जेचिऑन : भारताची जिम्नॅस्ट प्रणती नायकने आशियाई आर्टिस्टिक जिम्नॅस्टिक अजिंक्यपद स्पर्धेमध्ये व्हॉल्ट प्रकारात ब्राँझपदक पटकावले. आशियाई जिम्नॅस्टिक्स स्पर्धांमधील तिचे हे तिसरे पदक आहे. (Pranati Nayak)
दक्षिण कोरियामधील जेचिऑनमध्ये ही स्पर्धा सुरू आहे. ३० वर्षीय प्रणतीने या स्पर्धेत १३.४६६ गुण मिळवत ब्राँझपदकावर नाव कोरले. चीनच्या झँग यिहानने (१३.६५०) सुवर्णपदक जिंकले, तर व्हिएतनामची एनग्युएन थि न्हू (१३,५६६) ही रौप्यपदकाची मानकरी ठरली. टोकियो ऑलिंपिकमध्ये भारताचे प्रतिनिधित्व करणाऱ्या प्रणती या स्पर्धेच्या प्राथमिक फेरीत १३.०८३ गुण मिळवून चौथ्या स्थानावर राहिली होती. अंतिम फेरीमध्ये पहिल्या प्रयत्नात १३.४६६ गुण मिळवल्यानंतर तिच्याकडे दुसऱ्या प्रयत्नात कामगिरी उंचावण्याची संधी होती. मात्र, दुसऱ्या प्रयत्नात तिला १२.८६६ गुणांपर्यंतच पोहोचता आले. प्रणतीने यापूर्वी, २०१९ मध्ये उलनबतार आणि २०२२ मध्ये दोहा येथे झालेल्या आशियाई जिम्नॅस्टिक्स स्पर्धांमध्येही ब्राँझपदक मिळवले होते. (Pranati Nayak)
या स्पर्धेमध्ये भारताची प्रोतिशा समंथा अंतिम फेरीमध्ये १३.०१६ गुणांसह चौथ्या स्थानावर राहिल्यामुळे तिचे पदक थोडक्यात हुकले. माजी राष्ट्रीय विजेती असणारी समंथा प्राथमिक फेरीत १२.९१६ गुणांसह आठव्या स्थानावर होती. प्रणती आता आशियाई स्पर्धांमध्ये भारतातर्फे सर्वाधिक पदके जिंकणारी महिला जिम्नॅस्ट ठरली आहे. तिने दोन पदके मिळवणाऱ्या भारताच्या दीपा कर्माकरला मागे टाकले. दीपाने २०१५ च्या हिरोशिमा आणि २०२४ च्या ताश्कंद आशियाई जिम्नॅस्टिक्स स्पर्धांमध्ये अनुक्रमे ब्राँझ आणि सुवर्णपदक जिंकले होते. (Pranati Nayak)
हेही वाचा :
दक्षिण आफ्रिका कसोटी ‘चॅम्पियन’
आर्या-अर्जुन यांना मिश्रमध्ये सुवर्ण
