बेळगाव

बेळगाव : महाराष्ट्र एकीकरण समितीचा महामेळावा रविवारी येथे आयोजित केला होता. मात्र पोलिसांनी दडपशाहीच्या मार्गाने होऊ दिला नाही. पोलिसांनी मेळावा होण्याची शक्यता असलेल्या ठिकाणांवर जमावबंदी आदेश लागू केला होता. तरीही मेळाव्यासाठी मराठी भाषिक आणि समितीचे कार्यकर्ते येत होते. त्यांना पोलिसांनी ताब्यात घेतले. ‘बेळगाव-निपाणी-बिदर-भालकी-कारवारसह संयुक्त महाराष्ट्र झालाच पाहिजे,’ ‘महाराष्ट्रात सामील झाल्याशिवाय आम्ही राहणार नाही,’ असा इशारा कार्यकर्त्यांनी यावेळी दिल्या. (Belgaon News)

१) पोलिसांनी कार्यकर्त्यांची धरपकड करून अन्यत्र नेताना कार्यकर्त्यांनी घोषणाबाजी केली.

२) एकेकट्या आलेल्या कार्यकर्त्यांनी पोलिसांनी तत्काळ ताब्यात घेतले.

३) समितीने मेळाव्याची घोषणा केल्यानंतर रविवारी सकाळपासूनच शहरात ठिकठिकाणी बंदोबस्त तैनात करण्यात आला होता. त्यांच्याकडे असलेल्या ड्रोनच्या माध्यमातून सर्व हालचालींवर लक्ष ठेवण्यात येत होते.

४) ठिकठिकाणांहून आलेल्या कार्यकर्त्यांची पोलिसांनी धरपकड केली. त्यांना एका वाहनातून अन्यत्र हलवले.

५) धर्मवीर संभाजी महाराज चौकात कार्यकर्ते मोठ्या संख्येने येतील, अशी शक्यता गृहीत धरून येथे मोठा बंदोबस्त तैनात केला होता.

कोल्हापूर; प्रतिनिधी : मध्यवर्ती महाराष्ट्र एकिकरण समितीच्या मेळाव्याला कर्नाटक राज्य सरकारने परवानगी नाकारली असून मेळाव्याला उपस्थित राहण्यासाठी निघालेल्या बेळगाव आणि कोल्हापूरातील मराठी नेत्यांची पोलिसांकडून धरपकड करण्यात आली आहे. कोल्तहापूरातील शिवसैनिकांना कोगनोळी नाक्यावर रोखल्यावर पोलिस आणि शिवसैनिकांत जोरदार धक्काबुक्की झाली. मेळावा यशस्वी करणार असा निर्धार मराठी भाषिकांनी केला आहे. महाराष्ट्र कर्नाटक सीमेवरील कोगनोळी टोल नाक्यासह कर्नाटकात प्रवेश करणाऱ्या रस्त्यांवर कडक पोलिस बंदोबस्त ठेवण्यात असल्याने सीमाभागात तणावाचे वातावरण निर्माण झाले आहे. (Maharashtra Ekikaran Yuva Samiti)

महाराष्ट्र एकीकरण समितीने बेळगावात आज सोमवारी (दि.९) मराठी भाषिकांचा मेळावा आयोजित केला आहे. पण कर्नाटक पोलिसांनी आठ ते २० डिसेंबर या कालावधीत जमावबंदीचा आदेश लागू केला आहे. बेळगावातील एकिकरण समितीच्या नेते, पदाधिकारी आणि कार्यकर्त्यांवर कर्नाटक पोलिसांकडून पाळत ठेवली आहे. मेळाव्याला हजर राहणाऱ्या महाराष्ट्रातील नेत्यांना प्रवेश बंदी केली आहे. तरीही कोल्हापूरातील शिवसेना उद्धव ठाकरे पक्षाने मेळाव्याला उपस्थिती राहण्याचा निर्धार केला आहे.

आज सोमवारी सकाळी दहा वाजण्याच्या सुमारास ताराराणी चौकातील महाराणी ताराराणी यांच्या पुतळ्याला वंदन करुन शिवसेनेने भगवी रॅलीद्वारे बेळगावकडे कूच केले. शिवसेनेचे उप नेते संजय पवार, संपर्क प्रमुख विजय देवणे, जिल्हा प्रमुख सुनील शिंत्रे, शहर प्रमुख सुनील मोदी, संभाजी भोकरे यांच्यासह शिवसैनिक भगवे ध्वज, बाळासाहेब ठाकरे यांची प्रतिमा घेऊन मोठ्या संख्येने रॅलीत सहभागी झाले होते.

