार श्री. सिध्दिविनायक न्यास, मुंबई, २०१६
सु.ल. गद्रे साहित्य पुरस्कार साहित्य संघ, मुंबई (मुलुंड), २०१६
काकासाहेब खाडिलकर जीवन गौरव पुरस्कार अ.भा. मराठी नाट्य परिषद, सांगली, २०१७
पद्मश्री विखे पाटील जीवनगौरव पुरस्कार अहमदनगर, २०२१

पुराणकथा स्त्रियांवर अन्याय करायला शिकवतात?

पुराणकथा स्त्रियांवर अन्याय करायला शिकवतात?

हेही वाचा :

October 6, 2024 0 comments

ताज्या बातम्या

पाकिस्तानी क्रिकेटरशी लग्न करण्याआधी ‘ती’ करणार धर्मांतर

by प्रतिनिधी October 6, 2024

written by प्रतिनिधी

महाराष्ट्र दिनमान ऑनलाईन डेस्क : पाकिस्तानमधील क्रिकेटपटू रझा हसन लवकरच पूजा बोमन या भारतीय हिंदू तरुणीशी लग्न करणार आहे. या दोघांची एंगेजमेंट नुकतीच अमेरिकेतील न्यूयॉर्कमध्ये पार पडली. पाकिस्तानमधील क्रिकेटपटूंनी भारतीय महिलांशी लग्न करणं काही नवीन बाब नाही. मात्र यावेळेस लग्न करणारी भारतीय तरुणी लग्नाआधी धर्मांतर करणार आहे.नंतर हे दोघे पुढील वर्षी लग्न बंधनात अडकणार आहेत. (Raza Hasan)

रझाने हसने काही दिवसांपूर्वी सोशल मीडिया वरुन एक पोस्ट करून आपल्या एंगेजमेंटची घोषणा केली होती. “सांगायला आनंद होतोय की मी आता एंगेज आहे. तू आयुष्यभरासाठी माझी हो अशी मागणी मी तिला घातली आणि तिने होकार दिला आहे. भविष्यातील दोघांच्या एकत्रित वाटचालीसाठी फार उत्साही आहे,” अशी पोस्ट करत दोघांचा एंगेजमेंटमधील फोटो शेअर केला आहे.

लग्नाआधीच धर्म बदलणार

पूजा बोमन ही हिंदू असून लग्नापूर्वी धर्मांतर करुन इस्लाम धर्म स्वीकारणार आहे. हे धर्मांतर पूजा स्वइच्छेने करत आहे की तिला लग्नापूर्वी रझाने तशी अट घातली आहे यासंदर्भात कोणतीही माहिती मिळाली नसल्याचे सांगितले जात आहे. (Raza Hasan)

View this post on Instagram

A post shared by Raza Hassan (@razahassan_100)

हेही वाचा :

October 6, 2024 0 comments

देश-विदेश

इस्‍लामाबादमध्‍ये तणाव सरकार विरोधात निदर्शने

by प्रतिनिधी October 6, 2024

written by प्रतिनिधी

महाराष्ट्र दिनमान ऑनलाईन डेस्‍क : पाकिस्तानमध्ये इम्रान खान यांच्या तेहरिक-ए-इन्साफ (पीटीआय) या पक्षाच्या वतीने सरकार विरोधात निदर्शने केली जात आहेत. सलग दोन दिवस आंदोलन सुरू असल्याने इस्लामबाद मध्ये तणावाचे वातावरण आहे. निदर्शने व अशांततेच्या परिस्थितीमुळे रावळपिंडी व इस्लामाबाद मध्ये काही ठिकाणी मोबाईल फोन ची सेवा बंद करण्यात आली आहे. दरम्यान,जमावाला पांगवण्यासाठी पोलिसांनी अश्रूधुराच्या कांड्या फोडल्या आहेत. (Imran Khan)

माजी पंतप्रधान इम्रान खान यांचा आदेश येई पर्यंत आंदोलन सुरू राहील तसेच खैबर पख्तुनख्वाचे मुख्यमंत्री अली अमीन गंडापूर यांना अटक केल्यास पक्षाचे ज्येष्ठ नेते आझम स्वाती आंदोलनाचे नेतृत्व करतील, असेही तेहरिक-ए-इन्साफ (पीटीआय) पक्षाने स्‍पष्‍ट केले आहे.

