पाटणा : राष्ट्रीय जनता दल (राजद) नेते आणि माजी उपमुख्यमंत्री तेजस्वी यादव यांनी शनिवारी (२ ऑगस्ट) भारतीय निवडणूक आयोगाने (ECI) १ ऑगस्ट २०२५ रोजी प्रकाशित केलेल्या बिहारच्या ‘मतदार यादीच्या मसुद्यात’ त्यांचे नाव गायब झाले असल्याचा दावा केला. मतदारांचे हक्क हिरावून घेत लोकशाहीची हत्या करण्याचे काम येथे सुरू आहे, असा आरोपही त्यांनी केला. (Tejaswi alleges EC)
जवळजवळ ६५ लाख मतदार म्हणजे एकूण मतदार संख्येच्या सुमारे साडे आठ टक्के मतदार वगळण्यात आले आहेत. त्यामुळे कुणाची नावे गायब आहेत हे ओळखणे कठीण झाले आहे, असा दावा यादव यांनी पत्रकार परिषदेत केला. (Tejaswi alleges EC)
त्याआधी, श्री यादव यांनी मोठ्या स्क्रीनवर निवडणूक आयोगाच्या अधिकृत साईटवर नाव शोधण्यासंदर्भातील प्रात्यक्षिक दाखवले. त्यांचा EPIC नंबर टाकून कॅप्चा टाकला. त्यावेळी स्क्रीनवर, ‘रेकॉर्ड सापडत नसल्याचा’ मेसेज दिसला.
पाटणा जिल्हा प्रशासनाचे स्पष्टीकरण
यादव यांनी पत्रकार परिषद घेऊन आरोप केल्यानंतर पाटणा जिल्हा प्रशासनाची तारांबळ उडाली. या संदर्भात चौकशी केली असता तेजस्वी यादव यांचे नाव मसुदा मतदार यादीत नोंदलेले असल्याचे ते म्हणाले. (Tejaswi alleges EC)
“सध्या, त्यांचे नाव बिहार पशू विज्ञान विद्यापीठाच्या ग्रंथालय इमारतीतील मतदान केंद्र क्रमांक २०४ वर अनुक्रमांक ४१६ सह सूचीबद्ध आहे. पूर्वी, त्यांचे नाव बिहार पशू विज्ञान विद्यापीठाच्या ग्रंथालय इमारतीतील मतदान केंद्र क्रमांक १७१ वर अनुक्रमांक ४८१ सह नोंदवले गेले होते,” असा खुलासा जिल्हा प्रशासनाने ‘X’वरील पोस्टमध्ये केला आहे.
उपमुख्यमंत्र्यांकडून तेजस्वींच्या दाव्याचे खंडन
दरम्यान, उपमुख्यमंत्री आणि ज्येष्ठ भाजप नेते सम्राट चौधरी यांनी त्यांच्या एक्स हँडलवर एक पोस्ट टाकून तेजस्वी यादव यांच्या दाव्याचे खंडन केले. यादव यांच्याकडे मतदार यादीतील नाव कसे शोधावे, याचे ज्ञान नाही, त्यांच्याकडे ‘पात्रतेचा अभाव’ असल्याचा आरोप केला. “तुमचे नाव तुमच्या वडिलांच्या नावासोबत आहे, आदरणीय लालू प्रसाद [राजद सुप्रीमो]. फसवे आणि खोटे दावे करणारे तुमचे दुकान तुम्ही बंद केले तर चांगले होईल,” असा टोला श्री. चौधरी यांनी मारला आहे.