कोल्हापूर : प्रतिनिधी : कोल्हापूर शहरातील कसबा बावडा येथील श्री छत्रपती राजाराम सहकारी साखर कारखान्याला आग लागली. आग लागताच मोठे स्फोटाचे आवाज आल्याने बावड्यातील नागरिकांनी कारखान्याकडे धाव घेतली. आग विझवण्यासाठी अग्निशमन दलाचे सहा बंब घटनास्थळी दाखल झाले असून आग नियंत्रणात आणण्याचे शर्थीचे प्रयत्न सुरू आहेत. सुदैवाने आगीत कोणतीही जिवितहानी झाली नाही. (Suger factory fire)
घटनास्थळावरील मिळालेली माहिती अशी की, राजाराम साखर कारखान्याचा साखर हंगाम चार दिवसापूर्वी संपला आहे. हंगाम संपल्याने कारखान्यात मशिनची देखभालीची कामे सुरू होती. कारखान्यात वेल्डिंग, गॅस कटिंग आणि वायरिंगचे काम सुरू असताना आग लागली. जमिनीवर सांडलेल्या ऑईल आणि बगॅसमुळे आग भडकली. कारखान्यातील कामगारांनी आग विझवण्याचे प्रयत्न केले पण बघता बघता आगीने रौद्ररुप धरले. आग भडकताच कोल्हापूर महानगरपालिका अग्निशमन दलाला कळवण्यात आले. अग्निशमन दलाचे सहा बंब, आणि दोन पाण्याचे टँकर घटनास्थळी आले आहे. आग ऑईलमुळे भडकली असल्याने फोमचा फवारा मारुन आग आटोक्यात आणली. त्यानंतर आग विझवण्यासाचे शर्थीचे प्रयत्न सुरू झाले. (Suger factory fire)
आगीचे वृत्त कळताच आमदार अमल महाडिक कारखाना स्थळावर आले. त्यांनी महानगरपालिकेशी संपर्क साधून आग विझवण्यासाठी अग्निशमन दलाचे बंब मागवले. त्यानंतर अग्निशमन दलाच्या जवानांनी आग विझवण्याचे शर्थीचे प्रयत्न सुरू केले. याबाबत आमदार अमल महाडिक म्हणाले, “कारखान्याचा हंगाम चार दिवसापूर्वी संपला असल्याने कोणतीही जिवितहानी झालेली नाही. कारखान्यात देखभालीची कामे सुरू असून वायरिंग, वेल्डिंग, गॅस कटिंगची कामे सुरू असताना आग लागली. आग कशामुळे लागली याचे कारण नंतर स्पष्ट होईल. महानगरपालिकेने आग आटोक्यात आणण्याचे शर्थीने प्रयत्न केले. कामगारांनी धाडस दाखवून सुरवातीला आग विझवण्याचे प्रयत्न केले” (Suger factory fire)
चिफ फायर ऑफिसर मनिष रणभिसे म्हणाले, “सकाळी सव्वा दहा वाजता राजाराम कारखान्याला आग लागल्याची वर्दी मिळाली. घटनास्थळी अग्निशमन दलाचे सहा फायर फायटर आणि दोन पाण्याचे टँकर आले. इंजिन रुमला आग लागली असल्याने ऑईल फायर असल्याने आम्ही फोमने आग आटोक्यात आणली. त्यानंतर पाणी मारुन कुलिंग सुरू केले. कारखान्याच्या फायर फायटर आणि महानगरपालिकेने अग्निशमन दलाचे बंब, पाण्याचे टँकर, अन्य साखर कारखान्याचे बंब यामुळे पाण्याची कमतरता बसली नाही”. आग भडकल्यानंतर ऑईलचे बॅरेल फुटल्याने मोठा स्फोटाचा आवाज झाला. अग्निशमन दलाने फोम मारुन आग आटोक्यात आली. ऑईलमुळे आग भडकल्याचा प्राथमिक अंदाज असल्याचे त्यांनी सांगितले. (Suger factory fire)
हेही वाचा