आंदोलन सुरूच राहील

माजी पंतप्रधान इम्रान खान यांना पाकिस्‍तान सरकारने विविध आरोपांखाली ५ ऑगस्‍ट २०२३ रोजी अटक केली होती. काही प्रकरणांमध्‍ये न्‍यायालयाने त्‍यांना दोषी ठरवले आहे. सध्‍या ते रावळपिंडी येथील आदिलाला कारागृहात आहेत. इम्रान खान यांच्‍या सुटकेच्‍या मागणीसह न्यायव्यवस्थेचे स्वातंत्र्य आणि वाढत्या महागाईचा निषेध करणे यासाठी हे शनिवारपासून सरकारविरोधातील आंदोलन सुरु झाले आहे. (Imran Khan)

हेही वाचा :

October 6, 2024 0 comments

साहित्य-संस्कृती

बिग बॉस मराठी सीझनचा ‘आज’ ग्रँड फिनाले

by प्रतिनिधी October 6, 2024

written by प्रतिनिधी

महाराष्ट्र दिनमान ऑनलाईन डेस्क : मराठीतील टीआरपीच्या बाबतीत सर्व रेकाँर्ड मोडलेला बिग बाँसच्या पाचव्या सिझनचा ग्रँड फिनाले आज (दि.६) पार पडत असून या ट्राँफीवर कोण नाव कोरेल याकडे अख्ख्या महाराष्ट्राचे लक्ष लागले आहे. यावर्षीचा हा सीझन २८ जुलैला सुरू झाला. १६ सदस्यांचा प्रवास आता सहा सदस्यांपर्यंत आला असून १०० दिवसांऐवजी ७० दिवसांतच संपत आहे. मात्र, या शोला यंदा संपूर्ण महाराष्ट्राने भरभरून प्रतिसाद दिला. (Bigg Boss Marathi 5)

काही आठवड्यापासून या शोचा सूत्रसंचालक महाराष्ट्राचा लाडका भाऊ रितेश देशमुख या शो पासून दूर होता. मात्र, आज पुन्हा एकदा आपल्या लयभारी स्टाईलने आजचा ग्रँड फिनाले शो गाजवणार आहे. त्यामुळे बिग बाँस प्रेक्षकही त्याला पाहण्यासाठी उत्सुक आहेत. आपल्या आवडत्या सदस्याला जिंकवण्यासाठी गेल्या काही दिवसांपासून बिग बाँसप्रेमींनी भरभरून व्होटिंग केले आहे. त्यामुळे आज या पाचव्या सिझनच्या विजेत्याची उत्सुकता लागून राहिली आहे.

बिग बॉस मराठी ५ चा ग्रँड फिनाले

टॉप सहा सदस्यांमध्ये आज ग्रँड फिनाले पार पडेल. धनंजय पोवार, अभिजीत सावंत, सूरज चव्हाण, जान्हवी किल्लेकर , अंकिता वालावलकर, निक्की तांबोळी आणि यापैकी एका सदस्याचं नाव बिग बॉस मराठी सीझन ५ च्या ट्रॉफीवर कोरलं जाईल. आज बिग बॉस सीझन ५ चा विजेता मिळेल. त्याआधी बिग बॉस नवीन ट्विस्ट आणणार का आणि बक्षिसाच्या रकमेत वाढ करत स्पर्धकांना सुखद धक्का देणार का, हे आज ग्रँड फिनालेमध्ये पाहावं लागणार आहे. (Bigg Boss Marathi 5)

