कोल्हापूर : प्रतिनिधी : गोकुळ दूध संघाचे गायीचे तूप मागील एक वर्षापासून मुंबई, प्रभादेवी येथील सिद्धिविनायक गणपती मंदिरातील प्रसादासाठी वापरले जात आहे. आता सलग दुसऱ्या वर्षी सन २०२५-२६ या आर्थिक वर्षासाठी पुन्हा एकदा २८० मेट्रीक टन गाय तूप पूरवठ्याची ऑर्डर गोकुळ दूध संघास प्राप्त झाली आहे. मंदिराची मागणी म्हणजे गोकुळच्या गुणवत्तेची आणि पारदर्शक व्यवस्थेची दिलेली पावती असल्याचे गोकुळचे चेअरमन अरुण डोंगळे यांनी सांगितले. (Siddhivinayak Mandir)
उत्तम प्रतीच्या चवीमुळे महाराष्ट्रातच नव्हे तर देशभर गोकुळच्या दुधाचा आणि दुग्धजन्य पदार्थांचा लौकिक आहे. सिद्धिविनायक मंदिर न्यास प्रभादेवी, मुंबई यांना कोल्हापूर जिल्हा दूध उत्पादक संघ गोकुळमार्फत सन २०२४ -२५ या आर्थिक वर्षामध्ये गाय तूप पुरवठा करण्याचे २५० मेट्रीक टन चे टेंडर मिळाले होते. पुढील २०२५-२६ या आर्थिक वर्षाकरिता गाय तूप पुरवठा करणेबाबतचे टेंडर संघामार्फत भरले होते या टेंडर प्रक्रियेमध्ये गोकुळ संघ व इतर दूध संघ यांनीही सहभाग घेतला होता. या करिताचे टेक्निकल बीड व प्लांट इन्स्पेक्शन या स्तरावर गोकुळ दूध संघ यशस्वी झाल्यानंतर अंतिम कमर्शियल बीडमध्ये हे टेंडर गोकुळ दूध संघाला मिळाले असून त्याचा खरेदी आदेश लवकरच प्राप्त होईल.
गाय दुधाची संकलनामध्ये झालेली वाढ लक्षात घेता गाय दूध तसेच गाय दुधापासून बनवलेले दुग्ध पदार्थ यांची निर्गत होणे हे संघापुढे आव्हान असून यामधील एक सकारात्मक पाऊल म्हणजे प्राप्त होत असलेले गाय तूप पुरवठ्याचे हे टेंडर आहे. (Siddhivinayak Mandir)
मुंबईतील सिद्धिविनायक मंदिर हे महाराष्ट्रातील एक श्रद्धास्थान असून, दररोज हजारो भाविक येथे दर्शनासाठी येत असतात. मंदिरात होणाऱ्या विविध धार्मिक विधी, महापूजा, नैवेद्य व प्रसादासाठी उच्च प्रतीच्या तुपाचा वापर केला जातो. यासाठी मंदिर प्रशासनाकडून गुणवत्तेची कसून चाचपणी केली गेली आणि त्यात गोकुळच्या गायीच्या तुपाला प्राधान्य देण्यात आलं. “गोकुळचे तूप हे दर्जेदार असल्याने त्याचा सुवास, चव आणि पोषणमूल्ये टिकून राहतात. या गुणवत्तेमुळेच सिद्धिविनायक मंदिराने पुन्हा एकदा गोकुळला पसंती दिली” आहे असे गोकुळचे चेअरमन अरुण डोंगळे यांनी सांगितले. (Siddhivinayak Mandir)