Tag:

border gavskar trophy

India’s unwanted Records : भारताचे नकोसे विक्रम

by प्रतिनिधी January 3, 2025

written by प्रतिनिधी

सिडनी : बॉर्डर-गावसकर मालिकेत सातत्याने फलंदाजीत अपयशी ठरत असलेल्या भारताचा डाव सिडनी कसोटीमध्ये १८५ धावांत कोसळला. या अपयशामुळे भारताच्या वाट्याला काही नकोसे विक्रम आले आहेत. अशाच काही आकडेवारीवर टाकलेला हा दृष्टिक्षेप.

१८५ – सिडनी मैदानावर खेळलेल्या कसोटींपैकी मागील चौदा वर्षांमधील ही पहिल्या डावातील नीचांकी धावसंख्या आहे. यापूर्वी, २०१० मध्ये ऑस्ट्रेलियाने या मैदानावर पाकिस्तानचा पहिला डाव १२७ धावांत संपवला होता.

२ – भारताला या मोसमात एकदाही पहिल्या डावात ४०० धावांचा टप्पा ओलांडता आला नाही. संपूर्ण कसोटी मोसमामध्ये पहिल्या डावात एकदाही ४०० धावांचा टप्पा ओलांडता न आलेला भारत हा केवळ दुसराच संघ आहे. यापूर्वी, २०००-०१ च्या मोसमात वेस्ट इंडिज संघालाही पहिल्या डावात ४०० हून अधिक धावसंख्या उभारता आली नव्हती. भारताने बांगलादेशविरुद्ध चेन्नई कसोटीत केलेल्या ३७६ धावा ही या मोसमातील भारताची पहिल्या डावामधील सर्वोच्च धावसंख्या आहे. (India’s unwanted Records)
१८.७४ – या मोसमातील भारताची पहिल्या डावातील प्रतिविकेट सरासरी. एका मोसमात किमान पाच कसोटी खेळलेल्या संघामध्ये ही सर्वांत नीचांकी प्रतिविकेट सरासरी आहे.
० – यंदाच्या मोसमात भारताच्या आघाडीच्या सात फलंदाजांना पहिल्या डावात एकही शतक झळकावता आलेले नाही. भारताकडून या मोसमात केवळ रविचंद्रन अश्विन आणि नितीश कुमार रेड्डी या दोघांनी पहिल्या डावात शतके झळकावली असून हे दोघेही आठव्या स्थानी फलंदाजीस आले होते. India’s unwanted Records)
१२.६ – विराट कोहलीची २०२४-२५ च्या मोसमातील पहिल्या डावामधील सरासरी. एका मोसमात किमान दहा डाव खेळलेल्या फलंदाजांमध्ये ही पहिल्या डावातील नीचांकी सरासरी आहे. यापूर्वी, हा नकोसा विक्रम ऑस्ट्रेलियाच्या डेव्हिड बून यांच्या नावावर होता. त्यांनी १९९४-९५ च्या मोसमात १२.६६ च्या सरासरीने १२ डावांत १५२ धावा केल्या होत्या. (India’s unwanted Records)
११ – बुमराहने या मालिकेत ११ वेळा सलामीवीरांच्या विकेट काढल्या आहेत. याबरोबरच त्याने एका मालिकेमध्ये सर्वाधिकवेळा सलामीवीरांच्या विकेट घेण्याच्या विक्रमाशी बरोबरी केली. ऑस्ट्रेलियाचा शेन वॉर्न आणि इंग्लंडचा स्टुअर्ट ब्रॉड यांनीसुद्धा एका मालिकेत ११ वेळा सलामीवीरांना बाद केले होते. वॉर्नने २००५ च्या ॲशेसमध्ये, तर ब्रॉडने २०१३ च्या ॲशेस मालिकेत ही कामगिरी केली होती. सिडनी कसोटीचा आणखी एक डाव शिल्लक असल्याने बुमराहला हा विक्रम मोडण्याची संधी आहे.

