Tag:

Kolhapur

छत्रपती शिवरायांच्या पुतळ्याचे शुक्रवारी राहुल गांधी यांच्याहस्ते अनावरण

by प्रतिनिधी October 3, 2024

written by प्रतिनिधी

कोल्हापूर; प्रतिनिधी : कसबा बावडा येथील भगवा चौक येथे बसवण्यात आलेल्या छत्रपती शिवरायांच्या बहुशस्त्रधारी पुतळ्याचे अनावरण काँग्रेसचे नेते आणि लोकसभेचे विरोधी पक्ष नेते राहुल गांधी यांच्या हस्ते उद्या (दि. ४) होणार आहे. सायंकाळी सहा वाजता हा कार्यक्रम होणार आहे. राहुल गांधी यांच्या स्वागताची जय्यत तयारी करण्यात आली आहे. (Rahul Gandhi )

असा आहे पुतळा

छत्रपती शिवरायांच्या १६ व्या शतकातील समकालीन तैलचित्रांचा अभ्यास करून हा पुतळा तयार करण्यात आला आहे. तो ब्राँझमध्ये साकारण्यात आला आहे. त्याचे वजन साधारण दोन टन आहे. कमरेला शेलापटका, कट्यार आणि पाठीवर ढाल, उजव्या हातात दांडपट्टा, डाव्या हातात धोप आणि पायामध्ये सुंदर नक्षीकाम असलेले चढाव अशा देखण्या पेहरावात हा पुतळा बनविला आहे.

गुरुवारी सकाळी मोठ्या क्रेनद्वारे हा पुतळा चबुतऱ्यावर बसवण्यात आला. काँग्रेसचे विधिमंडळातील नेते आमदार सतेज पाटील तसेच आमदार ऋतुराज पाटील यांनी भेट देवून कामाचा आढावा घेतला. राहुल गांधी यांच्या स्वागताचीही जंगी तयारी करण्यात आली आहे. पोलिस प्रशासनानेही सुरक्षेचा आढावा घेतला. कसबा बावडा परिसरासह संपूर्ण कोल्हापूर जिल्ह्यातील काँग्रेस कार्यकर्ते, पदधिकाऱ्यांना त्यांच्या स्वागताची उत्सुकता लागली आहे.

दरम्यान, शुकवारी सकाळी छत्रपती शिवारायांच्या पुतळ्याच्या जागेची वास्तूशांती पूजा डॉ. डी. वाय. पाटील ग्रुपचे अध्यक्ष डॉ. संजय डी. पाटील तसेच श्रीराम सेवा संस्थेचे सभापती संतोष पाटील व उप सभापती अंनत पाटील यांच्या उपस्थितीत करण्यात येणार आहे. संपूर्ण कसबा बावड्यातील घराघरांमध्ये पारंपरिक पेहरावात मुलींनी आमंत्रण पत्रिका वाटल्या असून मोठ्या सणासारखी लगबग या परिसरात सुरु आहे. छत्रपती शिवरायांच्या भव्य प्रतिमा आणि राहुल गांधी यांच्या स्वागताचे फलक ठिकठिकाणी उभाण्यात आले आहेत.

हेही वाचा :

October 3, 2024 0 comments

दक्षिण महाराष्ट्र

विशाळगड संशयित रवींद पडवळची कणेरीमठावर हजेरी

by प्रतिनिधी October 3, 2024

written by प्रतिनिधी

कोल्हापूर; प्रातिनिधी : विशाळगड हिंसाचार प्रकरणातील फरारी असलेला प्रमुख संशयित रवींद पडवळ याने दोन दिवसापूर्वी करवीर तालुक्यातील कणेरी मठावर हिंदू संमेलनाला हजेरी लावली. रामगिरी महाराज आणि काडसिद्धेश्वर महाराजांची भेट घेतल्याचा व्हिडिओ स्वत: रवींद पडवळने सोशल मिडियावर पोस्ट केला आहे. या संमेलनाला मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी उपस्थिती लावली होती. या संमेलनस्थळी चोख बंदोबस्त लावला असतानाही रवींद्र पडवळ पोलिसांना कसा दिसला नाही असा प्रश्न सर्वसामान्यांकडून उपस्थित केला जात आहे.

