लातूर : प्रतिनिधी : लातूर महापालिकेचे आयुक्त बाबासाहेब मनोहरे यांनी स्वत:च्या डोक्यात गोळी झाडून घेतली. शनिवारी रात्री साडेअकरा वाजण्याच्या सुमारास ही घटना बार्शी रोडजवळील त्यांच्या शासकीय निवासस्थानी घडली. त्यांना तातडीने रूग्णालयात दाखल केले. त्यांची प्रकृती चिंताजनक असून, व्हेंटिलेटवर उपचार सुरू असल्याचे डॉक्टरांनी सांगितले. या घटनेने लातूर शहरासह सरकारी अधिकाऱ्यांच्या वर्तुळात खळबळ उडाली. (Latur Commissioner)
शनिवारी आयुक्त बाबासाहेब मनोहरे घरीच होते. त्यावेळी घरी पत्नी आणि दोन मुले होती. त्यांनी स्वत:च्या खोलीत जाऊन गोळी झाडून घेतली. मोठा आवाज झाल्याने कुटुंबातील सदस्यांनी खोलीकडे धाव घेतली. पण त्यावेळी त्या खोलीचा दरवाजा आतून बंद होता. सुरक्षा रक्षक आणि कुटुंबियांनी दरवाजा तोडून त्यांना तातडीने हॉस्पिटलमध्ये उपचारास दाखल केले. (Latur Commissioner)
मनपा आयुक्त मनोहरे यांनी स्वत:च्या डोक्यात गोळी झाडून का घेतली, याचा पोलिस तपास करीत आहेत. प्राथमिक माहितीनुसार त्यांनी स्वत:च डोक्यात गोळी झाडल्याचे दिसून येत आहे, असे पोलिस म्हणाले. आयुक्त मनोहरे यांनी २० ऑक्टोबर २०२२ रोजी लातूर महापालिकेत पदभार स्विकारला होता. आयुक्त आणि प्रशासक असल्याने संपूर्ण कारभार तेच पाहत होते. नुकताच २७ मार्च रोजी त्यांनी मनपाचा अर्थसंकल्प सादर केला. शनिवारी सुटी असल्याने ते घरीच होते. (Latur Commissioner)
आयुक्त मनोहरे यांना तातडीने सह्याद्री रूग्णालयात दाखल करण्यात आले. प्रकृती गंभीर असून, ते व्हेंटिलेटरवर आहेत. उपचार करणारे न्यूरोसर्जन डॉ. हणमंत किनीकर म्हणाले, उजव्या कानशिलाच्या बाजूने गोळी आत जावून डावीकडे वरच्या बाजूने गेली आहे. प्रकृती गंभीर असली तरी त्यांच्या मोठ्या रक्तवाहिनीला दुखापत नाही. त्या रक्तवाहिनीच्या जवळून गोळी गेली आहे. डॉक्टराकडून सर्वोतोपरी प्रयत्न सुरू आहेत. त्यांच्या प्रकृतीत सुधारणा होईल, अशी अपेक्षा आहे, असेही डॉ. किनीकर म्हणाले. (Latur Commissioner)
घटनेची माहिती मिळाल्यानंतर आमदार अमित देशमुख यांनी जिल्हाधिकारी डॉ.वर्षा ठाकूर-घुगे, जिल्हा पोलिस अधीक्षक सोमय मुंडे यांच्याशी संपर्क साधून आयुक्तांच्या प्रकृतीची विचारपूस करून घटनेची माहिती घेतली. दरम्यान, जिल्हा पोलिस अधीक्षक मुंडे, महापालिकेतील वरिष्ठ अधिकारी रूग्णालयात पोहोचले होते. (Latur Commissioner)
हेही वाचा :