हेही वाचा :

भारताचे पुन्हा ‘पहिले पाढे पंचावन्न’

आकाश दीप सिडनी कसोटीस मुकणार

January 3, 2025 0 comments

क्रीडा

Akash Deep : आकाश दीप सिडनी कसोटीस मुकणार

by प्रतिनिधी January 2, 2025

written by प्रतिनिधी

सिडनी : भारताचा वेगवान गोलंदाज आकाश दीप पाठीच्या दुखण्यामुळे बॉर्डर-गावसकर मालिकेतील सिडनी येथे रंगणाऱ्या अखेरच्या कसोटीत खेळू शकणार नाही. त्याच्याजागी हर्षित राणा किंवा प्रसिध कृष्णा यांच्यापैकी एका गोलंदाजास अंतिम संघात स्थान मिळेल. दरम्यान, ऑस्ट्रेलियाने या कसोटीसाठी संघ जाहीर केला असून त्यामध्ये मिचेल मार्शच्या जागी नवोदित ब्यू वेबस्टरला पदार्पणाची संधी देण्यात आली आहे. (Akash Deep)

आकाशदीपला मेलबर्न कसोटीदरम्यान पाठीचे स्नायू दुखावल्यामुळे काही काळ मैदानाबाहेर जाऊन उपचार घ्यावे लागले होते. त्याची दुखापत बळावू नये, यासाठी त्याला सिडनी कसोटीतून विश्रांती देण्याचा निर्णय घेण्यात आला. त्याच्याजागी हर्षित किंवा प्रसिध यांपैकी एकाची निवड करण्यात येईल. हर्षितने या मालिकेतील पहिल्या दोन कसोटी खेळल्या आहेत. प्रसिध मात्र मागील वर्षभरापासून आंतरराष्ट्रीय कसोटी खेळलेला नाही. मागील वर्षी दक्षिण आफ्रिकेविरुद्ध खेळलेली कसोटी ही त्याची अखेरची कसोटी होती.

ऑस्ट्रेलिया संघामध्ये मिचेल मार्शच्या जागी ब्यू वेबस्टरची निवड करण्यात आली. यंदाच्या बॉर्डर-गावसकर ट्रॉफीमध्ये ऑस्ट्रेलियातर्फे आंतरराष्ट्रीय कसोटी पदार्पण करणारा वेबस्टर हा तिसरा क्रिकेटपटू ठरणार आहे. आतापर्यंत, नॅथन मॅकस्विनीने पर्थमध्ये, तर सॅम कॉन्स्टसने मेलबर्न कसोटीत पदार्पण केले होते. अष्टपैलू वेबस्टरने ऑस्ट्रेलियातील शेफिल्ड शिल्ड या देशांतर्गत क्रिकेट स्पर्धेच्या मागील मोसमामध्ये सर्वाधिक धावा केल्या आहेत. त्याने ५८.६२ च्या सरासरीने ९३८ धावा करतानाच ३० विकेटही घेतल्या होत्या. (Akash Deep)

हेही वाचा :

January 2, 2025 0 comments

Rohit Dropped : रोहित शर्मा संघाबाहेर?

by प्रतिनिधी January 2, 2025

written by प्रतिनिधी

सिडनी : बॉर्डर-गावसकर ट्रॉफी मालिकेतील सिडनी येथील अखेरच्या कसोटीसाठी भारताचा कर्णधार रोहित शर्मालाच संघातून वगळण्यात येणार असल्याची चर्चा आहे. सामन्याच्या पूर्वसंध्येस झालेल्या पत्रकार परिषदेमध्ये रोहितऐवजी प्रशिक्षक गौतम गंभीर उपस्थित राहिले. यावेळी, गंभीर यांनी अंतिम संघनिवडीबाबत मोघम उत्तर दिल्यामुळे रोहितला वगळण्यात येणार असल्याची शक्यता बळावली आहे. (Rohit Dropped)

या मालिकेतील तीन कसोटींमध्ये रोहित खेळला असून त्याला सहा डावांमध्ये मिळून केवळ ३१ धावा करता आल्या आहेत. ॲडलेड व ब्रिस्बेन येथील कसोटीत रोहित सहाव्या स्थानी फलंदाजीस आला होता. परंतु, मधल्या फळीत अपयशी ठरल्यानंतर मेलबर्न कसोटीमध्ये त्याने पुन्हा सलामीला खेळण्याचा निर्णय घेतला. यामुळे, त्याच्या कामगिरीत सुधारणा झाली नसली, तरी संघाचा समतोल मात्र बिघडला. रोहित सलामीला खेळल्याने त्याअगोदरच्या सामन्यांमध्ये सलामीला खेळलेल्या लोकेश राहुलला तिसऱ्या स्थानावर फलंदाजीस यावे लागले, तर शुभमन गिलला संघाबाहेर जावे लागले.