विशाळगडावरील अतिक्रमणांच्या विरोधात माजी खासदार संभाजीराजे यांनी आंदोलन केले होते. १४ जुलै २०२४ रोजी संभाजीराजे विशाळगडावर आंदोलन करण्यापूर्वीच हिंदू बांधव समिती आणि सेवाव्रत प्रतिष्ठानच्या कार्यकर्त्यांनी विशाळगडाच्या पायथ्याशी असलेल्या गजापूरमध्ये वस्तीत घुसुन हिंसाचार केला होता. या घटनेने महाराष्ट्र हादरुन गेल्यावर पोलिसांनी विशाळगडावरील अतिक्रमण काढण्यासाठी आवाहन करणाऱ्या रवींद्र पडवळ आणि बंडा साळुंखे यांच्यासह २० हून अधिक हल्लेखोरांच्याविरोधात गुन्हा दाखल केला होता. या गुन्ह्यातील प्रत्यक्ष सहभागी झालेल्या काही संशयितांना पोलिसांनी अटक केली तर रवींद्र पडवळ आणि बंडा साळुंखे याला अटक करण्यासाठी पोलिसांनी आठ पथके निर्माण केली होती. पण दोघेही पोलिसांच्या ताब्यात सापडलेले नाहीत.

दरम्यान दोन दिवसापूर्वी कणेरी मठावर झालेल्या हिंदू संमेलनाला राज्यभरातील हिंदू साधू, संत, किर्तनकार, हिंदूत्ववादी कार्यकर्ते सहभागी झाले होते. मुख्यमंत्री शिंदे, उपमुख्यमंत्री फडणवीस, उद्योगमंत्री उदय सामंत यांच्यासह स्थानिक नेत्यांनी या संमेलनाला हजेरी लावली होती. मुख्यमंत्री आणि उपमुख्यमंत्री संमेलनाला येणार असल्याने चोख बंदोबस्त ठेवण्यात आला होता. या संमेलनाला रवींद पडवळ याने उपस्थिती लावली. त्याने रामगिरी महाराजांची भेट घेतल्याचा व्हिडिओ सोशल मिडियावर टाकला असून त्या व्हिडिओमध्येही एक पोलिस कर्मचारी बंदोबस्तास असल्याचे दिसते. पडवळ याने काही राजकीय नेत्यांची भेट घेतली असल्याची चर्चा आहे. फरारी असलेल्या रवींद्र पडवळ याला कोणाचा वरदहस्त आहे, असा प्रश्न यानिमित्ताने उपस्थित केला जात आहे.

October 3, 2024 0 comments

मंदिरात अंबाबाईनेच मला बोलावलं…. ; तिचा विलक्षण अनुभव

by प्रतिनिधी October 2, 2024

written by प्रतिनिधी

महाराष्ट्र दिनमान ऑनलाईन डेस्क : एके वर्षी नवरात्रोत्सवादरम्यान अंबाबाई दर्शनासाठी गेलेली असताना विलक्षण अनुभव आला. हा प्रसंग आठवला की वाटतं…देवीनेच मला बोलावलं… ‘गाभाऱ्यातील गुरुजी प्रसादाचे पाणी उडवत होते. त्यांनी मला त्यावेळीच तिथे आणले. देवीचं दर्शन झालं. मला वाटलं की खुद्द देवीनेच मला आतमध्ये बोलावून घेतलं आणि प्रसाद दिला’. ‘ठरलं तर मग’ मालिकेतील सायली म्हणजेच अभिनेत्री जुई गडकरीने (Jui Gadkari) करवीर निवासिनी अंबाबाईच्या दर्शनावेळी आलेला एक अनुभव शेअर केलाय.

स्टार प्रवाहने प्रसिद्ध केलेल्या व्हिडिओमध्ये जुई म्हणते, दरवर्षी असं काहीतरी घडतं की तिला कोल्हापूरला अंबाबाईच्या दर्शनासाठी जाण्याचा योग येतो. या काळात मंदिरात भाविकांची प्रचंड गर्दी असते. एका वर्षी अशीच एक घटना घडली. ती मी कधीच विसरू शकत नाही. मला तेव्हा सगळे सांगत होते की नवरात्रीमध्ये तिकडे जाऊ नको. कारण खूप गर्दी असते. तरीही मी गेले. तिथे एक गुरुजी आले. मला म्हणाले की, दर्शन घ्यायचंय ना? मी हो म्हणाले.’

