नवी दिल्ली : गेल्या दोन आठवड्यात हेरगिरीच्या आरोपाखाली पंजाब, हरियाणा आणि उत्तर प्रदेशातून एका युट्यूबरसह किमान १२ जणांना अटक करण्यात आली आहे, असे पोलिसांनी सांगितले. तपासात उत्तर भारतात पाकिस्तानशी संबंधित गुप्तहेर नेटवर्क कार्यरत असल्याची धक्कादायक बाब स्पष्ट झाली आहे. त्यापैकी सहा जणांना पंजाबमधून, पाच जणांना हरियाणातून आणि एकाला उत्तर प्रदेशातून अटक करण्यात आली आहे. (Spy Network)
पहेलगाम दहशतवादी हल्ला आणि भारताच्या ऑपरेशन सिंदूरच्या पार्श्वभूमीवर ही अटक करण्यात आली आहे, असे अधिकाऱ्यांनी सांगितले.
अटक करण्यात आलेल्यांमध्ये हरियाणातील युट्यूबर ज्योती मल्होत्रा आणि पंजाबमधील गुजाला या दोन महिलांचा समावेश आहे. ज्योतीचे युट्यूब चॅनल आणि इंस्टाग्राम अकाउंटवर ३.७७ लाख सबस्क्राइबर आणि १.३३ लाख फॉलोअर्स आहेत. या दोघी नवी दिल्लीतील पाकिस्तान उच्चायुक्तालयात तैनात असलेल्या पाकिस्तानी अधिकारी एहसान-उर-रहीम उर्फ दानिशच्या संपर्कात होत्या. (Spy Network)
१३ मे रोजी हेरगिरीत सहभागी असल्याच्या आरोपाखाली पाकिस्तानी अधिकाऱ्याला भारताने हद्दपार केले आहे.
आरोपी पाकिस्तानी गुप्तचर यंत्रणांना (पीआयओ) संवेदनशील माहिती पुरवत होते, असे पोलिसांच्या तपासात दिसून आल्याचे अधिकाऱ्यांनी सांगितले. त्यांच्या आर्थिक व्यवहारांची चौकशी आणि त्यांच्या इलेक्ट्रॉनिक उपकरणांचे फॉरेन्सिक विश्लेषण देखील सुरू आहे.
पंजाब आणि हरियाणा येथून झालेल्या अटकेव्यतिरिक्त, रविवारी उत्तर प्रदेशातील रामपूर येथून पाकिस्तानच्या गुप्तचर संस्थेच्या इंटर-सर्व्हिसेस इंटेलिजेंस (आयएसआय) च्या एका कथित एजंटला राज्याच्या विशेष कार्य दलाने अटक केली. (Spy Network)
४ मे रोजी पंजाब पोलिसांनी अमृतसरमधील अजनाला येथील रहिवासी असलेल्या फलकशेर मसीह आणि सूरज मसीह यांना अटक केली. सीमावर्ती जिल्ह्यातील लष्कराच्या छावणी क्षेत्रे आणि हवाई तळांची संवेदनशील माहिती आणि छायाचित्रे आयएसआयला लीक करण्याच्या आरोपाखाली त्यांना अटक करण्यात आली आहे.
दोघेही लष्कराच्या हालचाली, बीएसएफ छावण्या आणि विमानतळांची ठिकाणे, छायाचित्रे आणि इतर संवेदनशील डेटा पाकिस्तानमधील त्यांच्या हँडलर्सना गोळा करण्यात आणि प्रसारित करण्यात मदत करत होते, असे पोलिसांनी सांगितले.
दिल्लीतील उच्चायुक्तालयात तैनात असलेल्या पाकिस्तानी अधिकारी दानिशशी संबंधित हेरगिरीच्या कारवायांमध्ये सहभागी असल्याच्या आरोपाखाली पंजाब पोलिसांनी ११ मे रोजी आणखी दोन जणांना अटक केली.
३१ वर्षीय गुजाला आणि यामीन मोहम्मद अशी त्यांची नावे आहेत. दोघेही मालेरकोटला येथील रहिवासी आहेत. त्यांना वर्गीकृत माहिती शेअर करण्याच्या बदल्यात ऑनलाइन पेमेंट मिळत होते, असे पोलिस तपासात उघड झाले.
चौकशीदरम्यान, गुजालाने दिल्लीतील पाकिस्तान उच्चायुक्तालयात तैनात असलेल्या पाकिस्तानी अधिकाऱ्याला भारतीय सैन्याच्या कारवायांबद्दलची गोपनीय माहिती शेअर केल्याची कथित कबुली दिली. (Spy Network)
गुजालाने पुढे सांगितले की ती पैशासाठी हे करत होती आणि आरोपी अधिकाऱ्याने तिला यूपीआय (युनिफाइड पेमेंट इंटरफेस) द्वारे १०,००० आणि २०,००० रुपये असे ३०,००० रुपये पाठवले होते, असेही त्यांनी सांगितले.
दरम्यान, पंजाब पोलिसांचे डीजीपी गौरव यादव यांनी सोमवारी सांगितले की, पाकिस्तानच्या गुप्तचर संस्था आयएसआयला संवेदनशील लष्करी माहिती शेअर केल्याच्या आरोपाखाली आणखी दोन जणांना अटक करण्यात आली आहे. या दोघांची ओळख पटली आहे. यातील सुखप्रीत सिंग हा मूळचा गुरुदासपूरमधील आदियान गावचा रहिवासी आहे आणि करणबीर सिंग हा मूळचा गुरुदासपूरमधील चंदू वडाळा येथील रहिवासी आहे.
