मुंबई; वृत्तसंस्था : देशातील दुचाकींची विक्री ऑक्टोबर २०२४ मध्ये १४.२ टक्क्यांनी वाढून २१.६४ लाख युनिट झाली. ऑक्टोबर २०२३ मध्ये ती १८.९६ लाख युनिट होती. ‘असोसिएशन ऑफ इंडियन ऑटोमोबाईल मॅन्युफॅक्चरर्स’ (सियाम) ने ही आकडेवारी जाहीर केली.
प्रवासी वाहनांच्या विक्रीनेही ऑक्टोबरमध्ये उच्चांक गाठला आहे. या महिन्यात ३.९३ लाख युनिट्सची विक्री झाली. गेल्या वर्षी ऑक्टोबरमध्ये झालेल्या ३.९ लाख युनिटच्या विक्रीपेक्षा ०.९ टक्के अधिक आहे. ‘सियाम’चे महासंचालक राजेश मेनन यांनी निदर्शनास आणून दिले, की ऑक्टोबर २०२४ मध्ये दसरा आणि दिवाळी हे दोन्ही प्रमुख सण एकाच महिन्यात आले. त्यामुळे ग्राहकांची मागणी वाढली. त्यामुळे वाहन उद्योगाच्या कामगिरीत लक्षणीय वाढ झाली. प्रवासी वाहनांनी ऑक्टोबर २०२४ मध्ये आतापर्यंतची सर्वाधिक ३.९३ लाख युनिटची विक्री नोंदवली. गेल्या वर्षीच्या तुलनेत त्यात ०.९ टक्क्यांनी वाढली.
पीएम ई-ड्राइव्ह योजनेअंतर्गत इलेक्ट्रिक वाहन विक्रीत विक्रमी वाढ झाली. ‘मर्सिडीज-बेंझ इंडिया’ने सणासुदीच्या हंगामात विक्रीत विक्रमी वाढ नोंदवली. ऑक्टोबर २०२३ च्या तुलनेत ऑक्टोबर २०२४ मध्ये दोन्ही प्रवासी वाहने आणि दुचाकींची नोंदणी ३० टक्क्यांहून अधिक वाढली. तथापि, तीनचाकी वाहनांची विक्री गेल्या वर्षीच्या ऑक्टोबरच्या तुलनेत ०.७ टक्क्यांनी घटली आणि ऑक्टोबर २०२४ मध्ये ०.७७ लाख युनिट्स राहिली, तरीही गेल्या वर्षीच्या ऑक्टोबरच्या तुलनेत नोंदणीत ११ टक्क्यांनी वाढ झाली आहे.
ग्रामीण भागामुळे विक्रीत वाढ
दुचाकी वाहनांच्या विक्रीत वाढ होण्याचे कारण ग्रामीण उत्पन्नात वाढ असल्याचे विश्लेषकांचे म्हणणे आहे. कारण या वर्षी सामान्य पावसाने कृषी क्षेत्रात चांगले उत्पादन आले. त्यामुळे शेतकऱ्यांचे उत्पन्न वाढले. सरकारने विविध पिकांच्या किमान आधारभूत किमतीत (एमएसपी) वाढ केल्याने शेतकऱ्यांच्या उत्पन्नातही वाढ झाली. त्याचा परिणाम ग्रामीण कुटुंबांच्या उपभोगाच्या वस्तूंवर होणाऱ्या खर्चावर दिसून आला.