महाराष्ट्र

मुंबई : प्रतिनिधी : नाशिक जिल्ह्यात २००८ मध्ये झालेल्या भीषण मालेगाव बॉम्बस्फोट खटल्यात  विशेष एनआयए न्यायालयाने माजी खासदार साध्वी प्रज्ञा सिंह ठाकूर यांच्यासह सहा जणांची निर्दोष मुक्तता केली. सगळ्या आरोपींना संशयाचा फायदा बेनिफिट ऑफ डाऊट आहे. मालेगावातील भिक्खू चौकात झालेल्या स्फोटात सहा नागरिकांचा मृत्यू झाला तर शंभरहून अधिक नागरिक गंभीर जखमी झाले. रमजान महिन्यात हा स्फोट झाला होता.  (Malegaon bomb blast case)

गुरुवारी सकाळी ११ वाजता मुंबईच्या एनआयए या विशेष न्यायालयात मालेगाव बॉम्बस्फोटाच्या सुनावणीला सुरुवात झाली. यावेळी बॉम्ब ब्लास्ट झाल्याचे सरकारी पक्षाकडून सिद्ध करण्यात आले. पण ब्लास्ट स्कूटरमध्ये झाला हे सिद्ध करण्यात सरकारी वकीलांना अपयश आल्याचे न्यायालयाकडून सांगण्यात आले. ही घटना नक्कीच दुर्दैवी होती, असे कोर्टाने म्हटले. पण तपासात अनेक त्रुटी होत्या. या सगळ्या त्रुटीचे वाचन देखील न्यायालयात करण्यात आले. पंचनामा योग्य नव्हता. जागेवरून हातांचे ठसे जप्त करण्यात आले नाही, असे निरिक्षणही न्यायालयाने नोंदवले. त्यामुळे पुराव्यांच्याअभावी मालेगाव बॉम्बस्फोटातील सर्व आरोपींची निर्दोष सुटका करण्यात येत असल्याचेही यावेळी न्यायालयाकडून स्पष्टपणे सांगण्यात आले. (Malegaon bomb blast case)

महत्त्वाची बाब म्हणजे, ज्या दुचाकीमध्ये ब्लास्ट झाला होता. ती दुचाकी साध्वी प्रज्ञा सिंह ठाकूर यांच्या नावावर असल्याचा आरोप करण्यात आला होता. पण त्या दुचाकीचा चेसीस नंबर हा साध्वीच्या नावावर असल्याचे वकीलांना सिद्ध करण्यात आले नाही, असेही यावेळी न्यायालयाकडून स्पष्ट करण्यात आले नाही. बैठकांसंदर्भातही तपास यंत्रणेचे दाव्यांवर न्यायालयाचे समाधान झाले नाही. आधी लावलेला मकोका नंतर मागे घेतल्याने याअंतर्गत सगळे जबाब निरर्थक असल्याचे न्यायालयाने स्पष्टपणे सांगितले. युएपीए साठी घेण्यात आलेली मान्यता चुकीची आहे. त्यामुळे युएपीए लागू होत नाही. लष्करी अधिकारी असलेल्या कर्नल प्रसाद पुरोहित यांच्या विरोधात आरोपपत्र दाखल करण्यापूर्वी घेण्यात आलेल्या मान्यतेवरदेखील न्यायालयाकडून सवाल उपस्थित करण्यात आले. (Malegaon bomb blast case)

आरडीएक्स कर्नल प्रसाद पुरोहितांनी आणलं याचा पुरावा नाही, असंही न्यायालयाकडून स्पष्ट करण्यात आले. केवळ संशयाच्या आधारावर आरोपीना दोषी ठरवू शकत नाही. त्यामुळे सगळ्या आरोपींची निर्दोष सुटका करण्यात येत आहे, असं न्यायालयाकडून सांगण्यात आले. कोर्टाने सांगितले की, ३२५  लोकांचे जबाब नोंदवण्यात आले. पण त्यापैकी कोणीही कर्नल पुरोहित यांनी ऑन ड्युटी असताना आरडीक्स मिळवले, ते नेमके कोणत्या पद्धतीने पुरवण्यात आले, हे सरकारी वकीलांना सिद्ध करता आले नाही. त्याशिवाय, हे बॉम्ब नेमके कुठे बनविण्यात आले, हे सुद्धा न्यायालयामध्ये सिद्ध करता आले नाही. त्यामुळे हे सात जण आरोपी आहेत, असे कोर्टाला सिद्ध करता आले नाही आणि त्याचमुळे कोर्टाने आरोपींची निर्दोष सुटका केल्याचे आरोपीच्या वकिलांकडून सांगण्यात आले आहे. (Malegaon bomb blast case)