बिग बॉस मराठी ५ च्या विजेत्याला मिळणार इतकी रक्कम

बिग बाँस च्या पाचव्या पर्वाच्या विजेत्यासाठी २५ लाख रुपये बक्षीस ठेवण्यात आले होते. पण घरातील सदस्यांना वेगवेगळ्या टास्कमध्ये ही रक्कम जिंकावी लागणार होती. यानंतर बिग बॉसच्या घरातील सदस्यांनी चक्रव्यूह टास्कमध्ये २५ लाख रुपयांपैकी ८.६ लाख रुपये जिंकले होते. त्यानंतर पहिल्या तिकीट टू फिनालेच्या टास्कनंतर बिग बॉस मराठी सीझन ५ च्या विजेत्याला मिळणाऱ्या बक्षिसाच्या रक्कमेत वाढ झाली. या टास्कमध्ये स्पर्धकांना त्यांची किंमत ठरवायची होती. सूरजने हा टास्क जिंकल्यावर त्याची किंमत सहा लाख रुपये बक्षिसाच्या रकमेत जमा झाल्याने बिग बॉस मराठी विजेत्याच्या बक्षिसासाठीची रक्कम आता १४.६ लाख रुपये झाली आहे. आता विजेत्याला १४.६ लाख रुपये मिळतील की, आणखी काही वाढ होईल हे आजचा शो पाहिल्यानंतर समजेल.

बिग बाँस मराठी विजेते…..

बिग बॉस मराठी, एक लोकप्रिय रिॲलिटी टीव्ही शो, २०१८ पासून प्रेक्षकांचे मनोरंजन करत आहे. महेश मांजरेकर यांनी चार सिझन आणि रितेश देशमुख यांचा हा पहिला होस्ट केलेला, हा शो कलर्स मराठीवर प्रसारित होतो.चार सीझनमध्ये, मेघा धाडे, शिव ठाकरे,विशाल निकम आणि अक्षय केळकर यांसारखे स्पर्धक विजेते म्हणून उदयास आले आहेत, त्यांनी प्रसिद्धी आणि ओळख मिळवली आहे.

हेही वाचा :

October 6, 2024 0 comments

ताज्या बातम्या

इंग्लंडविरूद्धच्या पहिल्या कसोटीसाठी पाकिस्तानचा संघ जाहीर; शाहीन-नसीमचे पुनरागमन

by प्रतिनिधी October 6, 2024

written by प्रतिनिधी

महाराष्ट्र दिनमान ऑनलाईन डेस्क : इंग्लंडचा संघ पाकिस्तानच्या दौऱ्यावर येणार आहे. या दौऱ्यातील पहिल्या कसोटी सामन्यासाठी पाकिस्तानने आपला संघ जाहीर केला आहे. पाकिस्तान आणि इंग्लंड यांच्यातील पहिला कसोटी सामना सोमवारपासून मुलतानमध्ये होणार आहे. (PAK vs ENG)

इंग्लिडविरूद्ध होणाऱ्या पहिल्या कसोटी सामन्यासाठी पाकिस्तानने संघात तीन वेगवान गोलंदाजांना स्थान दिले आहे. या महत्त्वाच्या कसोटी मालिकेसाठी वेगवान गोलंदाज शाहीन आफ्रिदी आणि नसीम शाह यांचे पाकिस्तान संघात पुनरागमन झाले आहे. हे दोघेही बांगलादेशविरुद्धच्या शेवटच्या मालिकेतील दुसऱ्या कसोटीत खेळले नव्हते. इंग्लंडविरुद्धचे पहिले दोन कसोटी सामने मुलतानमध्ये आणि तिसरा सामना रावळपिंडीत होणार आहे. (PAK vs ENG)

पाकिस्तानला घरच्या मैदानावर बांगलादेशविरुद्ध पराभवाचा सामना करावा लागला होता. या मालिकेत बांगला देशने पाकिस्तानला क्लीन स्वीप केले होते. इंग्लंडने गेल्या वेळी पाकिस्तानचा दौरा केला होता. तेव्हा त्यांनी यजमानांना 3-0 असा व्हाईटवॉश केला होता. जागतिक कसोटी चॅम्पियनशिपच्या दृष्टिकोनातून ही मालिका दोन्ही संघांसाठी खूप महत्त्वाची आहे.