या पार्श्वभूमीवर सिडनी कसोटीसाठी शुभमनला पुन्हा अंतिम संघात स्थान मिळेल आणि यशस्वीसह राहुल सलामीला येईल, असे समजते. गुरुवारी झालेल्या अखेरच्या सरावसत्रामध्येही रोहितने थोडासा वेळच सराव केला. त्यामुळे रोहित सिडनी कसोटीत खेळणार नसल्याच्या शक्यतांना बळ मिळाले. मेलबर्न कसोटीत भारताचा पराभव झाल्यानंतर रोहित सिडनी कसोटीनंतर निवृत्ती पत्करेल, अशा चर्चा सुरू झाल्या होत्या. आता सिडनी कसोटीसाठी वगळल्यास मेलबर्न कसोटीच रोहितच्या कारकिर्दीतील अखेरची कसोटी ठरण्याची शक्याता आहे. (Rohit Dropped)

रोहितच्या अनुपस्थितीत उपकर्णधार जसप्रीत बुमराह भारतीय संघाचे नेतृत्व सांभाळेल. या मालिकेतील भारताचा एकमेव विजय हा बुमराहच्या नेतृत्वाखालीच मिळवलेला आहे. पर्थ येथील पहिल्या कसोटीत बुमराहने भारताचे नेतृत्व केले होते.

हेही वाचा :

January 2, 2025 0 comments

क्रीडा

Australia PM : दोन्ही संघांनी घेतली ऑस्ट्रेलियाच्या पंतप्रधानांची भेट

by प्रतिनिधी January 1, 2025

written by प्रतिनिधी

सिडनी : बॉर्डर-गावसकर ट्रॉफी मालिकेतील सिडनी येथील अखेरच्या कसोटीपूर्वी भारत व ऑस्ट्रेलियाच्या संघांनी ऑस्ट्रेलियाचे पंतप्रधान अँथनी अल्बानीज यांची भेट घेतली. नववर्षाच्या स्वागतासाठी अल्बानीज यांनी किरीबिल्ली हाउस या आपल्या निवासस्थानी कार्यक्रम आयोजित केला होता. याप्रसंगी अल्बानीज यांनी भारताचा वेगवान गोलंदाज जसप्रीत बुमराहचे कौतुक केले. (Australia PM)

सिडनी मॉर्निंग हेराल्ड या ऑस्ट्रेलियन वृत्तपत्राने यासंबंधीचे वृत्त दिले आहे. सुमारे दीड तास अल्बानीज यांनी दोन्ही संघांसोबत वेळ घालवला. “बुमराह दरवेळी गोलंदाजीस येतो, तेव्हा काहीतरी उत्कंठावर्धक घडते. त्याला डाव्या हाताने किंवा लंगडी घालत गोलंदाजी करावी लागेल, असा कायदा आपण येथे संमत करू शकतो,” अशी मिश्किल प्रतिक्रियाही अल्बानीज यांनी यावेळी दिली. ऑस्ट्रेलियाचा नवोदित फलंदाज सॅम कॉन्स्टसने या कार्यक्रमादरम्यान भारताच्या विराट कोहलीसोबत छायाचित्र घेतले. मेलबर्न कसोटीदरम्यान कॉन्स्टसला धक्का दिल्यामुळे विराटला मानधनाच्या २० टक्के दंड ठोठावण्यात आला होता. कॉन्स्टसचे पालकही या कार्यक्रमास उपस्थित होते. त्यांनी बुमराहसोबत छायाचित्र काढण्याची विनंती केली.

