नवी दिल्ली : चीनच्या तियांजिन येथे शांघाय सहकार्य संघटनेच्या (एससीओ) शिखर परिषदेच्या पार्श्वभूमीवर पंतप्रधान नरेंद्र मोदी यांनी रशियाचे अध्यक्ष व्लादिमीर पुतिन यांच्याशी द्विपक्षीय बैठक घेतली. याच दिवशी सोमवारी (१ सप्टेबर) नवी दिल्लीतील अमेरिकेच्या दूतावासाने भारत-अमेरिका भागीदारीला “२१ व्या शतकातील एक निर्णायक संबंध” असे म्हटले आहे. दोन्ही देशांदरम्यानची मैत्री शाश्वत आहे, असे यात म्हटले आहे. (US on SCO)
‘एक्स’ वरील एका पोस्टमध्ये, दूतावासाने परराष्ट्र सचिव मार्को रुबियो यांचे एक विधान प्रसिद्ध केले, ज्यामध्ये म्हटले आहे की, “आपल्या दोन्ही देशांमधील कायमस्वरूपी मैत्री ही आपल्या सहकार्याचा पाया आहे आणि आपल्या आर्थिक संबंधांच्या प्रचंड क्षमतेची जाणीव करून देत आपल्याला पुढे नेत आहे.” रुबियो यांनी या वर्षी जानेवारीमध्ये हे विधान केले होते.
दूतावासाच्या पोस्टमध्ये म्हटले आहे की, “अमेरिका आणि भारत यांच्यातील भागीदारी नवीन उंची गाठत आहे. ते २१ व्या शतकातील एक निर्णायक संबंध आहेत.”
‘‘या महिन्यात, आम्ही भारत आणि अमेरिकेतील जनता, दोन्ही देशांची प्रगती आणि त्यासंबंधीच्या शक्यतांवर प्रकाश टाकत आहोत जे आम्हाला पुढे नेत आहेत. नवोन्मेष आणि उद्योजकतेपासून ते संरक्षण आणि द्विपक्षीय संबंधांपर्यंत, आमच्या दोन्ही लोकांमधील शाश्वत मैत्री या प्रवासाला चालना देते,’’ असे दूतावासाने #USIndiaFWDforOurPeople या हॅशटॅगसह पुढे म्हटले आहे.
तियांजिनमधील मोदी, पुतिन आणि चीनचे अध्यक्ष शी जिनपिंग यांच्यासोबतचे फोटो प्रसिद्ध झाल्याच्या काही तासांतच अमेरिकन दूतावासाने ही पोस्ट केली आहे. मोदी यांनी सोमवारी युक्रेनमधील युद्ध संपवण्याच्या दिशेने सुरू असलेल्या शांतता प्रयत्नांचे स्वागत केले. तसेच पुतिन या वर्षी डिसेंबरमध्ये भारत दौऱ्यावर येतील, असे सांगितले.
दूतावासाच्या निवेदनात संरक्षण आणि द्विपक्षीय संबंधांचाही उल्लेख केला गेला आहे, परंतु दोन्ही देशांनी अलीकडेच भारत-अमेरिका 2+2 संवाद चौकटीअंतर्गत ऊर्जा सुरक्षा आणि संरक्षण सहकार्यात वाढ यावर चर्चा केली.
गेल्या आठवड्यात परराष्ट्र मंत्रालयाने (MEA) जारी केलेल्या निवेदनानुसार, भारत आणि अमेरिका “भारत-अमेरिका प्रमुख संरक्षण भागीदारीसाठी नवीन 10-वर्षीय फ्रेमवर्कवर स्वाक्षरी करणे, तसेच संरक्षण औद्योगिक, विज्ञान आणि तंत्रज्ञान सहकार्य वाढवणे; ऑपरेशनल समन्वय; प्रादेशिक सहकार्य; आणि माहिती-शेअरिंग” यासह संरक्षण सहकार्य वाढविण्यास उत्सुक होते.
चीनसोबतची बैठक फलदायी : मोदी
दरम्यान, एससीओ शिखर परिषदेच्या पार्श्वभूमीवर तियानजिन येथे राष्ट्राध्यक्ष शी जिनपिंग यांच्याशी फलदायी बैठक झाली, असे पंतप्रधान मोदी यांनी ‘एक्स’वर म्हटले आहे. कझानमधील आमच्या शेवटच्या बैठकीपासून भारत-चीन संबंधांमध्ये आलेल्या सकारात्मक गतीचा आम्ही आढावा घेतला. सीमावर्ती भागात शांतता आणि स्थैर्य राखण्याच्या महत्त्वावर आम्ही सहमत झालो आणि परस्पर आदर, परस्पर हित आणि परस्पर संवेदनशीलतेवर आधारित सहकार्यासाठी आमची वचनबद्धता पुन्हा एकदा व्यक्त केली, असे त्यांनी या पोस्टमध्ये म्हटले आहे.
