जमीर काझी : मुंबई : मुख्य निवडणूक आयुक्त ज्ञानेशकुमार यांनी सर्व नियमांना बगल देत लोकशाही व संविधानाची हत्या केली आहे. एसआयआरच्या नावाखाली मतदार याद्यांमधून कोट्यवधी नागरिकांची नावे वगळली असून फॉर्म ६, ७ व ८ मध्ये बेकायदेशीर बदल केला आहे . बिहार, पश्चिम बंगाल, हरियाणा व महाराष्ट्रातही वोटचोरीची पोलखोल झालेली असून लोकशाहीची हत्या करणाऱ्या भ्रष्ट ज्ञानेशकुमारांना पदावरून हटवण्यासाठी काँग्रेस व इंडिया आघाडीचा लढा सुरु आहे, असे काँग्रेसचे वरिष्ठ नेते डॉ. सी. पी. जोशी यांनी सांगितले. (Illegal alterations to Form 6 by Dnyanesh Kumar)
‘वोट बचाओ देश बचाओ’ अभियानाअंतर्गत डॉ. सी. पी. जोशी यांनी मुंबई काँग्रेसचे कार्यालय राजीव गांधी भवन येथे पत्रकार परिषदेला संबोधित केले. यावेळी मुंबई काँग्रेस अध्यक्ष खासदार वर्षा गायकवाड, प्रवक्ते आणि माध्यम समन्वयक सुरेशचंद्र राजहंस, जिल्हाध्यक्ष रवी बावकर, कचरू यादव, अर्शद आझमी, भावना जैन, राजपती यादव, केतन शाह, शितल म्हात्रे आणि इतर पदाधिकारी उपस्थित होते.
ज्ञानेशकुमारांकडून भाजपला मदत
डॉ. जोशी म्हणाले की, भारतीय निवडणूक आयोगाशी संबंधित अलीकडील घडामोडी, ज्यामध्ये मतदार यादीचे ‘विशेष सखोल पुनरीक्षण’ (SIR), ‘फॉर्म ६’ मध्ये केलेले बदल आणि दोन निवडणूक आयुक्तांनी नोंदवलेले आक्षेप यांचा समावेश आहे, यांनी निवडणूक आयोगातील पारदर्शकता, कायदेशीर नियमांचे पालन आणि सामूहिक निर्णय प्रक्रियेबाबत महत्त्वाचे प्रश्न उपस्थित केले आहेत. मुख्य निवडणूक आयुक्त आणि निवडणूक आयुक्तांची नियुक्ती पंतप्रधान, विरोधी पक्षनेते आणि भारताचे सरन्यायाधीश यांचा समावेश असलेल्या समितीच्या शिफारशीनुसार केली जाईल असा कायदा आहे पण केंद्र सरकारने नवीन कायदा करून निवड समितीमध्ये सरन्यायाधीशांच्या जागी पंतप्रधानांनी नामनिर्देशित केलेले केंद्रीय मंत्रिमंडळातील एक मंत्री यांचा समावेश केला आणि १९ फेब्रुवारी २०२५ रोजी ज्ञानेश कुमार यांना मुख्य निवडणूक आयुक्त बनवले. ज्ञानेशकुमार भाजपाला मदत होईल असे काम करत आहेत, असा आरोप जोशी यांनी केला. (Illegal alterations to Form 6 by Dnyanesh Kumar)
लोकसभा, विधानसभेच्या जागा वाढविण्यासाठी आटापिटा
बिहारमध्ये एसआयआर राबवून मतदार यादीतून सुमारे ४७ लाख नावे वगळली, पश्चिम बंगालमध्ये ९० लाखापेक्षा जास्त नावे वगळली, असाच प्रकार महाराष्ट्रातही करण्यात आला. आता भाजपा सरकार डिलिमिटेशन विधेयक आणून उत्तर प्रदेश, बिहार, पश्चिम बंगाल व महाराष्ट्रातील लोकसभेच्या २०० जागांमध्ये ५० टक्के वाढ करून त्या ३०० करणार आहेत, त्यासाठी त्यांचा आटापिटा सुरु आहे.
महाराष्ट्रात ४० लाख मते वाढवली.
यावेळी खा. वर्षा गायकवाड म्हणाल्या की, महाराष्ट्रातील प्रत्येक मतदार संघात विशिष्ट मतदार संख्या वाढवण्यात आली. विधानसभेच्या निवडणूकीत भाजपा महायुतीने चोरी करून सत्ता मिळवली आहे. लोकसभा व विधानसभा निवडणुकीच्या पाच सहा महिन्यात ४० लाख मते कशी वाढली. प्रत्येक बुथवर ४००-४०० मते वाढवली आहेत. आता मुंबईतही एसआयआरमधून लाखो मतदार वगळले आहेत. भाजपाने आयोगाच्या मदतीने लोकशाहीची हत्या केली आहे. लोकशाही व संविधानाच्या रक्षणासाठी काँग्रेसने देशव्यापी लढा सुरु केला असून याचाच पुढचा भाग म्हणून १ नोव्हेंबर रोजी दिल्लीतील रामलिला मैदानावर इंडिया आघाडीची मोठी रॅली आयोजित करण्यात आली आहे, असेही त्यांनी सांगितले. (Illegal alterations to Form 6 by Dnyanesh Kumar)
