लंडन : ओव्हल मैदानावर पहिल्या आणि दुसऱ्या दिवशी जलदगती गोलंदाजांचे वर्चस्व पहायला मिळाले. पहिल्या दिवशी भारताचे सहा गडी बाद झाल्यानंतर दुसऱ्या दिवशी अवघ्या वीस धावात भारताचे चार गडी बाद करत इंग्लंडने भारताला २२४ धावांवर रोखले. इंग्लंडने समाधानकारक सुरुवात करुनही उपाहारानंतर भारतीय गोलंदाजांनी भेदक मारा करत इंग्लंडच्या फलंदाजीला वेसन घातले. चहापानानंतर खेळ सुरू झाला तेव्हा इंग्लंडने ८ बाद २४१ धावा केल्या होत्या. (Gus Atkinson)
कालच्या ६ बाद २०४ धावसंख्येवरुन भारतीय संघाने डाव सुरू केला. पण जोश टंगने अर्धशतकवीर करुण नायरला बाद करुन अडथळा बाजूला केला. नायरने आठ चौकारांसह ५७ धावा केल्या. भारतीय संघाकडून सर्वात जास्त धावा करणार फलंदाज नायर ठरला. त्यानंतर गस अटकिन्स माऱ्यासमोर भारताची तळची फळी गारद झाली. अटकिनसने वॉशिगंटन सुंदरला (२६) बाद केले. त्यानंतर महमंद सिराज आणि प्रसिद्ध कृष्णाला भोपळाही फोडून दिला नाही. आकाश दीप शून्य धावांवर नाबाद राहिला. गस अटकिनसने ३३ धावात पाच गडी बाद केले. जोश टंगने ५७ धावात तीन गडी बाद केले. ख्रिस वोक्सने एक बळी मिळवला. (Gus Atkinson)
इंग्लंडच्या सलामी जोडीने संघाला दमदार सुरुवात करुन दिली. झॅक क्रॉली आणि बेन डकेटने वेगवान गोलंदाजी फोडून काढत पहिल्या गड्यासाठी ९१ धावांची भागीदारी केली. आकाश दीपने बेन डकेटला बाद करत सलामीची जोडी फोडून भारताला पहिले यश मिळवून दिले. यष्टीरक्षक ध्रुव जुरेलने त्याचा झेल घेतला. ३८ चेंडूत ४३ धावा करणार डकेटने पाच चौकार आणि दोन षटकार मारले. त्यानंतर झॅक क्राऊलीने अर्धशतक झळकावले. प्रसिद्ध कृष्णाने त्याला रवींद्र जडेजाकडे झेल देण्यास भाग पाडले. १४ चेंडू सीमापार करत त्याने ५७ चेंडूत ६४ धावांची खेळी केली. इंग्लंडने उपाहारापर्यंत २ बाद १२९ अशी समाधानकारक धावसंख्या उभारली.
उपाहानंतर चहापानापर्यंत भारताची भेदक गोलंदाजी पहायला मिळाली. कर्णधार ओली पोपे याला महम्मद सिराजने इनस्विंगरवर चकवले. तो एलबीडब्लू झाला. त्याने २२ धावा केल्या. त्यानंतर हॅरी ब्रुक जो रुटची जोडी जमली. पण सिराजच्या एका यॉर्करवर जो रुट बाद झाला. त्याने सहा चौकारांच्या सहाय्याने २२ धावा केल्या. दुसरीकडे हॅरि ब्रुकची फटकेबाजी सुरू होती. जोकब बेथेलला (६) सिराजने पायचित पकडले. फटकेबाजीसाठी प्रसिद्ध असलेला जेमी स्मिथ एका बाहेर जाणाऱ्या चेंडूवर चकला. के.एल. राहूलने त्याचा झेल टिपला. चहापानास खेळ थांबला तेव्हा इंग्लंडने ७ बाद २१५ धावा केल्या होत्या.
चहापानानंतर गस अटकिन्सला प्रसिद्ध कृष्णाने बाद केले. आकाश दीपने त्याचा झेल टिपला. त्याने ११ धावा केल्या. प्रसिद्ध कृष्णाने चार गडी बाद केले. तर महम्मद सिराजने तीन बळी घेतले होते. शेवटचे वृत्त हाती आली तेव्हा इंग्लंडने ८ बाद २४२ धावा केल्या होत्या. भारतावर इंग्लंडने १८ धावांचे लिड घेतले होते. (Gus Atkinson)