पाकिस्तानचे प्लेइंग इलेव्हन : शान मसूद (कर्णधार), सलीम अयुब, अब्दुल्ला शफीक, बाबर आझम, सौद शकील, मोहम्मद रिझवान, सलमान अली आगा, आमिर जमाल, शाहीन शाह आफ्रिदी, नसीम शाह, अबरार अहमद.

Playing XI named for the first Test! 🚨

The action starts tomorrow in Multan 🏏#PAKvENG | #TestAtHome pic.twitter.com/BmYzZf4MlP

— Pakistan Cricket (@TheRealPCB) October 6, 2024

हेही वाचा :

October 6, 2024 0 comments

महाराष्ट्र मुंबई

संभाजीराजे छत्रपती मुंबईत; सरकारविरोधात आंदोलन

by प्रतिनिधी October 6, 2024

written by प्रतिनिधी

महाराष्ट्र दिनमान ऑनलाईन डेस्क : पंतप्रधान नरेंद्र मोदी यांनी अरबी समुद्रात शिवस्मारकाचे भूमिपूजन केले. मात्र,अजूनही या कामाला सुरुवात झालेली नाही. गुजरातमध्ये सरदार पटेलांचा पुतळा उभा राहिला. पण, महाराष्ट्रात एल अँड टी कंपनीला टेंडर देण्यात आले त्यांना गेल्या आठ वर्षात छत्रपती शिवरायांचा पुतळा उभा करता आला नाही. शिवस्मारकासाठीचे करोडो रुपये कुठे गेले? असा उद्वीग्न सवाल छत्रपती संभाजीराजे यांनी केला. आज (दि.६) त्यांच्या नेतृत्वात पंतप्रधान नरेंद्र मोदींनी जलपूजन केलेले अरबी समुद्रातील शिवस्मारक शोधण्याची मोहीम आयोजित करण्यात आली होती. त्यावेळी ते प्रसारमाध्यमांशी बोलत होते. (Sambhaji Raje Chatrapati)

गेट वे ऑफ इंडियाच्या परिसरात कडेकोट पोलीस बंदोबस्त तैनात करण्यात आला आहे. या पार्श्वभूमीवर संभाजीराजे पुढे म्हणाले की, पंतप्रधान मोदी यांनी अरबी समुद्रातील शिवस्मारकाचं जलपूजन केल्यानंतर मी एक-दोन वर्षे थांबलो होतो. त्यानंतर मी तत्कालीन मुख्यमंत्री देवेंद्र फडणवीस, उद्धव ठाकरे आणि त्यानंतरचे मुख्यमंत्री एकनाथ शिंदे यांच्याकडे शिवस्मारकाबाबत विचारणा केली. शिवस्मारक बांधण्यासाठी समिती स्थापन होऊन काम का सुरु झाले नाही, असे मी विचारले. त्यावर मला सांगण्यात आलं की, अरबी समुद्रात शिवस्मारक उभारण्यासाठी पर्यावरणीयदृष्ट्या सगळ्या परवानग्या मिळालेल्या नाहीत. केंद्रात तुमचं सरकार आहे, राज्यात तुमचं सरकार आहे. मग हा प्रश्न मार्गी का लागत नाही, असा सवाल संभाजीराजे यांनी उपस्थित केला. (Sambhaji Raje Chatrapati)

१०० टक्के क्लीअरन्स नसताना पंतप्रधान मोदींनी जलपूजनाला कसे केले

सर्व परवानग्या मिळाल्या नसताना पंतप्रधान नरेंद्र मोदीजी शिवस्मारकाच्या जलपूजनाला कसे आले? आम्ही शोध मोहीमे वेळी कायदा हातात घेणार नाही. पण आम्हाला समुद्रात जाऊ न देण्यासाठी बोटवाल्यांना भाजपकडून धमकावले जात आहे. त्यांचा परवाना रद्द करण्याच्या धमक्या दिल्या जात आहेत. पण आम्ही शिवस्मारकाचं जलपूजन झालेल्या जागी पोहोचणारच, असा निर्धार संभाजीराजे छत्रपती यांनी व्यक्त केला.