ती व्यक्ती तिला देवळात घेऊन गेली. जुईला त्यांनी गाभाऱ्याजवळ उभं केलं. जुई सांगते, ‘मी तिथे उभी राहिले तेव्हा प्रसादाचे पाणी शिंपडले जात होते. मला त्यांनी सांगितलं की तोंड उघडून उभी राहा. मी उभी राहिले, त्यानंतर मागे वळून पाहिले तेव्हा तिथे ते गुरुजी नव्हते.’ नेमके त्या क्षणाला मंदिरात घेऊन जाणारे ते गुरुजी कोण होते, हाच विचार जुईच्या मनात आला. (Jui Gadkari)

जुईने पुढे म्हटले आहे की, ‘गाभाएऱ्यातील गुरुजी प्रसादाचे पाणी उडवत होते, त्यांनी मला बरोबर त्यावेळीच तिथे आणले आणि दर्शन झालं. मला वाटलं की खुद्द देवीनेच मला आतमध्ये बोलावून घेतलं आणि तो प्रसाद दिला. त्यामुळे माझा तिच्यावर भयंकर विश्वास आहे.’

हेही वाचा :

October 2, 2024 0 comments

दक्षिण महाराष्ट्र विधानसभा निवडणूक

आमचे हिंदुत्व जनतेच्या डोळ्यातील अश्रू पुसणारे : मुख्यमंत्री एकनाथ शिंदे

by प्रतिनिधी October 1, 2024

written by प्रतिनिधी

मारुती फाळके

उजळाईवाडी : आमचे हिंदुत्व हे बेगडी नाही तर ते लोकांच्या डोळ्यातले अश्रू पुसणारे आहे. आमच्या सरकारच्या काळात साधू-संतांच्या केसालाही धक्का लागणार नाही. हिंदू धर्माच्या उत्थानासाठी जे जे करावे लागेल त्यासाठी सरकार सक्षम आहे, असे प्रतिपादन मुख्यमंत्री एकनाथ शिंदे (Chief Minister Shinde) यांनी केले. कणेरी (ता.करवीर ) येथील सिद्धगिरी मठावर संत समावेश कार्यक्रमात ते बोलत होते. यावेळी राज्यभरातून विविध संत-महंत उपस्थित होते.

शेतकऱ्याचा मुलगा मुख्यमंत्री झाला हे काही लोकांच्या पचनी पडत नाही. गरिबाच्या घरातील, सर्वसामान्य घरातला मुलगा नेतृत्व करतोय ही भावना काही लोकांना असह्य होत आहे, अशी टीका त्यांनी शिवसेना पक्षप्रमुख उद्धव ठाकरे यांचा नामोल्लेख न करता केली. मुख्यमंत्री शिंदे म्हणाले, राज्य आणि देशाच्या एकात्मतेसाठी धर्मसंमेलनासारखे जनजागृतीचे उपक्रम राबवणे आवश्यक आहे. येथील महासंमेलनामुळे समाजाचे अभिसरण होण्यास निश्चितपणे मदत होईल. राज्यात तीर्थक्षेत्र योजना, गडकोट किल्ल्यांचे संवर्धन, युनेस्कोमध्ये १४ किल्ल्यांची नोंद होण्यासाठी राज्य सरकारने सकारात्मक पावले उचलली आहेत.

पंचगंगा प्रदूषणमुक्तीसाठी ६०० कोटी

राज्यातील तीर्थक्षेत्र विकासाला भरघोस निधी दिला आहे. कोल्हापूरच्या पंचगंगा नदी प्रदूषण मुक्तीसाठी ६०० कोटी देण्याचा निर्णय घेतला आहे. आळंदी देवस्थानासाठी ३५० कोटी देऊन सरकारने तीर्थक्षेत्राच्या पुनरुत्थानासाठी नेहमीच सकारात्मक भूमिका घेतली आहे. सरकार जनतेचे आहे. जनतेसाठी काही अटी -शर्ती बदलाव्या लागल्या तरी कमी पडणार नाही, अशी ग्वाही मुख्यमंत्री शिंदे यांनी यावेळी दिली.