या कार्यक्रमामध्ये भारताचा कर्णधार रोहित शर्मा छोटेखानी भाषण करणार होता. तथापि, ऐनवेळी त्याच्याऐवजी भारताचे प्रशिक्षक गौतम गंभीरने हे भाषण केले. “ऑस्ट्रेलिया हा प्रवासासाठी खूप सुंदर, परंतु क्रिकेटदौरा करण्यासाठी खूप कठीण देश आहे. येथील प्रेक्षक हा उत्साही आहे. या दौऱ्यातील आमची आणखी एक कसोटी शिल्लक आहे. त्या कसोटीत आम्ही प्रेक्षकांचे मनोरंजन करू शकू, अशी मला आशा आहे,” असे गंभीर म्हणाला. (Australia PM)

ऑस्ट्रेलियाचा कर्णधार पॅट कमिन्सनेही या वेळी मनोगत व्यक्त केले. “मागील आठवड्यामध्ये मेलबर्नमधील कसोटी ही आम्ही खेळलेल्या सर्वोत्तम कसोटींपैकी एक आहे. त्या पाच दिवसांमध्ये आम्ही स्टेडियममध्ये जे वातावरण अनुभवले, तसे मी यापूर्वी कधीही अनुभवले नव्हते. या आठवड्यात होणाऱ्या मालिकेतील अखेरच्या कसोटीकरिताही मी तितकाच उत्सुक आहे. मालिकेचा निकाल या कसोटीवर अवलंबून असल्याने आम्हाला मालिका जिंकण्याची संधी आहे,” असे कमिन्सने सांगितले. अल्बानीज यांनी भारतीय संघाची या दौऱ्यामध्ये घेतलेली ही दुसरी भेट आहे. यापूर्वी भारत आणि प्राइम मिनिस्टिर इलेव्हन यांच्यामध्ये कॅनबेरा येथे रंगलेल्या सराव सामन्यापूर्वी अल्बानीज भारतीय संघास भेटले होते.

The Australian and Indian teams have already given us an incredible summer of cricket. pic.twitter.com/oqVDOOr5Bm

— Anthony Albanese (@AlboMP) January 1, 2025

p>
हेही वाचा :

January 1, 2025 0 comments

क्रीडा महत्त्वाच्या बातम्या

Rohit Sharma : रोहित शर्माची निवृत्ती आठवड्यावर?

by प्रतिनिधी December 31, 2024

written by प्रतिनिधी

सिडनी : मागील काही कसोटींमध्ये सातत्याने अपयशी ठरत असलेला भारताचा कर्णधार रोहित शर्माच्या कसोटी क्रिकेटमधून निवृत्तीच्या चर्चांनी जोर धरला आहे. बॉर्डर-गावसकर ट्रॉफी मालिकेतील सिडनी येथे अखेरची कसोटी पार पडल्यानंतर रोहित निवृत्तीची घोषणा करू शकतो, असे वृत्त आहे. (Rohit Sharma)

कर्णधार आणि फलंदाज म्हणूनही रोहित सध्या टिकाकारांच्या रडारवरती आहे. न्यूझीलंडविरुद्धची मायदेशातील मालिका ०-३ अशी गमावल्यानंतर त्याच्या नेतृत्वावर प्रश्नचिन्ह उपस्थित करण्यात येत होते. सध्या सुरू असणाऱ्या बॉर्डर-गावसकर ट्रॉफी मालिकेत भारताचा एकमेव विजय हा रोहितच्या अनुपस्थितीत जसप्रीत बुमराहच्या नेतृत्वाखाली मिळालेला आहे. ॲडलेड येथे दुसऱ्या कसोटीत परतल्यानंतरची रोहितची कर्णधार म्हणून तीन कसोटींमधील कामगिरी ही दोन पराभव व एक अनिर्णित अशी आहे. एकाच मोसमात पाच कसोटी सामने गमावणारा रोहित हा भारताचा केवळ दुसराच कर्णधार ठरला आहे. यापूर्वी सचिन तेंडुलकरच्या नेतृत्वाखाली १९९९ मध्ये भारताने एकाच मोसमात पाच कसोटींमध्ये पराभव पत्करले होते. (Rohit Sharma)

