मुंबई : प्रतिनिधी : मुंबई पोलिसमध्ये पोर्ट झोनचे डीसीपी डॉ. सुधाकर पठारे यांचे अपघाती निधन झाले. तेलंगणातील श्रीशैलम येथून ते नागरकुरलूनकडे जात होते. त्यावेळी त्यांच्या कारचा अपघात झाला. त्यात त्यांचा जागीच मृत्यू झाला. त्यांच्यासह त्यांच्या एका नातेवाइकाचाही मृत्यू झाला. (IPS Pathare death)
डॉ. पठारे हे ज्या गाडीतून प्रवास करत होते त्या गाडीची ट्रकला धडक बसली. पठारे हे २०११ बॅचचे आयपीएस अधिकारी आहेत.
सुधाकर पठारे सध्या मुंबई पोलिसमध्ये पोर्ट झोनचे डीसीपी म्हणून कार्यरत होते. ते प्रशिक्षणासाठी हैदराबादमध्ये गेले होते. त्या ठिकाणी त्यांच्या एका नातेवाईकासह ते ज्योतिर्लिंगाच्या दर्शनासाठी जात होते. यावेळी झालेल्या अपघातात सुधाकर पठारे यांच्यासोबत भागवत खोडके या नातेवाईकाचाही मृत्यू झाला. दरम्यान, या घटनेची माहिती तेलंगणा पोलिसांना मुंबई पोलिसांना दिली. (IPS Pathare death)
अल्प परिचय
सुधाकर पठारे स्पर्धा परीक्षा देत असताना १९९५ साली ते जिल्हा विशेष लेखापरीक्षक झाले. यानंतर १९९६ साली विक्रीकर अधिकारी वर्ग १ म्हणून त्यांची निवड झाली. १९९८ साली पोलिस उपअधीक्षक म्हणून त्यांची निवड झाली.
सुधाकर पठारे हे २०११ बॅचचे आयपीएस अधिकारी होते. ते मूळचे वाळवणे (ता. पारनेर, जि. अहमदनगर) येथील होते. आयपीएस होण्याअगोदर ते शासनाच्या वेगवेगळ्या खात्यांमध्ये अधिकारी म्हणून राहिले आहेत. डॉ. सुधाकर पठारे यांचे शिक्षण एम.एस्सी. अॅग्री, एलएलबी झाले होते. (IPS Pathare death)
त्यांनी पोलिस उपअधीक्षक म्हणून पंढरपूर, अकलूज, कोल्हापूर शहर, राजुरा येथे सेवा बजावली. अप्पर पोलिस अधीक्षक म्हणून चंद्रपूर, वसई तर पोलिस अधीक्षक म्हणून सीआयडी अमरावती येथे सेवा बजावली. पोलिस उपायुक्त म्हणून मुंबई, ठाणे, पुणे, वाशी, नवी मुंबई, ठाणे शहर येथे सेवा बजावली आहे. डॉ. पठारे यांनी पोलिस खात्यात सेवा बजावताना संघटित गुन्हेगारी (मोक्का), तडीपारी, एमपीडीए अशा प्रतिबंधात्मक कारवाईंचा धडाका लावला होता. कायदा व सुव्यवस्था अबाधित राखण्याबरोबरच त्यांनी पोलिस दलात अनेक विविध उपक्रम राबवले होते.
हेही वाचा :
अजित पवारांनी शेतकऱ्यांच्या जखमेवर मीठ चोळले
वाघ्या कुत्र्याच्या स्मारकाबाबत मुख्यमंत्री म्हणाले…