नवी दिल्ली : देशाला आणि जगाला हादरवून सोडणाऱ्या २६/११ च्या मुंबई दहशतवादी हल्ल्यातील प्रमुख सूत्रधारांपैकी एक असलेल्या तहव्वुर राणा सध्या राष्ट्रीय तपास संस्थेच्या (एनआयए) कोठडीत आहे. लष्कर-ए-तोयबाच्या दहशतवाद्यांना महत्त्वपूर्ण रसद पुरवल्याचा आरोप राणावर आहे. (Rana requests Court)
२६/११ च्या हल्ल्यानंतर १६ वर्षांनी गुरुवारी (१० एप्रिल) अमेरिकेतून त्याचे भारतात प्रत्यार्पण करण्यात आले. रात्री १० वाजता त्याच्या औपचारिक अटकेनंतर, त्याला पटियाला हाऊस येथील एनआयए विशेष न्यायालयात हजर करण्यात आले. राष्ट्रीय तपास संस्थेने (एनआयए) न्यायालयाकडे त्याची २० दिवसांची कोठडी मागितली; मात्र राणाला १८ दिवसाची कोठडी सुनावली. (Rana requests Court)
राणाने सुनावणीवेळी दिल्ली न्यायालयाला एक विनंती केली आहे. ‘‘आपल्या (केसच्या) माध्यमातून नाव आणि प्रसिद्धी मिळवणारा कोणताही वकील नसावा,’’ अशी विनंती राणाने केली आहे.
वकिलांनी माध्यमांशी बोलू नये
अतिरिक्त सत्र न्यायाधीश (एनआयए) चंदरजीत सिंह यांच्यासमोर पोलिसांनी त्याची कोठडी मागितली. त्यानंतर त्याला कोठडी सुनावण्यात आली. न्या. सिंह यांनी त्यांच्या आदेशात म्हटले आहे की, ‘‘आरोपीने असे म्हटले आहे की, त्याच्या माध्यमातून नाव आणि प्रसिद्धी मिळवत असल्याचे दिसून येईल, असा कोणताही वकील मला नको, अशी विनंती त्याने केली आहे. विधि सेवा सल्लागार कायदेशीर सेवा प्राधिकरण कायदा, १९८७ मध्ये समाविष्ट असलेल्या वैधानिक योजनेनुसार नियुक्त केलेले वकील उपस्थित असले तरी, आरोपीची विनंती स्वीकारण्यात आली आहे. तसेच असे निर्देश देण्यात आले आहेत की कायदेशीर सेवा सल्लागाराने या प्रकरणातील आरोपीबद्दल माध्यमांशी (प्रिंट/डिजिटल/इलेक्ट्रॉनिक) शी बोलू नये. जर कायदेशीर सेवा सल्लागाराची माहिती मीडियाला माहीत नसेल तर ती मीडियाला उघडही केली जाऊ नये.’’(Rana requests Court)
लेखनसाहित्य पुरवणार
न्यायाधीशांनी त्यांच्या आदेशात पुढे म्हटले आहे की, आरोपीने त्याच्या वकिलाला सूचना देण्यासाठी काही उपकरणांची आवश्यकता असल्याने, आरोपीला त्याच्या वकिलाकडे सूचना मांडण्यासाठीचे लेखनसाहित्य दिले जाईल.
बिश्नोईला ठेवलेल्या ठिकाणीच रवानगी
दरम्यान, राणाला राजधानीतील सीजीओ कॉम्प्लेक्समधील दहशतवादविरोधी संस्थेच्या मुख्य कार्यालयात ठेवले आहे. याच ठिकाणी गँगस्टर लॉरेन्स बिश्नोईला यापूर्वी ठेवण्यात आले होते. तेथेच मध्यवर्ती वातानुकूलित उच्च सुरक्षा कक्षात राणाला ठेवण्यात आले आहे. हा लॉक-अप तळमजल्यावर आहे. सीआयएसएफ कर्मचारी आणि एनआयएचे दोन अधिकारी चोवीस तास पहारा देत आहेत. राणाला मुख्यालयातील कॅन्टीनमधील जेवणासह मूलभूत गरजा पुरवल्या जात आहेत, असे एका सूत्राने सांगितले. एनआयए कार्यालयाभोवतीची सुरक्षा वाढवण्यात आली आहे.(Rana requests Court)
हल्ल्यानंतर ११ महिन्यांनी झाली होती अटक
एकेकाळी पाकिस्तान आर्मी मेडिकल कॉर्प्समध्ये सेवा बजावलेल्या ६४ वर्षीय राणाला मुंबई हल्ल्याच्या भयंकर घटनेनंतर ११ महिन्यांनी, म्हणजे ऑक्टोबर २००९ मध्ये शिकागो येथे अटक करण्यात आली होती. २६/११ हल्ल्यातील राणाच्या भूमिकेबद्दल अमेरिकेच्या न्याय विभागाने शुक्रवारी (११ एप्रिल) सविस्तर माहिती दिली आहे. राणाने त्याचा बालपणीचा मित्र डेव्हिड कोलमन हेडली ऊर्फ दाऊद गिलानीला लष्कर-ए-तोयबाच्या संभाव्य लक्ष्यांवर देखरेख करण्यासाठी मुंबईत मुक्तपणे प्रवास करू दिला, असा भारताने आरोप केला असल्याचे या निवेदनात म्हटले आहे.
हेही वाचा :
ट्रॅकर्सचा धोका ओळखून राणाला कसे आणले?
राखून ठेवलेल्या विधेयकांवर राष्ट्रपतींनी ३ महिन्यांच्या आत निर्णय घ्यावा