मेलबर्न कसोटीतील पराभवानंतर जागतिक कसोटी अजिंक्यपद स्पर्धेची (वर्ल्ड टेस्ट चॅम्पियनशीप) अंतिम फेरी गाठण्याच्या भारताच्या आशा धुसर बनल्या आहेत. भारताने सिडनी कसोटी जिंकली, तरीही संघाला ऑस्ट्रेलिया-श्रीलंका कसोटी मालिकेच्या निकालावर अवलंबून राहावे लागणार आहे. अशातच फलंदाज म्हणूनही रोहित शर्मा सातत्याने अपयशी ठरतो आहे. या मोसमात रोहितला आतापर्यंत आठ कसोटींमध्ये केवळ एक अर्धशतक झळकावता आले आहे. मोसमातील त्याची सरासरी १०.९३ इतकी कमी आहे. यंदाच्या बॉर्डर-गावसकर ट्रॉफीमध्ये त्याला तीन कसोटींतील सहा डावांमध्ये मिळून केवळ ३१ धावा करता आल्या आहेत. ॲडलेड व ब्रिस्बेन कसोटीत रोहित सहाव्या स्थानी फलंदाजीस आला होता. मेलबर्नला रोहितने पुन्हा सलामीला येण्याचा निर्णय घेतला. त्यामुळे अगोदरच्या कसोटींमध्ये सलामीला प्रभावी कामगिरी करणाऱ्या लोकेश राहुलला तिसऱ्या स्थानी फलंदाजीस यावे लागले, तर शुभमन गिलला संघाबाहेर राहावे लागले. (Rohit Sharma)

या सर्व पार्श्वभूमीवर क्रिकेटप्रेमींबरोबरच क्रिकेटतज्ज्ञही रोहितच्या निवृत्तीची चर्चा करू लागले आहेत. फलंदाज म्हणून रोहितच्या पायांची हालचाल मंदावली असून त्याच्या फटक्यातील सफाईही दिसून येत नाही. कर्णधार म्हणूनही त्याच्या नेतृत्वात कल्पकतेचा अभाव आहे. त्यामुळे, भारतीय क्रिकेट नियामक मंडळाने (बीसीसीआय) रोहितची कर्णधारपदावरून हकालपट्टी करत त्याला संघातून डच्चू देण्यापूर्वी रोहितसमोर सन्मानाने निवृत्त होण्याचा पर्याय आहे. परिणामी, सिडनी कसोटीनंतर रोहित निवृत्तीची घोषणा करू शकतो. हा सामना जिंकला तरीही रोहित विजयासह सन्मानाने कसोटीला अलविदा करू शकतो. फेब्रुवारीत चॅम्पियन्स ट्रॉफी ही महत्त्वाची स्पर्धा असल्याने त्यापूर्वी कसोटीचे ओझे उतरवल्यास रोहित पुन्हा नव्या जोमाने ‘वन-डे’मध्ये भारताचे नेतृत्व करू शकेल. (Rohit Sharma)

हेही वाचा :

December 31, 2024 0 comments

क्रीडा महत्त्वाच्या बातम्या

‌Bumrah Nomination: बुमराहला सर्वोत्कृष्ट क्रिकेटपटूसाठी नामांकन

by प्रतिनिधी December 30, 2024

written by प्रतिनिधी

दुबई : आंतरराष्ट्रीय क्रिकेट परिषदेतर्फे (आयसीसी) सर्वोत्कृष्ट क्रिकेटपटूसाठी देण्यात येणाऱ्या सर गारफिल्ड सोबर्स ट्रॉफीकरिता सोमवारी नामांकने जाहीर करण्यात आली. यामध्ये, भारताचा प्रमुख वेगवान गोलंदाज जसप्रीत बुमराहला नामांकन मिळाले आहे. त्याच्यासह इंग्लंडचे जो रूट व हॅरी ब्रुक आणि ऑस्ट्रेलियाचा ट्रॅव्हिस हेड या पुरस्काराच्या शर्यतीत आहे. याबरोबरच, बुमराहला सर्वोत्कृष्ट कसोटीपटूसाठीही नामांकन मिळाले आहे. (‌Bumrah Nomination)