महाराष्ट्र कर्नाटक हद्दीवरील कोगनोळी टोल नाक्यावर महाराष्ट्र आणि कर्नाटक पोलिसांचा कडक बंदोबस्त ठेवण्यात आला असून प्रत्येक वाहनांची तपासणी केली जात आहे. शिवसेनेची भगवी रॅली कोगनोळी नाक्यावर अडवण्यात आली. यावेळी शिवसैनिकांनी ‘जय भवानी, जय शिवाजी’ चा जयघोष करत मराठी भाषिकांवरील होत असलेल्या अन्यायाकडे दुर्लक्ष करणाऱ्या केंद्र आणि राज्य सरकारचा निषेध केला. कर्नाटक सरकारच्या हुकुमशाही वृत्तीचा धिक्कार करण्यात आला. यावेळी बोलताना शिवसेनेचे संजय पवार म्हणाले, बेळगावसह बिदर, भालकी, कारवार हा महाराष्ट्राचा भाग आहे. तिथे मराठी माणसं राहतात. मराठी संस्कृती, भाषा तिथे जपली जाते. पण कर्नाटक सरकार हुकुमशाहीचा वरवंटा मराठी जनतेवर फिरवत आहे. लोकशाही मार्गाने मराठी जनतेच्या मेळाव्याला कर्नाटक सरकारने परवानगी नाकारली असली तरी आम्ही मेळावा यशस्वी करु असा निर्धार केला. त्यानंतर शिवसैनिकांनी कोगनोळी नाक्यावरुन कर्नाटक हद्दीत घुसण्याचा प्रयत्न केल्यावर पोलिस आणि शिवसैनिकांत जोरदार धक्काबुक्की झाली. पोलिसांनी शिवसैनिकांची धरपकड करत ताब्यात घेतले. (Maharashtra Ekikaran Yuva Samiti)

दरम्यान बेळगाव शहरात कर्नाटक पोलिसांचा चौकाचौकात कडक बंदोबस्त ठेवण्यात आला. महाराष्ट्र एकीकरण समितीच्या नेते आणि पदाधिकाऱ्यांवर पाळत ठेवण्यात आली आहे. एकीकरण समितीचे नेते मालोजी अष्टेकर सकाळी मॉनिंग वॉकला गेले असता साध्या वेषातील पोलिस त्यांचा पाठलाग करुन पाळत ठेवत आहेत. अष्टेकर यांच्यासह बेळगावातील मराठी नेत्यावर पाळत ठेवली जात आहे. अनेकांना नोटिसा पाठवल्या असून पदाधिकारी आणि कार्यकर्त्यांना ताब्यात घेतले जात आहे.

हेही वाचा :

• नवीन वर्षात २४ सार्वजनिक सुट्ट्या, सात सुट्ट्या बुडाल्या
• पुष्पा २, वर्ल्डवाईड ५८९.६० कोटीचा व्यवसाय

बेळगाव : प्रतिनिधी : बेळगावात सोमवारी (दि.९) होत असलेल्या महाराष्ट्र एकीकरण समितीच्या मेळाव्याच्या पार्श्वभूमीवर शहरात पाच ठिकाणी जमावबंदी आदेश लागू केला आहे. तथापि, महामेळावा घेणारच आणि महाराष्ट्रात गेल्याशिवाय आमचे आंदोलन थांबणार नाही, असा निर्धार समितीचे कार्याध्यक्ष माजी आमदार मनोहर किणेकर यांनी बोलून दाखवला.

बेळगाव शहर पोलिस आयुक्त याडा मार्टिन मार्ब्यांग यांनी महामेळावा घेण्याची शक्यता असलेल्या पाच ठिकाणी जमावबंदीचा आदेश लागू केला आहे. धर्मवीर संभाजी चौक येथे सोमवारी सकाळी अकरा वाजता समितीचा महामेळावा होणार आहे. या पार्श्वभूमीवर पोलीस खात्याने धास्ती घेऊन शहरातील धर्मवीर संभाजी चौक, छत्रपती संभाजी उद्यान, छत्रपती शिवाजी महाराज उद्यान, लेले ग्राउंड, व्हॅक्सीन डेपो अशा पाच ठिकाणी पोलीस आयुक्तांनी जमावबंदीचा आदेश लागू केला आहे. या सर्व ठिकाणी पोलीस बंदोबस्त ठेवण्यात आला आहे.

दरम्यान, माजी आमदार मनोहर किणेकर, समिती नेते आर. एम.चौगुले, शुभम शेळके आणि कार्यकर्त्यांनी व्हॅक्सीन डेपो येथेही भेट देऊन पाहणी केली.

महाराष्ट्रात जाण्यासाठी आम्ही आंदोलन करत आहोत. महाराष्ट्रात गेल्यावरच हे आंदोलन बंद होईल. यापूर्वीही अनेकदा पोलीस खात्याने दबाव तंत्र वापरून आंदोलनाला आडकाठी आणण्याचा प्रयत्न केला. पण त्याला मराठी माणसाने दाद दिली नाही. कोणत्याही परिस्थितीत सोमवारी आम्ही महामेळावा घेणारच असा निश्चय समिती नेते आर. एम. चौगुले यांनी व्यक्त केला.

हेही वाचा :

• विधानसभा अध्यक्ष निवडीची औपचारिकता बाकी
• नवीन वर्षात २४ सार्वजनिक सुट्ट्या, सात सुट्ट्या बुडाल्या
• पुष्पा २, वर्ल्डवाईड ५८९.६० कोटीचा व्यवसाय