जयपूर; वृत्तसंस्था : राजस्थानमधील टोंक येथे उपजिल्हाधिकाऱ्यांना थप्पड मारणाऱ्या आ. नरेश मीणा यांना गुरूवारी (दि.१४) अटक करण्यात आली. पोलिसांनी त्यांना सामरावता गावातून अटक केली आहे. गावात मोठा पोलिस बंदोबस्त तैनात करण्यात आला आहे. मीणा यांच्या समर्थकांनी रस्त्यावर जाळपोळ केली. शंभरहून अधिक गाड्या जाळण्यात आल्या. पोलिसांवर दगडफेक केल्यामुळे पोलिसांना हवेत फैरी झाडाव्या लागल्या. (Naresh Meena)
देवळी- उनियाडा विधानसभा मतदारसंघातील पोटनिवडणुकीदरम्यान अपक्ष उमेदवार यांनी उपजिल्हाधिकारी मालपुरा अमित चौधरी यांना कानशिलात लगावला. बोगस मतदान सुरू असल्याचा आरोप करत ते समर्थकांसह धरणे आंदोलन करत असताना जबरदस्त राडा आणि दगडफेक करण्यात आली. दरम्यान मीणा यांना अटक करण्यासाठी पोलीस आले असताना समर्थकांनी पोलिसांवर दगडफेक करत वाहनांची जाळपोळ केली.
दरम्यान, उपजिल्हाधिकाऱ्याच्या कानशीलात लगावल्याची कबुली मीणा यांनी दिली. तोडफोड आणि जाळपोळ प्रकरणी पोलिसांनी आतापर्यंत ६० जणांना अटक केली आहे. मीणा यांना याप्रकरणात लगेच अटक केली होती. मात्र त्यांचे समर्थक पोलीस ठाण्यावर मोठ्या संख्येने जमले आणि त्यांनी मीणा यांना सोडून देण्यास भाग पाडले. (Naresh Meena)
दरम्यान, माध्यम प्रतिनिधींशी बोलताना मीणा म्हणाले की, सचिन पायलट, हनुमान बेनिवाल, किरोडी लाल मीणा, कर्नल बैंसला आणि लालू यादव यांचे काम माझ्यासमोर आहे. मला त्यांच्यासारखे व्हायचे आहे. त्यांचे नेतृत्वही संघर्षातून उभे राहिले आहे. सचिन पायलट हे माझे सर्वांत आवडते नेते आहेत.