हेही वाचा :

October 1, 2024 0 comments

दक्षिण महाराष्ट्र विधानसभा निवडणूक

महायुती सरकार अन्यायी : रोहित पवार

by प्रतिनिधी October 1, 2024

written by प्रतिनिधी

कोल्हापूर : प्रतिनिधी : शिवरायांच्या पुतळा उभारण्यात तसेच लहान मुलांच्या गणवेशातही महायुती सरकारने भ्रष्टाचार केला आहे. सरकारकडून सर्वसामान्यांवर अन्याय सुरू आहे, अशी टीका राष्ट्रवादी काँग्रेस शरद पवार गटाचे आमदार रोहित पवार यांनी केली. (Rohit Pawar)

उपमुख्यमंत्री देवेंद्र फडणवीस, पालकमंत्री हसन मुश्रीफ यांनाही आ. पवार यांनी लक्ष्य केले. एखादा गुरु चांगल्या विचारासाठी, महाराष्ट्र धर्माच्या हितासाठी लढला असेल, तर अशा गुरूला विचार जपण्याची गुरुदक्षिणा द्यायला हवी. मात्र मंत्री मुश्रीफ यांनी ते विचार जपले नाहीत. त्यांनी आपला पुरोगामी विचार जपला नाही. ते केवळ आपल्या स्वार्थासाठी महायुतीच्या नेत्यांसोबत गेले आहेत.

देशी गायीला ‘राज्यमाता-गोमाता’ घोषीत करण्याबाबतचा निर्णय राज्य सरकारने घेतला. मात्र गाईचे खरे संगोपन शेतकरी करतात. दुष्काळग्रस्त भागात चारा छावणी काढायला हवी होती. मात्र दुष्काळात पाच महिने एकही छावणी राज्य सरकारने काढली नाही. राज्य सरकार अडचणीत असताना आता त्यांना गोमाता आठवते हे हास्यास्पद आहे, अशी टीकाही रोहित पवार यांनी केली.

हेही वाचा :

October 1, 2024 0 comments

दक्षिण महाराष्ट्र

कोल्हापूर : संशय खुनाचा पण…

by प्रतिनिधी October 1, 2024

written by प्रतिनिधी

कोल्हापूर : प्रतिनिधी : हातकणंगले तालुक्यात नवे पारगाव येथे एका व्यक्तीचा मृतदेह आढळून आला. त्याचा खून झाल्याचा संशय व्यक्त केला गेला. पोलिसांनी काही संशयितांना ताब्यात घेतले, चौकशीही सुरू केली. शवविच्छेदन केले असता तो खून नव्हे तर त्या व्यक्तीचा मृत्यू वीज पडून झाल्याचा अहवाल डॉक्टरांनी दिला.

स्थानिक गुन्हे अन्वेषण विभागाचे पोलिस निरीक्षक रवींद्र कळमकर यांनी याबाबतची माहिती दिली. नवे पारंगाव येथे नितीन मानसिंग भोसले (वय वर्षे ३०, रा. फडनायक कॉलनी, वारणानगर, रा. – मोहरे, तालुका- पन्हाळा) या तरुणाचा आज (दि.१) सकाळी नवे पारगाव येथे मोटरसायकलसह मृतदेह सापडला. प्रथमदर्शनी हा खून असावा, अशी शंका आल्याने वडगाव पोलीस आणि स्थानिक गुन्हे शाखा कोल्हापूर यांनी समांतर तपास सुरू केला. तपासादरम्यान काही व्यक्तींनाही ताब्यात घेतले. दरम्यान नितीन भोसलेचा मृतदेह विच्छेदनासाठी नवे पारगाव ग्रामीण रुग्णालयात नेण्यात आला. शवविच्छेदन केले असता नितीनलेच्या अंगावर वीज पडून मृत्यू झाला आहे. तसेच मृताच्या अंगावर भाजल्याच्या तसेच फुफ्फुसही जळाल्याचे स्पष्ट झाले आहे.

