बेळगाव : प्रतिनिधी : बेळगाव-गोवा मार्गावरील कुसमळी येथील रस्ता वाहून गेल्यामुळे चोर्ला मार्गे गोव्याला जाणारा रस्ता शनिवारी मध्यरात्रीपासून बंद झाला आहे. यामुळे गोव्याला जाणारी वाहतूक बैलुर आणि खानापूरमार्गे वळविण्यात आली आहे. (Road damaged)
बेळगावहून गोव्याला भाजीपाला, दूध आदी पुरवठा करणारी वाहने चोर्लामार्गे जातात. पण नदीवरील रस्ता वाहून गेल्याने आता या मार्गांवरील वाहतूक ठप्प झाली आहे.
बेळगाव-चोर्ला-गोवा मार्गावर कुसमळी येथे नवीन पूल बांधण्यात येत असल्याने, बाजूला पर्यायी रस्ता तयार करण्यात आला होता. परंतु जांबोटी परिसरात मोठ्या प्रमाणात पाऊस झाल्याने पाण्याचा प्रवाह मोठ्या प्रमाणात वाढला व त्यामध्ये पर्यायी मार्ग वाहून गेला. (Road damaged)
बेळगाव-चोर्ला-गोवा मार्गावरील कुसमळी ब्रिजला तडे गेल्याने सदर ब्रिज पाडण्यात आला व त्या जागी नवीन ब्रिज बांधण्याचे काम हाती घेण्यात आले होते. व वाहतुकीसाठी ब्रिजच्या बाजूने पर्यायी मार्ग तयार करण्यात आला होता. परंतु ब्रिजचे बांधकाम अजून काही प्रमाणात शिल्लक आहे. उर्वरित बांधकाम करण्यासाठी कंत्राटदाराने युद्धपातळीवर रात्रंदिवस काम सुरू केले आहे. परंतु यावर्षी पावसाचे आगमन लवकर झाल्याने या ब्रिज बांधकामात अडथळा निर्माण झाला आहे. (Road damaged)
सध्या जांबोटी परिसरात पावसाचे प्रमाण मोठ्या प्रमाणात वाढल्याने मलप्रभा नदीतून पाण्याचा प्रवाह मोठ्या प्रमाणात होत आहे. शनिवारी मध्यरात्री पाण्याच्या प्रवाहामुळे हा पर्यायी मार्ग वाहून गेला आहे. त्यामुळे वाहतूक बैलूर मार्गे व खानापूरमार्गे वळविण्यात आली आहे.
