मुंबई : मुंबईतील राष्ट्रवादी काँग्रेसचे ज्येष्ठ नेते बाबा सिद्दीकी यांच्या हत्येप्रकरणी गुन्हे शाखेने शुक्रवारी आणखी पाच आरोपींना अटक केली. याप्रकरणी बाबा सिद्दीकी यांचा मुलगा आ. झिशान यांनी उपमुख्यमंत्री देवेंद्र फडणवीस यांची भेट घेतली. या वेळी उपमुख्यमंत्री अजित पवार, प्रफुल्ल पटेल यांच्यासह वरिष्ठ पोलिस अधिकारीही उपस्थित होते. पोलिसांनी झिशान आणि त्याच्या कुटुंबीयांना या प्रकरणाच्या तपासाची माहिती दिली आहे. (Baba Siddique)
याआधी गुरुवारी मुंबई पोलिसांनी मुख्य शूटर शिवकुमार गौतमसह तीन आरोपींना देशातून पळून जाण्यापासून रोखण्यासाठी ‘लूक आउट नोटीस’जारी केली. त्यात नाव असलेल्या इतर दोन आरोपींमध्ये शुभम लोणकर आणि संशयित हँडलर मोहम्मद जीशान अख्तरची नावे आहेत. या अधिकाऱ्याने सांगितले, की आरोपींना पकडण्यासाठी मुंबई पोलिसांच्या गुन्हे शाखेची पथके देशाच्या विविध भागात पाठवण्यात आली आहेत. आरोपी देश सोडून पळून जाण्याचा प्रयत्न करू शकतात, म्हणून लूक आऊट नोटीस’जारी करण्यात आली आहे.
पोलिसांनी आत्तापर्यंत हरियाणाचा रहिवासी गुरमेल बलजीत सिंग (२३), हरिशकुमार बलकराम निसाद (२३) आणि पुण्यातील शुभम लोणकरचा भाऊ प्रवीण लोणकर याच्यासह नऊ जणांना अटक केली आहे. सिद्दीकी यांच्या हत्येचा तपास सुरू आहे. मुंबई पोलिसांची गुन्हे शाखा आता त्याच्या सुरक्षा कर्मचाऱ्यांची चौकशी करणार आहे. लोणकर बंधूंनी निषादच्या माध्यमातून शूटरला पाच लाख रुपये रोख दिले होते. शुभम पुण्यात डेअरी चालवतो. शुभमच्या चौकशीत तो गँगस्टर लॉरेन्स बिश्नोईचा भाऊ अनमोलच्या संपर्कात असल्याचे समोर आले. जामीन मिळाल्यानंतर २४ सप्टेंबरला शुभम बेपत्ता झाला, त्याचवेळी पोलिस त्याच्यावर नजर ठेवून होते. (Baba Siddique)
सुरक्षा रक्षकांची चौकशी
सिद्दीकी यांना ‘२+१’ सुरक्षा मिळाली होती. म्हणजेच दिवसा दोन आणि रात्री एक सुरक्षा रक्षक तैनात करण्यात येणार आहे. रिपोर्टनुसार, सिद्दीकी वांद्रे पूर्वेला गेले, तेव्हा त्यांच्यासोबत दोन सुरक्षा रक्षक उपस्थित होते; पण रात्री साडेआठ वाजण्याच्या सुमारास बाबा सिद्दीकी मुलाच्या कार्यालयातून बाहेर पडण्यापूर्वीच एक सुरक्षारक्षक कुठेतरी गेला होता. याचा अर्थ असा की सिद्दीकी यांच्यासोबत फक्त एक सुरक्षा रक्षक होता. त्याने गोळीबार झाला, तेव्हा प्रत्युत्तर दिले नाही. याबाबत प्रश्न उपस्थित केले जात आहेत.
हेही वाचा :
- विदर्भातील जागा देण्यास पटोलेंचे ठाकरे गटाला ‘ना ना’!
- आमदार सतीश चव्हाण यांचे ६ वर्षासाठी निलंबन; सुनिल तटकरे
- पाचगणी मुख्याधिकारी यांना उच्च न्यायालयाची नोटीस