हेही वाचा :

October 1, 2024 0 comments

दक्षिण महाराष्ट्र

कोल्हापूरच्या दसरा महोत्सवात यंदा शिव- शाहूंच्या हस्ताक्षरातील दुर्मिळ पत्रसंग्रह

by प्रतिनिधी October 1, 2024

written by प्रतिनिधी

कोल्हापूर : प्रतिनिधी : कोल्हापूरच्या शाही दसरा महोत्सवात यंदा सांस्कृतिक कार्यक्रम, प्रदर्शन, स्पर्धा असे भरगच्च कार्यक्रम होणार आहेत. घटस्थापना ते विजयादशमीदरम्यान म्हणजेच ३ ते १२ ऑक्टोबरदरम्यान हा महोत्सव होणार आहे. महोत्सवाची सुरुवात छत्रपती शिवाजी महाराज आणि राजर्षी शाहू महाराजांच्या हस्ताक्षरातील दुर्मिळ पत्रसंग्रहाच्या उद्घाटनाने होणार आहे. जिल्हाधिकारी अमोल येडगे यांनी ही माहिती पत्रकार परिषदेत दिली. (Kolhapur Shahi Dasra)

गुरुवारी, तीन ऑक्टोबर रोजी सायंकाळी पाच वाजता मेन राजाराम हायस्कूल येथे ग्रंथ प्रदर्शनाचे उद्घाटन होणार आहे. ग्रंथ प्रदर्शनाबरोबरच विक्रीही होणार आहे. शुक्रवारी (४ ऑक्टोबर) जिल्ह्यातील सर्व सरकारी आणि निमसरकारी कार्यालये, शाळा-महाविद्यालयात पारंपरिक वेशभूषा दिवस साजरा केला जाणार आहे. (Kolhapur Shahi Dasra)

शनिवारी (५ ऑक्टोबर) रोजी शालेय विद्यार्थ्यांसाठी चित्रकला स्पर्धा आयोजित केली आहे. रविवारी (६ ऑक्टोबर) रोजी सायंकाळी पाच वाजता भवानी मंडपात ‘महाराष्ट्राची शक्तिपीठे’ हा सांस्कृतिक कार्यक्रम होणार आहे. सोमवारी (७ ऑक्टोबर) रोजी सकाळी आठ वाजता महिलांची बाईक रॅली होणार आहे. दसरा चौक, बिंदू चौक, शिवाजी पुतळा, भवानी मंडप, टेंबलाई मंदिर, कावळा नाका परत दसरा चौक असा रॅलीचा मार्ग आहे. सायंकाळी पाच वाजता ‘गौरव माय मराठीचा’ हा सांस्कृतिक कार्यक्रम भवानी मंडपात होणार आहे.

मंगळवारी (८ ऑक्टोबर) साडेपाच वाजता युद्धकला प्रात्यक्षिक सादर करण्यात येणार आहे. भवानी मंडपात जिल्ह्यातील नामवंत दहा पथके प्रात्यक्षिके सादर करणार आहेत. बुधवारी (९ ऑक्टोबर), सायंकाळी साडेपाच वाजता बँड वादन स्पर्धा होणार आहे. पोलिस, मिलिटरी आणि जिल्ह्यातील नामवंत शाळांची बँड पथके यात सहभागी होणार आहेत. गुरुवारी निबंध स्पर्धा तर शुक्रवारी (११ ऑक्टोबर) नगर प्रदर्शन मार्गावर रांगोळी स्पर्धा होणार आहे.

१२ ऑक्टोबरला शाही स्वारी

शनिवारी, १२ ऑक्टोबर रोजी विजयादशमीचा मुख्य दिवस असून भवानी मंडप ते दसरा चौक या मार्गावर शाही स्वारी काढण्यात येणार आहे. या स्वारीत ढोल पथक, लेझीम पथक, मर्दानी खेळाची प्रात्यक्षिके होतील. तसेच राष्ट्रीय, आंतरराष्ट्रीय खेळाडू सहभागी होणार आहेत. छत्रपती घराण्यातील सदस्यांच्या रॅलीत १५० बुलेटस्वार सहभागी होणार आहेत.