या वर्षी बुमराहने १३ कसोटी सामन्यांत १३.९२ च्या सरासरीने ७१ विकेट्स घेतल्या आहेत. २०२४ साली आंतरराष्ट्रीय कसोटी क्रिकेटमध्ये तो सर्वाधिक विकेट घेणारा गोलंदाज आहे. सध्या सुरू असलेल्या बॉर्डर-गावसकर ट्रॉफी मालिकेत त्याने आतापर्यंत ४ कसोटींत ३० विकेट घेतल्या आहेत. सध्या आयसीसी कसोटी गोलंदाजांच्या क्रमवारीतही तो ९०४ गुणांसह अग्रस्थानी आहे. याबरोबरच त्याने टी-२० क्रिकेट वर्ल्ड कपमध्ये ८ सामन्यांत १५ विकेट घेऊन भारताला जगज्जेतेपद मिळवून देण्यात मोलाचा वाटा उचलला होता. (‌Bumrah Nomination)

बुमराहसह नामांकन लाभलेल्या इंग्लंडचा जो रूट हा २०२४ मध्ये सर्वाधिक धावा करणारा फलंदाज आहे. त्याने १७ कसोटींमध्ये ५५.५७ च्या सरासरीने सहा शतकांसह १,५५६ धावा केल्या आहेत. तोसुद्धा सध्या आयसीसी कसोटी फलंदाजांच्या क्रमवारीत अव्वलस्थानी आहे. इंग्लंडच्या हॅरी ब्रुकने यावर्षी १२ कसोटींमध्ये ५५ च्या सरासरीने १,१०० धावा केल्या असून त्यांमध्ये चार शतके व तीन अर्धशतकांचा समावेश आहे. त्याने या वर्षी पाकिस्तानविरुद्ध मुलतानमध्ये केलेली ३१७ धावांची खेळी ही इंग्लंडच्या विजयासाठी महत्त्वपूर्ण ठरली होती. ऑस्ट्रेलियाच्या ट्रॅव्हिस हेडने या वर्षी ९ कसोटींमध्ये ४०.५३ च्या सरासरीने ६०८ धावा केल्या आहेत. याबरोबरच त्याने १५ टी-२० सामन्यांत १७८.४७ च्या स्ट्राइक रेटने ५३९ धावाही केल्या आहेत. त्याने बॉर्डर-गावसकर ट्रॉफी स्पर्धेमध्ये ॲडलेड व ब्रिस्बेन कसोटीत लागोपाठ शतके झळकावली आहेत. (‌Bumrah Nomination)

सर्वोत्कृष्ट कसोटीपटूच्या पुरस्कारासाठी बुमराह, ब्रुक व रूट यांच्यासह श्रीलंकेच्या कमिंदू मेंडिसलाही नामांकन मिळाले आहे. मेंडिसने यावर्षी कसोटीत ७४.९२ च्या सरासरीने १०४९ धावा केल्या आहेत. आतापर्यंत राहुल द्रविड (२००४), सचिन तेंडुलकर (२०१०), रवीचंद्रन अश्विन (२०१६) आणि विराट कोहली (२०१७ व २०१८) हे भारतीय क्रिकेटपटू सर गारफिल्ड ट्रॉफीचे मानकरी ठरले आहेत. (‌Bumrah Nomination)

हेही वाचा :

