ठाणे

मुंबई; विशेष प्रतिनिधी : विधानसभा निवडणुकीत भोपळाही फोडू न शकलेल्या मनसेला आता आणखी एक धक्का बसला आहे. ठाण्याचे जिल्हाध्यक्ष अविनाश जाधव यांनी आपल्या पदाचा राजीनामा दिला आहे. ठाणे , पालघरमधील पराभवाची जबाबदारी स्वीकारत राजीनामा देत असल्याचे त्यांनी राज ठाकरेंना लिहिलेल्या पत्रात म्हटले आहे. त्यामुळे ते पक्षातच राहणार की, अन्य कुठली पक्षात प्रवेश करणार? याबाबत चर्चा सुरू झाली आहे.

जाधव यांनी स्वतः ठाणे विधानसभा मतदारसंघातून निवडणूक लढवली होती. मात्र, त्यात ते तिसऱ्या स्थानावर राहिले. पक्षप्रमुख राज ठाकरे यांना पाठवलेल्या पत्रात त्यांनी म्हटले आहे की, ठाणे आणि पालघर येथे पराभवाची जबाबदारी घेऊन मी माझ्या जिल्हाध्यक्ष पदाचा राजीनामा देत आहे. काम करताना माझ्याकडून कळत नकळत काही चूक झाली असल्यास आपण मला माफ करावे. यानंतर जाधव आगामी राजकीय भूमिका कोणती घेतात, याकडे ठाण्यातील मनसे सैनिकाचे लक्ष लागून राहिले आहे.