हेही वाचा :

October 1, 2024 0 comments

दक्षिण महाराष्ट्र

कोल्हापुरी फेटा, धोतर…शिक्षण आणि महोत्सव !

by प्रतिनिधी October 1, 2024

written by प्रतिनिधी

कोल्हापूर; प्रतिनिधी : भारतीय पारंपरिक वेशभूषेची ओळख नव्या पिढीला व्हावी यासाठी हा एक दिवसाचा उपक्रम आयोजित केला आहे. निमित्त आहे शाही दसरा महोत्सवाचे. (Kolhapur Shahi Dasra)

जिल्हा प्रशासनाच्यावतीने कोल्हापूरचा शाही दसरा महोत्सव यावर्षीही उत्साहात साजरा होणार आहे. घटस्थापनेपासून विजयादशमीपर्यंत म्हणजेच ३ ते १२ ऑक्टोबरदरम्यान भरगच्च कार्यक्रम होणार आहेत. त्यात शिव व शाहूकालीन दुर्मिळ पत्रसंग्रह प्रदर्शन, शालेय विद्यार्थ्यांसाठी चित्रकला स्पर्धा, महिलांची बाईक रॅली, सांस्कृतिक कार्यक्रम, बँड वादन, निबंध आणि रांगोळी स्पर्धेचे आयोजन करण्यात आले आहे.

जिल्हाधिकारी अमोल येडगे यांनी दसरा महोत्सवाची माहिती दिली. शुक्रवारी, दि. ४ रोजी पारंपरिक वेशभूषा कार्यक्रमाचे आयोजन केले आहे. या दिवशी सर्व शासकीय, निमशासकीय कार्यालयातील कर्मचाऱ्यांसह नागरिकांनी पारंपरिक वेशभूषेत सहभागी व्हावे, असे आवाहन जिल्हाधिकारी येडगे यांनी केले. (Kolhapur Shahi Dasra)

प्रात्यक्षिकांचा व्हिडिओही देणार

भारतीय आणि महाराष्ट्रीयन वेशभूषेत कोल्हापुरी फेटा, अंगरखा, धोतर अशा वेशभूषेला महत्त्व आहे. पण कोल्हापुरी फेटा बांधणे आणि धोतर नेसणे ही कला फार कमी लोकांना येते. फेटा बांधायला आणि धोतर नेसायला यावे यासाठी पारंपरिक वेशभूषा दिवशी सरकारी कार्यालये आणि शाळांमध्ये प्रशिक्षण देण्यात येणार आहे. त्यासाठी फेटा बांधणाऱ्या आणि धोतर नेसण्याची कला असणाऱ्या लोकांना आमंत्रित केले आहे. तसेच धोतर बांधणे आणि कोल्हापूर फेटा बांधण्याच्या प्रात्यक्षिकांचे व्हिडिओही बनवले आहेत. ते शाळा आणि सरकारी कार्यालयात देण्यात येणार आहे, असे जिल्हाधिकारी येडगे यांनी सांगितले. नागरिकांनी या उपक्रमात सहभागी व्हावे असे आवाहनही त्यांनी केले.

हेही वाचा :

October 1, 2024 0 comments

Sangeetsurya Keshavrao Bhosale Natyagruha

दक्षिण महाराष्ट्र साहित्य-संस्कृती

केशवराव भोसले नाट्यगृहासाठी २५ कोटी निधी मंजूर

by प्रतिनिधी October 1, 2024

written by प्रतिनिधी

कोल्हापूर; प्रतिनिधी : संगीतसूर्य केशवराव भोसले नाट्यगृह आणि राजर्षी शाहू खासबाग मैदान नूतनीकरणासाठी २५ कोटी १० लाख रुपयांचा निधी राज्य सरकारने मंजूर केला. दरम्यान, नाट्यगृहाची उभारणी हेरिटेज नियमानुसारच होणार असल्याचे महापालिकेने नियुक्त केलेल्या स्ट्रक्टवेल कंपनीने स्पष्ट केले आहे. राज्य सरकार आणि महापालिकेने तांत्रिक बाबी पूर्ण केल्यास सव्वा ते दीड वर्षात बांधकाम पूर्ण होऊ शकेल, असा विश्वासही स्ट्रक्टवेल कंपनीचे चेअरमन चेतन रायकर यांनी व्यक्त केला. (Sangeetsurya Keshavrao Bhosale Natyagruha)