वर्ल्ड चॅम्पियनशीपमधील भारताची वाटचाल खडतर

ऑस्ट्रेलियाने भारताला १८४ धावांनी हरवले

December 30, 2024 0 comments

क्रीडा

India-Australia: ऑस्ट्रेलियाने भारताला १८४ धावांनी हरवले

by प्रतिनिधी December 30, 2024

written by प्रतिनिधी

मेलबर्न : बॉर्डर-गावसकर ट्रॉफी मालिकेतील चौथ्या कसोटीत ऑस्ट्रेलियाने भारताचा दुसरा डाव १५५ धावांवर गुंडाळत १८४ धावांनी दणदणीत विजय मिळवला. या विजयासह यजमानांनी पाच सामन्यांच्या या मालिकेत २-१ अशी आघाडी घेतली. सोमवारी, अखेरच्या दिवशी ऑस्ट्रेलियाने भारताला जिंकण्यासाठी ३४० धावांचे लक्ष्य दिले होते. परंतु, भारताच्या दिग्गज फलंदाजांनी ऑसी गोलंदाजांपुढे नांगी टाकल्याने संघाला लाजिरवाणा पराभव स्वीकारावा लागला. या विजयामुळे ऑस्ट्रेलियाने वर्ल्ड चॅम्पियनशीपची अंतिम फेरी गाठण्याच्या दिशेने आणखी एक पाऊल टाकले आहे. तर भारताचा या स्पर्धेच्या अंतिम फेरीतील प्रवेश जर-तरच्या गणितावर अवलंबून असेल.(India-Australia)

भारतातर्फे यशस्वी जैस्वालने कडवी झुंज देत ८४ धावा जमवल्या. पण त्याला बाद करण्याचा निर्णय वादग्रस्त ठरला. डीआरएसमध्ये बॅटला चेंडू लागला नसताना पंचांनी त्याला बाद ठरवल्याने ‘पंचानी जैस्वालला कापला,’ अशी भावना तमाम भारतीय क्रिकेटशौकिनांकडून उमटली. ऑसी कर्णधार पॅट कमिन्स सामनावीर ठरला. त्याने दोन डावांत सहा बळी घेण्याबरोबरच फलंदाजीतही मोठा हातभार लावला. या कसोटीत ऑस्ट्रेलियाने पहिल्या डावात ४७४ धावा केल्यानंतर भारताने पहिला डावात ३६९ धावा केल्या. पहिल्या डावात ऑस्ट्रेलियाला १०५ धावांची आघाडी मिळाली होती. ऑस्ट्रेलियाचा दुसरा डाव २३४ धावांवर संपुष्टात आल्यानंतर भारतासमोर विजयासाठी ३४० धावांचे आव्हान होते.(India-Australia)

कर्णधार रोहित शर्मा, राहुल, कोहली झटपट बाद

विजयी लक्ष्याचा पाठलाग करताना कर्णधार रोहित शर्मा आणि यशस्वी जैस्वाल या भारताच्या सलामी जोडीने सुरवातीला सावध खेळ करत आठ षटकांत १२ धावा जमवल्या. पॅट कमिन्सने रोहितला ९ धावावर बाद केले. त्यानंतर मैदानावर उतरलेल्या केएल राहुलला पहिल्याच चेंडूवर कमिन्सने शून्य धावावर मैदानाबाहेर घालवले. पहिल्या स्लीपमध्ये ख्वाजाने त्याचा झेल घेतला. उपाहारापूर्वीच्या शेवटच्या मिचेल स्टार्कच्या षटकात पहिल्याच चेंडूवर विराट कोहली फटका मारण्याच्या नादात बाद झाला. त्याने पाच धावा केल्या. उपाहाराला खेळ थांबला तेव्हा भारताची स्थिती ३ बाद ३३ अशी होती.

जैस्वाल-पंतने डाव सावरला; जैस्वालचे अर्धशतक

उपाहारानंतर यशस्वी जैस्वाल आणि ऋषभ पंत यांनी भारताचा डाव सावरण्याचा प्रयत्न केला. या दोघांनी खेळपट्टीवर चांगलाच तग धरला होता. ४० व्या षटकात यशस्वी जैस्वालने १२७ चेंडूत अर्धशतक पूर्ण केले. त्यावेळी भारताची धावसंख्या ३ बाद ८६ होती. या दोघांनी संपूर्ण सत्रात ऑस्ट्रेलियाला यश मिळू न देता संघाचे शतक धावफलकावर झळकावले. चहापानापर्यंत भारताने ३ बाद ११५ धावा केल्या होत्या. चहापानानंतर ट्रॅव्हिस हेडच्या चेंडूवर फटका मारण्याच्या नादात पंत बाद झाला. सीमारेषेवर मिचेल मार्शने त्याचा झेल टिपला. त्यानंतर मैदानात उतरलेला रवींद्र जडेजा अवघ्या दोन धावा करून तंबूत परतला. स्कॉट बॉलंडने त्याला बाद केले. त्यानंतर ऑस्ट्रेलियाच्या गोलंदाजानी टिच्चून मारा करत भारतीय फलंदाजांना खेळपट्टीवर टिकू दिले नाही. पहिल्या डावात शतक झळकावणारा नितीश कुमार रेड्डी एका धावावर बाद झाला. ऑफ स्पिनर नॅथन लायनच्या गोलंदाजीवर स्लीपमध्ये स्टीव्ह स्मिथने आरामात त्याचा झेल टिपला.(India-Australia)

