मुंबई, विशेष प्रतिनिधी : विधानसभा निवडणुकीत दारुण अपयशाला सामोरे जावे लागलेल्या राष्ट्रवादी काँग्रेस शरदचंद्र पवार पक्षाच्या विधानसभेतील गटनेतेपदी आमदार जितेंद्र आव्हाड यांची निवड करण्यात आली आहे. तर मुख्य प्रतोद म्हणून रोहित पाटील व प्रतोदपदी उत्तम जानकर यांची निवड करण्यात आली आहे. पक्षाच्या नवनिर्वाचित आमदारांच्या बैठकीत याबाबतचा निर्णय एकमताने घेण्यात आले असल्याचे माहिती प्रदेशाध्यक्ष जयंत पाटील यांनी पत्रकार परिषदेत दिले.
रोहित पाटील हे दिवंगत नेते आर.आर. पाटील यांचे सुपुत्र व देशातील सर्वात तरुण आमदार आहेत. कमी वयात पक्षाने त्यांच्यावर मोठी जबाबदारी सोपवली आहे. बैठकीत विधिमंडळ पक्षाच्या नेत्यांबाबत निर्णय झाला नाही. बैठकीसाठी आज (दि.१) ९ सदस्य उपस्थित होते, बीडचे आमदार संदीप क्षीरसागर मतदारसंघात जाहीर कार्यक्रम असल्याने उपस्थित नव्हते. दरम्यान, विधानसभा निवडणुकीत शरद पवारांच्या राष्ट्रवादीने १० जागा जिंकल्या आहेत. त्यात, तासगाव मतदारसंघातून रोहित पाटील तर माळशिरस मतदारसंघातून उत्तम जानकर विधानसभेत पोहोचले आहेत.
राज्यातील विधानसभा निवडणुकांच्या निकालात महाविकास आघाडीला अपेक्षित यश आलं नसून केवळ ४९ जागांवर विजय मिळाला आहे. त्यामध्ये, शिवसेना ठाकरे गट २० जागा जिंकून सर्वात मोठा पक्ष ठरला, तर काँग्रेसने १७ जागा जिंकल्या आहेत. राष्ट्रवादी काँग्रेस शरदचंद्र पवार यांच्या पक्षाला केवळ १० जागांवर यश मिळाले आहे. त्यामुळे, महायुतीमधील एकाही पक्षाकडे विरोधी पक्षनेतेपद मिळेल, एवढे संख्याबळ नाही. मात्र, महाविकास आघाडीमधील पक्षांकडून विधिमंडळ गटनेते आणि प्रतोपदी पक्षातील नवनिर्वाचित आमदारांची नियुक्ती केली जात आहे.
मारकवाडीतील ग्रामस्थ पुन्हा करणार मतदान
सोलापूर जिल्ह्यातील माळशिरस विधानसभा मतदारसंघातून निवडून आलेले शरद पवार गटाचे आमदार उत्तम जानकर यांच्या मारकवाडी गावातील ग्रामस्थांनी ईव्हीएम मशीनवर अविश्वास दाखवत पुन्हा एकदा सोमवारी (दि.२) प्रतीकात्मक मतदान करण्याचा निर्णय घेतला आहे. यातून बॅलेट पेपरवर मतदान घेऊन ग्रामस्थ पूर्णपणे पाठीशी असल्याचे दिसून येईल , असा त्यांचा दावा असल्याचे जयंत पाटील यांनी सांगितले.
