महत्त्वाच्या बातम्या

रायगड : रायगडावरील वाघ्या कुत्र्याच्या स्मारकाबाबबत भाजपचे खासदार उदयनराजे यांनी शुक्रवारी (११ एप्रिल) आपली भूमिका स्पष्टपणे बोलून दाखवली. त्याचबरोबरच छत्रपती शिवाजी महाराज यांच्या अरबी समुद्रातील नियोजित स्मारकाबाबतही मत व्यक्त केले. त्यांच्या या भूमिकेमुळे हा वाद पुन्हा उफाळून येण्याची शक्यता आहे.(Udayanraje on Waghya)

उदयनराजे यांना रायगडावरील वाघ्या कुत्र्याच्या स्मारकाविषयी प्रश्न विचारण्यात आला. त्यावेळी उदयनराजे संतापून म्हणाले, ‘‘रायगड म्हटले की आपल्यासमोर कुणाची प्रतिमा यायला पाहिजे? छत्रपती शिवाजी महाराज की वाघ्या कुत्र्याची? या कुत्र्याच्या पुतळ्याकडे नीट बघा. एवढ्या लांब कानाचा कुत्रा भारतात कुठे आढळतो का? ही ब्रिटिशांची कुत्री आहेत. त्या पुतळ्याला द्या दणका आणि टाकून द्या. त्याचा एवढा विचार कशासाठी?” (Udayanraje on Waghya)

माजी खासदार संभाजीराजे भोसले यांनी काही दिवसांपूर्वी कुत्र्याचे स्मारक रायगडावरून हटविण्यात यावे, अशी मागणी केली आहे. त्यांनी राज्य सरकारला पत्र लिहिले होते. त्यानंतर शिवरायांकडे वाघ्या नावाचा कुत्रा होता का? याबाबत ऐतिहासिक दाखले आहेत का? अशी चर्चा सुरू झाली. आता या वादात साताऱ्याचे खासदार आणि छत्रपतींच्या घराण्याचे वंशज उदयनराजे भोसले यांनीही उडी घेतली. त्यामुळे वाघ्या कुत्र्याच्या स्मारकाची चर्चा पुन्हा सुरू झाली.

राजभवनच्या जागेत शिवछत्रपतींचे स्मारक उभारा

अरबी समुद्रात उभारण्यात येणाऱ्या छत्रपती शिवाजी महाराजांच्या स्मारकाचा मुद्दाही यावेळी उपस्थित करण्यात आला. पर्यावरणाच्या कारणास्तव येथे स्मारक उभारण्याबाबत काही अडथळे निर्माण होत आहेत. त्यामुळे अरबी समुद्राऐवजी राजभवनाच्या जागेत हे स्मारक व्हावे, अशी मागणीही उदयनराजे भोसले यांनी केली. (Udayanraje on Waghya)

राजभवनाकडे ४८ एकर जागा आहे. त्या जागेत छत्रपती शिवाजी महाराजांचे स्मारक उभारण्यात यावे. ही जागाही अरबी समुद्राला लागूनच आहे. राज्यपालांना राहण्यासाठी एवढी मोठी जागा कशाला हवी, असा सवाल करून या मागणीसाठी केंद्रीय गृहमंत्री अमित शाह आणि मुख्यमंत्री देवेंद्र फडणवीस यांच्याशी चर्चा केली असल्याचे खासदार उदयनराजे भोसले यावेळी म्हणाले.

रायगडावरील कार्यक्रमाचा घेतला आढावा
छत्रपती शिवाजी महाराजांच्या ३४५ व्या पुण्यतिथी निमित्त रायगड किल्ल्यावर विविध कार्यक्रमाचे आयोजन करण्यात आले आहे. या कार्यक्रमासाठी केंद्रीय गृहमंत्री अमित शाह, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांच्यासर मंत्रिमंडळातील अनेक मंत्री उपस्थित राहणार आहेत. कार्यक्रमाचा आढावा खासदार उदयनराजे भोसले रायगड येथे  आल्यानंतर घेतला.

हेही वाचा :
कुरूंदकरला २१ एप्रिलला शिक्षा सुनावणार
तीन विवाह करणारा पीएसआय निलंबित