जैस्वाल ‘बाद’ चा निर्णय वादग्रस्त

रेड्डी बाद झाल्याने भारताच्या गोटात पराभवाची चिंता सतावू लागली. एका बाजूला यशस्वी जैस्वाल खेळपट्टीवर ८४ धावांवर टिकून होता. मिचेल स्टार्कच्या उसळता चेंडूवर हूक मारण्याच्या नादात जैस्वाल बाद झाला. मैदानावरील पंचांनी त्याला नाबाद ठरवल्यानंतर ऑस्ट्रेलियाने डीआरएस घेतला. पण चेंडू त्याच्या बॅटला आणि ग्लोव्ह्जला लागला नसतानाही त्यांना बाद ठरवण्यात आल्याने पंचाच्या निर्णयावर जैस्वालने नाराजी व्यक्त केली. मैदानावर उपस्थित भारतीय क्रिकेट समर्थकांनी पंचाच्या निर्णयाची खिल्ली उडवली. जैस्वाल बाद झाल्याने ऑस्ट्रेलिया विजयाच्या समीप आला. आकाश दीप आणि जसप्रीत बुमराह पाठोपाठ बाद झाल्यानंतर भारताला लाजिरवाणा पराभव स्वीकारावा लागला. पॅट कमिन्स आणि स्कॉट बोलॅंडने प्रत्येकी तीन, तर लायनने दोन विकेट घेतल्या.

धावफलक

ऑस्ट्रेलिया : पहिला डाव ४७४ आणि दुसरा डाव ८३.४ षटकांत सर्वबाद २३४.
भारत : पहिला डाव ३६९ आणि दुसरा डाव – यशस्वी जैस्वाल झे. कॅरी गो. कमिन्स ८४, रोहित शर्मा झे. मार्श गो. कमिन्स ९, लोकेश राहुल झे. ख्वाजा गो. कमिन्स ०, विराट कोहली झे. ख्वाजा गो. स्टार्क ५, रिषभ पंत झे. मार्श गो. हेड ३०, रवींद्र जडेजा झे. कॅरी गो. बोलंड २, नितीश कुमार रेड्डी झे. स्मिथ गो. लायन १, वॉशिंग्टन सुंदर नाबाद ५, आकाश दीप झे. हेड गो. बोलंड ७, जसप्रीत बुमराह झे. स्मिथ गो. बोलंड ०, महंमद सिराज पायचीत गो. लायन ०, अवांतर १२, एकूण – ७९.१ षटकांत सर्वबाद १५५.
बाद क्रम : १-२५, २-२५, ३-३३, ४-१२१, ५-१२७, ६-१३०, ७-१४०, ८-१५०, ९-१५४, १०-१५५.
गोलंदाजी : मिचेल स्टार्क १६-८-२५-१, पॅट कमिन्स १८-५-२८-३, स्कॉट बोलंड १६-७-३९-३, मिचेल मार्श ३-२-२-०, नॅथन लायन २०.१-६-३७-२, ट्रॅव्हिस हेड ५-०-१४-१, मार्नस लॅबुशेन १-१-०-०.

https://www.espncricinfo.com/series/australia-vs-india-2024-25-1426547/australia-vs-india-4th-test-1426558/full-scorecard

हेही वाचा :

कोनेरू हम्पी विश्वविजेती
अर्शदीपला आयसीसीचे नामांकन

December 30, 2024 0 comments

border gavskar trophy

Queue