संभाजीराजेंचा ताफा पोलिसांनी रोखला

पुण्याहून निघालेल्या संभाजी राजे छत्रपतींच्या रॅलीला मुंबई पोलिसांनी अडवलं.. कार्यकर्त्यांना पोलिसांनी ताब्यात घेतलं…यावेळी कार्यकर्ते आणि पोलिसांमध्ये झटापटही झाली…संभाजीराजे अरबी समुद्राकडेजाण्यावर ठाम आहेत.. तर संभाजीराजे छत्रपतींनी कार्यकर्त्यांना शांतता राखण्याचं आवाहन केलंय…तर पाच हजार तिकीट काढले आणि दुर्बिणीतून पाहू आणि स्मारकाचं अभिवादन करू असं संभाजीराजे छत्रपतींनी म्हटलंय…

#चलो_मुंबई
मुंबईच्या अरबी समुद्रात जगातील सर्वात उंच असे जागतिक दर्जाचे भव्य शिवस्मारक साकारू, अशी स्वप्ने शिवप्रेमी जनतेला दाखवत मागील तीन दशकांत राज्यात अनेक सरकारे आली आणि गेली. २४ डिसेंबर २०१६ रोजी भाजप – शिवसेना प्रणित महायुती सरकारने अत्यंत भव्यदिव्य कार्यक्रमाचे आयोजन करत… pic.twitter.com/KtnU0VeyZt

— Sambhaji Chhatrapati (@YuvrajSambhaji) October 2, 2024

हेही वाचा :

October 6, 2024 0 comments

दक्षिण महाराष्ट्र विधानसभा निवडणूक

मुख्यमंत्री, दोन्ही उपमुख्यमंत्री बुधवारी कोल्हापूर दौऱ्यावर

by प्रतिनिधी October 5, 2024

written by प्रतिनिधी

कोल्हापूर /प्रतिनिधी : राज्याचे मुख्यमंत्री एकनाथ शिंदे व उपमुख्यमंत्री देवेंद्र फडणवीस, उपमुख्यमंत्री अजित पवार हे बुधवारी (दि.९) रोजी कोल्हापूर दौऱ्यावर येत आहेत. त्यांच्या प्रमुख उपस्थितीत राजर्षी छत्रपती शाहू महाराज शासकीय वैद्यकीय महाविद्यालय शेंडा पार्क येथील ११०० खाटांच्या विविध रूग्णालयांच्या इमारतीच्या भूमिपूजनासह विविध पुर्ण झालेल्या कामांचे लोकार्पण होणार आहे. बुधवारी सायंकाळी पाच वाजता हा कार्यक्रम होणार आहे, अशी माहिती वैद्यकीय शिक्षण व विशेष सहाय्य मंत्री तथा पालकमंत्री हसन मुश्रीफ यांनी दिली.

शेंडा पार्कात जाहीर सभाही आयोजित करण्यात आली आहे. शेंडापार्क येथे २५० खाटांचे कर्करोग रूग्णालय, ६०० खाटांचे सामान्य रूग्णालय व २५० खाटांचे अतिविशेषोपचार रूग्णालयांचा प्रामुख्याने समावेश आहे. या कार्यक्रमाच्या अगोदर दुपारी चार वाजता कोल्हापूर जिल्हा मध्यवर्ती बँकेच्या इमारतीचे लोकार्पण होणार आहे.