नाट्यगृहाच्या स्ट्रक्चरल ऑडिटचे काम स्ट्रक्टवेल डिझायनर्स आणि कन्सल्टंट या सल्लागार कंपनीला दिले होते. दरम्यान, नाट्यगृहाच्या जतन व दुरुस्ती प्रस्तावाचे सादरीकरण जिल्हाधिकारी कार्यालयातील ताराराणी सभागृहात करण्यात आले. यावेळी खासदार श्रीमंत शाहू महाराज, जिल्हाधिकारी अमोल येडगे, आमदार जयश्री जाधव, महापालिका आयुक्त मंजूलक्ष्मी, यांच्यासह नाट्यकर्मी, आर्किटेक्ट, बांधकाम व्यवसायिक, इतिहास संशोधक, सामाजिक आणि पर्यावरण चळवळीतील कार्यकर्ते उपस्थित होते.

राजर्षी शाहू महाराजांनी बांधलेल्या या नाट्यगृहाचा समावेश ग्रेड वन हेरिटेज गटात असल्याने नाट्यगृहाची उभारणी पूर्वीप्रमाणेच होणार आहे, असे या कंपनीचे चेअरमन चेतन रायकर यांनी स्पष्ट केले. या कंपनीने सीएसटी रेल्वे स्टेशन, मुंबई महापालिका इमारत, गेटवे ऑफ इंडिया, राज्यपालांचे निवासस्थान, पुण्यातील नाना वाडा, पुणे विद्यापीठ, मोरवी राजवाडा, इंदोर राजवाडा, हाजी अली दर्गा, ताज हॉटेल, दिल्ली विज्ञान भवन या इमारतीचे या वास्तूंची फेरउभारणी केली आहे. (Sangeetsurya Keshavrao Bhosale Natyagruha)

रायकर म्हणाले, नाट्यगृह आणि मैदान या कला आणि क्रीडा संबधित एकत्रित वास्तू जगामध्ये कुठेही पाहायला मिळत नाही. या वास्तूची पुनर्बांधणी करता येत नाही. पण आहे त्या स्थितीतील वास्तू वापरून नाट्यगृहाची उभारणी करता येईल. लागलेल्या आगीमुळे अन्य नुकसान झाले असले तरी वास्तूच्या सहा ते आठ मीटर उंचीच्या भिंती मजबूत आहेत. स्टेजही दणकट आहे. नाट्यगृहाचा किमान ५० टक्के भाग अजूनही चांगला आहे आहे. पूर्वी बांधकामात ज्या ठिकाणी लाकूड, स्टील, कौले वापरली आहे त्याच ठिकाणी त्याच वस्तूंचा वापर करण्यात येईल. नाट्यगृहाची आसनक्षमताही ८०० पर्यंत वाढवता येणे शक्य असल्याचे रायकर यांनी सांगितले.

खासबाग मैदानातून पावसाचे पाणी बाहेर पडणाऱ्या जागा बुजवण्यात आल्या आहेत. त्यामुळे भिंतींना धोका उत्पन्न झाला आहे ते काम ही पूर्ण करण्यात येईल. नाट्यगृहाभोवती असलेल्या जागेवर अंडरग्राउंड तीन मजली पार्किंग व्यवस्था करण्यात येईल . त्या ठिकाणी किमान २६० दुचाकी आणि ६५ चार चाकी वाहने पार्क करता येतील, अशी व्यवस्था करता येणे शक्य आहे. रायकर यांनी केलेल्या प्रेझेंटेशनवर अर्किटेक्ट, बांधकाम व्यावसायिक, उद्योजक, रंगकर्मी, सामाजिक कार्यकर्त्यांनी समाधान व्यक्त केले. (Sangeetsurya Keshavrao Bhosale Natyagruha)

