नवी दिल्ली : केंद्रीय अर्थमंत्रालयातील वरिष्ठ अधिकाऱ्याला बीएमडब्ल्यू कारने धडक दिली. या धडकेत सबंधित अधिकाऱ्याचा मृत्यू झाला. नवजोत सिंग (५२) असे या अधिकाऱ्याचे नाव आहे. कारचालक महिलेला पोलिसांनी ताब्यात घेतले आहे. (Official killed)
नवी दिल्लीत हा अपघात झाला. कारने मोटारसायकलला धडक दिली. त्यात सिंग यांचा मृत्यू झाला.
आर्थिक व्यवहार विभागातील उपसचिव नवजोत सिंग (५२), हरी नगर येथे राहतात. रविवारी (१४ सप्टेंबर) दुपारी ते बांगला साहिब गुरुद्वाराचे दर्शन घेऊन घरी परतत होते. त्यावेळी दिल्ली कॅन्टोन्मेंट मेट्रो स्टेशनजवळील रिंग रोडवर त्यांच्या मोटारसायकलला कारने धडक दिली. या भीषण अपघातात त्यांचा मृत्यू झाला. त्यांच्या पत्नीला गंभीर दुखापत झाली. (Official killed)
या घटनेत आलिशान कार चालवणारी महिला आणि तिचा पतीही जखमी झाले आहेत. गुरुग्राममधील या दाम्पत्याला उपचारासाठी रुग्णालयात दाखल करण्यात आले आहे.
तिला डिस्चार्ज दिल्यानंतर, तिला पुढील चौकशी आणि कायदेशीर कारवाईसाठी ताब्यात घेण्यात आले आहे, असे एका पोलिस अधिकाऱ्याने सांगितले. (Official killed)
पोलिसांनी या प्रकरणात भारतीय न्याय संहिता कलम २८१ (अविचारीपणे गाडी चालवणे किंवा सार्वजनिक मार्गावर गाडी चालवणे), १२५ ब (इतरांच्या जीवाला किंवा वैयक्तिक सुरक्षिततेला धोका निर्माण करणारी कृती), १०५ (खून न करता सदोष मनुष्यवध) आणि २३८ (गुन्ह्याचे पुरावे गायब करणे किंवा गुन्हेगाराला खोटी माहिती देणे) अंतर्गत सदोष मनुष्यवधाचा गुन्हा दाखल केला आहे.
धडक झालेली लक्झरी कार आणि दुचाकी जप्त करण्यात आल्या आहेत आणि अपघातस्थळाची फॉरेन्सिक तपासणी करण्यात आली आहे, असे पोलिसांनी सांगितले.