October 5, 2024 0 comments

दक्षिण महाराष्ट्र

८० हजारांची लाच घेताना दोघांना अटक

by प्रतिनिधी October 5, 2024

written by प्रतिनिधी

कोल्हापूर; प्रतिनिधी : शालेय विद्यार्थ्यांच्या गणवेशाचे बिल मंजूर करण्यासाठी ८० हजार रुपयांची लाच मागणाऱ्या महिला आर्थिक विकास मंडळाचे जिल्हा समन्वयक अधिकारी सचिन सिताराम कांबळे (वय ४५, रा. पंडीतराव जाधवनगर राम मंदिराजवळ पाचगाव ता. करवीर), आणि सहाय्यक सह नियंत्रण अधिकाऱ्याला उमेश बाळकृष्ण लिंगनूरकर (वय ४६, रा. सिद्धार्थ नगर) यांच्यावर लाचलुचपत प्रतिबंधक विभागाने कारवाई केली. या दोघांविरोधात लक्ष्मीपुरी पोलिस ठाण्यात गुन्हा नोंद झाला आहे.

८० हजाराची लाच घेताना उमेश लिंगनूरकर याला सापळा रचून रंगेहात पकडण्यात आले. शनिवार पेठेतील पद्माराजे शाळेजवळ ही कारवाई करण्यात आली. लाचलुचपतच्या अधिकाऱ्यांनी कारवाईची माहिती दिली. या कारवाईतील तक्रारदार हा जिल्हा परिषद तसेच खासगी शाळांना गणवेश तयार करुन देण्याचे काम करतो. तक्रारदाराला महिला आर्थिक विकास महामंडळाकडून जिल्हा परिषदेच्या १९ केंद्र शाळांना गणवेश पुरवठा करण्याचे काम मिळाले होते. तक्रारदाराच्या ओळखीच्या स्वयंसहाय्यता महिला समुहास गणवेश पुरवण्याचे काम मिळाले. काम पूर्ण झाल्यावर तक्रारदाराला बिल देण्याचे ठरले होते. त्यानंतर गणवेश पुरवण्याचे काम महिला समुहास देण्यात आले.

गणवेश तयार करण्याचे एकूण बिल १८ लाख ३५ हजार ८१४ रुपये इतके झाले. महिला आर्थिक विकास मंडळाने तक्रारदाराने केलेल्या पाठपुराव्यानंतर १४ लाख ३५ हजार रुपये बिल स्व्यंसहाय्यता महिला समुहाच्या बँकेच्या खात्यात जमा केले. त्यानंतर महिला समुहाने ते बिल तक्रारदाराला दिले. उर्वरित बिलाबाबत तक्रारदाराने महामंडळाच्या सहाय्यक सह नियंत्रण अधिकारी उमेश लिंगणुकर यांची भेट घेऊन विचारणा केली असता तुमचे १४ लाख ३५ हजाराचे बिल मंजूर केले आहे. शिल्लक बिल मंजूर करण्यासाठी लिंगणूकरने स्वत:ला आणि जिल्हा समन्वय अधिकारी सचिन कांबळे यांना ८० हजार रुपयांची लाच मागितली.

त्यानंतर तक्रारदाराने लाचलुचपत प्रतिबंधक विभागाकडे तक्रार केली. तक्रारदाराच्या तक्रारीची पडताळणी केली असता सचिन कांबळे आणि उमेश लिंगनूरकर यांनी ८० हजार रुपयांच् लाच मागितल्याने निष्पण झाले. त्यानंतर पोलिसांनी सापळा रचून शनिवार पेठेतील पद्माराजे शाळेजवळ तक्रारदारांकडून ८० हजार रुपयांची लाच घेताना उमेश लिंगनुरकर याला रंगेहात पकडले. लाचलुचपत प्रतिबंधक विभागाच्या पोलिस उप अधीक्षक वैष्णवी पाटील यांच्या नेतृत्वाखाली पोलिस निरीक्षक आसमा मुल्ला, सहाय्यक पोलिस उप निरीक्षक प्रकाश भंडारे, हेड कॉन्स्टेबल विकास माने, संदीप काशीद, सचिन पाटील, कृष्णा पाटील, यांचा कारवाईत सहभाग होता.

October 5, 2024 0 comments

Newer Posts

Older Posts