stock market

मुंबई : वृत्तसंस्था : भारतीय शेअर बाजाराला गेल्या काही दिवसांपासून हुडहुडी आणि ताप भरला आहे. बाजार सुरळीत होत असताना पुन्हा काही तरी घटना घडते आणि बाजार घसरतो. त्यात परदेशी पाहुणे तळ्यात-मळ्यात करत असल्याने शेअर बाजाराला मोठी झेप घेता आलेली नाही. त्यातच आता गेल्या दोन दिवसांपासून गौतम अदानी यांच्या अमेरिकेतील वादाने बाजाराचे उरल सुरले अवसान काढून घेतले; पण आज बाजाराने कशाचीच पर्वा केली नाही. अदानी शेअरसोबतच बाजाराने पुन्हा फिनिक्स भरारी घेण्याचा प्रयत्न केला. सेन्सेक्स १००० अंकांनी उसळला. त्यामुळे अखेरच्या व्यापारी सत्रात गुंतवणूकदारांच्या मनावरील मळभ हटले. बाजाराला पुन्हा भरते आल्याने गुंतवणूकदार धन्य झाले.

भारतीय बाजारावर गेल्या दोन दिवसांपासून अदानी-अमेरिका वादाचे सावट दिसले. अदानीच्या शेअरमध्ये मोठी पडझड झाली. भारतीय उद्योजकावर अशा प्रकारचे गंभीर आरोप झाल्याने बाजारात एक वेगळीच भीती निर्माण झाली होती; पण शुक्रवारी बाजाराने सर्व मळभ दूर केले. बाजाराला तेजीचे भरते आले. अदानी समूहातील जवळपास सर्वच शेअरने मोठा पल्ला गाठला. सेन्सेक्स १०३४.७६ अंकांनी वधारला. तो दुपारी ७८१९०.५५ अंकावर पोहचला, तर दुसरीकडे निफ्टी २३,६७९.०५ अंकावर व्यापार करत होता. या दमदार कामगिरीमुळे बीएसईच्या एकूण भांडवलात अजून ५ लाख कोटी रुपयांची भर पडली. बँकिंग, आर्थिक, आयटी आणि ऊर्जा क्षेत्रातील शेअरनी मोठी झेप घेतली.

या क्षेत्रातील कंपन्यांनी बाजार तोलून धरलाच नाही तर बाजाराला उभारी दिली. या सेक्टरमधील शेअरने दमदार कामगिरीच्या जोरावर सेन्सेक्स वरच्या दिशेला ओढला. अदानी समूहावर अमेरिकेत लाचखोरी आणि फसवणुकीचे आरोप झाल्याने देशात एकच खळबळ माजली. समूहाने या प्रकरणी हात झटकले आहेत. आज समूहाची कामगिरी चांगली राहिली. कालच्या घसरणीनंतर अम्बुजा सिमेंट ६ टक्क्यांनी तर एसीसी सिमेंटने जवळपास ४ टक्क्यांची वसुली केली. फ्लॅगशिप कंपनी अदानी एंटरप्राईजेस २.५ टक्क्यांनी वधारला, तर अदानी ग्रीन एनर्जी, अदानी पोर्टस्‌, अदानी पॉवर आणि अदानी टोटल गॅसमध्ये आज १-२ टक्क्यांची उसळी दिसली.

मुंबई  : वृत्तसंस्था : ग्लोबल ब्रोकरेज फर्म ‘एचएसबीसी’ने भारताबाबतच्या रणनीतीवर नवीन नोट जारी करताना ओव्हरवेट आउटलुकसह सकारात्मक भूमिका कायम ठेवली आहे. अहवालानुसार, २०२५ च्या अखेरीस सेन्सेक्स ९० हजार ५२० पर्यंत पोहोचण्याची शक्यता आहे. त्यामुळे सध्याच्या पातळीपेक्षा सुमारे १५ टक्क्यांपर्यंत वाढ होऊ शकते.

‘एचएसबीसी’ने यापूर्वी १,००,०८० हे लक्ष्य ठेवले होते. भारताचा आर्थिक विकास जरी थोडा मंदावला असला, तरी तो अजूनही मजबूत स्थितीत आहे. तथापि, इक्विटी मार्केटमध्ये काही आव्हाने आणि जोखीम कायम आहेत. मिडकॅप-स्मॉलकॅप किंवा लार्जकॅप ब्रोकरेज फर्मने सांगितले, की भारताची स्थिर वाढ असूनही, अधिक स्मॉलकॅप आणि मिडकॅप समभागांमध्ये प्रति शेअर सर्वाधिक कमाई (ईपीएस) वाढ दिसून येत आहे. व्यापक बाजारपेठेतील या कंपन्यांमध्ये ३० टक्के दराने वाढ अपेक्षित आहे. याउलट, लार्ज कॅप स्टॉकसाठी हा वाढीचा दर १२ टक्के असण्याचा अंदाज आहे. परदेशी संस्थागत गुंतवणूकदारांना लार्ज कॅप समभागांमध्ये सर्वाधिक रस आहे, ज्यांची वाढ आता मंद होत आहे.

‘ब्रोकरेज फर्म’च्या विश्लेषकांचा असा विश्वास आहे, की मंदी असूनही, भारत जगातील सर्वात वेगाने वाढणारी अर्थव्यवस्था आहे. या नोटमध्ये २०२५ साठी आशियातील सर्वाधिक पसंतीच्या स्टॉकची यादीही प्रसिद्ध करण्यात आली आहे. या यादीत फक्त दोन भारतीय समभाग ॲक्सिस बँक आणि किम्स समाविष्ट आहेत. नोटमध्ये म्हटले आहे, की ‘किम्स’ला कॅपेक्स अपसायकल आणि भारतातील आरोग्य सेवांमध्ये वाढती मागणी यांचा फायदा होण्याची अपेक्षा आहे. ॲक्सिस बँकेचे मूल्यांकन आकर्षक दिसते. कंपनी देशाच्या आर्थिक क्षेत्रात गुंतवणुकीसाठी एक मजबूत पर्याय म्हणून उदयास येत आहे.

जगातील सर्वात वेगाने वाढणारी अर्थव्यवस्था असूनही, भारतीय बाजारपेठेबाबत काही धोके आहेत. नोटमध्ये म्हटले आहे, की उच्च कमाई मल्टिपल धोका असल्याचे सिद्ध होऊ शकते. कमाईच्या वाढीवर आणखी दबाव असल्यास, गुंतवणूकदार त्यांच्या स्थितीचे पुनर्मूल्यांकन करतील. अल्पावधीत इक्विटी मार्केटशी संबंधित जोखीम बाजाराच्या कामगिरीवर परिणाम करू शकतात; परंतु दीर्घकालीन दृष्टिकोन सकारात्मक राहतो.