कोल्हापूर : प्रतिनिधी :  शिरोळ तालुक्यातील नांदणी जैन मठातील माधुरी हत्ती वनविभागाने घेऊन जावे, या आशयाचे २०१८ मधील स्वाभिमानी शेतकरी संघटनेचे अध्यक्ष माजी खासदार राजू शेट्टी यांचे पत्र सोशल मिडीयात व्हायरल झाल्यानंतर त्यांनी खुलासा केला आहे. (Madhuri Hatti)

कोर्टाच्या माधुरी हत्तीणीला वनतारामध्ये पाठवण्याचा निर्णय कायम ठेवल्यानंतर राजू शेट्टी सडकून टीका केली होती. त्यांनी मुकेश अंबानींवर हल्लाबोल केला होता. त्यानंतर त्यांच्या विरोधकांनी त्यांचे सात वर्षांपूर्वीचे पत्र सोशल मीडियात व्हायरल केल्यानंतर खळबळ उडाली.  पत्र व्हायरल झाल्यावर राजू शेट्टी यांनी खुलासा केला आहे. हत्तीची देखभाल करण्यासाठी माहुत नसल्याने मठाच्या विश्वस्तांनी शेट्टी यांची भेट घेतली. हत्तीची देखभाल करण्यासाठी गडचिरोलीतील वनविभागाकडे माधुरी हत्ती रवानगी करण्यात यावी, अशी विनंती विश्वस्तांनी केली होती, असे शेट्टी यांनी सांगितले. मात्र, इस्माईल या माहुतास अथक प्रयत्नातून नांदणी मठाच्या विश्वस्तांनी शोधून आणले आणि त्याने  आतापर्यंत हत्तीची काळजी घेतली असल्याचे शेट्टी म्हणाले. (Madhuri Hatti)

राजू शेट्टी यांनी म्हणाले, २०१८ मध्ये नांदणी मठातील हत्तीची देखभाल करणारा नागाप्पा हा माहुत हदयविकाराच्या तीव्र झटक्याने आजारी पडल्यानंतर डॅाक्टरांनी त्याला नोकरी सोडण्यास सांगितले. त्यामुळे माधुरीची सेवा करण्यासाठी प्रशिक्षित माहुत नसल्याने नांदणी मठाचे विश्वस्त माझ्याकडे येवून माहुत मिळेपर्यंत काही दिवसासाठी सदरचा हत्ती वनविभागाच्या गडचिरोली हत्तीकेंद्रात सोडण्याबाबत विनंती केली. त्यानुसार मी २०१८ मध्ये वनविभागास पत्रव्यवहार केला. मात्र, वनविभागाने या गोष्टीस असमर्थता दर्शवली. त्यानंतर थोड्या दिवसांनी इस्माईल या माहुतास अथक प्रयत्नातून नांदणी मठाच्या विश्वस्तांनी शोधून आणले. त्यादिवसापासून ते आजअखेर माधुरीची चांगल्या पध्दतीने देखभाल व काळजी घेतली गेली आहे. काही मंडळी खोडसाळपणाने राजकीय आकसापोटी माझे २०१८ साली वनविभागास देण्यात आलेले पत्र आता सोशलमिडीयावर व्हायरल केले जात असल्याचे त्यांनी सांगितले.

दरम्यान, माधुरीची रवानगी वनताराकडे झाल्यानंतर राजू शेट्टी यांनी तोफ डागली आहे. शेट्टी यांनी ट्विट करून म्हटलं आहे की, ज्यावेळी धीरूभाई अंबानी पेट्रोल पंपावरती पेट्रोल-डिझेल सोडण्याचे काम करत होते तेव्हापासून नांदणी मठाकडून हत्तीचे संगोपन करण्यात आले आहे. आज अंबानींकडे पैसा व संपत्ती आहे म्हणून स्वत:च्या मुलाच्या स्वप्नासाठी वनतारा हे प्राणीकेंद्र उभारले. याठिकाणी पाळीव प्राणी इतर प्राण्यांना शिकाऊ करण्यास मदत होते, म्हणून न्यायालयात जाऊन वर्षानुवर्षे सुरू असलेली जैन समाजाची परंपरा व प्रतिष्ठा खंड पाडण्याचा डाव या मंडळीनी रचला.  संस्कृती, इतिहास, परंपरा, वारसा या सगळ्या गोष्टी समाज म्हणून गेल्या १२०० वर्षापासून नांदणी मठाकडून जपल्या जात असताना पैसा, सत्ता व संपत्ती समोर अण्णा भाऊ साठे यांच्या मताप्रमाणे न्यायव्यवस्थाही काहींची रखेल झाली हे खरं आहे. आता माधुरीसाठी न्याय मागायचे कुणाकडे?  असा सवालही शेट्टी यांनी केला आहे. (Madhuri Hatti)