यावेळी माजी महापौर महादेवराव आडगुळे, अर्किटेक्ट अमरजा निंबाळकर, आनंद माने, वसंतराव मुळीक, संदीप घाटगे, सदानंद सबनीस, सुनील घोरपडे, रवी माने, दिलीप देसाई, प्रसाद जमदग्नी, मिलिंद अष्टेकर, आनंद काळे, इंद्रजीत सावंत, प्रशांत हडकर, गिरीश फोंडे, धनंजय पाटील, किरणसिंह चव्हाण यांनी चर्चेत भाग घेतला. दरम्यान, सरकारने निधी जाहीर केल्याबद्दल राज्य नियोजन मंडळाचे कार्यकारी अध्यक्ष राजेश क्षीरसागर यांनी सरकारचे आभार मानले.

हेही वाचा :

October 1, 2024 0 comments

महाराष्ट्र

श्री अंबाबाई नवरात्रासाठी १ लाख ८० हजार लाडू प्रसाद

by प्रतिनिधी September 30, 2024

written by प्रतिनिधी

कोल्हापूर : प्रतिनिधी

श्री अंबाबाई मंदिरातील नवरात्र उत्सव काळातील बुंदी लाडू प्रसादाचे कंत्राट यंदाही कळंबा कारागृहातील बेकरी विभागाला देण्यात आले आहे. या विभागाकडून १ लाख ८० हजार लाडू बनवून घेतले जाणार आहेत. अन्न आणि औषध प्रशासनाकडून चाचणी झाल्यानंतर हे लाडू मंदिरात आणले जातील, असे पश्चिम महाराष्ट्र देवस्थान व्यवस्थापन समितीकडून सांगण्यात आले.

दरम्यान, श्री अंबाबाई देवीच्या नित्यपूजेतील सोन्याच्या जडावी अलंकारांची स्वच्छता रविवारी पूर्ण झाली. कडेकोट सुरक्षा व्यवस्थेत मंदिर आवारातील मंडपात देवीचे सर्व दागिने लख्ख करण्यात आले. स्वच्छता आणि इतर कामांसाठी मंदिर व्यवस्थापनांसह भाविकही सेवा देऊ लागले आहेत. सुमधूर भक्तिगीतांमुळे मंदिर परिसरात नवरात्रोत्सव काळातील प्रसन्नतेची छटा उमटू लागली आहे. विक्रेत्यांकडून विविध साहित्यांचे स्टॉल सजू लागले आहेत.

दर्शन रांग शेतकरी संघाच्या कार्यालयातूनच सुरू होणार आहे. तेथून भाविक बाहेरील दर्शन मंडपात दाखल होतील, असे नियोजन आहे. मंडपावर पत्रे घातले असून पिण्याच्या पाण्याचीही सोयही केली आहे. भाविकांच्या आरोग्याची काळजी घेणारी व्यवस्थाही देवस्थान समितीकडून सक्रीय ठेवण्यात येणार आहे. घाटी दरवाजा, नवगृहाजवळ असलेले आरोग्य तपासणी केंद्र सुसज्ज ठेवले जाणार आहे.

जुन्या गरूड मंडपाच्या जागी मंडपाची प्रतिकृती उभारण्यात आली आहे. पालखी सोहळा व देवीचे धार्मिक विधी येथे होणार आहेत. आकर्षक विद्युत रोषणाई केली जात आहेत.

११६ सीसीटीव्ही कॅमेऱ्यांचा वॉच

अंबाबाई मंदिर व परिसरावर ९६ सीसीटीव्ही कॅमेऱ्यांचा वॉच आहे. त्यांचा आढावा घेऊन आठ दिवसांपूर्वी जिल्हाधिकारी तथा देवस्थान समिती प्रशासक अमोल येडगे यांनी मंदिर व भाविकांच्या सुरक्षेच्या कारणास्तव विशेष सूचना दिल्या आहेत. त्यानुसार आणखी वीस कॅमेरे बसवले आहेत. ड्रोन कॅमेऱ्यानेही मंदिर परिसरावर वॉच ठेवण्यात येणार आहे.

September 30, 2024 0 comments

Newer Posts

Older Posts